الأربعاء، 8 يوليو 2009

وايه يعني ؟؟؟


وايه يعني؟؟
ايه يعني لما اتألم لوفاة شيماء زميلتي وافتكر ذكريات ليها في كل ثانية لغاية لما قربت اتجنن ؟ الحي ابقى من الميت
ايه يعني لما خطيبة ابن خالي تغير مني وتحاول عيلة خالي كلها ارضائها على حساب انهم يزعلوني مش مشكله؟ معلش انا عليا الاستحمال لكن هي ضيفة
ايه يعني لما اكون بشتري اكسسوارات ويعجبني اكسسوار خاتم توينز واحد على شكل قلب والتاني بيكمله على شكل دبلة والبسه بكل براءة والاقي اللي بيحرجوني ها اتخطبتي وفي عنيهم اني اتعقدت يا حرام علشان متخطبتش ؟ عادي طالما انا مقتنعه ان مش ممكن اتخطب لمجرد الخطوبة والا كنت اتخطبت من وانا في اولى كلية
ايه يعني لما كل الناس تسألني هااااااااا مفيش؟؟ وارد عليهم مفيش ايه يقولولي مفيش قصة حب بينك وبين حد في الكلية وارد واقولهم لأ مفيش ويقولو اكيد مفيش حد حابب يتعرف عليها ؟ عادي برضه ميعرفوش ان كتير من زمايلي في الكلية بيحاولو يلفتو نظري وانا مطنشششششششششششه لأنهم في نظري مجرد عيال
ايه يعني لما الفرنساوي يبقى معايا لتاني سنة على التوازي واخسر تقدير السنة دي لتاني مرة ؟ نو كومنت هكتفي بحسبي الله ونعم الوكيل وربنا ينتقم منك يا حاقد
ايه يعني لما احس ان جوايا حاجه كبيرة انكسرت ومش قادرة اضحك من قلبي ولا حتى ارجع روح الطفلة اللي بعيش بيها ؟؟
يا ترى كل دا يخليني في مود كئيب؟؟ ويخلي دموعي تغلبني 4 ايام؟؟ حتى في التأمل اللي المفروض بيبقى فيه سعادة مش حاسة غير الدموع
الحمد لله انا احسن من غيري كتير في الابتلائات
الحمد لله على كل حال
اللهم عافني في سمعي وبصري واجعل لي نورا اهتدي به فيخرجني من ظلمات الاحزان الى نور السكينة والهدوء والسلام النفسي

ابكيتني وانا احسبك تكره دموعي
تُرى أسرتك دموعي وانا أبكي؟؟

هناك 43 تعليقًا:

تامر علي يقول...

فعلاً زي ما قلت الإبتلاءات دي وإن كانت محبطة وتعكر صفو الحياة فالعامل المشترك فيها أنها كلها "مؤقتة" لن تلبث أن تتلاشي قريباً بإذن الله .... لكن المهم الا نسمح لهذا الزائر المؤقت أن يفسد علينا صفو حياتنا :)

تحياتي :)

غير معرف يقول...

مش عارفة إيه يا حبيبتي الحكاية اليومين دول؟؟أعتقد إنها ظاهرة عامة
قريت في كذا بلوج الموود ده!!!!أبكيتيني وأسرتني دموعك الغالية؛ فرجه قريب إن شاء الله " وكلما ضاقت حلقاتهاوإستحكمت فرجت ؛ وكنت أظنها لا تفرج"
"الصبر ماهوش عيب ؛ مادام القضا إتحكم ، وتشمت الندل في إبن الأصول وتحكم"
" تجزي من الله ياللي تصنع المعروف مع ناس أخسة لا تفهم واجب ولا معروف"
حبيبتي : هوده حال الدنيا؛ الحكم إللي فوق دي كان بابا الله يرحمه دايما يصبرني بيها لما أتخنق ويقوللي : "إعملي الخير في أهله وفي غير أهله"
ديدي

♥نبع الغرام♥♪≈ يقول...

