الثلاثاء، 14 يوليو 2009

احلام على الرمال


كنت بتأمل في جمال البحر وهدوئه وكان في اطفال بيلعبو وعملو بيت جميل من الرمل وكانو فرحانين اوي وسابو البيت وراحو يلعبو كورة وفجأه جت موجة كبيرة من البحر وحطمت البيت الجميل دا
ولقيتني بفكر في فكرة غريبة بفكر في العنكبوتة او زي ما بيسموها الأرملة السوداء بعد ما بتلبس الفستان الأبيض الجميل والطرحة وبتفرح مع عريسها وسط المعازيم وبعد ما بيكونو طايرين من الفرحة بمجرد ما الفرح بينتهي العنكبوتة بتقتل العنكبوت !! عملا بالمثل اتغدى بيه قبل ما يفطر بيا ولغاية دلوقتي مش قادرة افهم ازاي العنكبوت بيوافق على كدا ويا ترى بيكون عارف انه هيتقتل بعد الفرح والزفة ؟ قصص حب كتير تأملت فيها والحمد لله كلها فاشلة وفعلا محدش بينجرح اوي الا اللي بيحب اوي بس للأسف الجرح دا بيفضل اثره ظاهر مهما الانسان حاول ينسى او يسامح برضه بيفضل الألم دا يظهر من وقت للتاني ويقول للمجروح حاسب ممكن اوي تنجرح تاني وتالت حتى بعد الاعتذار انا اسف ومش هفضل كل مرة اعتذر يااااه اد ايه الكلمة دي بتضايق يعني انتا اللي جرحت وفي نفس الوقت مضايق انك بتعتذر حاجه غريبة !
نرجع للعنكبوتة يا ترى عندها حق في انها تموت العنكبوت اصل بعد الفرح هتيجي المسؤلية هتلاقي انانية العنكبوت ظهرت هتلاقيه عايزها تعمل كل حاجه وهو مش عايز يعمل اي حاجه , مش عارفه بحس ان الجواز في مملكة العناكب بيبقى قائم اساسا على الاستغلال يعني هي تعمل كل حاجه وكمان يشتكي بعد كدا انها بقت شبه رجل الكنبه ف العنكبوتة عارفه السيناريو دا من الأول فبتقتل العنكبوت عالاقل يبقى له ذكرى حلوة قبل ما يموت ومع ان دا منطق غريب بس لو اتطبق على البشر هتبقى مشكلة :)
مش عارفة ليه اي احلام رومانسية ضاعت مني مبقيتش بحلم بأي حلم رومانسي كل احلامي الرومانسية اتحطمت على ارض الواقع ومبقتش بحلم غير لمستقبلي ما انا مش هتخرج من الكلية أأقشر ثوم والا مكنلوش لازمة التعليم من الأول وان شاء الله مش هاخد الشهادة لمجرد انها شهادة وخلاص

هناك 35 تعليقًا:

♥نبع الغرام♥♪≈ يقول...

اوووووول تعليق حجزززززززززززززز


اوعا حد يدخل اموته
ههههههههههههه

♥نبع الغرام♥♪≈ يقول...

الحمد لله


اول كومنت ياناس


انا مبسوطه قوووووووى

لولولى لولولى لولولى

♥نبع الغرام♥♪≈ يقول...

السلام عليكم


وحشتنى قووووووووووى

بجد حلمك جميل قووى فكرتينى بحاجات جميله قووى مرت بحياتى حبيبتى

وانا معاكى مستقبلك اهم من اى شىء

خدى شهادتك واشتغلى وحققى ذاتك بالحياه
وان شاء الله ربنا معاكى ويحقق ليكى كل ما تتمنى

وبدعليك من كل قلبى
ربنا يسعدك حياتى

اه على فكره انا نزلت بوست جديد حالا ومحتاجه رئيك
سلام حبيبتى

امووووووووه
بحبك قووى
ايناس

Ahmed يقول...

