الثلاثاء، 4 مايو 2010

مفيش فايدة !!! مش هقدر اغمض عينيا


في فيلم مفيش فايدة لمصطفى قمر وبسمة وادوارد وغيرهم ، مصطفى قمر في الفيلم تعب شوية وكان بيشوف الناس زي ما هما من جوه يعني بيشوف جوهرهم ، المهم لما تعب راح لدكتور اعصاب واللي بيمثل دوره سمير غانم
فشاف الدكتور جزار - وهم كثر -

المهم من أسبوع كنت مع ماما عند دكتور انف واذن وحنجرة فغلطت وسألت الضاكطور سؤال عن الأنف فكلكعلي الدنيا وقاللي انتي مستنية ايه علشان تكشفي مستنية لما العمارة تقع - ده على اساس اني عند مهندس معماري مش ضاكطور - وقاللي شوية اعراض هي فعلا موجودة عندي وقاللي لازم تكشفي دلوقتي وانا مرضتش اكشف وياريتني استمريت في القرار ده

المهم فات اسبوع وانا بفكر في كلام عم الحج الضاكطور وعندي احساس قوي ان كل اللي قاله فراسة -ذكاء- مش اكتر
وقلت مش هخسر حاجة لما اكشف وخصوصا انه ادى لماما ادوية والحمد لله بدأت تتحسن شوية ف اما اشوف في ايه
ورحت النهاردة وبعد شوية انتظار دخلت عند الضاكطور وفوجئت انه كلكع لي الدنيا وقاللي عندك التهاب في الجيوب الأنفية - علشان بحط في الجيوب حاجات تقيلة علشان كده التهبت - ولازمن ولابندق اعمل أشعة علشان احتمال يبقى في عملية - يا مرك يا مهجة -
اه وكمان الأشعة عند دكتور معين - علشانها مافيا طبعا والدكاترة بيحبوا ينفعوا بعض وليهم نسبة مع بعض -

المهم رحت انا وماما عند عيادة الأشعة وكان قلبي مقبوض اوي من المكان وفي كمية ناس كتير اوي - شعب مصر كلهم بيعملوا اشعة -
بعد برضه شوية انتظار دخلت علشان الأشعة وما شاء الله الأشعة طلعت زي الscary movie
والضاكطور اللي عملي الأشعة كان متغاظ من الفك المفترس بتاعي طبعا وضغط عليه وكان نفسي اديلة بالبوكس في مناخيره علشان جيوبه الانفية تلتهب هو كمان

كنت متأكده من قبل ما اعمل الأشعة ان الضاكطور هيقوللي لازم عملية لكن بعدما عملت الأشعة لقيته ما شاء الله ما شاء الله بيقوللي مش عملية واحدة دول اتنين - سيادته بيستهبل- ومفيش علاج الا بالعملية ولازم تتعمل في القاهرة أو الشرقية وأفضل ع الأقل أسبوعين في المستشفى وانا لسه على امتحاناتي اصلا شهر !

اللي خلاني حاسة اني ضعيفة اوي لما بيوصفلي العملية هتكون ازاي - عملية في عينه -
هيكون هو ودكتور التخدير ودكتور مساعد و3 دكاترة تانيين - ليه هي حفلة ولا ايه - كل دول في أوضة العمليات !
ده غير ان التخدير بيكون كامل ! اذا كان انا بكره التنويم بالايحاء في التنمية البشرية يبقى هسمح اني ابقى لوحدي في مكان معرفوش ومع ناس معرفهاش مع عملية في مناخيري اللي هو في وشي ! وانا مش حاسة بالدنيا

طبعا شرح لي حالة الجيوب الأنفية ع الأشعة فرديت عليه بتلقائية : هو كله بايظ كده مفيش حاجة سليمة :)
لأ وايه وهو بيشرح بيقولي دي صورة أشعة مريض سليم
قولتله : مريض سليم :)
قاللي : ايوة
قولتله : يعني مريض ولا سليم
قاللي : ايوة سليم يعني
انا اعمل عملية عند ضاكطور بيقوللي مريض سليم بيهزر طبعا


من المؤسف ان الطب يتحول لتجارة بس اشمعنى الطب يعني ما كله بقى تجارة حتى الدين بقوا بيتجاروا بيه والغلبان في بلدنا بيموت
وحسبي الله والله العظيم :)

وياريتني ما كشفت ، انا اللي غلطانه بجد لأنه خلى مودي منيل اكتر ما هو
وهو وليجيا عليا منه له منــــــــه لــــــــــه

هناك 34 تعليقًا:

sony2000 يقول...

