السبت، 12 يوليو 2008
أرواح شوريرة وأشباح مريرة
أخيرا خلصت قراءة كتاب أرواح وأشباح للكاتب الكبير : أنيس منصور
بجد الكتاب مفيد ومخيف في نفس ذات الوقت ومش عارفة ليه كنت مبحبش اقرأ الكتاب الا والدنيا ضلمه يمكن علشان احس اني في فيلم رعب نياهاهاها . وحصللي كذا موقف مخيف لما كنت بقرأ الكتاب مثلا اول يوم قرأته سمعت أصوات مخيفة وقولت أكيد دي تهيؤات من الكتاب قعدت أقرأ أية الكرسي وأيات من القرأن الكريم حسيت بإطمئنان وفورا طفيت الكمبيوتر ومكملتش قراءه ...
وفي يوم تاني كنت بقرأ في الكتاب وعايشه مع الاحداث ومرعوبة وطبعا الدنيا كانت ضلمه وانا حاطه الهدفون ومشغلاه على اغاني بصوت عالي علشان مسمعش أي صوت مخيف ومفيش فايده لقيت صوت بيشخط فيا لييييييييييييدي ليييييييييييييييييييييدي
شيلت الهيدفون وبصيت في كل الاوضه مش شايفه حاجه وقلت بأعلى صوت عندي ب بسم الله الرحمن الرحييييييم
ولقيت صوت بيقوللي بسم الله الرحمن الرحيم !!!؟؟؟ عرفت ان الصوت ده صوت باباتي وقلت لبابا : خضتني يا بابااااااااااااا
طبعا بابا اضايق مني يوميها وقاللي مش هتقرأي الكتاب ده تاني وابقي افتحي النور وشغلي السماعات مش الهدفون بدام انتي خوافه كده
المهم بعديها قرأت كذا في كذا كتاب تاني برضه شوية منهم للكاتب أنيس منصور وبرضه رجعت لكتاب أرواح وأشباح تاني ...
لاحظت أن معظم (الشبحات) يعني الأشباح بس مؤنثة (Female Ghosts) يعني الشبحة والشبحة والشبحة جمعها (الشبحات) اتعذبوا جدا
واتظلموا وكانوا ضحايا واحدة أخوها موتها والتانية جوزها قطعها نصفين والثالثة (ماري انطوانيت) ماتت بسبب الثورة الفرنسية (مقطوعة الرأس) والرابعة اتخنقت من أبوها ومن معاملته السيئة ليها فانتحرت وبعد كده ظهروا على شكل أشباح منها الرقيقة ومنها الشوريرة .
والغريب ان وأنا بقرأ الكتاب كنت بعيط كتير وساعات كنت بسرح في ولا حاجه وكنت بحس بحزن مش عارفة معناه يمكن حزن على الشبحات والأشباح واللي حصلهم في الدنيا
ومش ممكن أنكر ان أسلوب الكتاب كان رائع واني استفدت جدا منه وتنحت وازبهليت لما افتكرت حاجة حصلتلي قريب ومذكورة في الكتاب
صــــــــــ203ــــــ ((نعم كنت هنا من قبل))
والبوست الجاي ان شاء الله هتكلم عن الموقف اللي حصللي واللي شبه المواقف اللي مذكورة في الكتاب
الاشتراك في:
تعليقات الرسالة (Atom)
هناك 12 تعليقًا:
انتى خليتينى أدور على الكناب ده
وان شاء الله هقراه
عوووووووووووووو
:D
funckydoctor : منور البلوج
والبوست المخيف ده يا دكتر خصوصا بعد
امتحان الباطنةاللي كان مرعب لواحده
وليه عايز تقرأ الكتاب بس ده الكلية
هي قمة الرعب نياهاهاهاها
بجد سعيدة بإنك اول حد يعلق على البوست يا دكتر
كنت حسيت ان البلوج في كوكب بلوتو واول لما اي حد بيدخل البلوج بيكتشف ان الكوكب بعيد عن كوكب الأرض فبيجري ومش بيلحق يسيب كومنت
طيب هدور عليه وذنبى فى رقبتك يا ليدى لانى عايشه فى الشقه لوحدياتى اليومين دول ههههههههههه
appy: منورة يا قمر بجد سعيدة جدا بزيارتك الجميلة دي بس فين بطوط والخروف البمبي
وأنا من هذا السطر وهذا المكان بأعلن اعلاااان هام ان ملييييييييش دعوه باللي هيحصلك يا appy وخصوصا انك home alone دلوكيت
هو الكتاب نفسه مش مخيف لكن المخيف الجو اللي انا كنت عملاه وانا بقرأ الكتاب ههههههه
شكرا يا أحلى appy على الكومنت الجميلة دي ولما تقرأي الكتاب ابقي قوليلي ايه اللي حصل معاكي
على فكرة