اللي بيبني احلامه على الرمل, بيعرضها لخطر أبسط وأول موجه

واللي يتجوز العنكبوته, يستحمل لدغتها

تفتكري فعلا هوا عارف؟

غروب يقول...

ليدي

ازيك يا قمر

وحشانى اوى والله واعذرينى على التاخير

بس انا مش معاكى انك تتخلى عن احلامك

احنا لو نزلنا اوى لارض الواقع هنتعب

عرفت انك نجحتى الف مبروك يا قمر ومبروك عليكي الليسانس ومش تخافي

وادعيلي

Lady E يقول...

عاشقة الأحزان : هههههههه تم الحجز بنجاح

وبلاش الروح الشوريرة دي متقلديش العنكبوتة :)

احساس طفلة محبة للرومانسية بس واقعية يقول...

الاول خلينى اقولك على ردك على البوست اللى فات ان فعلا احنا لما بنركز فى حاجة جامد ونفكر فيها كتير بنسلط عليها الضوء وتحصل اقتنعت بدا جدا بعد ما شفت الفيلم الوثائقى دا the secret
http://www.youtube.com/watch?v=zNCARQdGHBQ&feature=related
يارب يعجبك

بالنسبة للعنكبوت اعذرينى مش عندى اى خلفية عن ان العنكبوتة اللى بتقتل العنكبوت ولا اى حاجة عن الحشرات او تحمل اسم الحشرات لا علاقة لى بيها نهائيا

بس بالنسبة للمضمون
اختلف معاكى اختلافى كلى
مهما حصل مش لازم نتخلى عن رومانسيتنا انتى يا بنتى لسة فى سن التفكير فى المستقبل كتير ودا ضرورى طبعا بس مش معناه اننا نتخلى عن رومانسيتنا احلمى وحققى احلامك من حقك يكون ليكى افكار واحلام بس خلي معاها ايمان بالمشاعر
متكتفيش بالمشاعر السطحية
يمكن بالنسبالى الرومانسية هى عبارة عن التعمق فى المشاعر
بس يمكن بالنسبالك هى علاقات الحب
بس حتى لو ان شايفة ان الزواج مش بيمنع الحب ولا الرومانسية ومش كل اللى بيحب اوى بيتجرح اوى

ساعة ما هكون فى حب وجراح بتهيألى هنكون احناغلطانين مش الحب ولا الرومانسية لاننا اخترنا غلط واوهمنا نفسنا انه حب بدون ما عقلنا يفكر صح ويوافق علية او حتى قلبنا لانه كمان استجاب لقلب مش لية ولا حاسس بية عشان كدا جرحة

تقبلى مرورى

Lady E يقول...

عاشقة الأحزان : لولولولولي مبروك عليكي يا اوختشي :)

Lady E يقول...

عاشقة الأحزان : وعليكم السلام ورحمة الله وبركاته

هو مكنش حلم هو كان تأمل يا انوسه

ويارب فعلا اخد شهادتي والكورسات اللي نفسي ادرسها واشتغل لاني لو معملتش كدا حاسة ان حياتي مش هيبقى ليها لازمة لان دا حلم كبير وان شاء الله احققه

ربنا يكرمك يا حبيبتي واللهم امين وليكي مثل دعائك ان شاء الله

وعيب عليكي طبعا لازم ازورك واقولك رأيي في البوست

Lady E يقول...

أحمـــــــــــــد أبو العلا : ههههههههههه بجد ربنا يسعدك لان الكومنت بتاعتك دمها خفيف اوي

اول حاجه اللي بيبني احلامه على الرمال يمكن مبيبقاش شايف امواج البحر او بيمني نفسه ان امواج البحر بعيد عنه وعن احلامه

واللي بيتجوز العنكبوتة لازم يكون عنكبوت زيها نياهاهاهاها وبعدين فعلا لدغة العنكبوتة دي صعبة اوي وبتأثر ع الجهاز العصبي فورا !!

وبالنوسبة لسؤالك فأنا محضرتش فرح عنكبوت وعنكبوتة قبل كدا علشان اسأل العريس :))
لو شوفته ابقى اسأله (وش بيطلع لسانو)

mohamed ghalia يقول...

