الثلاثاء، 23 فبراير 2010

عايزين تموتوهم تعالوا واحبطوهم



في اخر كورس h.r اخدته لقيت المستر قال كلام غريب اوي : "عارفين الجماعة اللي بيشحتوا مش بتلاقوهم تخان مع انهم ممكن ميكونوش بياكلوا او عندهم سوء تغذية بس في شكرة في البطن اللي هي الشكرة بتاعت العواطف وتقدير الذات (شكرة يعني مسار طاقة) فالشحاتين دول بيهانوا كتير أوي فالجسم بيضطر يبني كتل من الشحوم على مركز الطاقة ده علشان يعوضهم اي احساس بالإهانه "


الكلام ده فضل يودي ويجيب في دماغي لغاية لما اخر يوم في الكورس سألت فيه المستر


انا : يعني يا مستر اللي بيشحتوا دول مش ممكن يكون الأكل بتاعهم سعراته الحرارية عاليه وعلشان كده بيتخنوا يعني مثلا عندك الأمريكين أكبر نسبة سمنة في العالم علشان هما أكتر ناس بياكلوا الوجبات السريعة زي الهامبورجر وغيره ومعظم مطاعم الوجبات السريعة والحلويات زي الدونات وباسكن روبنز وغيرها امريكية فيبقى دول اشخاص مهانين ازاي


وجاوب وياريته ما جاوب لأني مضايقة من اجابته لغاية النهاردة


في 3 انواع من الاضهاد - انا مش فاكرة الا نوعين بس من الاضطهاد ولذالك مش هقولهم - والدراسات الأمريكية أثبتت ان معظم الأمريكين اتعرضوا لل3 انواع من الاضطهاد دي


انا : بس ده برضه مش معناه ان لو حد تخين يبقى اتعرض للإهانة كتير
المستر : اومال بياكلوا ليه؟
انا : جه في بالي ان ناس كتير بتاكل لما تكون متوترة او مضايقة يعني معنى كده ان اي حد تخين مريض نفسي !
مش اسلوب حياته غلط او مثلا بيعشق الشوكولاته وبيلاقي نفسه من غير ما يحس بقى over weight
معنى كده كمان اننا بنحكم ع الشخص البدين انه مكلكع ومش سوي نفسيا وبنحكم عليه بالموت لأن أي شخص بدين وخصوصا لو امرأه بيبقوا حساسين جدا ولو عرفوا معلومة زي دي هيبقوا عايزين يبقوا لواحدهم ومش عايزين حد يبصلهم بصة انهم مش سويين نفسيا
طبعا المستر قاللي انه مش مهم شكل الشخص بدين او رفيع المهم الطريقة اللي بيعيش بيها حياته صحية ولا لأ وكلام ايجابي كتير..... الخ
لكن انا مفضلش في بالي من الكلام كله الا كلمة اومال بياكلوا ليه ؟

هناك 53 تعليقًا:

The illusionist يقول...

ممكن اكون الاول

The illusionist يقول...

اه
انا الاول
انا سعيد انى الاول
ده شئ لطيف جدا

Lady E يقول...

The illusionist : حسستني انك الاول في الفصل :)

Lady E يقول...

The illusionist : الف الف مبروك بجد :)

بس خد بالك لو معلقتش عالبوست هتتعلق على باب المدونة

وقد بعجر من فعذر

The illusionist يقول...

انا لسه الاول

The illusionist يقول...

اه لسه الاول
شكرا ليكى
انا هقعد براحتى بقى
والبوست هيتقرى تلت مرات مش مره واحده
اوعى جاى

The illusionist يقول...

قرييييييييييييييييته

The illusionist يقول...

هحتلك النهارده
هو كده
ربنا بلاكى بواحد مجنون زى حالاتى
ربنا يعينك بجد

Lady E يقول...

The illusionist : تصدق فعلا لسه تعليقك الأول

فعلا شيء لا يصدقه عقل :)

The illusionist يقول...

هى اعتقد انها تشاكرا باين
اصلى متابع الحاجات الظريفه دى
بس افهم بقى عشان انا مندمج حبه
وخدت دوره ظوريفه
انتى محددتيش انهو مسار طاقه
وهل هى اى واحد فى السبعه باين على ما اتذكر
ولاواحد معين

The illusionist يقول...

