الأحد، 7 فبراير 2010

بوست ملوش اسم




بحاول أنقذ نفسي من بحر الاكتئاب واليأس اللي ممكن أغرق فيه ومحدش هيعرف يطلعني منه علشان كده بحاول ان المكتئبين ميزيدوش واحده وخصوصا ان الامتحانات خلت بصيص الأمل عندي يختفي في ظروف غامضة ومش معنى كده اني بكره دراستي بالعكس اللغة الانجليزية وآدابها دراستها رائعة بس معظم امتحاناتها فاجعه :(

أنا بحب المحاضرات وكلامي مع زميلاتي والاستفادة برأي الدكاترة ، بس مش بحب البيروقراطية وروح العداء اللي بين بعض الدكاترة المعقدين وبيننا فاكرين اننا داخلين معاهم حرب مع انها حرب غير متكافئة اطلااااقا

يارب كل الدكاترة المظلمين من جواهم يا تهديهم يا تهدهم
وربنا يكرم الدكاترة المخلصين واللي عايزين يعلمونا بجد لأنهم فعلا يستاهلوا كل التقدير والاحترام ويستاهلوا ندعي لهم ونفتكرهم بالخير دائما حتى بعدما نتخرج ان شاء الله

عايزة اروح معرض الكتاب بجد نفسي اروووووووح ولا مرة رحته مع اني دائما بروح معرض الكتاب اللي بيبقى في رأس البر عندنا في الصيف
وبمناسبة الكتب فدلوقتي بقرأ في كتابين عاجبينني افتوكالايزو للكاتب أسامة غريب وكتاب ملوش اسم للمفكر – هو بيحب اللقب ده وقاله عليه في كتابه- والمذيع والكاتب أحمد العسيلي ده غير طبعا كتب الرائع عبد الوهاب مطاوع الله يرحمه

مش عارفة ليه كل حاجه في الحياه بقت عادية وروتينية ساعات بحس اني old fashion
مفيش حد من البنوتات الحلوين اللي أعرفهم بيقرأوا ، احيانا زميلاتي في الكلية ساعات لما يشوفوا كتب معايا يتريقوا شوية على اسمائهم وبعدين ياخدوا من الكتب اللي معايا ويقرأوا منها :)
وأنا مقتنعة ان القراءة غذاء الروح _ والموسيقى كمان بس مش موضوعنا -

وسؤال حلقتنا النهاردة أقصد سؤال البوست ومحدش يربط بينه وبين الكلام اللي فوق : يعني ايه بنت مسترجله أصل انا بشوف ولاد متبنته كتير في الشارع اليومين دول يعني بياكلوا لبانه وطريقة مشيهم وكلامهم زي البنات وحتى ساعات بيرقصوا في الأفراح أحسن من البنات ، لكن مش فاهمه يعني ايه بنت مسترجلة طب ايه اللي يخلي حد يحكم على بنت انها مسترجلة؟

ع الهامش : انسى الآمك وأعلى على جرحك
تحلى ف عينيك الدنيا وتصالحك
طول ما نهار الخير بإمكانه
يطوى سواد الليل واحزانه
قطر الحياة
قطر الحياة عمره ما هيفوتك

كلمات بحبها من تتر البداية لمسلسل الدالي للشاعر ابراهيم عبد الفتاح
ع الهامش برضه : شيلت الموديريشن

هناك 24 تعليقًا:

Ana keda يقول...

مالك بس
عاتى يبنتى الطبيعى ان الدنيا حبة فوق وحبة تحت حبة تديلك وحبة تاخد منك لازم تتقبلى المواقف كلها برخامتها وغلاستها وتحاولى تتعاملى من المنطق ده
انا كنت فى المود ده لفترة ولسه فيه حبة ويمكن بكلم عشان اسمع نفسى كمان
البنات اصحابك فكرونى بيا ايام الكلية وكانوا مسينى طائر الوطواط
عشان كنت علطول ماسكة كتاب وقاعدة فى الكورنر لما القعدة متعجبنيش او ورقة وقلم واكتب
العيب مش فيكى العيب فى ناس مبقتش فاضية تعمل اى حاجة عشان تنمى عقلها
كونى انتى بغض النظر ده هيعجب الى حواليكى ولالاءا
اه بنت مسرجلة يعنى واخدة طابع الولاد يعنى ملهاش فى حورارات هن
الى هيا الواد ده واللول ده وهكذا
لو انتى كده خليكى واستمرى :)
بحبك اوى ومش عاوزة اشوفك كده بقى

لــــ زهــــــراء ــــولا يقول...

