الأحد، 23 مايو 2010

مشربتش من نيلها ؟!


ع الهامش :بابا
وماما ربنا يخليكوا ليا ، انتوا أغلى ناس في حياتي
بحبكم جدا

------------------------------------------------------
امبارح كان عندنا أخر محاضرة في الأدب الأمريكي ، المحاضرة جزء منها كان بيتكلم عن مسرحية اسمها thirst العطش لأونيل ، المسرحية رائعة وبتنتمي للمدرسة التعبيرية زي السيريالية في الرسم يعني الكلام المكتوب مقصود بيه حاجات تانيه
المسرحية بإختصار بتحكي عن حياة 3 ناجين من سفينة Titanic على قارب نجاة – رجل وراقصة ورجل أسود -
وحواليهم أسماك القرش ، ومأكلوش من شهور وعطشانين جدا والجو حر جدا ومفيش أي حاجة تحميهم من الحرارة وكمان ال3 لابسين لبس سهرة أسود فبيمتص الشمس أكتر
وفات يوم والتاني وهما بيعانوا من شدة العطش أكتر وم
ن الجو ومع ان حواليهم مية كتير لكن مالحة ميقدروش يشربوا منها وكل يوم بيفوت بيبدأوا يضعفوا ويتخانقوا وفي الأخر بيموتوا من شدة العطش
- مش عارفة هيمثلوا المسرحية ازاي عالمسرح وهيجيبوا البحر وأسماك القرش منين بس مش موضوعنا المؤلف عايز كده- وانا في المحاضرة حسيت بالعطش جدااااااا جدااااااااا جدااااااا

طبعا كلنا أو معظمنا عارفين ان دول منبع النيل عملوا اتفاقية انهم يعملوا اللي عايزينه في مية النيل يبنوا سدود ، يعملوا مشروعات عليه ياخدوه كله ويصبوه في ازايز ويبيعوه او يمنعوه عن دول المجرى والمصب ملناش فيه
النيل نيلهم لواحدهم لأنهم المنبع !!!


يعني
ممكن في يوم نعطش ومنلاقيش ولا نقطة مية !
وبعدين احنا مستحملين دول المنبع بكل التلوث اللي بيعملوه في النيل وساكتين يجو هما ويمنعوه عننا
طيب تعالوا نفكر شوية لو فعلا النيل لا قدر الله نشف

- المصانع هتقفل لأنهم مش هيلاقوا مكان يرموا فيه مخلفاتهم :)

- كورنيش النيل هيبقى اسمه كورنيش الطين

- مش هيبقى الحبيبة اتنين اتنين عالنيل


- هتختفي مصطلحات منيل بنيلة وجتك ستين نيلة لأن أصلا مفيش نيل


- مصر مش هتبقى هبة ولا حتى مروة النيل

- مش هنعرف نغني مشربتش من نيلها :(

- مش هنقول اللي يشرب من نيلها لااااااااازم يعيى
قصدي لازم يرجعلها

- هتكتر كلمة نشفت ريقي وهتكتر كلمة اشرب من البحر


يعني احنا مستحملين النيل بكل الكلور اللي فيه على ما بيوصل لنا للبيت ، بكل تلوثه ، الخ
وفي الأخر كمان مش هيبقى موجود

نتكلم جد شوية لو حصل فعلا جفاف للنيل ده معناه هلاك لأننا في مصر برغم ان عندنا بحر احمر وبحر أبيض
لكن مش هنعمل مصانع تحلية مياه ، هيفكروا 100 سنة الاول نكون بقينا في خبر كان
ولو مفيش مية مش هيبقى في زراعة ولو مفيش زراعة الثروة الحيوانية هتموت والصناعات المرتبطة بيها هتتلاشى زي صناعات الألبان بأنواعها والعصاير والخضروات والفواكه واللحوم يعني هيبقى عطش وجوع كمان ! ده غير الأمراض اللي ممكن تحصل نتيجة لإختفاء المياه في ظروف غامضة

يارب ميوصلش بينا الحال للعطش اللي كان في قصة أونيل مش هيبقى عطش نفسي ان الناس اتغيرت وبقو عاملين زي المية المالحة اللي ملهاش لازمة وكمان عطش حقيقي

ولو مشربتش من نيلها ألحق أشرب منه بقى علشان محدش عارف بكرة في ايه :(

هناك 11 تعليقًا:

حنين الذكريات يقول...

