السبت، 20 فبراير 2010

يوم من الأيام






نفس الموضوع أرق كل يوم ومش عارفة أنام ، بالطريقة دي هتمنى ان كل يوم يبقى عندي امتحانات
لأني بنام بعمق أيام الامتحانات حتى لو شربت كل القهوة والنيسكافية والشاي اللي في الدنيا برضه بنام بيبقى نوع من الهروب ، بقيت زي ماجي في فيلم CITY OF ANGELS يوم لما بتنام للصبح بتفرح وبتحس ان في حاجة مش طبيعية حصلت


بيسعدني جدا لما أبقى موجودة في جروب وأقول ان عندي مدونة والموجودين في الجروب ياخدوا لينك المدونة ويقرأوها بس في نفس الوقت بقلق لأن معظم كتاباتي حكي وبوح وأعتقد متهمش ناس كتير وبقلق كمان من انهم يضيعوا الوقت في مدونتي ويطلعوا منها ويقولوا " منك لله ضيعتي وقتنا عالفاضي " الوقت أغلى بكتير من اننا نضيعه

نفسي جدا أعمل حفلة غنائية – أغني فيها – انا بعشق الغنا والموسيقى - ويكون في الحفلة دي كل اللي بحبهم والحضور بالملابس الرسمية
والجنتلمن بالبدل والبنوتات باللبس اللي بربرق وطبعا انا كمان هلبس بربرق والحفلة دي تكون تبع الكلية _ وانا هحاول انها تبقى حفلة التخرج- أو تكون في ساقية الصاوي – مع اني مروحتهاش أبدا – بس مش عارفة حباها ليه ومش عارفة لغاية امتى هفضل أأجل الحلم ده ويا ترى هيتحقق ولا لأ انا افتقدت جو حفلات المدرسة
الكلية بجد مملة جدا ومفيهاش أي نشاط أو بمعنى أصح انا كمان مش متحمسة اني اشارك تبع الكلية حتى لو كان في انشطة – بكرة أول يوم كلية في الترم التاني - سامعة موسيقى احباط خلفية بتقول ييييييييييييييييييييه
لما بمشي قدام الكلية مش بحس بأي انتماء أو حنين ليها وخلاص بقى نفسي اتخرج علشان زهقت وفي نفس الوقت خايفة من الحياه بعد الكلية ، أكيد هيبقى فيها صعوبات بس لازم الصعوبات دي لو كنت عايزة أحقق أحلامي



كمان نفسي أروح دريم بارك والسندباد ولندن وتركيا ولبنان وأماكن كتير جدا جوه وبره مصر
وأخيرا اكتشفت ان كل ده مش مهم المهم الصحبة الكويسة والروح لأن من غير الصحبة الجميلة وروحهم الحلوة
مفيش أي حاجة من دول هيبقى ليها طعم ، في أشخاص معينين في حياتنا الحياة مش بتحلى غير بيهم ومن غيرهم الحياة ملهاش لازمة



عايزة احط اختبار نمط الشخصيات (بصري ، حسي ، سمعي ، رقمي ) عالمدونة بس مش عايزة احطها في بوست وتضيع في وسط زحام المدونة عايزاها تكون موجودة في المدونة دائما علشان اللي يحب يعرف شخصيته ممكن يعمل الاختبار ده ويعرف من المدونة مش من البوست وبس
اكيد هلاقي حل اني انقل أسئلة الامتحان عالمدونة وتبقى موجودة على طول بس ازاي مش عارفة
ولغاية ما اعرف

دمتم بخير

هناك 20 تعليقًا:

sony2000 يقول...

انا بقرا مدونتك من مده وقولت اما اعمل مدونه هعلق عندك
واديني اهوووووووووو بعلق لاول مره وبأذن الله موش هتكون اخر مره
بجد عندك حق وانا برده مرعوبه من الحكايه دي كلها كاااام شهر وهنبقي اوت
ربنا يسترها معانا
تقبلي مروري وتحياتي

صوت من مصر يقول...

عاوز اقولك ان اللى قالك ضيعتى وقتنا
بصراحة جدا جدا
مقراش شىء

احساس طفلة محبة للرومانسية بس واقعية يقول...