السلام عليكم

حبيبتى نونا

والله العظيم واحشنى موووت لدرجه كبيرة قووى

اخبارك ايه هو واضح من كلامك انك بتعيشى حاله غريبه قووى من نوعها

معلهش والله بجد انا مريت بنفس تجربتك ومازلت اقسم بالله
وبحط جوايا ومش بلاقى غير دموعى هو اللى بتتحملنى

متزعليش نفسك ومش تعبرى حد
وان شاء الله ربنا احن مننا علينا

واكيد انتى عارفه حياتى

ربنا معاكى ويبعد عنك الاحزان

بحبك قووى
انوسه

غير معرف يقول...

no coment
قتلتينى اوى بحزنك دة!!
عووووو

ديالا يقول...

حبيبتي

بجد انتي انسانه رقيقه جدا

ولو علي افرنساوي

بسيطه اوي

باذن الله ياريت تقبلني اساعدك في ملخصاته

هو ماده حلبوه بس تلاقي بس الدكتور هوا الي رخم

غير معرف يقول...

حاسين ان جواهم طفل عنيد بيحاول البقاء

*******************************
وبيظهر في أوقات كتير وممكن جدا وانا متأكده ان نسبة مش قليلة من الشخصيات العامة والمرموقة وحتى الناس العاديين أطفال مش عايزة

تكبر لكن ساعة الجد جد بنبقى كبار أوي وبنتحمل اي مسؤلية أن شاء الله****
فاكرة دة كلام مين؟؟؟؟!!!!

غير معرف يقول...

عووووووووووووووووووو
انا جيت بس عشان اعرف نفسى عشان غير معروف كتر اوى عندك!!!!
عارفة اقعدت اقرء ليكى فى الارشيف ورجعت تانى بضحك اهوا وجبتلك الكلام الى فوق الكومنت دة
***يانهار ابيض كل دة نو كومنت!!!

hasona يقول...

السلام عليكم

عندنا مثل بيقول تعيش وتفتكر
يعني لازم نفتكر بعض ونذكر محاسن موتانا وخصوصا من نحبهم ونجلهم

و

غير معرف يقول...

انا عارف ان انا السبب
ومش عارف اقولك سامحينى
والله العظيم كان غصب عنى
والله العظيم كان غصب عنى

غير معرف يقول...

ارجوكى قوليلى اعمل ايه علشان اكفر عن الذنب دا

الشعب لابد له من حكومه تشكمه يقول...

اولا انتى كل بوست بينزل ليكى مش بيظهر عندى بشوفه بالصدفه!!! حاجه غريبه.
ندخل باه على المفيد:
هاااااا انزلك بوست تانى علشان الاكتئاب ولا ايييييه؟ مش قولنا نسمع الكلام ونبطل نكتئب.
بصى باه علشان انا عاوزه اشدك من ودنك.
اولا: مين قال انك متفتكريش صاحبتك اللى ماتت وتزعلى عليها؟؟؟ ومين قال اننا ننسى ذكرياتنا ونفتقدها وتوحشنا.
افتكريها وازعلى بس مفيش اكتئاب افتكريها وادعيلها وافتكرى تهريجكوا بس بلاش نغرق فى الحزن.
ياستى اللى بيغير منك معناه انه شايفك احسن منه.كده ولا لا؟؟؟؟ دى حاجه متزعلش انا شخصيا لما حد يغير منى بعتبر انى كده فى التوب ايوه واحده وحاسه بالنقص هى اللى تكتئب مش انا.!!ولا ايييه؟
انتى زعلانه علشان بيقولولك ليه متخطبتيش ومفيش قصه حب ههههههههه دى ضحكتنى.اصلك بدأتى بدرى جداااااا طب اصبرى كده لما تدخلى على 25 وتسمعى الكلام اللى على اصوله:))
انتى لسه كتكوته متسبيش حد يزعلك بكلام فاضى وتافه. واعرفى دايما ان حالك احسن كتييير من ناس تانيه:)
عارفه انا مش قادره الومك على زعلك بس صدقينى لما تعدى المرحله دى هتقولى ايه اللى كان بيزعلنى,دى كانت حاجه صغيره..