عجبنى جدا موضوعك
بتتكلمى عن اكبر مشكله هتقابل مصر بخفة دم
ياريت منعملش زاى هنيدى فى فول الصين العظيم وننتظر لما الكارثه تحصل لما كان معاه القنبله والبنت الصينيه اتصرفت وخرجت من العربيه وهو فضل يقول اه يانى ياما يانى ياما
وحتى لما حاولت مساعدته خد معاه القنبله
الحل اننا نحاول حل الازمة ونشوف البدائل
نتصرف على اسوء الافترضات
الحمد لله احنا بلد اتبهدلت من الجزائر ومعرفناش نثبت واتفرضت علينا العقوبات
هى دى مصر ياليدى

أع ـقل مـ ج ـنـونــة يقول...

انتي عارفة

بجد فيكي خفة دم المصريين مش معقولة بجد

برغم القلق اللى عندنا كلنا زي ماعندك كدا بالظبط بس خفة دمك طغت ع الموضوع

ربنا يستر والله بجد

هتبقي مذبحة جماعية :(

Tamer Moghazy يقول...

عارفة..
من وقت للتاني باجي هنا واقرا..
لاني مش ديما موجود..
بس ربطك بطريقة ذكية لفكرة المسرحية الرمزية بالواقع اللي مش (رمزي) عجبني قوي..
الفكرة اننا بنحتاج الكارثة تحصل في الاول وبعدين ندور على حلول..!!!

الزهرة البرية (Joudy) يقول...

تصدقى بجد دى حاجة ترعب حقيقى كل لما أفكرإن ده هيحصل مش عارفة هيبقى حالنا عامل ازاى ياترى هنبقى زى دول أهلها بيتجمعوا على مصدر واحد للميه خزان تحت الأرض وطالع منه ماسورة والقريب والبعيد يروح يملا منها ويتحدد بإن البلد دى تشرب النهاردة والبلد دى بكره يااااااااااه بجد إحنا كنا فى نعمة ربنا يديمها علينا واللى خيفين منه مش يحصل لأن ببساطة هتحصل مجازر مش بس حرب ولو حصل اللى بيقولوا عليه ويبقى كده حققنا كلمة قالها السادات بإن حربنا الجاية هتكون على المية ربنا يستر بجد

دمتى بكل الخير والسعادة

قلم رصاص يقول...

اولا ربنا يخلي بابا وماما ولايحرمكوش من بعض ..اللهم امين .

ثانيا احييكِ على البوست الرائع حقيقي

بخصوص مسرحية الأدب الأمريكي thirst طالما كان فيه لا مؤاخذه رقاصه في الموضوع .. فكويس انه كان حواليها سمك القرش.. الجزاء من جنس العمل .. هههههه

______

اما عن مياه النيل فالموضوع حقيقي خطير جدا ولكن احنا السبب صدقيني
احنا عندنا موارد مياه متعدده اهمها النيل والمياه الجوفيه بالأعماق .. حصيلة حصة مصر من النيل 55 مليار متر مكعب من مجموع 88 تقريبا كل مايأتي من النيل لكل دوله العشره
فاحنا بناخد نصيب الأسد ودا مش ظلم ولا حاجة بقدر ماهو متناسب وحجم ووضع وثقل مصر السياسي والاقتصادي بالنسبة لباقي المجموعه.

لكن للأسف الموضوع اصبح الان ليه ابعاد سياسيه خطيره جدا على مستقبل مصر لأن اسرائيل دخلت على طول الخط وبتلعب مع دول منبع النيل على حساب مصر..واحنا بالطبع نايمين في العسل .

