المدير اشتغل خاطبة

الحمد لله ان اللي هتكلم عنهم النهاردة مفيش عندهم ولا فيس ولا يعرفوا يعني ايه بلوجر -كناية عن انهم مبيعرفوش حاجة جهلاء تكنولوجيا-

أنا أشتغلت English teacher!!!! وعلامة تعجب أكتر احتمال أسيب الشغل الشهر ده لغاية لما يلاقوا مدرسة تانيه غيري مع اني مكملتش يومين في المدرسة وتقريبا في لعنة في المدرسة دي لمدرسات الإنجليش
في 5 مدرسات استقالوا قبل ما انا أروح

الشغل ده جالي عن طريق جارتنا ومجتمعنا المصري الحبيب كله بيدخل في حياة كله

على رأي ياسمين عبد العزيز : كل الناس بتتدخل في حياة كل الناس بطريقة تضايق كل الناس

الشغل سلبياته أكتر من ايجابياته بس هدفي من الشغل اني عايزة أراجع لغتي الانجليش بدل ما تطير وفي نفس الوقت عايزة أغير جو بدل ما أقعد في البيت

انا كنت عارفة من الأول ان هيبقى في فرق ثقافي رهيب بيني وبين المدرسات المصريات اللي في المدرسة في كل حاجة مفيش حاجة بتجمعنا الا اننا مصريين وفي غربة بس غير كده ولا تفكير ولا طريقة لبس .... الخ
النهاردة تاني يوم ليا في المدرسة وكانوا موصرين اني اشرب شاي يا جماعه مبحبوش لأ لازم تشربيه علشان تصحصحي قولتلهم أنا شربت شاي بارد الصبح لأني لو قولتلهم أيس تي مش عارفه هيعتبروها شتيمة ولا ايه !!
فضلوا شوية كتار يتكلموا على الشاي البارد والكائنة اللي جايه من الفضاء اللي مبتحبش الشاي ..

المدرسات أسهل حاجة عندهم الضرب وانا شايفة ان المدرس مينفعش يضرب لأنه بيتعامل مع بني أدميين مش مع حيوانات ممكن أعاقبهم عقاب تاني لكن ضرب مرفوض بالنسبة لي ف دي نقطة اخدوها عليا برضه وكأني برضه كائن فضائي

أكتر موقف استفزني النهاردة جدا كان عندي حصة وأغلب الطلاب اللي بدرسلهم اشقياء جدا وبيقلدوا مدرسة المشاغبين فلقيت العامل الهندي في المدرسة بيقوللي المدير عايزك فكملت كلامي شوية مع طلابي فلقيته أصر أوي وقاللي المدير عايزك فنزلت أشوف في ايه ؟ لقيت في شاب عند المدير بيتكلم معاه ف عادي دخلت
لقيت المدير اللي خلاني أسيب الحصة وأنزل أكلمه بسرعه بيقوللي ايه؟ هي ميس أميرة – اللي كانت انجليش قبلي-
عاملة نشاط؟ قولتله مش عارفه هبقى اخد رقمها وأكلمها وأسألها قاللي طيب علشان تعملي نشاط
في الوقت ده لقيت الشاب ده بيبصلي ومنتبه اوي للحوار !! مع اني مكنتش بصاله بس أنا بعرف طاقة الموجودين قدامي عاملة ازاي وعرفت انه بيبصلي فقولت للمدير بسرعه طيب انا هعمل النشاط عادي وجابلي فايل اخدته ولسه بمشي فاجئني بسؤال
انتي منين؟ !!!!!!!!!!!!!!!! علامات تعجب من هنا لبكرة ما انا يا ابن الناس لسه عامله انترفيو امبارح وسألتني نفس السؤال لحقت تنسى :( جاوبت بإقتضاب على رأي اللغة العربية الفصحى .. من دمياط
فقال للشاب : اهي طلعت بحراوية يا عم !!!!!!!!!!!!!!! وهو مال اهله انا بحراوية ولا صعيدية ولا قاهريه
المدير كان لسه مكملش كلامه ولفيت وسبته ومشيت قاللي استني قولتله عندي class ورجعت للحصة بتاعتي

العالم ده مش بتاعي وطالما ان الجو ده مش الجو بتاعي نتيجة طبيعية اني احس بالضيق اللي حاسه بيه دلوقتي

هو مينفعش وردة تتزرع وسط صبار بس انا حاليا عملت كده وبكرة هقول تجربة وعدت عدت عدت ومش هكررها تاني

في مدرسة كبيرة في السن حطاني في دماغها – مصرية- وكل يوم تضايقني بكلام ملوش أي 30 لازمة

وزملائي المدرسين الشباب السنجل حركاتهم حركات مراهقين !! كان نفسي يكونوا أنضج من كده ويعرفوا معنى الزمالة ..

عالعموم الأيام الجايه هتعرفني وهتعلمني حاجات كتير ومحدش بيتعلم بالساهل والعمل عبادة

ولازم لما أوصل لهدفي اني أبقى دكتورة في الجامعة أفتكر كويس اوي انا تعبت أد ايه صحيا ونفسيا علشان أوصل وأحقق حلم من أحلامي