بصي
ادعي عليه واكنسي عليه السيده ذينب
ههههههههههه
طب بذمتك هقولك ايييه بس
الله معك

هراء لا داعى له ..... يقول...

إحم .....

بس خلى بالك يعنى هو اه ممكن يبقى دكتور جزار ...بس دا ميمنعش برضه إنه ممكن يكون جزار و بيعرف يشخص صح

يستحسن تروحى تكشفى عند واحد تانى كمان علشان تطمنى

أسمعنى شكراًً يقول...

الأول هيه هيه

أسمعنى شكراًً يقول...

بنج كلى

هما هاينفزو عملية أنف
ولا عملية أغتيال فى العدو

وعموما عادى رياضة برضة وفيها بطولات بنج بونج

دة حتى أبو الليف غناها
وهو كمان ساعتها كان رابط أيدة

وأنتى أبقى فضى الجيوب وأنتى بتلعبى علشان مافيش فلوس تقع منها.!

تحياتى شكرا....

محمد فؤاد (صاحب عمود النور) يقول...

انا برضه عندى نفس القصة بتاعتك والدكتور قالى عمليه
بس انا بصراحة نفضتله انا ماشى عنب اللوز على الدوا
الف سلامة عليكى

قلم رصاص يقول...

أولا ألف سلامه عليكِ
وان شاء الله تعدي على خير

لاشك في ان مهنة الطب حاليا في مصر بتمر هي الأخرى بأزمه أخلاق في مجملها..ودا شيئ متعب نفسيا.. العيب ليس في المهنه ولا في ممتهنيها بقدر ماهو موجود في الحاله المترديه للأخلاق العامه في المجتمع اللي طالت جميع المهن ومعظم نواحي الحياه

أعتقد بشده ان الأمه الإسلاميه تمر بأعظم ابتلاء منذ قرون طويله

ومعاكي جدااااااا في قلقك من وجودك في غرفه مع مجموعة دكاتره وتخدير كلي علشان عمليه بسيطة زي كدا..

فعلا بجد والله الدنيا معادش فيها أمان زي الأول .. والحرص واجب بردو ^_^


ـــــ

بخصوص البوستين الأخيرين عندك ، اسمحي لي بتعليق صغير........

فيما يتعلق بإستيائك من الإحباط وعدم التشجيع على الاستمرار في تحقيق طموحاتك خصوصا العلميه زي الحصول على الماستر مثلا ، فبجد عاوز أقولك :

استمري في طريقك وحاولي بكل قوه تحقيق احلامك اللي اكيد انتي شايفه نفسك فيها.. لو مأخدتيش الماجستير اللي انتي بتحلمي بيه مش هترضي الناس بردو صدقيني حتى لو نويتي كدا بتخليك عن جزء من طموحك..... لأن الناس في جميع الأحوال غير راضيه عن أي حاجة وأي حد.. ودي طبيعه بشريه مش ممكن هتتغيرإلا إذا أراد ربنا.

أيوا المفروض الواحد ميخسرش رضا الناس عليه ودا شيئ جميل بردو حتى عشان الراحه النفسيه .. بس مش في كل حاجة تخص الإنسان .. فيه حاجات عادي اما نرضي الناس فيها بس بردو فيه حاجات مفروض مضرش نفسي بيها عشان ارضي الناس.. والله اعلم

إمبارح في برنامج العاشره مساء كانت الأستاذه منى الشاذلي مستضيفه العالم المصري المرموق كبير باحثي وكالة ناسا الفضائيه بأمريكا الدكتور فاروق الباز ، وقال كلمه مهمه :

رغم ان إيران دوله بوليسيه يحكمها العسكر إلا أن ماتشهده من نهضه علميه الآن تشارك فيها المرأة الإيرانيه بقوة ورغم تدين المرأة هناك إلا ان أكثر من نصف باحثي إيران في شتى التخصصات خصوصا العلميه الدقيقه من النساء.

فمابالك احنا في مصر _أفضل شويه طبعا _ فاستمري !

وبخصوص اغلاقك المدونه وابتعادك عن التدوين فدي حريه شخصيه تتكيفي معها حسب ظروفك .. يعني لو التدوين مش مسبب لك أي مشاكل او أضرار مع أي حد يهمك وتهميه زي البيت مثلا يعني .. يبقى ليه تقفلي المدونه طالما بتعبري عن نفسك من خلالها.

أتمنى لك التوفيق

واسف على الاطاله

تقبلي مروري وتحيتي

Mahmoud البطراوى يقول...

