الخميس، 20 مايو 2010

صباح مش عادي


نزلت من البيت لقيت الكتكوتة مش مضبوطة ومش عايزة تتحرك من مكانها ، قلت مش مشكلة صباح الفل انا أصلا عايزة أمشي ، مشيت شوية وبعدين أخدت تاكسي وصلت للكورس لقيته اتلغى :) قلت برضه بتحصل مش مشكلة وايه يعني ، رحت اشتري كارت موبايل ملقيتش :) بس الحقيقة كان في راجل طيب جدا في المحل فكرني بجدي الله يرحمه سألته عن تحويل الخط لفاتورة وكأنه ما صدق ان حد يدخل المحل علشان يدردش معاه قاللي اوعي تحولي الخط لفاتورة انتي كده بتتحكمي في الكروت والفاتورة عليها ضربية مبيعات وبلاوي
انتي بتدرسي هنا قولتله أيوة انا في رابعة اداب انجليزي قاللي انجليزي حلو اوي بنتي اتخرجت معاها حقوق انجليش ومبروزة الشهادة وحطاها في المطبخ :) قولتله شكلي انا كمان هعمل كده
قاللي معاها دلوقتي عمر وحبيبة قلتلو ربنا يخليهم لها يارب ويبارك فيهم ، قاللي وانتي مش مخطوبة قولتله لأ لسه شوية قاللي خلصي دراستك براحتك وربنا يوفقك ورزقك مكتوبلك من قبل ما تتولدي ، انتي حبوبة وان شاء الله ربنا هيكرمك بعريس كويس قولتله شكرا ومشيت ،
بس بطريقة ما اسعدني كلامه وافتكرت الجملة المنسية اللي كتباها في أول كشكول المحاضرات " علمت ان رزقي لن يأخذه غيري ف اطمئن قلبي " مع احساسي ان جدي اللي بيكلمني الله يرحمه

شوفت سوبر ماركت قدامي قلت هشتري منه لبن بالشوكولاته وبرغم ان المحل فيه كل حاجة الا اني ملقيتش اللبن بالشوكولاته :) فجبت شيتوس وعصير والحمد لله روحت البيت بسلام ، فتحت الشيتوس واتخضيت لما لقيت السعرات الحرارية مكتوبة لكل عشرة جرام مش للشيتوس كله اللي عالأقل 100 جرام يا خبر عالخدعه أول مرة اخد بالي منها
السعرات الحرارية للعشرة جرام 234 ونص كالوري اضربوهم في 10 :) يعني مجرد كيس شيتوس بيزود 2 كيلو

رجعت البيت بفتح الكمبيوتر طلع عيني لغاية لما فتح :) بجد يوم غريب ، كل اللي بتمناه ان اليوم يعدي على خير وينصرف ويبطل يعملي مفاجأت مش لطيفة اكتر من كده

المواد الدراسية اللي بدرسها الترم ده

أدب امريكي American literature

أدب مقارن
comparative
literature
تحليل نصوص Text analysis

لغة عربية 400 صفحة وكلهم مقررين بقصائدهم وقصصهم ومنـــــــه له

مقال writing essay

ترجمة Translation

وأخيرا بما اني متميزة عن باقي الدفعة فرنساوي

قلقانة من الترم ده أوي ، مواده ..... مش قادرة أوصفها وهنمتحن في عز الحر
عالعموم كله خير ويارب الشهر ده واللي جاي يفوتوا على خير
وربنا يوفقنا جميعا سواء اللي بيمتحنوا او اللي يا بختهم خلصوا

--------------------------------------------------

ع الهامش : مقصرة في الرد على التعليقات بس مش ناسياها هرد عليهم ان شاء الله
ساسو سألتيني عن جيم رديت على سؤالك في تعليقات البوست

هناك 14 تعليقًا:

ستيتة يقول...

رد ايه اللي ترديه؟
مش مقصرة ولا حاجة
كلنا بنحبك وبندعي لك
انا رحت كتبت لمانوسة اللي ابتدى رعب الثانوية يتعبها الجملة
علمت ان رزقي لن يأخذه غيري فاطمئن قلبي
رحم الله جدي وجدك وكل جد طيب علمنا كلمة بقيت وحفرت داخل النفس
بصي انا جدي كان بيقول ايه الله يرحمه

"تحصنت بذي العزة والجبروت واعتصمت برب الملكوت وتوكلت على الحي الذي لا يموت .. اصرف عنا الأذى انك على كل شيء قدير"
كان يرقيني بها

أع ـقل مـ ج ـنـونــة يقول...

