الجمعة، 12 يونيو 2009

بفرح لما


اكون بتفرج على موبايل حبيبي وارن عليه واكتشف ان اسمي في موبايله رحيق الورد والرينج تون بتاعت رقمي عنده بدي شوفك كل يوم يا حبيبي ولا تغيب عني ولا يوم يا حبيبي

اكون قاعدة مع نفسي وحاسة بوحدة وغربة وفجأه الاقي مسج من صديقة غالية عليا بتقولي انتي ع البال ومش ممكن تتنسي بحبك اوي

لما اشوف صورتي في موبايل حبيبي برضه والاقي اسم الصورة بنتي وحبيبتي وعمري

لما بحس ان حبيبة عمري هي اختي وصحبتي وانتيمتي واخيرا مامتي

لما بشوف ضحكة هدى اللي عمرها شهرين ضحكة بريئة بتنور الدنيا وبتملاها سعادة


لما بحس ان حد بيحبني بجد مش مجرد كلام

لما بروح المدينة المنورة واحس بسكينتها وجمالها يارب ازورها تاني قريب

لما بشوف البحر واحس بعطر البحر مالي المكان حب ودفء وغموض


لما بشتري عطر جديد وانا وصبحتي بنطلع من محلات العطور كإننا ازازة برفيوم من كتر العطور اللي جربناها وبنضحك على نفسنا

لما بشوف صبحتي شيري بعد سنة كاملة غياب وكإننا مبعدناش عن بعض غير كام ساعة

لما باكل شوكولاتة :)

لما اكون بتمنى حاجه من كل قلبي والاقيها بتتحق من غير ما حتى اقول عليها

لما بكون ماشية بالكتكوتة ويلفت انتباهي فساتين السواريه والافراح بحس بفرحه غريبة لما بشوف الفساتين دي وبحس اني انا وكل بنوتة بنبقى في اللبس ده أجمل برينسسز


لما الكتكوتة بتبقى نيتها صافيه ومش عايزة تتصلح مش زي امبارح طلعت عينينا الكاوتش والبطارية كانو نايمين والبنزين خلص والزيت كان عايز يتغير حتى الام بي فور اللي مستحملة اغاني جنات عليه من اول الامتحانات كان صوته مش حلو وبيقطع واخيرا المراية الجانبية اتفشفشت يا عيني عليكي يا فشفوشة

لما بدخل قسم لعب الاطفال في اي مول


لما بمشي بسرعة على اي طريق وبخرج ايدي من شباك الكتكوتة وبحس اني طايرة

لما بسمع اغاني بحبها ولما بغني اغنية بحبها ولما بشوف افلام بحبها ولما بسرح مع كتاب بحبه ولما بتوه في سحر الكلمات لما اقرأ لحد أنا حباه
وطبعا لما بكتب حاجه بحبها


لما ادخل المطبخ واطبخ اكلة جديدة وتطلع حلوة

لما بسافر وانا في قمة احباطي وحزني وبدوب احزاني في مسافات الطريق

لما بشوف منظر السحاب والشمس والسما الزرقا والبحر من شباك الطيارة

لما بلاقي تعليق جديد عالمدونة

حاجات بسيطة بتحصل في حياتنا وبتفرحنا ويمكن كتير مش بياخدو بالهم منها

دي شوية من شوية حاجات لما بتحصل بفرح بيها
يا ترى انتو بتحسو بسعادة لما بيحصل ايه؟

هناك 52 تعليقًا:

ذكرى يقول...

لما شوفت ايه بيفرحك عرفت أد أيه انك فعلا طفله وياريت تكبر ربنا يفرحك الفرحه الكبيره وتنجحى أول تعليق ومش هيكون أخر

بنت الغربة يقول...

واحشااانى قوى ...ده اولا..
انا بقالى كتيير قوى مافرحتش..وده من كتر المشاكل اللى انا فيها ..
ربنا يفرحك كمان وكمان ..
انا الحاجه اللى بجد بتفرحنى هى ان احس بالاستقرااار...والامااان ...
وده بقى صعب قوى اليومين دول ..
يارب تفضلي طفله كده على طووول وماتكبريش وتشوفى مشاكل الكبار
تحياتى ياقمر

الشعب لابد له من حكومه تشكمه يقول...

ربنا يفرحك كمان وكمان ويديم عليكى كل اللى بيفرحك يارب:)
بالنسبه لسؤالك فللاسف انا زمان كان ممكن فى حجات تفرحنى بس دلوقتى مبقاش فى حاجه تقدر تفرحنى.:)
حكم السن باين:))

غير معرف يقول...