حـــلـــم كـــان يقول...

ولا يهمك

وايه يعنى

شلاطة يقول...

كلامك زعلني اوي
خصوصا صاحبتك اللي ماتت
الله يرحمها ويحسن اليها
بس دا مش معناه
ان الواحد يكتئب
لان اكتئابنا من عدمه
مش هيغير في الواقع شيء
بالعكس هيضلمه
وعشان كده
المفروض تطلعي من المود دا
لان اللي ماتوا
لو رجعوا تاني ولقونا كده
هيقولولنا لأ لازم ترجعوا لحياتكم عادي

وبالنسبة للي بتغير
ف اللي يغير يغير عادي
وانتي مزعله نفسك على ايه
عشان خالك بيحاول يرضيها على حسابك
متبصيش للموقف عشان هي ضيفة
لأ والف لأ هي مش ضيفة
هي داخلة العيلة ودا بقى نسب
ودي الحاجة اللي عاوزك تبصيلها
انه نسب
يعني حاجة على طول
مش هتتغير بمرور الوقت
معنى كده
انك تديلها الطرشة
وبالعكس
انتي تستمتعي بغيرتها منك
طبعا مش معنى كده انك تغيظيها عن قصد
لأ
انتي اتعاملي بطبيعتك
واللي مش عاجبه
عنده البحر
براحته
وكلمه اخيره
مفيش حاجه في الدنيا مستاهلة الاكتئاب
سلام

mohamed ghalia يقول...

الحمد لله انا احسن من غيري كتير في الابتلائات
الحمد لله على كل حال
اللهم عافني في سمعي وبصري واجعل لي نورا اهتدي به فيخرجني من ظلمات الاحزان الى نور السكينة والهدوء والسلام النفسي
الحمد لله على كل حال
هى الأيام كما عادتها دول إذا سائك زمن سرتك أزمان
ربنا يسعدك دايما

اقدم عاصمه فى الحب يقول...

وايه يعنى صحيح
انتى قولتى المفيد
مافيش اصلا اصلا حاجه فى الدنيا تستاهل ان حد يفكر فيها
مجرد التفكير فى ربنا وفى رضاه هيشيل كل حاجه من دماغك وكأنك لسه طفله
ربنا يرزقك بالبراءه والشفافيه والصدق والحب واولا واخيرا رضا ربنا

ويا رب تقبلينى زائر دائم لمدونتك الجميله

كونى كما يحلو لكى
:)

Lady E يقول...

تامر علي : اولا الحمد لله على السلامة ويا رايحين للنبي الغالي هنيالكم وعقبالي يااااارب

والحمدلله انها مؤقتة والا كنت هروح العباسية فورا وبجد الزائر ده انا مش ببقى عايزة ارحب بيه اصلا بس مفيش فايدة هو زائر دمه تقيل :)

Lady E يقول...

ديدي حبيبتي : اكتر حاجه كانت مضايقاني اني كنت مفتقدة تواجدك في المدونة جدااااا جدااااا جدااااا بجد ويارب تعملي مدونة لأن بجد كلامك رائع جدا وانا بحب حضرتك جدا وبحترم فكرك جدا وكمان بتعلم منك
هو ده اللي بيسموه الحب من اول كومنت :)

ووالله اسفة جدا على دموعك الغالية ومكنتش اتمنى ابدا اني اتسبب في حزن ليكي

بجد حكم جميلة جدا وحسيت انها زي البلسم اللي بيداوي الجروح
ربنا يرحم باباكي ويجعل مثواه الجنة انا متأكده انه كان انسان رائع
وبجد استفدت جدا من كلامك الجميل ويارب متحرمنيش من تواجدك وتعليقاتك ويارب كمان تعملي مدونة لأن خسارة الكلام القيم والفكر الراقي ده ميوصلش لكل المدونين

Lady E يقول...

