الجمعة، 17 يوليو 2009

انا والمفاجئات بنحكي حكايات + تحديث

تحديث : حصل معايا النهاردة مفاجئتين بجد فرحت بيهم جدا
بجد شكرا :)
..................................
حاولت انشر الصور بتاعت رحلتنا من مصر لسلطنة عمان وبعدما الصور طلعت عينيا في رفعها ساعتين واذ بالكمبيوتر يحلف 100 يمين انه مش هيشتغل وفضلت احايله ميردش اقوله يا كمبيوتر ميردش اقوله يا جميل ميردش وفي الاخر قولتله عنك ما رديت وعملتله ريستارت طبعا البوست اتمسح عااااااااا قولت هكتب بوست تاني عن صلالة رفعت صور من صلالة وانا في نص البوست مسحته عااااااااااا وبعدين انا عايزة اكتب النهاردة بس هكتب واقول ايه؟


خير اللهم اجعله خير انا حاسة ان تنطبق عليا اغنية المطرب الفظيع رامي صبري : كلمة كلمة توديك او كلمة تجيبك اهو انا كدا بالظبط ممكن ابقى فرحانه ومفرفشه ورومانسية وفأجه كلمه تقلب مودي كله للعكس او اكون مخنوقة مثلا واسمع كلمه حلوة والاقيني بقيت ماشيه وسط السحاب مع النجوم والقمر حبيبي

وكمان من الحاجات اللي بتأثر في مودي المفاجأه بحب جدا المفاجأت والحمد لله حصلت في حياتي شوية مفاجأت كتير منها الحلو ومنها اللي مش حلو


وفي شعور مسيطر عليا جدا اليومين دول ان هتحصل في حياتي ان شاء الله مفاجأه سعيدة جدا وانا هكون فرحانه بيها جدا السنة دي بس ايه نوع المفاجأه بالظبط مش عارفه الله اعلم ويارب ظني يكون في محله وتكون مفاجأه سعيدة

من المفاجأت اللي مش قادرة انساها ولسه لما افتكرها بفرح بيها :-

في ثانوية عاميه كانو بيكرموا الطلاب المتفوقين وانا طبعا وبكل فخر مكنتش من ال3 الاوائل وكنت هموت واطلع اتكرم زي البنوتات اللي بيتكرموا وفجأه الاقيهم بيندهوا اسمي انا حسيت اني بحلم واتكرمت مرتين واخدت هديتين واحدة كأفضل نشاط في المدرسة في الموسيقى والاذاعة مع ان موضوع الموسيقى دا في حد ذاته كان اكبر هدية ليا كنت كل يوم بعزف في الطابور نسم علينا الهوا من مفرق الوادي بتاعت فيروز او بعزف فينو حبيبي فينو بتاعت هشام عباس ههههههه على اساس ان محدش فاهم حاجه في الموسيقى غيري انا وزميلتي اللي كانت بتعزف معايا
والتانية كانت الطالبة المثالية في القراءة في المكتبة المدرسية وكنت مستغربة موضوع المكتبة دا جدا لأن كان من قوانين المكتبة استعارة الكتب يومين وانا كنت بخلي الكتب عندي 4 ايام وفي تالت يوم كل مرة يقولو في الاذاعه على الطالبة ليدي انها تجيب الكتاب الفلاني وتدفع غرامه وقدرها كذا يعني الفلوس اللي دفعتها جابولي بيها هديه :)


برضه وانا في ثانوية عاميه كنت مضايقة جدا يوميها وبعيط بشكل مش طبيعي وفجأه بابا قال لنا يلا علشان هنخرج وخرجنا مع بابا وانا مش عارفه هنروح فين ولقيتنا روحنا مكان في وسط الصحرا ومن اول الطريق في حاجات ضخمة منورة زي الشموع بس مش شموع ومنظرها تحفة قمة في الرومانسية ووصلنا في النهاية للمسرح الموسيقى العربية من مصر كانو عاملين حفلة وكانت حفلة جميلة بجد نستني اني كنت في ثانويه عاميه اصلا :)


