الاثنين، 21 نوفمبر، 2011

يارب مصر يارب بلدي + تحديث

تحديث : اللي نقل كلامي من غير ما يستأذن مني وياخد اذن بنقل محتوى من مدونتي هو انسان قليل الذوق ومسمعش عن حقوق الملكية الفكرية قبل كده وحتى بعدما نشر كلامي مبلغنيش انه نشره انا عرفت بالصدفة وكمان مش كاتب اسمه تحت المقال !!

http://m.albawaba.com/ar/node/401862 ده اللينك


مش عارفة أنام ودمي محروق ذنبهم ايه الشباب يفقدوا عينيهم ويتخنقوا بالغاز وهما بيجروا يقعوا وايديهم أو رجلهم تتكسر

طيب الشاب اللي في الفيديو اللي متشير دلوقتي عالفيس اللي مات برصاص القوات اللي كانت في ميدان التحرير ومش عارفه اميز شرطة ولا جيش واللي مات ومش بس كده اتسحــــــــــل واتجرجر في الشارع بعدما ما مات ومش كده وبس كمان اللي جره حطه في مكان مليان زبالة موجوعة اوي وانا بكتب كده وموجوعة ان مفيش في ايدي حيلة نفس العجز اللي حسيته اول ايام الثورة 25-1
كان نفسي جدا أكون طبيبة وأشارك في تطيب جروح الناس دي اللي بيضحوا بكل حاجة غالية في حياتهم علشان ناس بيشتموهم وبيقولوا عليهم بلطجية ومشاغبين
كان نفسي دلوقتي أكون في بلدي وأنا فعلا منفية نفي إجباري لأن صعب أرجع أقعد في مصر لوحدي في الظروف دي مع ان ربنا شاهد اني كنت بمشي في شوارع مصر مطمئنة أكتر ما بمشي في الشوارع هنا
مع ان بيقولو ان هنا بلد أمن وأمان وفي مصر في بلطجية !!
شهر ونص قعدته في مصر متعرضتش للسرقة يمكن عربيتي حمتني من موضوع السرقة ده بس مفيش مانع انها كانت تتسرق لو فعلا في لكل مواطن بلطجي وخصوصا اني كنت ساعات بنساها مفتوحة وساعات بنسى الموبايل فيها ؟ خايفة؟ كنت خايفة في الأول من كلام الإعلام
الإعلام المصري اللي طلع أكبر كذبة في الدنيا ومش بس انا اللي كنت خايفة ماما كمان كانت خايفة عليا ومكنتش بتسبني اروح مكان لوحدي ده طبعا من كلام الإعلام عن مصر وقبل حتى ما يكون معايا العربية كنت بركب مواصلات عادي جدا والقصة اللي سمعتها مليون مرة كل ما احب اروح محافظة من محافظات مصر يقولوهالي علشان يخوفوني من المحافظة اللي عايزة أروحها !!

لأن كان من احلامي اني أدرس دراسات عليا في امريكا فكنت بقرأ كتير عنها وسمعت دكاترتنا بيحكوا لنا عن شيكاجو وغيرها والرعب اللي بيحصل فيهم وتقنيات الأمن اللي المفروض نتبعها كطلاب دوليين واحنا ماشيين في الشارع زي مثلا ان شنطة ايدنا تبقى على كتفنا وراسنا وزي كمان اننا نمشي بإسبراي دفاع عن النفس وكمان نمشي بفلوس قليلة علشان اكيد هنتعرض للسرقة ونخبي أي لاب توب ومنلبسش أي دهب أو أي ساعة غالية مثلا
حد واخد باله ان دي امريكا ؟ وكان في محاضر مصري امريكي وهو اللي كان بيقول تعليمات الأمن وكتب امريكية بتعلم التعليمات دي للطلاب الدوليين !!
مصر برغم ان مفيش حد بيدافع عن مواطنيها الا ان الدنيا موصلتش للدرجة دي وموصلتش ان كل واحد يخبي سلاح في بيته !!