ايه كتلة الإحباط ده
بجد ركزى كده واهدى
عندى بس رد صغنن على ردك على تعليقى التوبك الى فات
أيوة صح الناس الى قولتى عليهم نجحوا فى كتاباتهم عن ذاتهم بس ده بيكون فى نهاية المشور
مش فى أول خطوة هو ده الى اقصدة
وبالتوفيق إن شاء الله

بنجاواتى يقول...

السلام عليكم

اولا احب ابارك واهنى بمناسبة النجاح وما تنسيش الناس اللى وقفوا جمبك-هو مش جمبك اوى- ليلة امتحان الحضارة من زمان ايام ما كنت بكتب بوستات

ثانيا مش عارف ليه انا تهت شوية فى البوست ده

بس عموما مش عارف ليه معظم القصص بقت بتنتهى بالفشل سواء قبل ما تبدأ أو بعد بدايتها بوقت قليل

والمشكلة ان كل قصة من دول بتسيب جوا الانسان مكان مظلم صعب انه ينور تانى

يا رب تكون اخر جراحنا هى اخر بيوت بنيناها ع الرملة

سلام

Lady E يقول...

غروب : الحمد لله يا قمرايا

والله وانتي كمان وحشاني بس مش بتفتحي الايميل بقالك كتير

الله يبارك فيكي يا غروب وان شاء الله ناجحه ومتفوقة كمان متقلقيش وان شاء الله اقولك مبروك عليكي الليسانس قريب اما انا فلسه قدامي حوالي 8 شهور ان شاء الله ع الليسانس :)

ربنا يكرمك وينجحك دنيا واخرة

Lady E يقول...

احساس طفلة محبة للرومانسية بس واقعية : فعلا فيلم جميل اوي يا احساس طفلة بس لسه مشوفتش اجزائه كلها وعارفه الجميل كمان فيه انه في احاديث نبوية وأيات من القران الكريم بتأكد الكلام انا بحب جدا اي حاجه ليها علاقة بالتنمية البشرية فبجد شكرا ليكي وربنا يجزيكي خير

ههههههههههه وتقريبا كدا عندك فوبيا من الحشرات

بصي يا قمرايا انا كنت رومانسية جدا جدا بس حسيت ان رومانسيتي بتروح مني تدريجيا لغاية لما حاسه انها هتختفي ودا من تجارب صحباتي اللي كلهم تقريبا اتبهدلو بعد الجواز يعني جواز عن حب منفعش وجواز من وجهة نظر المجتمع كويس برضه منفعش واخيرا جواز من شخص متدين منفعش فيبقى فاضل ايه؟
واعتقد في الجواز دا اقصى تعمق للمشاعر اتنين بيكملو حياتهم مع بعض في النور فتبقى مش مشاعر سطحية وللأسف بيفشلوا حتى لو بصيتي للزبجات نفسها هتلاقي الزوجة المصرية مثلا عليها اعباء كل حاجه والزوج مكبر دماغه وكمان بيشتكي انها مش مهتمه بيه وكمان مش مهتمه بنفسها بعد كل المسؤليات اللي عليها ومش مقدرها
تفتكري بعد اللي بقولك عليه دا ممكن افكر في الرومانسية ممكن افكر في الاحتواء والحب والمودة والرحمة كل دا مش موجود للاسف في قاموس كتير من الازواج المصريين لأن شعارهم مصلحتهم اولا ..

بالنسبة لمقولة اللي بيحب اوي بينجرح اوي دا طبيعي لانك لما بتحبي انسان ويجرحك سواء بإرادته او غصب عنه فعلشان بتحبيه اوي ومش متوقعه انه يجرحك فبتنجرحي اوي

Lady E يقول...