وغيرها مفاجئات كتير بس مش هطول البوست اكتر من كدا بس انا حتى بحب المفاجئات لما بشوفها في الافلام
يعني مثلا في الفيلم دا حصلت حاجات كتير خلت البطل والبطلة عمرهم ما هيتجوزوا في يوم من الأيام ومع ذلك حصلت مفاجأه واتجوزوا وفرحت اوي في الشوريرين اللي كانو في الفيلم انا بحب الفيلم دا جدا مع اني شوفته مرتين بس







جاك وروز في فيلم تيتانيك حبيب الملايين الفيلم دا اتفرجت عليه كتييييييييير بس طبعا كان محذوف منه برضه مشاهد كتيييييييير والجميل ان جاك كان كل شوية بيفاجئ روز كان عاجبني اوي مفاجئات جاك دا طبعا غير حنيته وانه بيحب روز اكتر من نفسه لدرجة انه اتسجن علشانها ومات كمان علشانها وهو دا اللي بيسموه الرومانسية الخيالية مع ان قصة الفيلم قصة واقعية بس بجد فيلم مليان مفاجئات في البداية ان جاك كسب التذاكر بتاعت رحلة السفينة تيتانيك وانه انقذ روز من الانتحار وقال لها مصيرنا واحد لو نطيتي هنط معاكي ولما وقفوا في بداية السفينة زي الصورة اللي فوق ولما روز نزلت مع جاك للطبقة التالتة من السفينة ورقصوا سوى ولما ضحكوا على اللي بيطاردوهم وهربوا منهم كلها مفاجئات جميلة

واخيرا نطلع من البوست دا بسؤالين مهمين

يا ترى بتحبوا المفاجئات زي حلاتي ولا بتحبو كل حاجه تمشي بالورقة والقلم؟

ممكن تحكي احلى مفاجئة حصلتلك في حياتك؟

هناك 28 تعليقًا:

الشعب لابد له من حكومه تشكمه يقول...
أزال المؤلف هذا التعليق.
الشعب لابد له من حكومه تشكمه يقول...

التعليق الاولانى طلع بايظ:)) مفاجأه برضه لما شفته:)
ربنا يسعدك يارب كمان وكمان...ممممم انا بحب المفاجات بس تكون حلوه لو مش حلوه بلاها:)
مفاجأه حصلتلى:)مممممممم كتير والله بس بما انهم حجات من الماضى فمش عاوزه احكى عنهم:(

احساس طفلة محبة للرومانسية بس واقعية يقول...

تصدقى مشفتش فيلم تايتنك و مش عايزة اشوفة خالص حاسة انى هبكى وانا مش بحب اى فيلم رومانسي فية بكاء وفراق وكدا

انا بحب المفاجئات جدا سواء هدية
او رحلة او خبر حلو و معتقدش ان فى حد بيحب الروتين بس اكتر حاجة بتفرحنى رحلة او خروجة لمكان نفسى اروحوا

واكتر خبر فاجئنى واسعدنى كان لما نزلت مصر هو خطوبة اخويا و كانوا محددين الميعاد فى الشهر اللى انا موجودة فية وبجد من احلى ايام حياتى اللى استنتها كتير وفرحت واتفاجئت بيها كتير ربنا يسعده هو وخطيبتة

ان شاء الله المفاجئة اللى مستنياها
وحاسة انها هتيجى تكون سعيدة
وتغير حياتك للافضل

تقبلى مرورى

Bent Men ElZman Da !! يقول...