بجد كنت جاية اقولك
وحشتينى
مش لاقية كلام تانى!!!
والله معيش رصيد ياترى امضى ولا حسانى؟؟؟

قلب ارهقته الاحلام يقول...

إحساسك جمييل بجد وربنا يديم عليكي شعور الفرح ده دايما

بس اما عن ايه بيفرح :)

فهو الا صحيح .. يعني ايه فرح .؟؟!ههههه

دمتي بالأفراح دايما يارب

تحياتي ,,,

عاشقه الرومانسيه يقول...

ربنا يسعد قلبك يابنوته
كمان وكمان

Lady E يقول...

ذكرى : اهلا بيكي

ليه بس عايزاني اكبر

تسلمي يا قمرايا

ربنا يكرمك

نورتيني

Lady E يقول...

بنت الغربة : وانتي كمان وحشتيني جدا يا بنت الغربة بس مقدرة انك مشغولة ربنا يعينك

عارفة لما تقولي ان بقالك كتير مفرحتيش عقلك الباطن هيقولك ايون فعلا مفرحتيش من زمااااان ويجيلك سوبر اكتئاب

كل انسان فينا عنده مشاكل وهموم بس في حد بياخد باله من تفاصيل صغنونه ممكن تسعده وبرضه في حد مش بياخد باله

حاسة بيكي اوي لأن انا كتير بفتقد الاستقرار كل شوية مسافرين وكمان ساعات كتير بفتقد الامان بس عارفة
الاستقرار اللي بجد جوانا احنا اللي بنعمل الاستقرار واحنا اللي بنحسس نفسنا بالامان
اكيد صعب ان الواحد يسيب اصحاب اتعود عليهم واماكن حبها بس محدش عارف الخير فين ممكن تتعرفي على ناس يحبوكي وتحبيهم اكتر في المكان الجديد اللي هتروحيه المهم ان معاكي الباشا واولادك
ربنا يباركلك فيهم وربنا يسعدك ويفرحك ويطمنك

Lady E يقول...

الشعب لابد له من حكومه تشكمه : ايوة هو حكم السن يا شابة

احييكي على تفاؤلك الشديد بجد (وش بيطلع لسانو)

اكيد في حاجات بتحصل بتفرحك يا شيمو بس انتي مش واخده بالك منها


وبرضه ارجع واقول طالما بتقولي لنفسك انه مبقاش في حاجه تقدر تفرحك يبقى عمر الفرحه ما هتقدر تدخل قلبك
لكن لو جبتي ورقة وقلم وكتبتي ايه اللي بيفرحك او مواقف وحاجات حصلت فرحتك هتلاقيهم كتير وانا متأكده وكمان افتحي باب قلبك وخليه يستقبل الفرحه متكبريش نفسك قبل الاوان يا اوختشي

احساس طفلة محبة للرومانسية بس واقعية يقول...

وانا كمان بفرح بكل دول
بس مجربتش اروح المدينة المنورة ادعيلى اروح هناك
ومجربتش الكتكوتة ولا غيرها عشان لسة مش بعرف اسوق :)
وبدل هدى خلى سومة وبدل شهرين خليهم 3 سنين
كدا البوست بقى بتاعى خلاص :)

نتشارك فى روح واحساس الطفولة الممتع دا
بأقل مجهود واصغر الاشياء ولكن قيمتها
تغير حياتنا ربما اياما او اسابيع
تشعرنا بالتفاؤل

حلو اوى البوست دا عجبنى
تقبلى مرورى

Unknown يقول...

معاكى فى حاجات كتير
من اللى بتبسطك بتبسطنى
لكن حتة(لما بشوف منظر السحاب
والشمس والسما الزرقا والبحر من شباك الطيارة)شفته مرتين فى حياتى
ومش ممكن انساه ابدا ابدا ابدا :)

Lady E يقول...

كيكي المعرفة دايما بالنسبة لي : عيب عليكي تمضي ايه بس المفروض تبصمي مش تمضي نياهاهاهاها

نفسي مرة الاقي رصيدك مش خلصان عاااا

وحشتيني

e_emy يقول...

بجد بوست بسيط ورقيق

انا سألت نفسى انهرده ايه اكتر حاجه تفرحنى .......

اكتر حاجه بجد انى اشوف ماما وبابا واختى فرحاني .......

صمت الحنين يقول...

