الثلاثاء، 6 ديسمبر 2011

المدير اشتغل خاطبة


الحمد لله ان اللي هتكلم عنهم النهاردة مفيش عندهم ولا فيس ولا يعرفوا يعني ايه بلوجر -كناية عن انهم مبيعرفوش حاجة جهلاء تكنولوجيا-


أنا أشتغلت English teacher!!!! وعلامة تعجب أكتر احتمال أسيب الشغل الشهر ده لغاية لما يلاقوا مدرسة تانيه غيري مع اني مكملتش يومين في المدرسة وتقريبا في لعنة في المدرسة دي لمدرسات الإنجليش
في 5 مدرسات استقالوا قبل ما انا أروح


الشغل ده جالي عن طريق جارتنا ومجتمعنا المصري الحبيب كله بيدخل في حياة كله

على رأي ياسمين عبد العزيز : كل الناس بتتدخل في حياة كل الناس بطريقة تضايق كل الناس


الشغل سلبياته أكتر من ايجابياته بس هدفي من الشغل اني عايزة أراجع لغتي الانجليش بدل ما تطير وفي نفس الوقت عايزة أغير جو بدل ما أقعد في البيت

انا كنت عارفة من الأول ان هيبقى في فرق ثقافي رهيب بيني وبين المدرسات المصريات اللي في المدرسة في كل حاجة مفيش حاجة بتجمعنا الا اننا مصريين وفي غربة بس غير كده ولا تفكير ولا طريقة لبس .... الخ
النهاردة تاني يوم ليا في المدرسة وكانوا موصرين اني اشرب شاي يا جماعه مبحبوش لأ لازم تشربيه علشان تصحصحي قولتلهم أنا شربت شاي بارد الصبح لأني لو قولتلهم أيس تي مش عارفه هيعتبروها شتيمة ولا ايه !!
فضلوا شوية كتار يتكلموا على الشاي البارد والكائنة اللي جايه من الفضاء اللي مبتحبش الشاي ..

المدرسات أسهل حاجة عندهم الضرب وانا شايفة ان المدرس مينفعش يضرب لأنه بيتعامل مع بني أدميين مش مع حيوانات ممكن أعاقبهم عقاب تاني لكن ضرب مرفوض بالنسبة لي ف دي نقطة اخدوها عليا برضه وكأني برضه كائن فضائي

أكتر موقف استفزني النهاردة جد
ا كان عندي حصة وأغلب الطلاب اللي بدرسلهم اشقياء جدا وبيقلدوا مدرسة المشاغبين فلقيت العامل الهندي في المدرسة بيقوللي المدير عايزك فكملت كلامي شوية مع طلابي فلقيته أصر أوي وقاللي المدير عايزك فنزلت أشوف في ايه ؟ لقيت في شاب عند المدير بيتكلم معاه ف عادي دخلت
لقيت المدير اللي خلاني أسيب الحصة وأنزل أكلمه بسرعه بيقوللي ايه؟ هي ميس أميرة – اللي كانت انجليش قبلي-
عاملة نشاط؟ قولتله مش عارفه هبقى اخد رقمها وأكلمها وأسألها قاللي طيب علشان تعملي نشاط
في الوقت ده لقيت الشاب ده بيبصلي ومنتبه اوي للحوار !! مع اني مكنتش بصاله بس أنا بعرف طاقة الموجودين قدامي عاملة ازاي وعرفت انه بيبصلي فقولت للمدير بسرعه طيب انا هعمل النشاط عادي وجابلي فايل اخدته ولسه بمشي فاجئني بسؤال

انتي منين؟ !!!!!!!!!!!!!!!! علامات تعجب من هنا لبكرة ما انا يا ابن الناس لسه عامله انترفيو امبارح وسألتني نفس السؤال لحقت تنسى :( جاوبت بإقتضاب على رأي اللغة العربية الفصحى .. من دمياط
فقال للشاب :
اهي طلعت بحراوية يا عم !!!!!!!!!!!!!!! وهو مال اهله انا بحراوية ولا صعيدية ولا قاهريه
المدير كان لسه مكملش كلامه ولفيت وسبته ومشيت قاللي استني قولتله عندي class ورجعت للحصة بتاعتي