احساس طفلة محبة للرومانسية بس واقعية : وهفكر نفسي وافكرك ان الاختلاف في الرأي لا يفسد للود قضية :)

Lady E يقول...

mohamed ghalia : هههههههه كتلة احباط مرة واحدة يا محمد

دا مش احباط بس واقعية والحمد لله انا هادية جدا بس بعبر عن فكرة جايه على بالي :)

طب ممكن اسألك سؤال ويارب تجاوبني بصراحة؟ ليه بتدخل مدونتي مع ان في بوستات كتير بتكلم فيها عن نفسي وافكاري؟

وايه الفرق انك تقرأ الكلام دا في مدونتي او في كتابي؟ بجد اجابة الاسئلة دي مهمة بالنسبة لي

اكيد انا في اول خطوة بس موضوع الكتابة الذاتية لو اتكتب بشكل كويس بينجح وعايزة اقولك ان كتاب مبسوطة يا مصر للمدون والكاتب اشرف توفيق نجح جدا واتطبع منه كذا طبعه مع ان في بوستات شخصية ليه ومع ذلك كنت سعيدة وانا بقرأها

هستنى اجابتك ع الاسئلة

Lady E يقول...

بنجاواتى : وعليكم السلام ورحمة الله وبركاته

اولا : الله يبارك فيك وان شاء الله نباركلك على نجاحك بتفوق قريب وطبعا مش هنسى الناس اللي وقفو جنبي مش جنبي اوي يعني :) ليلة امتحان الحضارة وطبعا دعيتلهم كلهم بما فيهم بنجاواتي :)

ثانيا : عندك حق تتوه في البوست دا لاني انا كنت بكتبه وانا تايهه وكتبته بسرعه ومع ذلك مش عايزة اعدل فيه حاجه فعلشان كدا ممكن اللي يقراه يتوه فيه

والمشكلة مش في قصص الحب بس دي المشكلة الاكبر في الازواج اللي بيظلمو اطفالهم معاهم لما بيتخانقو قدامهم كل شوية او لما بينفصلوا بجد شفت كذا حالة كدا وصعبان عليا الاطفال جدا

ويارب منتجرحش اساسا

وبجد وحشتني البوستات اللي كنت بتكتبها

بلاش كسل وارجع اكتب تاني

دمت بخير

ديالا يقول...

ليدي حبيبيتي

خديها مني كلمه عن تجربه

لما بنحب وبننجرح لما نقابل حد يدواينا جرحنا صدقيني بننسي ان احنا انجرحنا وبيبقي همنا منجرحش الي دوانا

امي بقي عن العنكبوته فيارب مانكون في يوم زيها ابدا ويكفينا شر لدغتها

ومبروك علي النجاح ياسكره

عاشقه الرومانسيه يقول...

يعنى اطلع من البوست ده بمعلومه مهمه
انى بعد الفرح اموت عريسى
علشان احتفظ له بذكريات حلوه
طيب لو فيه مشاكل حاليا ولو خفيفه
اعمل ايه
اقتله بعد الخطوبه؟
ههههههههههههههههه
ردى عليا بسررررررررعه
اصل الخطوبه اخر الشهر
(:

وحشتييييينى ياليدى

Lady E يقول...

ديالا : وعارفة يا دودو لما اللي جرحك اعتذرلك كذا مرة بس انتي حاسة ان مش كلمة الأسف دي اللي هتخليكي تسامحي عارفة لما تبقي بتحاولي من جواكي تسامحي ومش قادرة وتحاولي وتحاولي وبرضه مفيش فايدة احساس قاسي بجد

اما عن العنكبوتة فسبحان الله ربنا له حكم في ذلك بس الكلام دا عند العنكبوتات بس لكن احنا الطف وارق الكائنات قتل ايه بقى ههههه
سيبك انتي العنكبوتة مخها لاسع

الله يبارك فيكي يا قمرايا وان شاء الله اباركلك على نجاحك في الامتحان اللي ضيعتي عليه مصروفك قريب :)

Lady E يقول...