عاشقة الأحزان : وعليكم السلام ورحمة الله وبركاته

هي فعلا كانت حالة صعبة اوي ومكنتش عارفة اطلع منها بس الحمد لله بوقوفكو جنبي طلعت منها

وانتي كمان بجد كنتي واحشاني جدا ولسه وحشاني حتى بعدما اتكلمنا عالايميل

وبعدين متحطيش جواكي اومال احنا اخوات بالاسم ولا ايه؟؟
وبجد كلمة جميلة اوي ربنا احن علينا مننا عندك حق

ربنا يبعد عننا جميعا الاحزان يا حبيبتي

Lady E يقول...

كيكي اللي مكسلة تدخل بالاكوانت بتاعها وداخلة بغير معرف : انا برييييييييييئة برييييييئة يا بيه مقتلتهاش دي هي اللي جت تاخد الشوكولاته بتاعتي فطخيتها عيارين هي دي حاجه تقتل يعني ؟؟ :))

كتكوتتي والله بحبك اوي
وعلى فكرة صفر في الشفوي علشان كومنت ناقصها m كمان

Lady E يقول...

ديالا : اخجلتم تواضعنا يا دودو انا فعلا رقيقة علشان بحب الرقاق :))

وبعدين ايه اقبل تساعديني دي هو انا اطول اساسا اللي يشرحلي الفرنساوي تبقى ميس رقيقة جدا وعسولة جدا جدا
كدا يبقى هاضمن الامتياز في الدور التالت مش التاني ان شاء الله

ويا حبيبتي كلمة رخم دي قليلة على امثالة اعتقد انك لو كنتي قسم فرنساوي في جامعتنا يبقى اكيد درسلك
اسمه حاقد الفار

MǿиY El-Shreef يقول...

الناس المحبطه دي كتير اوووي

ماتقفيش عند كلامهم اوعي

انتي حلوه زي مانتي وناس كتير بيحبوكي كده

ودايما عروسات القرايب بيبقوا رزلين والله مجربين احنا

كمان حكايه الدبله عادي يابنتي كبري دماغك طب انا مشتريه دبله دهب اساسا بس ابيض ولبساها وخلي الي يتكلم يتكلم انتي متميزه عنهم مش شبه الباقي عشان كده بيلوكو كتير

ماتزعليش نفسك ولا تعيطي

بالعكس انتي الي الكل هيموت ويقلدك :)

dramaqueen يقول...

ايه الكلام دة يا ليدى
نتقوليش كدة تانى
لما تفتكرى شيماء ادعيلها واقرى قرأن
عارفة الحالة اللى انتى فيها لانى مريت بيها لما زميلى اتوفى
ثانيا ان خطيبة ابن خالتك تغير منك دة دليل على انك انسانة جميلة وتشدى انتباه اى حد ودة يلغى كلام الناس انك ليه مش اتخطبتى او ارتبطتى
ثم ان فى ناس مش وراها غير الكلام عن الناس
وعن المادة فدة قضاء ربنا واحمدى ربنا انها جت على اد كدة

ان شاء الله الفترة دى تعدى على خير
انتى بجد انسانة جميلة جدا وتستاهلى كل خير

موناليزا يقول...

خليكِ قوية زى عنوان الموضوع:)

Lady E يقول...