بس انا لاحظت حاجه غريبه فى التعليقات بجد
















































انا الاول

The illusionist يقول...

واضح ان التعليقات هتتقفل حالا
اما الحق ابت اهداء
بهدى الردود دى
لماما وبابا واخويا واختى والفيلق السادس فى جيش العثمانيين
ودبابتين ديزيل من بتوع هتلر
وتلت غواصات هينرش يابانى
واربعى قاذفات صواريخ روسى
وديناصورين
وارنب برى

Lady E يقول...

The illusionist : كويس انك دخلت في موضوع البوست علشان كنت هنده البودي جارد بتوع المدونة :)

ايوة عليك نور تشاكرا بالانجليش وشكرة بالعربي عندك مانع ؟!

لا تخف تكلم بصراااااااحه بلا خوف بلااا خوف :)

واحده من السبعة

The illusionist يقول...

سورى بس عاوز اقول حاجه كمان
انا بسال بس
المستر قل ايه
لان الكلام كلو من ناحيتك
قولتى وجهه نظرك
هو قالك لا
وشرح
انا مفهمتش بقى
الشرح ده ايه
بس هل هما بياكلوا
عشان تم اضهادهم؟

Lady E يقول...

The illusionist :نفسي اعرف بتلحق تكتب التعليقات دي امتى !

The illusionist يقول...

طيب
عشان انتى ليدى اى
اونتى حاجه اسبيشيال
هوريكى حاجه مش شوفتيها غير منى انا بس

هوكس بوكس
خمس تعليقات فى نفس الزمن
بصى ومتخافيش
هوكس
بوكس

The illusionist يقول...

طيب
عشان انتى ليدى اى
اونتى حاجه اسبيشيال
هوريكى حاجه مش شوفتيها غير منى انا بس

هوكس بوكس
خمس تعليقات فى نفس الزمن
بصى ومتخافيش
هوكس
بوكس

The illusionist يقول...

مستعده
هوباااااااااااااااااااا

بس بوست ظريف وسهران معاكى للصبح
انسحبى انتى افضل

The illusionist يقول...

مدونه زى الفل
الواحد بيتمشى فى الهوا لوحده هنا

sony2000 يقول...

انا بقي التانيه حد عنده مانع ههههه
اولا بجد بوست جامد احيكي عليه
ثانيا عندي ملحوظه
موش كل الناس اللي تلاقيهم مليانين كدا بالعكس دول اكتر ناس تلاقيهم بيضحكو وبيضحكوكي وانا شيفه امثله كتير جدا حوليا
وهنروح بعيد ليه صلاح جاهين الله يرحمه مهو منهم بس دا بقي حد دماغه عليا وانا بمووووووووووووت فيه
تقبلي مروري وتحياتي

Lady E يقول...

The illusionist : بعد الاهداء الفوق الفظيع ده

تحب تسمع أغنية ايه ؟

الديناصورين والأرنب البري بيسلموا عليك وبيقولوا لك شكرا على الاهداء :)

psycho يقول...

ازيك يا ليدى
مساء الخير عليكى
كلامك على فكره فى ناس كتيره قوى اتكلموا فيه
بس بنظرات مختلفه
فى مؤلف امريكى
كتب كتاب اسمه
امريكا المصابه بالسمنه
ده كان بيناقش فى المشكله دى
بس من منظور اقتصادى
مش طبى
بس بالنسبه لنوع تساؤلك
مش كلو اكيد مرض
بس كنسبه
فى اكيد ناس بتاكل اما حرمان
او شهيه زايده
قله وعى
توفر الاطعمه بشده

The illusionist يقول...

شوكرا شوكرا
احب اسمع اغنيه
نيجيرى بيه
لمحمد منير
وفى ناس بتهل اهين

The illusionist يقول...

حد صاحى غيرى

Lady E يقول...

The illusionist : واضح ان الكلام دخل ملخبط عندك من كتر الكومنتات

زي ما اتفقنا ان في شكرة اللي هي الشكرة بتاعت العواطف وتقدير الذات فلأن الأشخاص دول بيتعرضوا للإهانة فجسمهم بيبني كتل دهنية علشان يعوضهم الاحساس بالاهانه يعني تبقى الكتل الدهنية دي زي حماية وهميه ليهم

The illusionist يقول...