عاشقه الرومانسية : هههههههههههههههه يا سلااااااام هو انتي عنكبوتة ولا ايه يا رومانسية

وبعدين طبيعي ان يكون في مشاكل خفيفة قبل الخطوبة

الف الف مبروووووك عالخطوبة بجد خبر جميل اوي وسيبك م البوست دا انا حتى هغنيلك

يا دبلة الخطوبة عقبالنا كلنا ونبنبي طوبة طوبة في عش حبنا نتهنى بالخطوبة ونقول من قلبنا يا دبلة الخطوبة عقبالنا كلنا لولولولولولولولي

انسي البوست خالص لأنه عن العنكبوتة وانتي احلى بنوتة مش عنكبوتة وخدي بالك انا اللي هغتالك لو عملتي الفرح قبل ما انزل مصر انتي حرة بقى

أميرة علي كوكب مهجور يقول...

بجد مدونتك حلوة اوي وانا حبتها وحبيت اسلوبك بجد وياريت نكون اصحاب وياريت تزوري مدرونتي

MaNoOoSh يقول...

انتى عارفة يا ليدي ليه التجارب اللي شفتيها بتفشل
علشان الناس يا اما بتختار بعقلها بس يا اما بقلبها بس يا اما علشان يبقوا اسمهم اتجوزوا وكملوا نص دينهم وخلاص

امال ربنا خلق البشر مختلفين ليه
علشان كل بنى ادم يلاقى بنى ادم تاني يناسبه (ومش كل الناس بتلاقي الانسان المناسب ليها)
بس اهم حاجة الرسول عليه الصلاة والسلام وصانا عليها (تخيروا لنطفكم)
يعني حق ولادي اللي لسة فى علم الغيب انى اختار لهم أب يتقي الله فيهم وفيا.. ساعتها لا هبقى عنكبوتة ولا هقدر اديله غير كل حب واحترام.

على فكرة الف مبروك النجاح يا قمر

وكمان فى حاجة
صدقيني الانسان الصالح فى الزمن ده كنز وعمله نادرة والست مش لازم علشان اتعلمت يبقى لازم تشتغل اجباري.. دي حاجة بتخضع لقدرتها الشخصية ومدى تحملها لضغوط الشغل.. والانسان الصالح لو بيحبها هيريحها ويساندها كمان زي ما هي هتريحة وتقف جنبه.

الشعب لابد له من حكومه تشكمه يقول...

اييييييييييه ده؟ اييييييييييه الجمال دا كله؟ اييييييييييه التفاؤل اللى خبط فى عينى ده..يعنى الولاد بيلعبوا ومبسوطين ولعلمك باه انا وانا صغيره كنت بفرح جدااا لما اعمل بيت وتيجى الموجه تدخله وعلشان كده لما كبرت كل احلامى غرقت :)))
بالنسبه للعنكبوت,هو اللى اصلا غبى طب بالله عليكى قوليلى شاف كام عنكبوت حصله كده قبل كده؟ وبرضه بيتجوز!!! يباه غبى ويستاهل ولا لا,,دا مبيتعلمش من اخطاء غيره يابنتى..
بالنسبه لتقشير التوم متقلقيش مش هتقشرى بس احتمال تقعدى جمبى ونبص للسقف:))
بالنسبه للاحلام اممممممم احلمى احلمى(هى طالعه من غير نفس اصلى خايفه اقولك تحلمى احلامك تختفى ولا حاجه) بس عموما احلمى يكفيكى شرف المحاوله واهو خبره وتجارب فى الحياه..

Bent Men ElZman Da !! يقول...

ازيك يا جميله عامله ايه وحشتينى
وانا داخله كده استغربت قولت هو انا دخلت غلط والا ايه
بس هى فعلا اللى مفيش غيرها مش ناوى يكبر :D
اتاريكى غيرتى شكل البلوج
مبروك اولا
ثانيا بقى
مش عارفه ليه حاسه انك مخليه الموضوع كئيب شويه
مش شرط ان ده نفس الحال فى البشر
ومش شرط ان العنكبوته تقتل العنكبوت بتدبحله القطه يعنى زى ما بيقولوا
انا شايفه ان الواحد مش بيتجرح عشان يفضل عايش فى عذاب للابد
الجرح مهما كانت قسوته بس بيعلمنا حاجات كتير اوى ماكناش واخدين بالنا منها
وبيخلينا نغير فى نفسنا للاحسن عشان مانسمحش لحد انه يجرحنا تانى والا هنبقى هبل
وانا متفقه معاكى جدااااااااااا ان اهم حاجه مستقبلك
وربنا معاكى :)

زهرة الحب يقول...