كيكي : ايوة صحيح ده كلام مين ؟؟ (وش بيطلع لسانو)

ربنا يخليكي ليا يا كتكوتة ومتشكرة انك افتكرتي الارشيف دا انا نفسي مش بقرأه وبما انك قرأتي الارشيف وبما انك انتيخي فلازم استنهز الفرصة واقولك ايه المواضيع اللي عجبتك وضحكتك ؟؟
وثانكيو على ال نو كومنت :)

Lady E يقول...

hasona : وعليكم السلام ورحمة الله وبركاته

اكيد لازم نفتكر موتانا بس لما نفتكرهم ونفضل نفكر فيهم بالساعات ونحزن حزن ملوش نهاية وحزن يشلنا عن التفكير في حياتنا يبقى ندعيلهم ونحاول ننسى لانها ارادة ربنا سبحانه وتعالى قبل اي شيء

Lady E يقول...

غير معرف : خياااااانه يبقى انتا اللي قتلت شيماء ااااه يا شيماء

ولا انتا حد من الكنترول ؟؟

ولا يمكن اخو خطيبة ابن خالي

السبب في ايه من الكلام اللي قولته في البوست بالظبط :)

Lady E يقول...

غير معرف : اي ذنب فيهم ؟؟ مش لما اعرف السبب في ايه الأول ؟؟

عاشقه الرومانسيه يقول...

طظ
طظ فى الدنيا كلها
طظ فى اى حد يضايقك ياليدى
كبرى الدى وروقى الجى ونفضى لكل الناس
(;

Lady E يقول...

الشعب لابد له من حكومه تشكمه : اولا نفس الموضوع بيحصل معايا في مدونتك برضه :(

شيما بحالها هتكتبلي بوست تاني على كدا بقى اكتئب كل يوم :)

وبلاش الشد من الودن متبقيش شوريرة

عارفة يا شيما اللي تاعبني بجد ان زميلتي الله يرحمها كانت قاعدة جنبي في الفصل سنتين كاملين ده غير السنة اللي كنت اعرفها فيها بس مكناش في نفس الفصل يعني في ال3 سنين دول كنت بشوفها وبتكلم معاها اكتر ما بتكلم مع ماما وبابا وطبيعي اني عارفه احلامها وطموحتها وحاجات كتير كان نفسها فيها الله يرحمها ويجعل مثواها الجنة يارب

ثانيا اللي بتغير مني ده طبيعي اني احسن منها ووالله ده مش غرور لكنها الحقيقة
بس عارفه لما تحسي ان انسانة بتكرهك من غير ما تكوني حتى اتعاملتي معاها ده شعور مش لطيف خاااالص

ومش عارفه ليه الناس بتحشر نفسها في حياتنا الخطوبة والجواز والحب دي حاجه تخصني ليه بقى بيرغو كتير تقريبا علشان يضايقوني وخلاص

واكيد كل دي حاجات صغيرة بالمقارنة مع المشاكل والهموم اللي بجد اومال انا كاتبه وايه يعني ليه؟ :)

Lady E يقول...

طالبه مقهوره : نورتيني يا قمرايا واهلا بيكي

جحا المصرى يقول...

هى الأيام كما عادتها دول إذا سرك زمن سائتك أزمان

احساس طفلة محبة للرومانسية بس واقعية يقول...

ليدى
ما باليد حيلة
صدقينى الحزن بيروح والفرح بيروح وكلها ايام المهم نعيشها ومنضيعهاش واحنا بنلوم ونعاتب نفسنا ولا مكتفيش بالبكاء والتفكير فى كل ما يزيدنا بكاء

كل حاجة انتى قلتيها مؤقته واكيد فى حاجات هتغير مشاعرك بعد ما تزول الإبتلاءات دى وتخليكى تضحكى من القلب روح الطفلة جوانا كلنا بس احنا اللى مش بنحس بيها ولا بنشوف الحاجات اللى حوالينا اللى تظهرها يا طفلة مش عايزة تكبر رغم كل اللى حوليها برائتها جواها
:)

تقبلى مرورى

Unknown يقول...

يا بنتى ربنا يغنيكى ويغنينا عن الناس

Lady E يقول...