ليدى
-*-*-
تتر مسلسل الدالى حلو اوى وبيعبر عن حاجات كتير

بصى يا قمرايه مش انتى اللى اولد فاشون هما اللى بيبصوا على القراءه والكتب هما اللى هايفه فاشون
انتى عارفه انى كنت من هواة حضور المزادات وكنت ابقى مستمتعه بجد جدا جدا لما اتفرج على حاجه سينيه طبعا مش هاكدب واقولك انى كنت اشترى حاجه منها لكن بصراحه يعنى كنت اتفرج واعرف ازاى المزاد يتم وبيتعرض فيه حاجات نوعيهتا ايه المهم حتى لا اطيل عليكى كنت مع ناس وباقول امامهم انى رايحه مزاد مش خلصت من التريقه عليهم ولما قولت بعد شويه انى رايحه هيئة الكتاب لانى ابحث عن راويه لاقيت بنوته كده تافهه وسطحيه بتقولى هو فى حد لسه بيقرا وسالتنى هو انتى تعرفى حاجه عن النت قولت لها نت يعنى ده وطبا ضحكت فى سرى وقولت خليها تعيش الدور
يا بنتى خلى اللى عاوز يسوف اننا اولد فاشون يقول دع القافله تسير والكلاب تعوى

اما بقى بالنسبه لموضوع البنت المسترجله ممكن يكون المقوصد بها شكلها يعنى طريقة لبسها او طريقة كلامها ناشفه رغم انى مش من هواة الحكم على الناس بشكلهم لكن فى ناس كده
معلش رغيت كتير
ربنا يصلك لكى الاحوال ويفرح قلبك ويسعد ايامك

زهراء

لــــ زهــــــراء ــــولا يقول...

ليدى
سورى على الغلطات الاملائيه والله انا باعرف اكتب عربى كويس بس زى ما تقولى كده الكيبورد زهقت منى

زهراء

R-H-S يقول...

حلوه ولد متبنت دي الواد اللي كارف علي بنت دا ولمؤخذه ميبقاش راجل دا يبقي حاجه تانيه

اما البنت المسترجله دي اكيد يعني بنت بتفهم وبتعقل الامور علي ما اعتقد

تحياتى

KEBLAWYAT يقول...

فعلا فيه دكاتره معقده تحسى انهم بينتقموا منك .. مش بيعلموكى


معرفش يعنى ايه بنت مسترجله ... بس اعتقد ان لو البنت اتقال عليها مسترجله " بمعنى جد يعنى " فده مش وحش أبدا

انتى شيلتى الموديريشن ليه ؟ مع انها ماده سهله يعنى

بسمة انور يقول...

ربنا يهدهم يارب الدكاترة المعقدين دول
ياااااااااااااارب

روقى يا قمرايتى
فى قمر يكتأب ؟؟؟ مش معقول

امووووووووووواه
وحشانى كتيييييير

راء يقول...

السلام عليكم

بصي يا قمر كل الليي يبص للكتاب على انه موضه قديمة يبقى هوا اللي قديم لأنه لو يعرف الجهد اللي بيتبذل في كتابته او ممكن يستفيد ايه لو قرأ كتاب ممتع بجد مش اي كتاب هيعرف قيمة القراية..

انا قرأت كتاب ملوش اسم من فترة..عجبني فيه بعض الحجات بس مش كله معجبتنيش شوية ف اوله تطرقه للدين ..في الشابترز الاولانية من الكتاب اقصد

البنات المسترجلين على حسب ما بيقولولي كده اللي هما بيتشبهوا بالولاد سواء ف التصرفات أواللبس

بالنسبالي مش بتمثللي مشكلة لأن كل واحد حر مادام عارف الصح من الغلط ومادام مش بيئذوني خلاص..

تحياتي

سواحة يقول...

موضوع
تريقة زملاء الكلية لرؤية كتاب
ياه لسه لحد دلوقتى:-)))

بتقرى ثلاث كتب فى نفس واحد انك لمتمكن :-))
طيب كلمينا عنهم

بنت مسترجلة
زمان على الى بتلبس بنطلون
وبعدين كمان بقت الى بتقص شعرها قصير
بعدين على الى كمان كلمها خشن و جاف بدون دلع
و بعدين وبعدين و بعدين
علينا كل البنات :-))))))لو عرفوا يعيشوا حياتهم بدون رجال :-))))))
حتى لو لبسه جيبة
و شعرها طويل
و بتدلع اخر دلع
:-))

غير معرف يقول...