اناااااااا جيت نورت المدونة :)
عرفاكى هتجرى ورايا تحدفينى بشوية بوستات بس صدقينى الدنيا حواليا زحمة زحمة
الاول نسلم ونسأل اخبارك اية ؟

وبعدين ندخل على النوم واقولك انى من كتر الارق كرهت النوم بقهوة ونسكافية او من غير مبيجيش كنت فاكرة انا كدا عشان بعد الايام بس الظاهر انها حالة منتشرة زى الاكتئاب كدا ربنا يرحمنا منهم الاتنين

وبعدين خلاص يا قمراية
اخر ترم ان شاء الله
وتخلصى الكلية وترتاحى وتنامى براحتك حتى لو اجازة اهى هتكون من غير مسؤلية العودة للدراسة هتكونى خرجتى من عنق الزجاجة وانطلقتى فى الحياة ربنا يكتبلك احلى انطلاقة وكل خير

المدونة صحيح شخصية بس متنكريش انها بتذكر كل منا بمواقف حصلتلة او بتضيفلة معلومة حياتية جديدة او حتى بتخلينا نعلق تعليق تلاتة متر زى اللى بكتبة كل لما ازورك دا او حتى كفاية اننا نعرفك :)

خلى بالك من نفسك
دمتى بكل خير وسعادة وراحة بال
تقبلى مرورى

صيدلانيه طالعه نازله يقول...

انتى كلامك حلو و جميل و صعب ان حد يقرالك و يقول انك ضيعتى وقته

موضوع النوم ده مشكله المشاكل بجد و اللى بيعانى من الارق بيبقى نفسيا و جسمانيا تعبان و مهما نام فى وسط اليوم بيبقى تعبان

حاولى متوتريش نفسك قبل النوم و ابعدى عن اى حاجه تقلقك
وحسسى نفسك انك رايحه تمتحنى بكره
حتلاقى الدنيا بقت حلواااااااااااا

غير معرف يقول...

بالعكس يا بنتى مدونتك حلوة صحيح مش متبعاها من زمان بس بتعجبنى
كملى زى ما انتى

الصحبة احلى حاجة حتى لو قاعدين فى عز الحر وفى اسوا مكان بس الصحبة الحلوة بتهون علينا كل حاجة بس الهم نعرف نختارهم صح وكويس

والله فى موضوع الكلية الوضع عندى مختلف عشان بدات افكر من دلوقتى عاوزة اكمل حياتى ازاى والكلية زى ما تيى تيجى مبقتش تهم كتير عندى

اخر حاجة اعرفها شخصية حسية ولا بصرية بس رقمية جديدة عليا
هستنى الاختبار وانا كمان ولو لاقيت طريقة كده عسولة زيك تسهل على الكل انه يعمل الاختبار كل اما يدخل المدونة هقولك فى تعليك :D

المهم انتى اخبارك ايه يا جميل
يارب يكون مودك تمام وزى الفل كده
سلاموز

لــــ زهــــــراء ــــولا يقول...

ليدى
-*******-**********
تعالى نتفق على حاجه انا عمرى ما دخلت هنا وحسيت ان وقتى ضاع بالعكس باكون فرحانه اوى اوى بكلامك وبطريقة عرضك لاى حاجه حتى لو كانت حاجه شخصيه
ان شاء الله تقدر تعملى الحفله وياريت تعزمينا عليها علشان ده هيكون شرف لنا بجد
ان شاء الله الحياه بعد التخرج يكون كلها سعاده وهنا
مش تخافى
خليها على الله
ثقى فى رحمة الله
تقبلى اطيب الامنيات بالسعاده والهنا والفرح

ستيتة يقول...

قصة النوم دي متقلقيش
ده علشان الحر وتغير الجو بتاع اليومين دول
لكن ان شاء الله تتحل
وبعدين اديكي راجعة للمذاكرة جالبة النوم :)

انا بقى مستنية الحفل
مش علشان الغنا
نو
علشان ها تبقى راقية وكلنا ها نبقى بربرق :)

الغاردينيا يقول...

مدونة جميلة يسعدني برضه اني وصلت هنا ^_^ ... و محدش يقدر ابدا يقول انه ضيع وقته هنا ابدا ,,

طبعا كلنا مش عايزين نكبر يا حبيبتي
وبنحس اننا مهما كبرنا فجوانا طفل /طفلة ... اما امنية الوقوف عالمسرح
تقدر تقولي انها امنية مجنونة مرت بخيالي
مرة بس لحد دلوقتي محصلتش ههههه

ايه رايك نعملها بقى سوى ؟؟

قلت ان نفسك تزوري دول زي لندن وووو
طب واليمن يعني مش عاجباكي ولا ايه ؟
دعابة حبيبتي , تحية

أميرة علي كوكب مهجور يقول...

خلاص اجهزي الشنط والترحال
بينا ع تركيا :)
كل الاحلام هتتحقق ان شاء الله

R-H-S يقول...

انا اللي شدني قوي في البوست كلمه بربرق
يعني ايه بربرق؟

غير معرف يقول...