هههههههههههههههههه
اللى مفطسنى من الضحك انى مش فاهم انتى مخنوءه من الدكتور ليه
انا مش مختلف معاكى ان الطب تجاره .. بس كل اللى قلتيه دا يقول انك محتاجه عمليه عرفتى منين انك مش محتاجه مش عارف

بالمناسبه الطب فى كل حته تجاره .. والتجاره دى هى مصدر الدخل الوحيد للدكتور اللى بيصرف بيه على بيته واولاده .. بس فى ناس بتراعى ربنا فى تجارتها وناس لأ

غير معرف يقول...

ههههههههههههههههه ايه دا

السلام عليكم الاول :)

بوست جميل وفعلا دا اللي بيحصل في كتير بلاد عربية .. عندنا الوضع اقل شوية يعني بس برضو في من كلووو

:)

بوست جميل وفرحانة اني اول تعليق :)

ستيتة يقول...

كنتي رحتي مع سون سون كشفتي في المانيا
ده بابا برضه
او مع خديجة هي تجيب فريدة في بروطانيا وانتي تكشفي

بصي يا ليدي
ربنا ما يكتب علينا وعليكي "السوء" ولا "المرض" ولا "دكاترة مصر" الثلاثة مرادفات لكلمة واحدة

غير معرف يقول...

عند حق كله بيلعب على كله
مش الدكاتره بس
تحياتى
وسلامتك ودومتى بكل خير

Tarkieb يقول...

لازم تروحي لكذا واحد ويستحسن تقولي للدكتور الجديد اللي قاله الاول عشان يطلعه غلطان او ياكد المعلومة

мαησηα يقول...

هههههههههههههههه والله انتى مشكلة

انا بجيلك كتير وبتعجبنى مدونتك بس النهاردة قررت ارد عندك لانى لاحظت حاجة غريبة اوووى

اننا كلنا كمدونيين شبه بعض اوى

بس يوصل الشبة لدرجة انى ابقى كمان زيك ف موضوع الجيوب الانفية والعملية والافلام دى يبقى كده كتيييير بقه هههههههههه

سلامتك ياقمر واحب ابلغك انك لو ماعملتيش العملية زى اختك منونا ماهى مطنشة
هتشوفى ايام سودا زى ما اختك منونا شايفة هههههههههه
انا بصراحة مرعوبة من فكرة انهم هيفتحوا ويشتغلوا بقه وكل ده ف مراخيرى عااااااااااااااااا

طيب افرضى اخنفييييت اضيع انا بقه

انا بهدى النفوس بس ؟؟ هههههههههه
حكم انا ما اقولكيش سبرتاية ههههه

بصى بجد حاليا ولحد ماتعملى العملية حاولى على قد ماتقدرى انك ماتتعرضيش لاى ملوثات للبيئة وطبعا ده مستحيل بردو بس ماعلينا حاولى لان بجد المها صعب صعب صعب

وسلامتك يا جميل الف سلامة

كيكى عوووووو يقول...

الف سلامه يانونتى
وحشتينى
زغروف الصغير

Lyssandra يقول...

ألف سلامة عليكي يا ليدي
وبلاش تضايقي نفسك كده

ان شاء الله تكوني بخير دايماً

سلام

Lady E يقول...

sony2000 : تفتكري الموضوع ده هيجيب نتيجة :)

قولي حاجة اي حاجة قولي وميهميكش حاجة يا سوني

ومعاكي يا قمرايا

Lady E يقول...

هراء لا داعى له ..... : وادي اول دكتور يرد عالموضوع

هو تشخيصه صح بس قدامه كذا اختيار قبل العملية لكن هو اختار أصعب الحلول وقفلها في وشي وقاللي مفيش علاج الا بالعملية

عملت كده والدكتور التاني كلامه زي الاولاني بس كتبلي أدوية الأول وقاللي أخر حاجة ممكن نلجأ لها هي العملية

Lady E يقول...

أسمعنى شكراَ : مش عارفة والله الناس دي مالهم :)

ياريته كان البنج بونج اللي بيتكلم عنه ايمن بهجت قمر وابو الليف

Lady E يقول...

محمد فؤاد (صاحب عمود النور : شفاك الله وعافاك
انا كمان نفضت للعملية ورحت لدكتور تاني كتبلي أدوية وفعلا كويسة جدا

الله يسلمك من كل شر

KEBLAWYAT يقول...

احم


هو انا مش شايف فين التجاره فى الموضوع ده يعنى

" - علشانها مافيا طبعا والدكاترة بيحبوا ينفعوا بعض وليهم نسبة مع بعض -"

أغلب الدكاتره بتطلب الآشعه والتحاليل من مكان معين ..

