الاثنين، 6 يوليو 2009

عن مخنوقة ستان


حدث في دولة مخنوقة ستان ان اتنين من ولاد الدولة العظمى دي سافروا يتعلموا وبعدين وهما مسافرين وفي الغربة حصل للزوجة تحرش بالكلام على انها ارهابيه بسبب حجابها ومظهرها الاسلامي ولما راحت ترجع حقها ماتت شهيدة على ايد ارهابي متعصب ولما جوزها حاول يدافع عنها ضربوه بالرصاص ده غير الطعنتين اللي اخدهم
نفسي اصرخ واقول كنتو متوقعين ايه يعني؟؟؟؟؟؟ ما كل الناس بتتعامل اسؤا معاملة في مخنوقة ستان
في كل المجالات
اكل ملوث ومسرطن ومبهدل
ومية مشبعه بالكلور وبمواد تقضي على صحة اصح انسان
تعليم: زي الزفت وكله كوسة ورشاوي ومفيش مناهج اساسا
صحة : اسؤا رعاية في اسؤا مستشفيات بأسؤا ادوية
شغل : البطالة متوفرة وممكن تتصدر
تحرش وجرائم: العدد في الليمون
ترحيب بالاجانب على حساب اهل مخنوقة ستان وده انفراد لمخنوقة ستان بيرحبو اوي بالاجانب على حساب اولاد البلد
حياة كريمة : ابقى سلملي على كريمة
مستنيين ايه ؟؟؟؟
الناس في مخنوقة ستان بيتعاملوا بالشكل ده مستنيين ان الناس اللي بره يعاملوهم ازاي يعني؟ بالاحضان بالاحضان ؟؟؟ معتقدش
برغم قسوة وفاجعة اللي حصل ف ده وضع طبيعي حاليا لأن برغم كترة عدد سكان مخنوقة ستان وضواحيها الا اننا زي غثاء السيل
ومحدش ينسى العبارة ولا القطارات ولا البلاوي التانيه اللي كل يوم بتحصل في مخنوقة ستان
لما الناس تتعامل كويس في مخنوقة ستان يبقى نزعل اوي ونتأثر لما يتعاملوا وحش بره مخنوقة ستان

هناك 30 تعليقًا:

Ahmed يقول...

كلامك صج ياليدي

لما يبقى دمنا ليه تمن جوا بلدنا

هيكون ليه تمن بره بلدنا

♥نبع الغرام♥♪≈ يقول...

السلام عليكم

حبيبتى بجد وحشتينى قووى

اخبارك ايه ياريت تطمنينى عليكى

انا كويسه ورجعت من السفر

بجد كلامك بيوجع قوووى

تحياتى

ديالا يقول...

طب هنعمل ايه

اذاا كان دم المسلم بقي رخيص

ربنا يسامح حكامنا

Lady E يقول...

أحمـــــــــــــد أبو العلا : كان نفسي كلامي ميكونش صح يا انجينير

لنا الله

Lady E يقول...

عاشقة الأحزان : وعليكم السلام ورحمة الله وبركاته

الحمد لله على سلامتك يا انوسه وحشتيني جدا جدا بجد كنت مفتقداكي اووووي

وللأسف الكلام بيوجع لأنه حقيقي

Lady E يقول...

ديالا : دم المسلم بقى رخيص نتيجة لأعمالنا احنا المسلمين يا ديالا مش الحكام بس هما السبب لأ احنا كمان قبلهم المسلمين نفسهم اتغيرو بياخدو اللي يعجبهم من الاسلام واللي مش بيعجبهم بيسيبوه اتفرجي على بعض الشيوخ وهتلاقي فتاوى تشل
انزلي الشارع هتلاقي منتقبات وملتحيين كتييير وشوفي تصرفاتهم هتلاقيهم اخدو من الاسلام اللبس بس
ضاعت القيم بتاعت احسان الجار للجار وبتاعت تعاونو على البر والتقوى وضاعت اخلاق اسلامية كتير وفوق كل ده بنتظلم وساكتين
ربنا يسامحنا ويسامح حكامنا

عاشقه الرومانسيه يقول...

فعلا احنا اللى عملنا كده فى نفسنا
كان زمان لينا اسم وسمعه طيبه وكرامه محفوظه
دلوقتى بح
كل ده طاااار
لاننها متهانين جوه
يبقى سهل جدا اهانتنا على ايد اى حيوان بره
واى واحد يتكلم ولا يعترض ياخد بالجزمه ويعتقلوه
مااحنا مالناش كرامه ولا قيمه

حسبى الله ونعم الوكيل

بنجاواتى يقول...

عندك حق

لما نعيش فى بلدنا حياة محترمة يبقى الغرب يحترمنا

لما تكون لنا قوة يبقى الغرب يخاف من قوتنا

لما نكون عايشين فى بلدنا يبقى ندور على حق الحياة برة بلدنا

ربنا يرحمها ويلحقها بالصالحين

تحياتى

mohamed ghalia يقول...

جيتى على الجرح ياليدى
احنا خلاص كله بيهين فينا دلوقتى
ربنا يتولانا برحمته

احساس طفلة محبة للرومانسية بس واقعية يقول...