أد ايه ممكن حاجات بسيطه تسعد اى انسان ربنا يزيد افراحك وسعدتك ان شاء الله
وعلى فكره الحاجات اللى قولتها دى بتخلينى طايره من الفرحه بالذات اول 6 حاجات ذكرتيها وضحكة الاطفال الصغيرين دول حاجه تانيه ممكن تغير المود بتاعى خالص وتقلب الحزن بتاعى بفرحه ونفسى ازور المدينه المنوره لانى عمرى مازورتها حلم ويارب يحققهولى

تسلمى على البوست الجميل ده

ستيتة يقول...

يا ما شاء الله يا ما شاء الله
المزاج عالي يا ولاد
يارب ديمها نعمة واحفظها من الزوال

بفرح بايه؟
زيك لما اركب كتكوتي وتبقى بنت حلال واشغل نجوم اف ام الاقي عليها اغنية كان نفسي فيها وارفع صوتي "الجعوري واقفل الإزاز علشان التلوث الصوتي واحس اني بدوب احزاني بالمسافات

كمان الشيكولاتة حبيبتي دي سيدة كل الأفراح

ولما اصحى يوم الصبح ويسكت صوت ضميري وميقوليش وراكي حاجة
ياسلاااااااااااام

MaNoOoSh يقول...

اممممممممممممممم

بقرح لما نبقى قاعدين كلنا فى البيت نتكلم مع بعض من غير تليفزيون ونضحك ونهزر


بفرح لما احس اني موراييش حاجة


بفرح لما امسح الدموع من عنين اى حد بحبه


بفرح لما الاقيه بيخاف عليا وبفرح من غيرته.. وبفرح لما يخفظ وعده ولما يهنيني في عيد ميلادي حتي كلمة كل سنة وانتي طيبة بيبقى ليها طعم تاني


بفرح لما اقعد على الشط بالليل

بفرح زيك من حاجات كتير قوي صغيرة وفعلا محدش بيحس بيها

خليكي كدة يا ليدي واوعي تكبري أبدا
وربنا يفرح قلبك علطول يا قمر

Ahmed يقول...

بفرح بالحاجات الجميله ديه كلها
بفرح بابتسامة طفل
بفرح لما اشوف رومانسيه بس مش حزينه

بقرح لما احس اني متفائل حتى لو مش عارف السبب

بفرح مع احمد اللي جوايا لما يفرح

شموسة يقول...

بفرح لما بلاقي اللي بدور عليه

بالنسبه للبوست بتاعك:
فهو بجد جميل واحلى مافيه انه خارج من القلب بجد...

Unknown يقول...

يارب يدخل عليكي السرور دائما

ويارب ما تشوفي حاجة تزعلك

ويبقى التواصل

blue-wave يقول...

كعادتك
طفله كبيرة
بس مش مش عايزة تكبر
هيا ماينفعش انها تكبر
علشان كل الحاجات الجميله اللى جواها دى تفضل جواها
ابقى سلميلى عليها بليز:)

منــار فايد يقول...

ربنا يزيد اوقاتك فرح اكتر واكتر
انتي بجد فظيعه
كاتبه حاجات كتيره حسيتها على لساني انا...مرسي اوي على مرورك
وان شاء الله دايما ازورك واشوف جديدك دايما


منار فايد

dramaqueen يقول...

وانا بافرح لما انتى تفرحى
ربنا يفرحك دايما يا بنوتة
واحشانى اوووووووووووى

MR./zanaty يقول...

تحفه
الحمد لله
شوفت بوست فى حد بيفرح قبل ما اموت
وكويس انك لسه بتخشى قسم الالعاب فى المول
يبقى انتى لسه متفاءله
ربنا معاكى
هى دى المواضيع اللى تفتح النفس

The illusionist يقول...

ههههههههههههه
وانا كمان شوفت حد فرحان قبل ما اموت
يا خرابى
فرحانه
الحمد لله
بتروحى مول ولعب وتفرحى
الحمد لله
البلد بخيييييييييييير
يا رب دايما
وابعدى عن المدونات المحبطه
( ده ثيم )
بس متجيبيش سيره لشيمو عشان هتموتنى)

صمت المشاعر يقول...

ربنا يجعل ايامك كلها فرح ياليدي يارب

دمتي بالف خير

إيمان يقول...

انا بقى بفرح لما الاقى الناس فرحانه

وبفرح لما الاقى الناس بتحب بعض

والاقى الناس صافيه من ناحية بعض

ربنا يسعد ايامك

جميل البوست ربنا يديم البوستات المتفاءلة

Lady E يقول...