نسيت اقول .. يارب اكون اول كووووووووومنت ^_^

ليا واحد شيتووووووس :D

أع ـقل مـ ج ـنـونــة يقول...

شوفي مع ان اليوم مش متظبط من اوله
لكن الراجل الطيوب اللى قابلتيه دا حاجة جميلة اوي

متاكليش شيتوس دا :d

انا مبحبش ابص ف السعرات عشان متضايقش ونفسي تتسد
بس لما بتخن بصوت وبنكد ع البيت كله واصحابي واللى يعرفوني واللى ميعرفونيش :D


ربنا معاكي يارب وتتخرجي يا اجمل تقدير ف الدنيا وتعزمينا ع حفلة التخرج

تحياتي ^_^

غير معرف يقول...

تصدقى والله اتخنقت لك اوى
اصلا الايام تخنق لوحدها مابالك بقا دراسه
ومذاكره وامتحانات فى الحر
بس انتى عارفه النجاح بينسى ده كله
طعم النجاح هاينسيكى كل الحر والخنقه
ولا يهمك ربنا معاكى وانشالله تنجحى وتتخرجى
وتبقى حد ناجح اااااااوى
وتعلقى شهادتك فى ميدان زى اللوحات العالميه وتبقى حد ليه وزنه ومكانته العلميه يارب
ربنا يطمنك ويطمنا عليكى
تحياتى

كيكى عوووووو يقول...

وووووووووووووووووووووووووش بيلطم
بعد بكره ياااااااااااااااااختى
ربنا معاكى ومعانا
يلا ختمتها انا كدة معاكى
ربنا يهدينى واذاكر بقى
واروح اتقدم

دودي فلسطين يقول...

ربنا يوفقك اختي وتنجحي
انا بدعيلك نفس عمي الحج

بس شو هادا الشيتوس
مو هو زي الشيبس ؟؟؟؟

يا ريت تقوليلي نفسي يزيد وزني

لــــ زهــــــراء ــــولا يقول...

السلام عليكم ورحمة الله وبركاته

ازيك ياقمر ربنا يوفقك يارب ولعلك كنتِ محتاجة تتكلمي مع حد ترتحيله زي جدك فربنا بعتلك حد يشبهله اقري لجد الفاتحة بقى

لـــولا

MaNoO يقول...

انا هبص لاحلى حاجه فى يومك وهو الراجل الطيب اللى قابلتيه دا اكيد كلامه فيه مزايا كتير تضيع كل اللى حصل فى اليوم لان الناس دى لسه عارفه يعنى ايه خير
وبراحتك فى الردود يابنتى المدونه مدونتك واللى يزعل ابقى قوليلى بس

mrmr يقول...

اجمل حاجه روح الطفله اللى مش عايزه تكبر
نصيحه اوعى تكبرى ابدا حتى لو وصل سنك 90 سنه الروح الجميله لا يمكن تكبر ولا يبان عليها الكبر
ربنا يوفقك ويعدى الشهر ده ع خير انت واللى زيك
باى ياقمر

واثقة بربها يقول...

" علمت ان رزقي لن يأخذه غيري ف اطمئن قلبي " بحب الجملة دى جدا
هو يمكن يوم مش عادى بس المهم فى الاخر افتكرتى جدك و اكلتى شيتوس و عصير (:

سبحان الله ربنا بيبعت للواحد حاجات فى يومه تفكره بناس يحبهم فبيكون سعيد جدااا انه شافهم

Lady E يقول...

ستيتة حسب الله الحمش : ياه يا خالتو كنت مفتقدة تعليقاتك

حبيبتي مانوسة ربنا معاها يارب وان شاء الله هتدخل الكلية اللي بتحبها ، خليكي معاها وطمنيها يا خالتو الثانوية العامية دي بتعمل للواحد فسفس هستيري
خليها متخفش مفيش حد بيكتب شعر انجليش حلو يخاف من الثانوية العامية :)

الله يرحمهم ويرحم موتانا وموتى المسلمين

دعاء جميل اوي ورقية رائعة

دمتي بخير وسعادة

Lady E يقول...

أع ـقل مـ ج ـنـونــة : فعلا في ناس بتقابليهم في حياتك بيغيروا المود وبيخلوا اليوم جميل مهما كان فيه حاجات مش لطيفة

:)

يارب من بؤك لباب السما :)

نورتيني وخليها اول كومنت مكرر :)

Lady E يقول...

يتبــــــــــــــــــــع

Selfmeaning يقول...

فكرتينى بأيام الجاعة الجميلة

كانت ايام مهلكه بس ممتعة جدا

مع المواد ديه كمان كنت بحبها جدا

ربنا معاكى و يوفقك