الاثنين، 15 فبراير 2010

كل الكلام مرة واحدة



رحت المطار مع حنين انتيمتي ورحت مكتبة الشروق في المطار جبت منها كتابين حلوين أوي كان نفسي أجيبهم كتاب اسكندرية/بيروت لنرمين نزار وكتاب سفينة نوح لخالد الخميسي بس مش ناوية اشيله من الغلاف دلوقتي خالص خليني فرحانه بشكله وهو متغلف دلوقتي

سفر حنين عمل لي مرارة في قلبي وروحي ويوميها فضلت أكل حاجات مسكرة ان المرارة دي تروح أبدا طعم المر من قلبي وروحي واحساس رهيب بإفتقاد حنين وافتكرت أغنية " مليش أمل في الدنيا دي غير اني أشوفك متهني حتى ان لقيت ان بعادي راح يسعدك ابعد عني اما أنا مهما جرى هفضل أصون عهد الهوى وان غبت يوم ولا سنة هفضل أنا هفضل أنا أنا برضه أنا "


تاني يوم صحيت على صوت حنين بتتصل بيا تطمن عليا وتبلغني انها وصلت بالسلامة ، حسيت اني مش عايزة اعمل حاجة في الدنيا غير اني أنام ونسيت أقول ان وانا في المطار اتصلت بيا زميلتي في الكلية نفس البنوتة اللي وانا في سنة اولى عملتلي مشاكل كتير معنوية بس لقيتها بتتصل بيا وصوتها مخنوق بالعياط حسيت اني متعاطفة معاها ونفسي أخفف عنها وفهمت هي مخنوقة من ايه من الكول تون بتاعتها

رجعنا على دمياط مع خالتو وأنا فيا اللي مكفيني من سفر حنين لسفري أنا للطاقة السلبية اللي كانت حواليا
كل الناس بتشتكي ، مفيش حد مرتاح أبدا او بيقول بكرة احلى !


روحنا دمياط وفتحت الايميل وكلمت زميلتي وحكتلي بالتفصيل الممل عن الي حصل معاها وعن مشكلتها ونسيت خالص انها جرحتني في يوم من الأيام وانا اتعاملت معاها كويس جدا كنت حاسة أوي بيها ولأنها في الأول والأخر زميلتي وبنت ومسلمة ومهما حصل فهي كان ليها مواقف جدعنه معايا ، بعدها تعبت أوي ، كانت بتحكيلي وانا بدمع من كلامها ولأني مريت بتجربة شبيهه من تجربتها فنصحتها والحمد لله تقبلت النصح وارتاحت وبقت في مود كويس وانا كالعادة أخدت طاقتها السلبيه وفضلت اسأل نفسي هو انا ليه خففت عنها
بس لقيت الحديث ده ومندمتش على الزائر الكئيب صاحب لقب " اوعى تضحك " اللي زارني


كان عندي كورس H.R هيبدأ النهاردة ومكنتش متحمسة خالص اني اروح وكنت وفكرت كتير اروح ولا لأ وفعلا رحت بعد ما الكورس بدأ بساعة ونص والحمد لله اني رحت معايا بنوتات زي العسل وولاد دماغ وطبعا شرح مستر اسلام عبد اللطيف لا يعلى عليه وبيجاوب عن كل اسئلتنا وفي حاجات كتير كنت بفكر فيها ولقيتها موجودة عندنا في الكورس وكمان اتناقشنا فيها
نفسي أوي أجيب التدريبات اللي عملناها في المدونة هنا يمكن اكتبها عالمدونة ان شاء الله
ضحكنا كتير وفي بنوتة زي العسل معانا اسمها سارة كل شوية تقول على رأي المثل وبتعلق تعليقات بتطلع الضحكة من جوه قلوبنا بجد بنوتة لذيذه اوي وفي بنوتة كمان معانا هادية جدا بس أول لما اتكلمنا سوى دردشنا كتير ولقينا المواضيع بتتفتح لواحدها وأول مرة أحس بجو الألفة كده في الجروب من أول يوم في الكورس ، في روح جميلة أوي بيننا كلنا وانا متأكده ان من هنا لغاية ما الكورس يخلص الأيام هتفوت بسرعة أوي
ونطلع من البوست كله بإيه عزيزي القارئ : لو انت مكتئب ونمت وقفلت على نفسك بالمفتاح هتفضل مكتئب لكن غير وهتلاقي حياتك بتتجدد وتتغير للأحسن المهم متستلمش

هناك 37 تعليقًا:

حنين الذكريات يقول...