و الغالبيه بتبقى عشان هو بيثق فى المكان ده ..

يمكن فى حالتك انتى بالذات الموضوع ده واضح اكتر لان العمليه بتاعتك الدكتور هيبقى حاطط قدامه الآشعه المقطعيه اللى عملتيها و بيشتغل على أساسها ، فلو عاملاها فى مركز مش محترم و مش مطلع نتايج كويسه ده هيضر شغله هو ،،

مش معنى كده ان مفيش ناس وحشه و بتعمل زى ما بتقولى .. فى كل مكان فيه الحلو والوحش طبعا

ممكن تكشفى عند حد تانى .. بس فى الغالب هيطلب نفس الآشعه ( مكلفه و العرضه الكتير للآشعه مش شئ جميل )

صحيح .. العمليه دى بتتعمل بنج كلى آه

بس انا الحقيقه مش شايف ف التوبيك بتاعك حاجه تقول ان الراجل ده وحش ولا تاجر ولا حاجه من دى خالص

Lady E يقول...

قلم رصاص : الله يسلمك من كل شر

اللهم أمين

للأسف دلوقتي قلة قليلة اللي بيراعوا ضميرهم في شغلهم وحياتهم
الصورة مش سودا أوي لكن سودا

اللي يغيظ ان ال3 دكاترة اللي في العملية مع باقي الدكاترة طلاب يعني بيتعلموا في المريض وانا معنديش استعداد أخوض التجربة دي وطبعا مش مسموح ان حد من الأهل يفضل مع المريض في اوضة العمليات

اسعدني جدا كلامك عن الماستر وان في حد بيحترم عقلية المرأة للدرجة دي

وأكيد مفيش أي مشاكل من وجود المدونة ولا في البيت ولا من أي حد :)

شكرا على كلامك ومفيش اطالة
وبجد انا بحترم كلامك جدا
برغم ان اول تعليق ليا في مدونتك كان فيه اختلاف في وجهات النظر

Lady E يقول...

بطوط حبوب : لازم تضحك يا بطوط لأنك انت كمان دكتور

اللي خانقني من الدكتور ان العلاج عنده يعني عملية ، مفيش أي حل تاني وده مش صحيح لأني روحت لدكتور تاني وكتبلي أدوية والحمد لله حاسة بتحسن وخصوصا اني مقدرش اعمل عمليات دلوقتي وأصلا مش حابة فكرة العملية

الطب تجارة؟ تصدق زعلت ان اللي بيقول كده دكتور
يعني اعتبر الدكتور ميكانيكي بشري ولا ايه؟

اي واحد بيشتغل شغله المصدر الوحيد لرزقه مش الدكاترة بس

وبعدين انا مؤمنة ان الطب رسالة انسانية قبل ما تكون شغل
انك تحيي نفس كانك أحييت الناس جميعا
وانبل حاجة في الدنيا انك تخفف الم حد بيتألم

Lady E يقول...

يـ ألوناتك ! " : وعليكم السلام ورحمة الله وبركاته

في كل مكان بتلاقي ناس كده

نورتيني ومش مشكلة هعتبرك اول تعليق :)

Lady E يقول...

ستيتة حسب الله الحمش : هههههههه انا قلت لماما كده برضه :)

مش ريسنا قدوتنا والأب الكبير يبقى نتعالج في المانيا احنا كمان :)

اللهم أمين

Lady E يقول...

الشـوكة الــنـاعـمـة : مش اوي كده يا بنوتة ، روقي شوية والبسي نضارة بمبي علشان تشوفي الدنيا حلوة شوية

الله يسلمك من كل شر

Lady E يقول...

Tarkieb : شكرا على النصيحة

انا فعلا رحت لدكتور كمان وحسيت بتحسن لكن لو الموضوع رجع تاني هروح لدكتور تالت

وربنا يبعد عننا أي سوء جميعا

Lady E يقول...

мαησηα : ههههههه طب عندك علاج للمشكلة دي؟ :)

وهل يخفى القمر يا منونا عارفة انك في المتابعين وبشوف لينك مدونتك على طول

عم الحج أحمد شوقي بيقول - هو بيت قوي شوية بس هقوله- ان المصائب يجمعن المصابينا :) جميل اننا نكون شبه بعض بس مش في الجيوب الانفية :)
ولا الموضوع ماشي في الجو ولا ايه :)

ههههههههه بعد الشر عليكي انا فعلا مطنشة موضوع العملية وفعلا بشوف أيام سودا عااااا بس الحمد لله الدوا كويس نوعا ما

ههههههههه تصدقي حاجة مرعبة ، ان شا الله اللي يكرهونا هما اللي يخنفوا

الملوثات حدثي ولا حرج وفعلا ألمها وحش وحش وحـــــــش

الله يسلمك من كل شر يا حبيبتي
خدي بالك من نفسوياتك وسعيدة بتعليقك

Lady E يقول...