الاول الحمد الله انك مبسوطه يا جميله ويارب دايما :)
ومعلش على البوستين اللى طاروا من غير ما يتحطوا
بس مش هتنازل عن انك تحطيلنا صور رحلتك بردو :D

انا بحس ان اجمل حاجه فى الحياه بجد المفاجأت
جميل اوى انك تكونى مش متوقعه اى تغيير وتلاقى حاجه جميله بتحصلك
بيبقى احساس حلو اوى ومش بيروح بسهوله

المفاجأه الوحيده اللى انا فاكراها دلوقتى
ان مره كانت والدتى تعبانه واتفاجئنا ان خالتو وبنتها جت من السفر عشانها فجأه من غير ما يقولوا لاى حد فينا خالص
وانا ماكنتش شوفت بنت خالتى دى من حوالى 9 سنين تقريبا او اكتر
كنت مبسوطه اوووووووووى
المفاجأه بصراحه رغم انها فى ظروف مش تمام بس غيرت احساسى خالص وخلتنى مبسوطه

بحب اوى فيلم تيتانيك بردو مفاجأته حلوه اوى الا اخر مفاجأه :(

VÖltaa يقول...

انا بموت فى المفاجات
وعلى فكرة بوست جميل اوى ياليدى

وعامة مفاجات فى حياتى مكنتش حلوة اوى
بالعكس كانت اغلبها وحشة
ولو عايزة احكيلك مفاجأة

هى مفاجأة لسة حاصلة من حوالى ساعة
بس مفاجأة تقييييييلة اوى
لغاية دلوقتى مش عارف حلوة ولا وحشة

حروف يقول...

ليدي حببتي ميرسي علي اني مفاجاتي اسعدتتك ان شاء الله مش اقفل المدونة تاني
وانتي كمان مفاجاتك حلوة خالص
ربنا يفرحك دايما اة بحب المفاجاة جداااااااااااا
دمتي بالف خير

♥نبع الغرام♥♪≈ يقول...

الله الله على مفاجئتك


يا نونو

هههههههه

ستيتة يقول...

بحب المفاجأت؟
ده سؤال
أي أنثى تحمل كرموسومين إكس لازمن ولابد تموت فرحا من حبها في المفاجأت

ربنا يحقق لك اللي انت حاسة بيه

حصلت لي مفاجأة؟
حتة مفاجأة تحفة وقدر رائع من رب العالمين
بس بعينيكم اقول لكم "وش مطلع لسانه"

أميرة علي كوكب مهجور يقول...

ازيك الاول والحمدلله ان مودك حلو ويارب دايما والمفأجات اللي حصتلي كتير اوي و بحس انها كرم من ربنا واجمل مفأجأه حصتلي مقدرش احكي عنها باكتر من كلمة "هو"

Lady E يقول...

الشعب لابد له من حكومه تشكمه : طلع بايظ ازاي يا شيمو محطتيش فيه بيكنج بودر ولا ايه نياهاهاهاهاها

ومين مش بيحب المفاجأت الحلوة

ولا يهمك انا كان قصدي مفاجئات حلوة بس بما انك مش عايزة تحكي عنهم فعليكي ربع جنيه نياهاهاهاهاها :)

نورتي الفيرست كومنت

غير معرف يقول...

مين مش بيحب المفأجات!!!
احلى مفاجأة ممممممممممممممم
الصراحه مش فاكرة بس بجد بفرح لمة اجى كل اسبوع والاقى نفسى نزلت كتير بجد بتنتط قدام الراجل وامشى بوقى مفتوح ولا نفق شبرااا وبحس انى عايزة احضن كل الناس واغنى سكر حلوة الدنياثكر!!
عوووووووو

ديالا يقول...

ليدي

عاده انا بمو في المفاجات

تصدقي انا كمان حاسه ان فيه حاجه حلوه اوي هتحصلي السنه دي بس ايه تحديدا مش عارفه

معلش مقصره معاكي بس فعلا عندي كميه افراح كتيره جدا

تقبلي مروري

blue-wave يقول...

الله عليكى
انا عارف واحدة من المفاجئتين دول:))
اقول؟؟؟
بجد بقى
انا مش بحب المفاجأت
بالعكس انا بقيت بتخض منها
يمكن علشان الفترة اللى فاتت كانت كلها مفاجأت غير سعيدة
عموما
بوست رائع وملخبط كالعادة:))
تحياتى

كــركــبــة دمـــاغ ㋡ يقول...

طبحا بحب المفاجات الحلوة ..

احلى مفاجاة ..