اوعى اكون هنجتلك البلوج ولا حاجه

Lady E يقول...

The illusionist : كمان طلعت ساحر :)

هوكس بوكس اومال فين هابرا كادبرا

او شبيك لبيك

وبعدين هو متجيش المدونة خالص او تكتب كل الكومنتات في بوست واحد

The illusionist يقول...

الو
انتى بقى بتتكلمى على انهى نوعيات بالضبط
حاجه من نوعيه الشرح
دى
http://www.folknouveau.com/healing/chakra-meditation-spiral.gif


ولا

http://www.clearandbalanced.com/Chakra%20Chart.jpg

Lady E يقول...

The illusionist : ده على اساس ان احنا بالليل ولا ايه

احنا فعلا الصبح :)

The illusionist يقول...

اعمل ايه بس
والله ببقى مشغول
واجى الاقيكى بتقولى انك عملتى روحتى المعرض
فبزعل واعيط وامشى

Lady E يقول...

sony2000 : ههههههههه بقى كل الكومنتات دي وانتي التانية

ازيك يا زميلة اصل عرفت انك في نفس ذات الكلية اللي انا فيها بس انا انجليش وانتي بتدرسي ايه ؟

ثانيا : ملحوظتك هي رأيي لغاية دلوقتي بس برضه قرأت قبل كده كلام بيقول ان اللي بيعانوا من السمنة بيبقى دمهم خفيف علشان يخبوا انهم بيعانوا من السمنة او يعالجوا مشكلة مظهرهم وثقتهم بنفسهم بإنهم يكونوا مضحكين

ومين مبيحبش صلاح جاهين الله يرحمه

بس في معلومة صغنونة أوي صلاح جاهين كان عنده اكتئاب :( وده ممكن تحسيه في شويه من اشعاره

Lady E يقول...

psycho : الحمد لله تمام

يسعد صباحك ومسائك

لازم امريكا تبقى مصابة بالسمنة علشان نمط حياتهم وأكلهم يشجع على السمنة

هو ده رأيي يعني مش لمجرد اني اشوف حد over weight يبقى اقول ايوة يبقى مريض نفسي

في اسباب كتير جدا للسمنة

بجد نورتني وشكرا على تعليقك

Lady E يقول...

The illusionist : الله عليك بجد

على فكرة الصورتين بيشرحوا بعض

يعني اول صورة بتقولك الشكرات دي بتاعت ايه او وظيفتها ايه

وتاني صورة بتبين اماكنهم في الجسم

تقريبا المستر كان بيتكلم عن الشكرة اللي لونها اصفر ( الشكرة الذاتية) او اللي لونها برتقالي وطبعا مش هقولك مين فيهم لأني درستهم من سنة فمش فاكراهم :)

شاب فقرى يقول...

انا زمان كنت عارف ان اللى بيكون زهقان بيحط همه فى الاكل
يعنى بيكون قاصد
وبعدين واحد صاحبى قالى انته بتتخن يابنى
قلت له يابنى مغيرتش نظام اكلى
بقيت باكل اقل والله
لقيته بيقولى ان دى ممكن تكون حالة نفسيه
ودلوقتى انتى خليتينى افكر فى الموضوع بشكل تالت
:(
تحياتى ياليدى عالبوست
ربنا يزيد من كورساتك
شاب فقرى

لــــ زهــــــراء ــــولا يقول...

ليدى
-*-*-

واضح انك حساسه اوى وباين ده طريقة كتابته للموضوع
اكيد مش كل واحد بدين يبقى مريض نفسى ومكلكع وعلى فكره الاكل مش مرتبط بالبدانه لان اعرف ناس ما شاء الله حريقة اكل ومع ذكل جسمهم مش بيزيد وبالعكس فى نا اكلتهم عاديه وتالاقى اللى هو نظام مطرح ما يسرى يمرى ههههههههههههههه
بصى يا فمرايه فى ناس اوعل ما تزعل تحط همها كله فى الاكل وفى ناس نفسها تتسد
المستر بتاعك اتكلم فى اعموم وعلى فكره بقى الناس المكلبظين يبقوا دمهم خفيف جدا جدا
تقبلى اطيب امنياتى بالسعاده

زهراء

صيدلانيه طالعه نازله يقول...