انا غرقت فيه و دخلت فى البحر اللى بعده الاستستلام والتخلى عن كل شىء
وبرده عديته وبحاول اسمى البحر اللى
انا فيه بس مش عارفة

الكلية احيانا حلوة واحيانا وحشة بس الدكاترة اغلبهم بيكون سىء مش عارفة ليه ربنا يهديهم يا يهديهم حرام برده ندعى على حد هههههههههه


بخصوص معرض الكتاب ياااااااااااااه نفسى موووووووت احضره بس حصل خير يمكن كمان سنة ولا تلاتة ولا حتى عشرة اقدر اجى احضره :D
وفعلا القراية دى امتع شىء ممكن الواحد يعملها هى والكتابة وعزف موسيقى مع انى لسة متعلمتها

نيجى بقى لسؤال حلقتنا اقصد البوست
البنت مسترجلة اعتقد انها بيبقى المقصود بيها برده نفس فكرة ولد متبنته يعنى مثلا تلاقيها فى لبسها تميل لهدوم شبه الولاد وصوتها وطريقة كلامها تشبه الولاد ملهاش اى علاقة بالرقة والدلع بتاع البنات حتى ممكن قصة شعرها تلاقيها تشبه الولاد ومشيتها تلاقيها ممكن تمشى بسرعة مش المشية المستعجلة لا مشية تشبه الرجالة او الولاد مش عارفة بس احسها كده يعنى الموضوع كله بيبقى مقصود بيه سلوكيات

يلا بقى فين الجايزة بتاعتى
ههههههههههه

معلش بقى طولت عليكى من الصبح برغى

صوت من مصر يقول...

اظن ان الاكتئاب ولد معى بعض من الافكار المبدعه

الشعب لابد له من حكومه تشكمه يقول...

انتى فين يا بنتى:( مش بشوفك خالص.

هو بحر الاكتئاب وصلك انتى كمان؟؟:))

استنى نجيب باه العوامات ونعيييييييييش:)

كفايـة طيبـة يقول...

اكتئاب مممم
كويس انك بتعافرى معاه
طول مانتى بتحاولى المكتئبين ميزيدوش واحدة ربنا يسهل ان شاء الله
دراستك جميلة اوى :)

بالنسبة للمعرض هو مستمر لغاية 13 فبراير... لو قدرتى تيجي فى يوم وترجعي فى نفس اليوم هتبقي فرصة حلوة اوى

لــــ زهــــــراء ــــولا يقول...

ربنا يبعد عنك الاكتئاب انا كمان حبيت دوووووووري
افتكري كلامها لما الدنيا تكشرلك عوم واتمخطر عوم واتمخطر بالمناسبة دا صوت عبلة كامل

البنت المسترجلة واحدة قررت تعيش في جلباب ابيها
لاما كانت بتشوف قهر الرجل للمرأة فقررت تتمرد على انوثتها لاما بتقول للولد متشوفش جمالي لما تكلمني عاملني بالند

لــــ زهــــــراء ــــولا يقول...

لولا وزهراء يقول...
ربنا يبعد عنك الاكتئاب انا كمان حبيت دوووووووري
افتكري كلامها لما الدنيا تكشرلك عوم واتمخطر عوم واتمخطر بالمناسبة دا صوت عبلة كامل

البنت المسترجلة واحدة قررت تعيش في جلباب ابيها
لاما كانت بتشوف قهر الرجل للمرأة فقررت تتمرد على انوثتها لاما بتقول للولد متشوفش جمالي لما تكلمني عاملني بالند

08 فبراير, 2010 02:59 م

مقولتش انا مين

لـــولا

SHAPE YOUR LIFE (ABOALI) يقول...

اممممممممممممممم
نيجى لاول نقطه اللى هى ان الاستاذه ليدى على مشارف اكتئاب...ان شاء الله كل خير يا ليدى والنتيجه هتتفاجئى بيها وكمان تقريبا انتى فى اخرسنه على ما اعتقد وبكره هتشتاقى للايام دى حتى لغلاسه الدكاتره اللى هى موجوده دايما.
ثانيا بالنسبه لمعرض الكتاب طالما عندك وقت انصحك تروحى وتزوريه لانه بيكون فيه مجموعه كتب رااائعه مش هتلقيها فى مكان تانى.
بالنسبه بقى للقراءه فالبنات اللى تتريق عليكى هم اللى ماشيين مع التيار السطحى والروتينى وانتى طبعا الاصح والاكثر تميز لانه عذاء للعقول والروح ومهم لبناء شخصيتك وعقليتك طبعا.
بالنسبه للمراه المسترجله هى فى وجهه نظرى اللى فقدت حياء وخجل الانثى سواء فى اللبس او طريقه الكلام او الصوت او التصرفات والاحتكاك بالرجال والاولاد بطريقه لا تناسب طبيعتها بمعنى انها بتاخد مكان غير مكانها الطبيعى.