ممممممممممممممم


مفيش حاجه فاكراها ابداااااااااا..

تفتكري مفيش !!

لالالا انا هقول اي حاجع تحسب مفاجاة ..

اما خدت نتيجتي السنه دي ولقتني ما نقصتش فـ الرياضيات الحمد لله ..

البوست ده جميل ..

حمد لله عـ السلامه ..

تحياتي ليكي يا رومانسيه انتي ..

youssuf يقول...

موضوع الأوائل دة فكرني بموقف ليا في اعدادي برضه لما كاناو كل مرة بيكرموا الأوائل و انا مبطلعش لحد في مرة حصلت المفجأة و قالوا اسمي و طلعت اتكرم عشان جيت الدرجة النهائي في الرسم ... اه والله تخيلي ...

واضح انك بريئة جدا في إحساسك ...
و عجبتني المدونة اوي

Lady E يقول...

احساس طفلة محبة للرومانسية بس واقعية : من ناحية هتبكي فهتبكي فعلا لو شوفتيه يا احساس طفله


والف الف مبروك على خطوبة اخوكي ربنا يسعده هو وخطيبته يارب ويتمم لهم على خير ويفرحهم

واللهم امين
تسلميلي يا حبيبتي

Lady E يقول...

Bent Men ElZaman Da !! : نياهاهاها اوعدك اني هنشرهم في يوم من الايام يا دودو وعالعموم الرحلات جايه كتير :)

عندك حق احساس المفاجئة الجميلة بيكون احساس جميل اوي

وحلوة اوي المفاجئة اللي حصلت معاكي
ربنا يباركلك في مامتك وخالتك وبنوتتها وكل اللي بتحبيهم

وبالنوسبة لتايتنك ف اخر حاجه حصلت مفاجعه مش مفاجئة خالص !!

Lady E يقول...

Mo7ammed : تسلم يا محمد

يارب كل المفاجئات اللي تحصلك تكون حلوة وخصوصا المفاجأه اللي قولت عليها

Lady E يقول...

حررروووف : نورتيني يا حبيبتي

وربنا يجعل حياتك كلها مفاجأت حلوة

Lady E يقول...

عاشقة الأحزان : ههههههههه ماشي يا ايناس

Lady E يقول...

ستيته حسب الله الحمش : ربنا يجعل كل ايامك مفاجئات جميلة يا د. ستيتة

واللهم امين

وانا عرفت المفاجئة دي من غير ما تقوليها :) ربنا يسعدك بيها دايما يارب

Lady E يقول...

أميرة علي كوكب مهجور : الحمد لله بخير طول ما انتو بخير :)

ربنا يسعدك معاه ويجعله اجمل واغلى واحلى مفاجأه حصلتلك في حياتك

Lady E يقول...

كيكي : ربنا يحقق لك اللي بتتمنيه يا حبيبتي ويسعدك دايما

Lady E يقول...

ديالا : يارب ان شاء الله المفاجأه الحلوة اللي حاسة بيها تتحقق

وربنا يكتر افراحنا وافراحك وافراح المسلمين

Lady E يقول...

blue-wave : معتقدش ان حضرتك عارف المفاجئتين او واحده فيهم !!

Lady E يقول...

شقاوة مراهقة : اهلا بيكي يا قمرايا

والف مبروك على التفوق في الرياضيات ويارب دايما متفوقة

نورتيني

Lady E يقول...

youssif : حلوة اوي المفاجأة دي ومختلفة كمان لأن اي حد صميم ودحاح ممكن يبقى من الأوائل لكن الدرجة النهائية في الرسم مش اي حد يعرف يرسم كويس

شكرا على المجاملة

نيللي علي يقول...

أنا بعشق المفاجأت جدا..وعرفت دلوقتى ليه ؟امبارح أنبسطى لما لقيتى انى كاتبه انوس فى أخر القصه عشان اتفاجأتى ..بجد كل كلمة ياانوس كاتبها تدخل القلب وتخلى العقل يفكر فيها ..تسلمى ياانوستى