جديده حكايه الاضطهاد دى
بس ياريت الناس تعرفها و بالتالى تحاول تنفى الفكره بانها تخس شويه

بس احنا فعلا عادداتنا الغذائيه سيئه و من غير ما حد يضطهدنا خااالص

حنين الذكريات يقول...

ممكن يكون المستر فى كلامه شئ من الصح لكن مش ممكن يطبق على الكل
وأكيد الاكل والسعرات الحراريه بيكون لها عامل كبير
وفيه نوع من الأكتئاب بيخلى الريض بيه ياكل كتير وعلى العكس ممكن يخليه ينسى الاكل ويخس
وكان زمان بيقولو ان السمنه دليل على الترفيه والعز فى بيت الوالد
ومعظم المالينين دمهم خفيف وحساسين زياده

ستيتة يقول...

واحب في نهاية البرنامج ابدي اعجابي بكورساتك
والمستر بتاع الكورسات
وليدي العسولة اللي بتشاركنا خبراتها في مجال الهيومن ريسورسس :)

فراشة يقول...

ليدي ...
هم لحد دلوقتى 38 تعليق اعلق انا كمان ولا انام :)

بصى هو الكلام تقريبا صحيح بس مش على كل الناس خالص
يعنى السمنه لها اسباب نفسيه وعضوية وهرمونيه
يعنى مش كل حاجه غير عادية نقول مرض نفسي
ناس بتحب الأكل وبتاكل لازم تتخن مش لازم يعنى يبقى نفسيا مش مظبوط

وبعدين ممكن دول يكون فعلا الدهون بتتراكم عشان السبب اللى قال عليه اللاستاذ وممكن كمان عشان نظام اكلهم مش مظبوط خالص ومش بمواعيد وممكن من عدم الحركه

وصلاح جاهين كان عنده اكتئاب عشان آمن بحاجه قوي وحصل عكسها :(

بعيدا عن كل ما قيل .... وحشتيني

غير معرف يقول...

بصى بقى
معلوماتى عن شكرات الطاقة مش اوى

بس موضوع التخن اعرف ان فى ناس تخنية عشان الجسم بيبقى عنده استعداد لكده يعنى حتى لو اكلت قليل بتتخن اسرع من اللى اكتر
و فى ناس بتاكل كتير لما بتكون متضايقة او قاعدة فى البيت كتير ومش معاها حاجة فدايما بتاكل ودى تقريبا نفس فكرة الاضطهاد بتطلع اللى جواها فى الاكل
بس الاكل ده وسيلة يعوض بيها احساسه بالاهانة او الاضطهاد يعنى انا احس ان ممكن حد اتعرض للاضطهاد او الاهانة انه يبقى عدوانى فى سلوكه اكتر وعنيف او ممكن يبقى انطوائى ويبعد عن الناس مش عارفة لو صح بس بيتهيالى ان التخن ممكن يكون سبب للاضطهاد زى ما قال المستر بس مش كل الاسباب وبرده مش دايما الاضطهاد نتيجته التخن

بقولك الصورتين اللى منزل لينكاتهم زناتى فهمتهم بس مش اوى

معلش يا مس لو تشرحيهم تكسبى فيا ويارب ينجحك وتدخلى الجنة
حلو شغل الشحاته ده هههههههههههههه

شكله كان كورس حلو وشكلك استمتعتى الحمد لله ويارب كده دايما

سلام

KEBLAWYAT يقول...

السلام عليكم

موضوع مسارات الطاقة ده الكلام عنه كتير ، وفيه منه حلو ....


بس المثال اللى ضربه المستر ده معتقدش ابدا انه صحيح ..

لانها نظريات .. بيحاول يفسر كل حاجه على أساس مسارات الطاقة

انما المعروف والثابت .. ان الجسم مش بيبنى شحوم اما يبقى مبياكلش يعنى

Lady E يقول...