العالم ده مش بتاعي وطالما ان الجو ده مش الجو بتاعي نتيجة طبيعية اني احس بالضيق اللي حاسه بيه دلوقتي

هو مينفعش وردة تتزرع وسط صبار بس انا حاليا عملت كده وبكرة هقول تجربة وعدت عدت عدت ومش هكررها تاني


في مدرسة كبيرة في السن حطاني في دماغها – مصرية- وكل يوم تضايقني بكلام ملوش أي 30 لازمة

وزملائي المدرسين الشباب السنجل حركاتهم حركات مراهقين !! كان نفسي يكونوا أنضج من كده ويعرفوا معنى الزمالة ..

عالعموم الأيام الجايه هتعرفني وهتعلمني حاجات كتير ومحدش بيتعلم بالساهل والعمل عبادة

ولازم لما أوصل لهدفي اني أبقى دكتورة في الجامعة أفتكر كويس اوي انا تعبت أد ايه صحيا ونفسيا علشان أوصل وأحقق حلم من أحلامي

هناك 17 تعليقًا:

قلم رصاص يقول...

أكتر الأشياء اللي بتثير استفزاز الانسان السوي، هي تدخل الناس في حياته على هذه الشاكلة والطريقة.

انت منين؟ (مثلا) وميسكتش لما ارد واريحه, ﻻااااااا لازم يقصص بقى، ويعمل تعقيب واقتباسات وحوارات زرقا..!!!

على كل حال، فعلا محدش بيتعلم ببلاش زي مابيقولوا. لازم يكون فيه ضريبه هاتدفع، من المزاج العام، والحالة النفسيه احيانا. المهم ان تجاربنا تصقل حياتنا وتثريها، رغم كل المنغصات اللي فيها، الا انها بتفيد في بيان الغث من الثمين كما يقال.

وبالتوفيق دايما، وتحققي كل اهدافك واحلامك يارب ان شاء الله

تقبلي تحيتي :)

نيللي علي يقول...

كل اللى هقولهولك انى كل يوم بتعلم منك حاجه جديدة,والنهارده اتعلمت منك يعنى ايه اصرار ثم الأصرار ثم الأصرار ..ثم اخد القرار والتجربه ..

ربنا يوفقك يارب ..ويبعد عنك الناس الشر يارب آمين

amiraali يقول...

هههههههههههههه..... والله الشعب المصري ده محدش بيسيب حد في حاله...

nour alqamar يقول...

استمتعت يالقراءه بالفعل الموضوع شدنى وضحكنى الامر فى الاول .. بس بينى وبينك انتى اشتغلى فى المكان الى ترتاحي فيه بجد وربنا يوفقك ..
مع تحياتى
نور

Tamer Moghazy يقول...

عندك حق..
كل الناس بتتدخل في حياة كل الناس بطريقة تضايق كل الناس..!!

انا بقيت باهرب من التعامل او النقاش مع الناس من كتر الاخطاء اللي باشوفها منهم كل يوم ..!!

لو ينفع اعتذر لك عن كل تصرف غلط بتقابليه..
بس لو ده حصل..
تفتكري مين يعتذر لي..؟؟!!
ولو ده كمان حصل.. يبقى محتاجين واحد يعتذر لكل واحد صح عن كل الغلط اللي عمله الباقيين...!!

فراشة يقول...

يعني أقول مبروك للشغل ولا ايه النظام

عارفه أحلى حاجه أصلا انك تقابلي ناس مش شبهك , عشان هتتعلمي منهم حاجات كتير قوي
هتتعرفي على شخصيات مختلفه عنك فمش هتتصدمي لو قابلتيهم ناس زيهم بعد كده

انا كل المدرسه كانت مستغرباني عشان انا بقول يا استاذه كذا بدل كلمه (أبله )
وكنت بخلي التلاميذ يقولولي يا استاذه مش يا ميس :)

التجربه بتبقى حلوة قوي
عيشيها بكل تفاصييلها

ومبروك الخبرات الجدييده ف حياتك :)

قصيدة وآقعية .. يقول...