قلب ارهقته الاحلام : اهلا بيكي يا قمرايا

وتسلميلي يا صاحبة الاحساس والرقة

الفرح جوانا لو دورنا عليه هنلاقيه قاعد حزين وخايف جوه قلوبنا لإننا اهملناه لكن اول ما ناخد بإيده هيملا حياتنا كلها
جربي تبتسمي وانتي هتلاقي الدنيا كلها بقت فرحانه من جمال ابتسامتك

نورتيني

Lady E يقول...

عاشقه الرومانسيه : تسلميلي يا حبيبتي

ربنا يجعل حياتك كلها فرح

Lady E يقول...

احساس طفلة محبة للرومانسية بس واقعية : ايه ده توأمي :)

لحظة بس افهم ازاي بتفرحي بكل دول هو انتي كمان اسمك رحيق الورد ولا ايه نياهاهاهاها

ياااااارب تروحي المدينة المنورة ياااارب واذا ربنا سبحانه وتعالى استجاب دعائي ورحت مرة تانيه وعد هدعيلك في الروضة الشريفة ان شاء الله واذا رحتي قبلي ابقي افتكريني هناك
بجد هناك روحانية وسكينة ودفء مش طبيعي

وبعدين لأ جربتي الكتكوتة بتاعتكو بأمارة لما كنتي قاعدة عليها في الكلية والدكتور جه زعقلك - شوريرة انا علشان بفكرك- مش شرط تكوني بتعرفي تسوقي علشان تحسي بسعادة الكتكوتة
بمجرد انك مع سومة وسمسم وبتوصلو بالسلامة دي في حد ذاتها نعمة كبيرة وفرحة ربنا يديمها عليكم
ويحمينا من شرور الطريق ويحميكم

وفي فرق بين هدى وسومة
ربنا يحفظلك سومة لأنها بنوتك وده احساس في حد ذاته رائع انا لسه مجربتوش
بس اكيد الامومة دي شيء عظيم بجد ومشاعر مش ممكن تتوصف
اما هدى فهي بنت عمي وعلشان كده بحس بحب وحنان ناحيتها وفرحه لما بشيلها وبلعب معاها بس مهما كان مش بنوتي

مين مين مين ؟؟؟؟؟ بوست ايه اللي جايه تقولي عليه ده يا احساس طفله مفيناش من كده والا همنع عنك الشوكولاته :)

والبوست عجبك على اساس ان البوستات اللي قبل كده مكانوش بيعجبوكي
اوكي اوووووكي :) ثانكيو

نورتيني يا قمرايا

Lady E يقول...

norahaty : بيبقى منظر مش ممكن ابدا يتنسي من جماله فعلا

ويا سلام بقى لما تكوني شايفه الجمال ده كله وتسمعي ايات من القرأن الكريم بتتكلم عن الجنة والنعيم بتحسي انك مش عالارض اصلا وانك طايرة في دنيا جميله

نورتيني يا د. نورا ويارب دايما مبسوطة

Lady E يقول...

e_emy : انتي الارق يا ايمي

وفعلا نعمة الاهل نعمة كبيرة جدا للأسف كتير مش بيحسو انها نعمة وبيحسو انها من المسلمات ومش بيحسو بفرحتها
ومش بيفرق معاهم فرحهم

ربنا يباركلك في مامتك وباباكي واختك

وربنا يحفظ لينا اهلنا واحبائنا

Lady E يقول...

صمت الحنين : اللهم امين انا وانتي كل المسلمين يا قمرايا

اول 6 حاجات يبقى انتي كمان اسمك رحيق الورد :)

ربنا يارب يحقق حلمك وتزوري المدينة المنورة ويارب اروح تاني وان شاء الله هبقى ادعيلك في الروضة الشريفه هناك ولما تروحي ان شاء الله ابقي افتكريني وانتي في روحانيات المدينة
ومين عالم ممكن نزور المدينة انا وانتي في نفس ذات الوقت مفيش حاجه بعيد على ربنا سبحانه وتعالى

وجودك في البوست هو الاجمل

نورتيني

♥نبع الغرام♥♪≈ يقول...

السلام عليكم


وحشتينى قووى يا نونا
ربنا يديمعليك السعاده والفرح


بجد انا احاسيسى زيك بالظبط

ومتشبهان فى حاجات كتير قووى

اشكرك من كل قلبى على سؤالك عنى
ويارب تدوم المحبة

اختك
ايناس

Lady E يقول...