بما انك جايبه سيرتى فى الموضوع وواخد أكبر حيز أقولك شكرا على مشاعيرك
والف سلامه عليكى من المر حاولى تاكلى شكولاته بس بحساب علشان الديت
وان شاء الله مش هتأخر عليكى والايام هتعدى بسرعة واحنا مع بعض وبنطمن على بعض
ومتخاليش أى طاقة سالبيه تأثر عليكى وحاولى تقلبى اى طاقه سالبيه لطاقة ايجابيه
وانا فرحانه انك سمعتى كلامى وروحتى الكورس وغير المود بتاعك
وكمان اول تعليق

Lady E يقول...

حنين الذكريات : هيييييييييييييه حنين حبيبتي

الله يسلمك من كل شر بتهزري بقى انا قلباها دراما وانتي بتهزري ماشي ماشي
وكل حاجة ممكن تتاكل بحساب الا الشوكولاته :) " ودايت ويياضة ويياضة ودايت :)

مفيش أسرع من الأيام وربنا يهونها وأشوفك على خير يا أحلى حنين في حياتي

بالنسبة للطاقة السلبية فصعب ان الواحد يتغلب عليها لما يلاقي الدنيا كلها مكتئبة

أي خدعه ما انا بسمع كلام اللي بحبهم وانتي مش أي حد يا حنونه ولا بلاش علشان منخدش عين بس :)
ربنا يكرمك ويرضى عليكي ويعينك ويسعد أيامك بجد دعيت لك كتير أوي لما معنوياتي ارتفعت من الكورس النهاردة

هيييييييييه نورتيني في أول تعليق أول مرة تحصل :) وان شاء الله تكرر

لــــ زهــــــراء ــــولا يقول...

ليدى الرقيقه
على فكره باين اوى من كلامك انك حد رقيق اوى ومشاعره جميله
انتى عارفه انك اكلتى حاجات حلوه مش علشان طعم المراره ولكن علشان فى احساس داخلى جوانا بيدفعنا اننا نهرب من مشاكلنا وهمومنا بالاكل وكمان الحااجات الحلوه ممكن تضيع الاكتئاب
ربنا يفرح قلبك ويسعد ايامك وتفضل علاقتك حلوه بكل الناس
اتمنى لكى كورس سعيد وصحبه جميييييله
ربنا يسعد كل اوقاتك

Lady E يقول...

لولا وزهراء : يا مرحبا يا مرحبا

والله انتي اللي رقيقة وقمرايا

ههههههه يا خبر أبيض كده هظهر اني مفجوعة مع اني مش كده

صحيح كلامك بس انا فعلا كنت حاسة بإحساس مر حسيت ان مشاعر مرة غلفت روحي ووصلت لقلبي وحاولت انشغل في قطعة شوكولاتة أو حلويات ومع ذلك مكنتش حاسه بمذاق الشوكولاته المعتاد علشان في أشخاص معينين في حياتنا الحياة مش بتحلى غير بيهم وفي بعدهم الحياة بتبقى مرة مهما ضيفنا لها شوكولاته أو سكر

اللهم أمين وليكي مثل دعائك يا قمرايا
نورتوني

غير معرف يقول...

تعرفى انت كنت محتاجة اوووى اقرا الخلاصة دى

ان الواحد لما يلاقى نفسه متئب يخرج من الحالة اللى هو فيها مش يكمل اكتئاب

ويارب تفضلى كده دايما مبسوطة يا جميل

Lady E يقول...

star in the sky : فرحتيني بكلامك يا ستار ربنا يسعد أيامك

الواحد لما بيبقى مكتئب أسهل حاجة انه ينام او يقعد مكانه ويكتئب وخلاص لكن لما نغير حياتنا ونتحدى الاكتئاب واليأس بنخليها أحلى زي بالضبط المية الراكدة في مكانها بتبقى مستنقع لكن المية المتحركة بيبقى فيها حياه

عارفة بمناسبة كلامك كان في سؤال النهاردة في الكورس بيقول : امتى أخر مرة عملت حاجة مجنونة في حياتك ؟ علشان نكسر الملل وطبعا مش المقصود من حاجة مجنونة انها حاجة تضر بالانسان سواء معنويا او ماديا بس تغيير
أكلة جديدة ، خروجه جديدة ، حاجة جديدة

ويارب انتي كمان تتبسطي وتفرحي وتبقى حياتك كلها فرحه

برضه لسه حاسة اني اعرفك من زمان مش عارفه ليه

اقصوصه يقول...

الاكتئاب صار من اخطر امراض العصر

لهالسبب لازم دايما ندور حوالينا

على مضادات حيويه للاكتئاب!

psycho يقول...

حلو كتاب سفينه نوح
جميل قوى كمان

Bent Men ElZman Da !! يقول...