شلاطة : انا اسفة على زعلك مع ان مش قصدي اني ازعل حد لما يقرأ البوست
واكيد عندك حق اكتائبنا مش هيغير الواقع

وبالنسبة للي بتغير ف للامانة مش خالو اللي كان بيرضيها على حسابي لكن بنت خالي وابن خالي ومامتهم كانو اوفر اوي اوي اوي يعني وده ضايقني وللأسف مش من طبعي اني استمتع بغيرة حد ولاني بحس اني متهمة في موقف الغيرة دا انها فاهمه اني ممكن اسرق خطيبها منها مثلا وهي مش فاهمه ان هو ابن خالي من قبل ما هي تتولد اساسا ولو كان في نية او تفكير لخطوبة كنت اتخطبتله وانه مجاش في بالي اني اكون خطيبة ابن خالي قبل كدا !! بس مش عارفه هي بتفكر ازاي

وانا فعلا بتعامل بطبيعتي واكيد مفيش حاجه في الدنيا مستاهلة الاكتئاب

Lady E يقول...

mohamed ghalia : اذا سائتك زمن سرتك ازمان .. اتمنى

ربنا يسعدنا جميعا

Lady E يقول...

اقدم عاصمه فى الحب : اهلا بيك وكويس انك اقدم عاصمة في الحب مش في الحزن زي كلمات نزار قباني

اللهم امين

واكيد يسعدني انك تكون زائر دائم للمدونة

Lady E يقول...

MǿиY El-Shreef : تصدقي يا موني عجبتني الفكرة وان في بنوتة كمان فكرت انها تلبس دبلة بجد مش توينز زي حلاتي بس قوليلي في حد بيرخم عليكي كدا برضه ولا ايه

على فكرة شجعتيني وانا لابسه التوينز وفرحانه بيه ومستعدة لتعليق اي حد رخم

Lady E يقول...

dramaqueen : ماي كوين حبيبتي
انا فعلا بدعي لشيماء الله يرحمها وبقرألها قرأن بس الموضوع لسه صعب عليا ربنا يرحم امواتنا جميعا يارب وانا اسفة اني فكرتك بوفاة زميلك

ثانيا : ربنا يكرمك وانتي الاجمل والاحلى وعلى رأي الشاعر الكبير الحلاوة حلاوة الروح وبالنسبة لكلام الناس فنفسي اقول ان انا عندي 20 سنة مش مليون يعني علشان يفكروا متخطبتش ليه بجد ناس غريبة وبعدين انا مش بقييم نفسي بناءا على كلام الناس انا بقييم نفسي ب ازاي انا شايفة نفسي وبيقيم نفسي برضه بالقرييبن مني شايفينني ازاي

اما عن المادة ف انا مش زعلانه اني شيلتها اطلاقا لكن اللي مزعلني بجد الاسباب اللي خلتني اشيل المادة وحضور المحاضرات للمرة الرابعه مع ضاكتور بيحب يبين انه قوي على الطلبة ربنا ينتقم منه

يارب الفترة دي تعدي على خير

وتسلميلي يا احلى واغلى كوين

Lady E يقول...

موناليزا : حاضر الله المستعان
نورتيني يا قمرايا

Lady E يقول...

عاشقة الرومانسية : ماشي يا رومانسية هسمع الكلام :)

منوراني دايما يا حبيبتي

Lady E يقول...

جحا المصرى : اتمنى

دمت بخير

Lady E يقول...

احساس طفلة محبة للرومانسية بس واقعية : مش عارفه مش مرتاحه للكومنت ليه يا احساس طفله حاسه ان مودك مش متظبط

وعلى فكرة انتي كمان طفلة جميلة رغم غربتها ومسؤلياتها الطفلة الشقية الجميلة جواها زي سومة ربنا يباركلك فيها ويحفظهالك يارب سلميلي عليها

Lady E يقول...

ENJY : اللهم امين