الله يرحمك ياريس عبدالناصر كان تفكيره استراتيجي وكان عامل تواجد رهيب لمصر في عمق افريقيا ومدخل البحر الاحمر عشان كان شايف ان ده أمن مصر القومي الحقيقي وكان فاهم اوي ان اسرائيل بتخطط لضرب مصالحنا هناك..وقد كان وحصل ماكان يخشاه الرجل..لدرجة ان اسرائيل من اوائل الدول اللي اعترفت بدولة اريتريا الانفصاليه في بداية التسعينات وعملت معاها علاقات استراتيجيه خصوصا في عهد أسياسي أفورقي .. طب هقولك:

لدرجة انها أجرت بعض الجزء الاريتريه لعشرات السنوات لهدفين:
الاول- ان تكون متوجده على مدخل البحر الاحمر كي تكون بمثابة عين مراقبه لحركة الملاحه المصرية وكي تضرب نظرية أن البحر الاحمر بحيره عربيه خالصه.
الثاني- كانت بتربي ثروه حيوانيه على ارض هذه الجزيره وترسلها للاقتصاد الاسرائيلي .

موضوعات كتيره اوي خلف مشكلة مياه النيل واسرائيل شغاله تمام واحنا نايمين

انا كنت كتبت بوست قريب عن الموضوع اسمه اشربي يامصر ، هنا
http://2lamrosas.blogspot.com/2010/05/blog-post.html

انا أسف على الاطاله وعارف انك ملكيش في السياسه زي ماقلتي هنا قبل كدا ، اعمل ايه .. الكيبورد السبب
^_^

احييك بجد على بعض الجمل اللي عجبتني اوي في البوست

وربنا يوفقك في الامتحانات

تقبلي مروري وتحيتي

واثقة بربها يقول...

بوست جميل جدا و اسلوبك ما شاء الله رائع بس هو يعنى المشكلة فى النيل ان مش هيبقى فى كورنيش للحبيبة هههه :) تصدقى برده مشكلة هيروحوا فين ....عموما موضوع النيل ده هيبقى مشكلة لو متحلش فعلا و محدش عارف هنروح على فين و اقتصادنا اكيد هيأثر بدرجة كبيرة لاننا فى نعمة مش حاسين بيها ..على راى واحد اعرفه خايفين من الشرق و الغرب اتى الخوف من الجنوب و ربنا يسلم يارب

مهموهة أحمد يقول...

فعلا و الله معاكي حق .. ربنا يستر
لان بجد لو ده حصل ؟؟
ساعتها هنعرف يعني ايه النيل و يعني ايه معنى النيل اللي احنا و لا سائلين فيه ده ؟؟

ربنا يرحمنا و يحفظنا يا رب من كل شر

خالص حبي و تقديري

غير معرف يقول...

انتى عارفه مش متخيله مصر من غير نيل
حتى مع كل بلاويه
ربنا يعدى الفتره دى على خير
تحياتى

Ana keda يقول...

ههههههههههههههه
مش هيبقى فى هبة النيل ولا مروة النيل
ماشى ماشى
هههههههههه
حلو الموضوع اوى ولذيذ الامتحانات عاملة جو شكلها كده ربنا يوفقك يا حبى
بس ربنا يستر يا ليدى والله
وحشانى والله كتييييييير

أسمعنى شكراًً يقول...

الموضوع تحفة
ومهم بجد وأكيد قبلى كتير قالو
أنك كتبتى فى موضوع زى دة بخفة دم
باحتة وعلى فكرة دى من صفات الشعب المصرى كلة

وتحياتى شكرا

mrmr يقول...

يا خبر منيل
اقصد يا خبر اسود
لالا اقصد ياخبر احمر
يووووووه يا خبر ابيض
الواحد مش متصور الحياه بدون ماء
ده الله خلق من الماءكل شئ حى
يبقى ما فيش حياه وكمان مجاعه
ومافيش هبه وما فيش مروه يا سلام
استر يارب وحوووووش عنا
بس بجد موضوع جميل