اديكى انتى بتقولى لما تخرجى من جو الاكتئاب ده مش هتحسى بيه
لما تحاولى تنسى اكيد الطاقه السلبيه دى هتخرج منك
وبجد انتى حد طيب ورقيق اوى
وعندك قدره على التسامح جميله اوى
ربنا يوفقك يا قمر ويسعدك دايما :)

Unknown يقول...

حلووووو حبك
لصديقتك دا
وحأقولك
حاجة
الصداقة فى
الكلية والسن دا
فعلاً ممكن تبقى صداقة
العمر.جميلة طريقتك فى
الكلام والحكى ياطفلة بأحـس
كأنى قاعدة معاكِ وشايفاكِ وشايفة
شقاوتك وضحكتك وممكن كمان ساعات
دموعك.

Unknown يقول...

بقولك ايه لو
حتجيبى شوكولاتة
ما تنسنيششششششش:)
حتة أتنين تلاتة اربعة
خمسة نص كيلو كيلو بحاله
مش حاقووووووووووول لأ:)

Unknown يقول...

خلاص خلاص حأمشى أهوه
بس بقولك كمان لوسمحتى
وقدرتى تجيبى التدريبات
اللى قلتى عليها بتاعة
الكورس وتحطيها هنا يبقى
كترررررررررررررررررررررر
مليون خيرك ياطفلة جميلة وحلوة

Unknown يقول...

ايه دا؟
هو أنتِ
شيلتى الكومنت
موديرشن :مبروك
ولو ما كنا الفجر
كنت زغررررررررررط:)

صوت من مصر يقول...

مهما ضحكت فالاكتئاب هو صديقى
فاعلمى انى لن انسى اى شخص موجود على الارض مظلوم وانا اضحك بسخريه على تفاهات

صيدلانيه طالعه نازله يقول...

انتى عارفه انا اما ببقى مكتئبه و زعلانه بدور على ناس اتكلم معاهم
و الحمد لله اصحابى كتير و بيعرفونى من طريقتى يعنى اما اتكلم كتير و افتح مواضيع مالهاش علاقه ببعض ده معناه انى فى اسوأ حالاتى

دى طريقتى انا الشخصيه اما اكون زعلانه

على فكره كمان انا دلوقتى كل اصدقائى المقربين مدونين
و ده معناه ان مدونتى كانت وسيلتى للتخفيف من اكتئابى

ربنا يرجعلك صاحبتك بالسلامه و تفرحوا تانى مع بعض

محمد فؤاد (صاحب عمود النور) يقول...

موضوع الطاقه السلبي هوالايجابيه

انا حاسس انى بقيت قطب سال ماشى بيتحرك على الارض وماقتش عارف افرح او اتكلم وانا مبسوط ان فى حاجه كويسه هتحصل وكل الطاقات الايجابيه اللى بستمدها من اللى حوالى سرعان ما تزول ..الحمد لله

ايه موضوع الكورس بتاع الاتش ار دا افيدينى بيه اصل دا مجال شغلى

Lady E يقول...

اقصوصه: أكيد يا اقصوصة وكمان ياريته مرض نفسي وبيعدي ده بيعمل مشاكل تانية وممكن يعمل أمراض نفس جسمانية كمان

ربنا يبعد الاكتئاب عننا ويبعدنا عنه ويجعل كل أيامنا سعادة وفرح

غير معرف يقول...

والله ما اعرف اذا كنتى تعرفينى ولا لا


الفترة اللى فاتت ملخبطة اوووى ومبقتش عارفة انا اعرف مين ولا مين يعرفنى

بس لو جه الوقت المناسب بقول انا مين بس شخصيا لا منعرفش بعض

امممممممممممم حاجة مجنونة
اه من كام فترة كده بدات اغير وابعد عن حياتى الروتينية واعمل اى حاجة تخرجنى من الجو الللى انا فيه وتغير من اللاخبطة الللى انا فيه

فراشة يقول...

شفتى حتى النت مش عايزنى اعلق عندك يعنى سما والنت عليا هههههه

ربنا يرجهالك بالسلامه يارب وتفضلوا صحاب طول العمر

انا بجد حاسه بيكي قوي لانى كنت بسافر بالسنه واسيب كل صحباتي ببقى بجد حزييييينه جدا

ومبارك الكتب انا نفسي ف شويه كتب بقالي عمر مجبتش كتب بقيت جاهله قوي


وعشان انتى يا قمر جميله وطيوبه الناس بترتاح لك وتشكيلك بس حاولي متتأثريش لان كل الناس مكتئبه ف اكيد هتتعدي منهم :)

وبفكر آخد كورسات زيك اشمعنى انتى يعنى ههههه بس يارب الاقي بسرعه

بالتوفيق ف كل الحياه ...بحبك

شفـقــة و إحســــان يقول...