The illusionist : ليه بس بتعيط ليه

انا فعلا كنت موجودة في المعرض يوم الأربعاء وفي السور كمان :) بس بجد الوقت فات بسرعة جدا

واحب اقولك يا بختك جبت شوية كتب حلوين جدا

Lady E يقول...

شاب فقرى : عاش مين شافك يا شاب فقري

على فكرة انا بعرض وجهة النظر بس مش اكتر وهي فيها شيء من الصحة لكن مش كلها صح

شكرا عالدعوة وليك مثلها :)

P A S H A يقول...

مساء الفل


مممم

مش عارف !

أو بصراحة مش قادر أربط السمنة بتعويض الإحساس بالإهانة.

يمكن مش مستوعب .. أيون مشيها مش مستوعب ههههههه
بس أنتِ طبعاً عارفه إني مش فاهم :))

سلام

Lady E يقول...

لولا وزهراء : كل كلامك صحيح يا زهراء

بس برضه مش شرط أي حد بدين يبقى دمه خفيف

نورتيني وسعيدة انك متابعة المدونة لأنك بجد دماغ ومثقفة

دمتي بخير

Lady E يقول...

صيدلانيه طالعه نازله : طبعا والبركة في المكرونة الباشميل والمحشي وبالنسبة لأهل بحري اللي انا منهم الرز والسمك

ده غير الحلويات وربنا يزيد ويبارك :)

Lady E يقول...

حنين الذكريات : وحشاااني

اينعم زمان كانوا بيقولوا التخن عز وهيبة وانا كان نفسي اعيش زمان اصلا :)

نورتيني يا حبي

Lady E يقول...

ستيته حسب الله الحمش : بنرحب بضيفة البرنامج وبنهديلها اغنية البرنامج النهاردة

تسلميلي يا خالتو ومجال الهيومن ريسورسس فعلا جميل وبيخلي الحياة أحسن

Lady E يقول...

فراشة : مستغناش عن تعليقك يا احلى فراشة حتى لو التعليقات مليون مش 38

طبعا الكلام مش على كل الناس لأن مينفعش نعمم حاجة على كل الناس

وفعلا صلاح جاهين اكتئب للسبب ده ولأسباب تانيه - الله يرحمه-

تسلميلي وانتي كمان بجد

Lady E يقول...

star in the sky : كلام سليم يا ستار

امين وشكرا على الدعوات وليكي مثلها

بس موضوع الشكرات ده كبير ولسه هطلع الكتاب بتاعه واراجع علشان اشرحه لأني درسته من سنة دي حاجة

تاني حاجه علشان الموضوع كبير ففي طريقتين ممكن تبعتيلي ايميلك ونتكلم في الH.R عامة او تستني المدونة اللي هعملها عن الH.R

وبجد حاجة جميلة جدا وبقت نادرة انك عايزة تتعلمي وتعرفي اكتر يا ستار

الحمد لله كان كورس جميل بمعلوماته وصحبته

نورتيني

Lady E يقول...

قبلاوى : وعليكم السلام ورحمة الله وبركاته

لما شفت تعليقك ابتسمت لأن ده رد فعل طبيعي لأنك درست جسم الانسان ومدرستش اي حاجه عن مسارات الطاقة لأن الحاجات دي مش في كتب الطب وبالتالي اي حاحه غير الطب كتير من الأطباء مش بيعترفوا بيها

مسارات الطاقة مش مرئية في جسم الانسان لكن موجودة زيها زي الروح مش مرئيه بس موجودة وكمان مسارات الطاقة ليها اماكن ووظائف ولو حبيت تعرف عنها اكتر هتلاقي مصادر كتير عالنت

Lady E يقول...

P A S H A : يسعد صباحك ومسائك

ولا يهمك انا كمان مش مستوعبة علشان كده كتبت البوست ده :)

محمد فؤاد (صاحب عمود النور) يقول...

هو ممكن تكون وجهة نظرة صح وممكن لا
بس موضوع ان الواحد لما بيكون مضايق بياكل كتير دا انا مقتنع بيه وشفته كتير.... كنتى حاولى اكتر تفهمى منه ليه هو بيفكر كدا..او ليه قال الكلام دا