أنا كمان بحب الإحتبار ده أوى..و طلعت فيه بصرى D:

البوست حلو أوى..أنا بحب النوع ده اللى بيكون فى فضفضة كتير

بصى بالنسبة للى بعد الكلية سبيها على الله و اعرفى أن كل وقت ليه حلاوته أنتى بس استعدى لفترة ما بعد الكليه و كله على الله

بالنسبة للأرق..
مش عرافة أنا بعمل حركة كدة..باخد دش دافى و اعمل شاى بلبن سخن و اقعد على السرير و أهدى النور و أقرا رواية و اشرب الشاى بلبن..الطريقة دى بنيمنى أوى

و أنا كمان مخنوقة إن بكرة كليه..قرفت أوى مع إنى بحبها

:(

The illusionist يقول...

مساء الفل
اولا انا عاوز اروح تركيا انا كمان ولندن

ثانيا الدراسه نغصت عليا البوست ده

ههههههههه

ثالثا فعلا دى موهبه اكيد

انك تنامى يوم امتحان

ده مش طبيعى

مفيش حد بينام يوم الامتحان ده الا نادرا

ربنا يعينك فى السنه الجديده

و

لازم تحطى البوست اللى بتقولى عليه

عشان شكله هيبقى حلو قوى

حنين الذكريات يقول...

الارق بيجى لما بنام كتير فى النهار وفيه ناس من كتر التوتر بتنام أكتر هروب زاى مابتقولى
أهم شئ الصحبه الحلوه فى كل الاوقات وكتاباتك كلها دمها خفيف وليها قيمه مش بنضيع وقت بنسعد بيها
الحمد لله انتى غنيتى قبل كده فى التلفزيون وانتى طفله وحفلات خاصه بالعائله والكل كان مبهور بصوتك بس للأسف دلوقتى الفن بقى فى هبوط أنتى هتعملى شئ محترم ملوش وجودفى ايامنا دى
وان شاء الله نروح سوى كل الاماكن اللى ذكرتيها
كنت بتمنى أشوف أختبار نمط الشخصيات هنتظر لما تكتبيها قريبا ان شاء الله

فراشة يقول...

ليدي العسووووله
وحشاني خالص

امممممم بصى اولا مدونتك مش تافهه عشان يقولوا عليها ضيعت وقتهم

انا كمان نفسي اروح اليابان وفرنسا وماليزيا :)
بس فعلا اكتشفت ان الصحبه الحوة احلى مليون مره من اني اروح مكان جميل لوحدي ... بس يمكن تروحي الاماكن دي مع حبايبك "يارب "

انا كمان كان نفسي اغني بس اكتشفت انى صوتى وحش هههههه "مش قوي يعني" وكمان بتكسف اغني قدام الناس ... بس ابقى اعزميني ولا اقولك ممكن اشترك ف العزف مع الفرقه :)

وعن الاختبار دوري عليه ع النت ولو لقتيه هو اللى قصدك عليه حطيه لنك على صوره...او اكتبيه على ملف ورد وارفعيه على موقع وحطي اللنك

انا لقيت اختبار ع النت بس كان مش كويس زي اول واحد عملته
الاولاني كنت (حسيه)لقتني بقيت (بصريه)
بس الاسئله مكانتش شامله بصراحه مكانش اختبار مقنن حتى :) ماعلينا

المهم الارق بيبقى توتر او قلق وعشان انتى بتفكري كتيييييير
لما ببقى كدا بصلي ركعتين وامسك السبحه وافضل اسبح واستغفر لحد ما انام

انا رغايه قوووي كدا ليه ...سلام بقى

شفـقــة و إحســــان يقول...

بكرة تندمى علىايام الكلية دى
يا بنتى دى ايام الكلية لازم يبقى ليها انتماء
دى اجمل ايام العمر وبكرة لما تتخرجى هتقولى ولا يوم من ايام الجامعة
وحشتينى

psycho يقول...

امنياتك جميله

وطموحك حلو قوى

مهما ان كان باذن الله
لو فضلتى مقتنعه انك هتعمليه
باذن الله كمان كذا سنه هتكلمينا من تركيا ولندن وباريس

والاختبار ده محتاج دقه متنسيش بقى تخليه بوست محصلش
عشان انا باذن الله اول واحد يعمله
لانى بحب الاختبارات دى جدا

صحيصح انا وعدتك

البوست الجديد نزل

مي يقول...

مالك ياقمر بس على فكرة المدونة جميبلة جدااااااااا
وحكاية القلق دى طبيعية شان انتى اخر سنة وبتفكرى فى اللى جاى بس صدقينى مش صعبة زى ماانتى فاكرة
ان شاء الله تحققى كل احلامك
وتروحى السندباد ههههههههههه
انتى عثل والله

Lady E يقول...

sony2000 : اهلا بيكي يا قمرايا والف مبروك على مدونتك

دي حاجة تسعدني انك بتعلقي عندي وكمان متابعة المدونة وهستنى تعليقاتك دائما

امين يارب

نورتيني

Lady E يقول...

صوت من مصر : تسلم ع المجاملة يا كيمو

Lady E يقول...

أكيد يتبــــــــــــــــــــــــع