ايه الاكتئاب ده يا ليدى
انتى خلتينى مكتئبة عموما انا هدخل انام
هههههههههههههه
وحشتينى بجد
وبجد بجد زعلانة منك معرفش ليه بطلتى تسالى عليا
بس راحتك
عموما انا بحبك ووحشتينى فبسال اهو

Ana keda يقول...

وش مكسوف اوى

والله بجد بقالى اكتر من يومين بحاول اجى هنا والكمبيوتر عندى زى الزفت برضو نفس الحركة القديمة متفتكريش انى مطنشاكى او مش بسأل عليكى لا والله يا حبيبتى غصبن عنى وانا ناو عند ماما واول حاجة جات فى دماغى انى اجيلك

البوست حلو اوى وربنا يرجعلك حنين بالسلامة وغيرى مودك واخرجى ومتقفليش عليكى ابدا
وحشتينى

Lady E يقول...

psycho : أهلا بيك

رأي يشجع اني اقرأ الكتاب

شكرا ليك ونورت المدونة

Lady E يقول...

Bent Men ElZaman Da ! : ربنا يخليكي يا حبيبتي

عارفة اني مقصرة معاكي ومزورتش مدونتك بقالي كتير بس ان شاء الله هركب اول توك توك واجيلك :)

تسلميلي يا دودو

Lady E يقول...

norahaty : ان شاء الله هتبقى صداقة العمر يا د. نورا لأن دي صداقة بادئة من زمان أوي مش بس من الكلية او من الدراسة

وبجد حضرتك من الناس اللي بكون فخورة برأيهم وكلامك ده وسام ليا بجد

دمتي بخير

Lady E يقول...

norahaty : هيييييه حضرتك برضه عاشقة الشوكولاتة زيي

خلاص وعد ان شاء الله لما اجيب شوكولاته هفكر فيكي وبرضه لما حضرتك تجيبي شوكولاته كوليهالي :)

ربنا يحلي أيامك ويخليها اطعم من الشوكولاته

Lady E يقول...

norahaty : لااا تمشي ازاي قبل ما نضايفك يا دكتر ودي تيجي وعندك واحد اورنج جوس لدكتر نورا وصلحوااااااا

عايزة احط التدريب عالمدونة نفسها علشان يبقى موجود على طول مش بوست ويروح بس مش عارفة ازاي !

Lady E يقول...

norahaty : ايوة انا شيلته من زمان بس مش من كل البوستات

ومع اننا الفجر برضه بس انا هزغرط :)لولولولولولي :)

Lady E يقول...

صوت من مصر : مش معاك في الموضوع ده

لو اكتئبت اكتئابك مش هيزود في ظلم حد ولا هيمنع الظلم عنه

انت كده بتظلم نفسك

Lady E يقول...

صيدلانيه طالعه نازله : ربنا يسعد ايامك ويباركلك في اصدقائك ومدونتك وميحرمكيش منهم

حضرتك بجد انسانة جميلة وتستاهلي كل خير

Lady E يقول...

محمد فؤاد (صاحب عمود النور : اهلا بيك

يا ساتر قطب سالب مرة واحدة التشبيه ده صعب اوي وأكيد احساسك صعب
نصيحة غير شوية في روتين حياتك واعمل حاجة جديدة ومش معتادة

كورس الاتش ار اسمه Law of connection

اتمنى تيجي المدونة قريب وتقول انك بقيت قطب موجب

Lady E يقول...

يتبــــــــــــــــــــــــــــع باقي الرد عالتعليقات

الغاردينيا يقول...

معاك حق .. كبرها تكبر صغرها تصغر

ولو دخلنا عالم الكآبة صعب جدا نخرج

منه ... سلام عزيزتي

Lady E يقول...

star in the sky : ايه كمية اللخبطة دي يا ستار :)

عالعموم التغيير حلو وبيخرج من اي مود مش حلو

Lady E يقول...

فراشة : ولا يهمك يا فراشة المهم انك رديتي يا قمر

اللهم امين

ربنا يكرمك يا فراشة يا جميلة

وطالما عايزة تاخدي كورسات اكيد ربنا سبحانه وتعالى هيوفقك وتاخدي كورسات h.r

وانا كمان :)

نورتيني يا صبحتي

Lady E يقول...

شفـقــة و إحســــان : ههههههههه طيب احلام سعيدة يا شفقه

وانا اقدر برضه يا شفشوقه

وانا كمان :)

نورتيني

Lady E يقول...

Ana keda : مرمر حبيبتي ولا يهمك يا قمرايا

سلميلي على مامتك كتير

اللهم امين

نورتيني

Lady E يقول...

الغاردينيا : اهلا بيكي يا قمرايا

نورتيني