دايما التجارب الجديده بتعلمنا دروس جديده ..
صحيح إن كل الناس بتتدخل في حياة كل الناس بطريقة تضايق كل الناس! بس مش معنى كده إننا نستسلم قدام أول تحدي بالعكس إنتي تقدري تثبتي شخصيتك وتفرضيها واللي عاجبه أهلا وسهلاً واللي مش عاجبه دي تبقى حاجه تخصه هوّ !
طبعاً قرارك لازم يريحك بس أنا عجبني كلامك خصوصاً عن الإصرار وإصرارك لازم يخليكي تنجحي في شغلتك دي وعلى الأقل ساعتها هيقولوا إنك إنتي اللي غيرتي وأثرتي في المكان ده وإنك بتختلفي عن اللي قبلك بإنك شخص عنده رساله وهدف..
بس طبعاً إذا شغلك ده هيأثر بالسلب على تحقيق هدفك الرئيسي فقلته أحسن!

P A S H A يقول...

سرحت وأنا باكتب التعليق دلوقت هنا في صفحة التعليقات .. ضغطت على إظهار الرسالة الأصلية / إخفاء الرسالة الأصلية :)

جميل إنك عارفه هدفك ورسالتك الأصلية وإن شاء الله ربنا يوفقك وتحققيه رغم بعض السلبيات اللي ممكن تقابليها :)

sony2000 يقول...

الف مبروك اولا
ثانيا خدي بالك من نفسك
وطمنينيا عليكي

sony2000 يقول...

طمنينا عليكي

Lady E يقول...

قلم رصاص : الله عليك : " لازم يكون فيه ضريبه هاتدفع، من المزاج العام، والحالة النفسيه احيانا. المهم ان تجاربنا تصقل حياتنا وتثريها، رغم كل المنغصات اللي فيها، الا انها بتفيد في بيان الغث من الثمين كما يقال." ده حقيقي جدا

اللهم امين وانت كمان

Lady E يقول...

نيللي : وانا كمان بتعلم منك وباخد برأيك في حاجات كتير والحمد لله اننا أصدقاء :)

اللهم أمين

احلى دعوة :) وليكي مثلها

Lady E يقول...

amiraali : للأسف !!!

Lady E يقول...

نور القمر : تسلمي :)

بحاول ارتاح في المكان اللي بشتغل فيه يا نور

Lady E يقول...

Timo.. : كلامك فلسفي جدا يا تيمو

واضح انك مضايق من الموضوع ده اكتر مني بس انا بضايق وبصد الأخطاء أو الفضول لو لقيتني مش عارفة بتجنب النقاش مع الناس اللي من النوعية دي

سعيدة بتعليقك بجد

Lady E يقول...

فراشة وقصيدة واقعية وباشا وسوني : تعليقاتكم مينفعش ارد عليها بسرعة ه أرد عليها بكرة ان شاء الله بس بجد جزاكم الله خيرا

rona ali يقول...

انا شدنى العنوان قولت ازاى معلتقتش من قبل كدة
ياحجه انا كتير مبخدش بالي ابعتى ميسد طيب بالجديد
انبوكسيا حلوة كدة تنبهينى بيها^_^

صراحتآ البوست دة عجبنى فيه اكتر من حاجه
اولا مساله الخاطبه والمدير مضحكنى موووت الناس الحشريه دى مش هتحل عنا بقي
والله احنا لو عايزين منبقاش سينجل اولآ مش بالطريقه دى ثانيآ احنا حالتنا مش تصعب علي الكافر يعنى احنا مش بنتسول عريس

ثانيآ موضوع اصرارك دة عجبنى ويخلى اى حد يتفائل منك
فعلا احنا احيانآ كتير بندخل حاجات وتجارب مش بتاعتنا بس بنحاول نتعلم ونستفاد والاهم منقفش عند الخطوة والمرحله دى كتير والاهم ان التجارب متجيبش ندم
ثالثآ احيانا البيئه ومكان العمل بيبقي يقرف مع ذلك انتى ممكن تنجحى وفكرة الاستقصادى دايمآ تلاقيها مابين المصريين وتلقيهم فكرينك دلوقتى متكبره عليهم وعامله نفسك مستوى
ههههههههههههههههه
بس احلى حاجه انك كل دة عارفه ومش مخليه ياثر عليكى :))

تحياتى لفكرك يا قمر انت ياقمر ^_^