ستيته حسب الله الحمش : امين ربنا يديمها نعمة علينا كلنا

ربنا يسعدك دايما يا د. ستيتة حاجات جميلة وبسيطة اللي بتفرحك

وحيث انك من محبي الشوكولاته ف يبقى لي عندك شوكولاتايه :)

بحبك اوي
نورتيني

Lady E يقول...

MaNoOoSh : حاجات رقيقة اوي اللي بتخليكي تفرحي يا منوش

ربنا يفرحك دايما يا قمرايا

نورتيني

Lady E يقول...

أحمـــــــــــــد أبو العلا : كلها؟؟ انتا كمان اسمك رحيق الورد ولا ايه يا انجينير - وش بيطلع لسانو- نياهاهاهاها

جميل انك تبقى متواصل مع احمد اللي جواك

يارب تبقى دايما فرحان

Lady E يقول...

شموسة : اهلا بيكي يا قمرايا

عام اوي المعنى اللي بيفرحك يا شموسة

يارب تلاقي اللي بتدوري عليه دايما لكن لو ملقيتهوش برضه لازم تفرحي علشان ممكن اللي بتدوري عليه ميكونش فيه خير ليكي

وبعدين كذا مرة قولت للبوست ميخرجش من القلب لواحده لكن مبيسمعش كلامي :)

نورتيني

Lady E يقول...

معتز شاهين - باحث تربوي : اللهم امين

شكرا على رد حضرتك

Lady E يقول...

blue-wave : مش مش اخو مش مشة :)

للأسف علشان طفلة كبيرة فبيستهينو بمشاعرها

Lady E يقول...

شباك موارب : اللهم امين

وانتي الافظع يا قمرايا انا كمان لما دخلت مدونتك حسيت ان في حاجات كتير انتي كتباها وقريبة مني

نورتيني يا منار

Lady E يقول...

dramaqueen : ياااااه تسلميلي يا كوين

ربنا يفرحك ويسعدك دايما

وشكرا ع المجاملة يا قمرايا

Lady E يقول...

MR./zanaty : الحمد لله لسه ممنعوش الفرحة من السوق :)

وايه علاقة التفاؤل بقسم الالعاب؟؟
انا بدخل قسم العاب الاطفال لأن ده اكتر مكان بحس اني طفلة فيه وسط الدباديب والعرايس وباقي اللعب

وبلاش الموضوع يفتح نفسك اوي علشان متعملش دايت بعد كده

Lady E يقول...

THE illusionist : ههههههه مين فرحانه دي انا ليدي مش فرحانه عااااا

واوووووووووكي سرك في بيييييييير

يا شيمووووووووووووو شوووووووفتي

THE illusionist بيقول عليكي ايه

نياهاهاهاهاها ضحكة شوريرة

Lady E يقول...

صمت المشاعر : اللهم امين انا وانتي والمسلمين يا قمرايا

دمتي بخير

Lady E يقول...

إيمان : ودي بقت حاجات نادرة اوي

ومعتقدش ان البوستات المتفائلة هتستمر كتير نياهاهاهاها

Lady E يقول...

عاشقة الأحزان : وعليكم السلام ورحمة الله وبركاته

اكيد يا انوس لازم نكون متشابهين في حاجات كتير اومال اختي الصغنونة ازاي :)

ولو على الشكر يبقى انا اللي لازم اشكرك على سؤالك عني طول ايام الامتحانات

ربنا يديم المحبة
وربنا يسعدك ويفرحك دايما يا قمرايا

The illusionist يقول...

ضحه شريره
ماشى
فينا من ال
نياهاهاهاهاها
وال
هع هع هعه ع
ماشى ماشى
لنا تار قادم
وانا اسف يا شيمو
بلاش رباط صليبى
انا لسه شباب

دعاء يقول...

بفرح لما أدخل مدونة والاقى صاحبها بلدياتى وانا مكنتش اعرف
دعاء
من دمياط

moustapha achraf يقول...

كويس ان الواحد لسة ى حاجات بسيطة كدة بتفرحة
يا رب دايما

Lady E يقول...

THE illusionist: ضحه ؟؟ انتا جايب صبحتك معاك في الكومنت ولا ايه نياهاهاهاهاها تاني


ومع اني مش عارفه مين الرباط الصليبي ده بس تستاهله ها ها ها ها

Lady E يقول...

دعاء : هييييييييييه اخيرا حد بلدياتي على بلوجر

منوراني يا بلدياتي وبجد فرحت بيكي

Lady E يقول...

Blind Sniper : وليه لأ يا سنيبر

لو مكناش نفرح بالحاجات البسيطة اللي بتحصل في حياتنا مين هيفرح بيها غيرنا

دمت بخير