الله على مدونتك وكلماتك جميله ربنا يوفقك ياريت تدخلى على مدونتى وتقوليلى ايه رايك

blue-wave يقول...

اوقات
بيكون صعب عليك تعتذر
لأنك بتحس ان اللى بتعتذرله دا جواك وحته منك واكيد فاهمك وعاذرك
وبالنسبه للأحلام المستقبليه
فحلو ان يكون عندك طموح
وتحطى هدف قدامك
واكيد ربنا هايوفقك

Lady E يقول...

أميرة علي كوكب مهجور : تسلميلي يا قمرايا

بجد دا من ذوقك وبجد عجبتني مدونتك جدا

واكيد احنا اصحاب

نورتيني

Lady E يقول...

MaNoOoSh : كلامك سليم يا منوش وغالبا بيرموا سوء اختيارهم على القسمة والنصيب


وبعدين هو فين الانسان الصالح دا؟؟ زي ما بتقولي انه بقى كنز وعمله نادرة يعني من كل مليون هتلاقي واحد ولا حاجه

بالنسبة للشغل ف ده حلم من احلامي ما انا مش هفضل ادرس خماشر سنة وفي الاخر اقعد في البيت نفسي اشتغل عالاقل سنة وسيبك من ضغوط الشغل لأني مش هقدر احكم عليها الا لما ابقى جواها
وعالعموم احنا بنحلم والعبد في التفكير والرب في التدبير

أحمد زاهر يقول...

ربنا يوفقك
ممكن تكون العنكوبته عندها حق
بس دا ما ينفعش يطبق على البشر لأنه ما حدش هايعرف يعيش لوحده وهى الدنيا كده لازم ننجرح ونرضى دا واقع أما النسيان فياريت نقدر ننسى كنا ريحنا وارتحنا

غير معرف يقول...

إنت لسه صغنن يا جميل ؛إحلمي وتمني دي الأحلام من غير فلوس ؛؛؛؛وعلي رأي فودافون "عيش أحلي ما في اللحظة"
هتتخرجي وتتوظفي بس بردك هتقشري توم وبصل كمان امال ده لازم نكون ستات بيوت شطرة ولا إيه !!!! ؟؟؟
ديدي

دعاء يقول...

يا رب تتحقق أحلامك ويكون المستقبل أحسن حاولي انتي بس تشوفي بكرة بنظرة تفاؤلية عن كدة OK!!

كيكى عوووووو يقول...

مممممممم عاجبنى الصورة والعنوان وكرهت نظره التشأم الى فى!!!
ع فكرة المثل اتغدى بى قبل ما يتعشى بيكى اكيد قولتى الفطار عشان العنكبوت ياعين امه مش بيلحق يتعشى!!
وحياه الغاليه فوفو
تبسم و نبى

Lady E يقول...

الشعب لابد له من حكومه تشكمه : منوراني دايما يا شيمو والله

عارفه انا كمان كنت بحب المية لما تدخل على بيوت الرمل زمان وانا صغيرة
بس الحمد لله لما كبرت مش كل احلامي غرقت في احلام غرقت وفي احلام طلعت بتعرف تعوم :)

اما العنكبوت ههههههه فيمكن كان عنده امل ان العنكبوتة تكون بتحبه ومتقتلوش محدش عارف كان بيفكر ازاي :)

وانا وانتي المفروض كلنا نحلم بس نحلم ونسعى لتحقيق احلامنا
وبما ان الاحلام الرومانسية مش في ايدي لوحدي ف أنا فضلت احلم لنفسي الاول والاحلام الرومانسية تيجي على مهلها وقت لما تحب تيجي

Lady E يقول...

ليا عودة ان شاء الله للرد على باقي التعليقات :)