معاكى يا ليدى
بس هى متقتلتش عشان هى من دولة معينة
هى اتقتلت عشان تفكرها ومعتقداتها
يعنى السبب مش اننا ملناش ثمن جوة بلدنا

السبب ان احنا خلينا شكلنا دائما وحش
ومعندناش حاجة كويس ترفع من قدر دينا
فنجبرهم بيها على احترامنا حتى لو اختلفوا معانا فى الفكر وساعتها يبقوا عارفين ان فكرنا ادى لنتيجة ايجابية

السبب مش قيمة الانسان فى بلدة
السبب فى قيمة الانسان اللى عملها لنفسه
انا وانتى وهو وهى والدكتور والاستاذ والمحامى والمهندس مش البلد
احنا معملناش قيمة لنفسنا نفسى اصرخ بيها ومش زعلانة على حاجة غير على احساسى بالفاجعة دى

ربنا يرحمها ويعفوا عنها
ويصبر اهلها ويبارك لها فى ابنها
ويسكنها الفردوس الاعلى

مبروك شكل المدونة الجديد
تقبلى مرورى

Unknown يقول...

صح

احنا متهانين هنا متوقعة يبقى أيه الوضع بره

حسبنا الله ونعم الوكيل في جوه وبره

ويبقى التواصل

دعاء يقول...

الله يرحمها ويصبر أهلها و يشفى زوجها.

و يكون في عوننا في الزمن القادم.
حسبنا الله ونعم الوكيل



انتي عاملة ايه؟
يا رب تكوني بخير

blue-wave يقول...

هنا على انفسنا
ف هنا عليهم
مستنى رأيك فى البوست الجديد

غير معرف يقول...

وحشتينى
ابقى سلميلى على روحى اللى معاكى:))

الشعب لابد له من حكومه تشكمه يقول...

صح جدا

قلب امراه يقول...

هو كلامك مزبوط ميه الميه وبينطبق على كل دول عرب ستان مش مخنوقه ستان تعرفي احنا مفيش فايده فينا لاننا كشعب قبلنا من زمان ان حقنا يروح ومحدش يدافع عنه قبلنا نتنازل عن كتير اشياء ونسكت عالظلم لغيرنا ونسينا ان النار لما بتولع ببييت جارنا حتوصلني بالتاكيد .
ومدام في ناس بتموت وبلاد لسه محتله وشعب مقهور وسجون مليان ناس من غير ذنب واحنا ساكتين يبقى الي ممكن يحصلنا من الغريب ولا حاجه
وتبقى بلدنا عمار بس من غير اصرار
ولا كرامه
لازم اوقف لاني لما انفتح بهالموضوع عاوزلي بوست كامل ومش حاخلص
اسمحيلي ده مروري الاول
وشكرا لمرورك عندي
دمتي بحب

MaNoOoSh يقول...

ربنا يرحمها بقى

لكن احنا اللي بنعمل كده فى نفسنا
مش احنا اللي سيبنا حكام مخنوقة ستان يمرمطوا فينا من غير ما ننطق

ربنا يرحما احياء واموات

وحشتيني يا قمر وحمدا لله على سلامتك

كيكى عوووووو يقول...

ماشى يابتاعت مخنوقة ستان!!!
المهم عندك حق هى هى برة زى جوة بس برة بنحب تعمل افلام ونحتج الله يرحمها ويرحمنا
**ع فكرة ياريت ترجعى لشكل البلوج القديم لان دة يقبض القلب وياريت ترجعى معاه حاجات تانية!!!

Lady E يقول...

عاشقة الرومانسية : السمعة الطيبة والاسم والكرامه المحفوظه كانو موجودين من حوالي 10 سنين وكان المصري بيفتخر فعلا انه مصري بره بلده بس ايه التدهور اللي حصل بسرعه ده مش عارفه

حسبنا الله ونعم الوكيل
ومعلش يا دودو هدي اعصابك انتي لسه صغيره ع الضغط والسكر

Lady E يقول...

بنجاواتى : يارب يجي اليوم ونعيش حياة محترمة ويكون لينا قوة ونعيش كويس في بلدنا ومنضطرش نسافر

اللهم امين

Lady E يقول...

mohamed ghalia : للأسف جرحنا كلنا وبنعاني منه

اللهم امين

Lady E يقول...

احساس طفلة محبة للرومانسية بس واقعية : مش مختلفة معاكي اطلاقا يا احساس طفلة بس لو كانت بلدنا قوية وفي لأهلها كرامه عالاقل كانو انقذوها او دافعو عنها في المحكمه مش سابوها تتطعن ومحدش حتى دافع عنها وكأنهم بيتلذذوا بقتلها بالطريقة دي

اللهم امين

Lady E يقول...

معتز شاهين - باحث تربوي : والله بقرأ السطور دي وفعلا حزينة ان كلنا مقرين بالحقيقة المرة دي وبرغم معرفتنا ليها مش عارفيين نغيرها

Lady E يقول...

دعاء : اللهم امين

تسلميلي يا دودو الحمد لله بخير

Lady E يقول...

blue-wave : للأسف فعلا احنا اللي قبلنا الهوان فطبيعي اننا نهون على الناس

Lady E يقول...

غير معرف : غير معرف بس معرف بالنسبة لي

هي اكيد روحك معايا ؟؟

Lady E يقول...

الشعب لابد له من حكومه تشكمه : خير الكلام ما قل ودل

Lady E يقول...

reem : لا ازاي بتقولي كده يا ريم
دول عرب ستان فلة يا روحي وكويسين جدا و100 فل وتمناشر احنا اللي بندلع زيادة عن اللزوم

دمتي بخير

Lady E يقول...

MaNoOoSh : اللهم امين

ويا منوش احنا اللي بنمرمط في بعض كشعب مش بس الحكام يعني هي جت عالحكام يعني يا منوش
بلاش النظرة السودواية دي :(

بجد انتي وحشتيني اكتر والله يسلمك من كل شر

Lady E يقول...

كيكى عوووووو :مش هقولك مفتقداكي اد ايه يا انتيمتي الغريب اننا متكلمناش في الموضوع ده بس رأيينا فيه نفس الرأي

وانا عارفة ايه الحاجات التانية متزعليش يا كتكوتة