بالنسبه لاخر كلمات من تتر الدالى
ايوه كده يا باشا خليك مع التفائل الجميل ده ومبتسم دائماوربنا يوفقك ان شاءالله.

صيدلانيه طالعه نازله يقول...

ليه بس تكتئبى الحياه فيها حاجات كتيره حلوه بس مش باينه و تستاهل اننا ندور عليها و اما تلاقيها تاكدى انك حتبقى سعيده باكتشافك
بالنسبه للدكاتره بقى يا اختى فيايهدهم يا يهدهم
هههههههههههههههههه
اصلهم كده من زمان و مفيش فايده و لا دعا بيحوق

Unknown يقول...

حلوه مدونتك يا قمر
ومتفكرنيش بامتحانات اللغات
محسوبتك قسم لغه عبرية وادابها :(

Lady E يقول...

Ana keda : مرمر حبيبتي

أينعم حبه فوق حبه فووق وحبه تحت حبه تحت بنغني لأحمد عدوية :)

ربنا يعدي المود ده على خير ويبقى بعده حاجات مفرحه ترفع من روحنا المعدنيه

يا خبر طائر الوطواط بات جيرل :) المفروض يسموكي عصفور الجنة او الكناريا أو الفراشه مش وطواط
هما اللي وطواط

هو انا مليش في كتير من حوارات هن اللي كتير منها بيبقى هايف بس مينفعش ميبقاش ليا في كل الحوارات لأني انثى

وانا كمان بحبك اوي يا مرمر ويلا نطلع من المود سوى

منوراني دائما يا حبي

Bent Men ElZman Da !! يقول...

لازم كل كليه يبقى فيها دكاتره معقدين نفسيا كده
وفى الغالب الطلبه هما اللى بيكونوا الضحايا
انا بردو ماليش اصحاب كتير بيهتموا بالقرايه وياريتهم بياخدوا كتب منى يقروها
لا دول بيقولوا عليا بعمل عليهم مثقفه
لدرجه انى بقيت حاسه ان القرايه وباء وهادارى منه بعد كده هههههههههههه
اما معنى بنت مسترجله دى عكس ولد متبنت بالظبط :D
يمكن قصدهم بنت قافشه ومكشره على طول وضاربه بوز وماتهزرش وبتتكلم مع حد
او يمكن قصدهم على لبسها انه زى الولاد
كل ولد حسب تفكيره وجهه نظره بقى :D
ربنا يبعدك عن الاكتئاب يا حبيبتى :)

Lady E يقول...

لولا وزهراء : أيوة مين بينادي :)

فعلا التتر كلماته جميلة والمزيكا كمان وصوت وائل جسار خطييييييير

الله حلوة الهواية دي بجد وجميل انك تدوري على رواية لغاية لما تلاقيها وتقرأيها

ما شاء الله عليكي يا زهراء دماغ ربنا يحميكي

هي مش فكرة ان حد يشوفنا اولد فاشون بس هي فكرة اننا نشوف نفسنا احيانا اولد فاشون

والحكم على الناس بشكلهم دي مشكلة تانيه ساعات كتير الجوهر بيبقى غير المظهر نهائيا

اللهم أمين وليكي مقل دعائك يا حبيبتي

و ولا يهمك عارفه انك بتكتبي بسرعه والكيبورد مضايقاكي

Lady E يقول...

عاوز اصحي :يا خبر ابيض يعني البنت اللي بتفهم تبقى مسترجلة عاااا

Lady E يقول...

قبلاوى : اينعم

هههههههههههه ربنا يسعدك يا د.قبلاوي يارب انا قرأت الكومنت أول مرة وانا في الكتكوتة وضحكت بجد وفضلت كل ما افتكر الكومنت أضحك وكل الناس طبعا حسوا اني عندي تاتش هبل

ربنا ميجيبش شيل مواد ابدااااا ياارب

Lady E يقول...

بـــــسمة انـــــــــور : أميييييييييييييييييييين

انتي اللي قمر يا بسبوستي يا جميلة

اموااااااااة

Lady E يقول...

يتبع طبعا