دى اول زيارة وعجبتنى المدونه جدا
اسلوبك طفولى عسول لذيذ مشوق جدا
تحياتى
blue-wave : أهلا بيك يا دكتر
كلامك شهادة أعتز بيها
وان شاء الله متبقاش الزيارة الأولى والأخيره
نورت البلوج يادكتر وانا متشكرة جدا على الزيارة الجميلة دي وان شاء الله الجزء التاني من ارواح شوريرة يكون أحلى من الجزء الأول
ليديييييييييييي يا ليديييييييييي
انا فكرته يا شيخه كيني روجرز
الحمد لله جات سليمة وطلع باباكي
ايه يا بنتي هو عم انيس معينك مديرة الدعايا بتاعته
انا كمان هدور على ابو الانس وانزل الكتاب
الخوف بئه ابوا وامي يلاقوني نايم جنبهم بالليل مش عارف وقتها هقولهم ايه
ربنا يستر
فتك بعافيه يا ليدي
كلبوشستان عندنا يا مرحبا يا مرحبا
وفعلا الروعباية الحلوة دي كانت ناقصة كيني روجرز ويوسف خوري في فيلم كتكوت يجي يغني ليدي بالمره بقى
ومتقلقش انا مديرة دعاية فاشلة لأن كتب الاستاذ أنيس منصور مش محتاجه دعايه خالص هي مشهورة لواحديها
وابني المحكمة انتا بس وبعدين الاشباح مش هتجرؤ تيجي ناحيتك خااااااالص علشان عارفين انك قاضي اد الدنيا
نورت البلوج والبوست
والله يعافيك يا كلبوشستان
بقى الصوت كان بيقولك يا ليدى
على اساس ان العفريت عنده مدونة
و عارف اسمك التدوينى
ههههههههههههههه
عفريت ديجيتال
ههههههههه
بس عموما انا كتب الرعب و امنا الغولة دى
هى اللى بتخاف منى مش انا اللى بخاف منها
لان انا لو طلع لى عفريت فى الحقيقة
حطلع عينة و مش بعيد اخلية الصبى بتاعى فى القهوة بتاعتى
بصى نصحتى ليكى
لما تكونى خايفة بلاش الاغانى
عشان هى مبعث الرعب و لخلخه القلوب
بس الشبحات صعبت عليا اوووووى
ههههههههههههههههه
بوست دمه خفيف
تحياتى
اسلام
مواطن مصري نايم : منور البلوج والبوست
ما هو الصوت طلع صوت بابا الحمد لله وهو لو كان صوت عفريت كان زماني بكلمكم من هنا هههههههههه لالالا كان زماني هناااك شبحايه مع الشبحات
وانا نفسي بجد يطلعلك عفريت علشان تشوف هتخليه الصبي بتاع القهوة ولا هتعمل ايه وعندك واحد اورنج جوس وصلحوووووووه ليا طبعا من القهوة بتاعتك يا اسلام
حلوة لخلخة القلوب دي على اساس انها سنة ولا درس ولا حاجه بس نصيحه مقبوله يا اسلام وان شاء الله هتبقى محل دراسه
ومعلش بقى ميصعبش عليك غالي
هاى يا ليدى
أخبارك إيه؟
فكرتينى بأول مرة قريت فيها الكتاب ده.. كنت ساعتها صغيرة خالص ممكن تقولى فى تانية أ تالتة إبتدائى .. مانت ماما بتقراه ولما سابته قعدت أقرا فيه شوية.. ومن ساعتها وأنا معقدة من الكتاب ده
ههههههههههههه
بس سيبك إنت حلوة حكاية السبحات دى أول مرة أسمعها
شبحة وشبحة وشبحة يبقوا شبحات
ههههههههههههههه
لأ جديدة جديدة يعنى
متتأخريش بقى فى حكاية الموقف
سلام
maiosha: هييييييييه ميوشه جت ميوشة جت
الحمد لله انا تمام يا قمرايا يا رب تكوني بخير
و يااااه بجد كنتي صغنونه خاااااالص لما قراتي الكتاب انا كنت بقرأ حاجات اطفالي وانا صغنونه مجلة ماجد مثلا بطوط مجلات سيدتي او حواء... الخ , لكن حاجات مخيفة كده زي ارواح واشباح لالالا صعب الله يكون في عونك ده كويس ان الكتاب عملك عقدة واحدة بس مش عقد بشنيطة وكلاكيع
وعن موضوع الشبحات أكيد مش أي حاجه لازم تاء التانيث والألف معاها اومال هيبقى جمع مؤنث سالم ازاي بقى هههههههههه ده قاموس ليدي حصريا هنا في البلوج بس
وهكتب البوست الجديد دلوقتي ان شاء الله يا قمر انتي تأمري بس
نورتي البلوج يا قمرايا بجد سعيدة بزيارتك الجميلة دي
إرسال تعليق