يتبـــــــــــــع

كيكى عوووووو يقول...

فينك؟؟

Lady E يقول...

كيكى عوووووو : الله يسلمك من كل شر يا حبي :)

ويبعد عنك زغروف وأمثالة :)

Lady E يقول...

Lyssandra : الله يسلمك من كل شر يا ليسا

الحمد لله على كل حال ، بس هي حاجة تضايق فعلا

وانتي كمان يا قمرايا

Lady E يقول...

قبلاوى : أهلا بدكتور المستقبل

يا سلام يعني وهو ايش عرفه بمراكز الأشعة الا اذا كان عارف أصحابها
وبعدين لما الكتكوتة اللي في عيادة الأشعة تسألك انت جاي من عند دكتور مين؟ وعلى الأساس ده تقولك هتدفع كام في الأشعة يبقى ده أسمه ايه؟! بيتهيألي يبقى اسمه نصب وتجارة

وفي الحالة بتاعتي لو عملت العملية وده احتمال بعيد شوية بالنسبة لي الأشعة مش مهمة أصلا لأن العملية بالمنظار والاشعة اصلا مكنش ليها لازمة ولما رحت لتاني دكتور شخص نفس التشخيص من غير أشعة

عارفة معلومة التعرض للأشعة دي كان عندي فصل كامل في الفيزيا في ثانوية عامية بيتكلم عنها ومكنتش عايزة أتعرض لها أصلا لا قليل ولا كتير :( بس مكتوب

انا مش بحكم عليه شخصيا انه وحش انا بقول اللي وحش انه قال مفيش علاج الا بالعملية ومفيش حاجة تقلل من الألم ولا تعالج شوية عالاقل لغاية ما الامتحانات تخلص ، يعني قفل كل الأبواب في وشي
تفتكر دي حاجة كويسة؟!
في حين ان دكتور تاني كتب لي ادوية والحمد لله بدات احس بتحسن شوية
وكمان العملية في مستشفيات معينة في القاهرة او الزقازيق

يبقى تاجر ولا مش تاجر

Lady E يقول...

كيكى عوووووو : انا هنا يا كيكتي لا تقلقي اطلاقا وكنت عندك في المدونة من شوية

عجبني اخر بوست عندك وهروح اعلق فيه :)

KEBLAWYAT يقول...

اوكى

انا بتكلم عامة

مش ع الدطتور ده بالذات أو غيره

بس على فكره العمليه آه بالمنظار بس بيبقى شغال على هدى الآشعه

وعشان تبقى متخيله المنظر بالظبط .. بيبقى حاطط الآشعه قدامه وماشى بالمنظار على أساسها


عامة .. فى موضوع الجيوب الأنفية .. اذا قالوا ان المفروض عملية تبقى ضرورية ، لأ، كان فيه واحد كمان قايل ف التعليقات ان قالوله المفروض عمليه وهو طنش

والا الالتهاب هيتنقل لجيوب أنفية تانيه ( فيه 4 مجموعات من الجيوب الأنفية ) ومشاكل تانيه كتير وممكن يمتد لبره الجيوب الأنفية كمان ..

بس عامة اذا كانت الالتهاب بسيط ممكن بيجربوا أدوية الأول .. ممكن تسأليه ف الموضوع ده

انتى من دمياط تقريبا .. عندكوا طب هناك تبع الأزهر ممكن تاخدى نفسك لمستشفى الجامعه و تكشفى و خدى معاكى الآشعه بتاعتك ..

وشوفى هيقولولك ايه

وألف سلامه عليكى

Lady E يقول...

قبلاوى : وأنا بتكلم عامة وكمان عن الدكتور ده

اكيد انت عارف اكتر مني بإعتبارك بتدرس طب بس هو قاللي ان في المنظار بيبقى شايف الجيوب الأنفية ع المونيتور او على Skreen قدامه

هما 2 قالوا في التعليقات انهم مطنشين وانا كمان مطنشة نبقى 3 :)

شكرا ع المعلومة بتاعت 4 مجموعات م الجيوب الأنفية

انا قفلت الموضوع ده لبعد الامتحانات وربنا يشفيني ويشفي كل اللي عندهم جيوب انفية او غيرها

الله يسلمك من كل شر

تسلم يا قبلاوي وشكرا على تعليقك وان شاء الله تبقى دكتور ممتاز