وأنا مسافرة وبحط شنطتي على جهاز بيكشف في ايه في الشنط اللي كان قاعد عالجهاز ومعاه واحدة قاللي لو سمحتي افتحي شنطتك بعدما شنطتي عدت عالجهاز قولتله ليه؟ قاللي شاكك ان فيها قصافة !! فتحت شنطتي وبصو فيها وملقوش أي الة حادة أو ممنوع تطلع الطيارة فلقيته بيقول لماما يا خسارة كان نفسي الأمورة دي يبقى معاها حاجة ونمنعها من السفر قولتله يااااااااااااااااااااريييييييييييييييييييت حاجة زي ايه؟ قاللي مطوة مثلا :) انتي مش عايزة تسافري؟ ماما قالتله ايوة مسافرة غصب عنها قال لماما بسيطة نحطلها مطوة في شنطتها ونمنعها من السفر يااااااااااااااااااااااريته عمل كده ومكنش الموضوع هزار
المشكلة كانت هتبقى اختيارين أصعب من بعض وأحلاهما مر بلدي ولا أهلي pan style="font-size:130%;">
أهلي هما اللي علموني أحب بلدي
يارب صبرني على بعدها برغم كل حاجة بحبها وكل يوم بيمر وأنا مش فيها بشتاق لها اكتر من اليوم اللي قبله
مصر هتعدي الأزمة ياااااااااارب مصر تعدي الأزمة دي وتبقى أحسن بلد في الدنيا
ربنا يعوض اللي اتصابوا ويرحم اللي ماتوا ويفرجها من عنده ويبقى فرجه قريب يارب

هناك 11 تعليقًا:

دعاء يقول...

يا رب سترك علينا

يا رب

Miss LoZa يقول...

انا كمان كان نفسى يكون فأيدى حاجة أقدر اعملها علشان احوال البلد دى تتعدل :(
موضوع السرقة دى فأى بلد اصلا وزى ما قولتى فأمريكا حتى
انما الفكرة احساسك انتى بالامان مع أنك عارفة الاخطار اصلا
الاعلام زبالة وهيفضل زبالة اصلا
دول حاطين صورة واحد لابس ماسك على وشه من الغاز
ويقولولك كائنات فضائية ظهرت !
احلفوا بالله ان الى قريته ده حد عاقل يكتبه لو بجد ؟؟
معلش يا نوستى ربنا يرجعك بالسلامة وتكون الاحوال اتحسنت بأذن الله
واحنا معاكى يا سكر اصلاانتى مش فغربة :)

موقع البوابة يقول...

عزيزتي صاحبة المدونة
بداية نأسف لعدم إبلاغك بنشر الاقتباس المأخوذ من مدونتك ولكن نعتقد بأن حقوق الملكية الفكرية الموجودة لم يتم الإخلال بها وذلك لأن الرابط إلى مدونتك موجود في مقالنا إضافة إلى ذكر اسم المدون/المدونة.

ثانيا: بحثنا عن حساب لك على موقع تويتر لنخطرك بنشر التدوينة ولم نجده ولا يوجد عنوان إلكتروني يمكننا من خلاله التواصل معك.

نأسف لهذا الخطأ غير المقصود من طرفنا.

hasona يقول...

يا رب سترك
يا رب احفظ مصر والمصرين من كل سوء
يا رب نتجمع علي كلمة سواء بكل صدق وثقة

نيللى يقول...

يارب احفظ مصر يارب

هبة فاروق يقول...

اللهم احفظ مصر
تحياتى

Lady E يقول...

دعاء : اللهم أمين

Lady E يقول...

لوزة : ان شاء الله الأحوال تتحسن ودلوقتي مفيش في ايدنا كتير غير الدعاء ومتابعة أخبار بلدنا

وأنتوا فعلا بتهونوا غربتي يا مهموهتي ربنا يخليكو ليا

Lady E يقول...

موقع البوابة : بداية شكرا على الاعتذار لأن شجاعة الأعتذار دي ناس كتير مبيقدروش عليها

ثانيا : من ضمن حقوق الملكية الفكرية انكم تستأذنوا من صاحبة الكلام قبل ما تنشروه وموضوع تويتر انا عندي حساب على تويتر وعالفيس بوك والتواصل كان ممكن يكون من خلال المدونة زي التعليق ده دلوقتي وعلى فكرة اسمي إيناس الشناوي ولأن اسمي من بداية التدوين عالمدونة ليدي فمغيرتوش لغاية دلوقتي

على كل حال حصل خير وأرجو أن الخطأ ده ميتكررش مرة تانيه

Lady E يقول...

hasona : اللهم أمين

بجد افتقدت تعليقات حضرتك

Lady E يقول...

نيللي وهبة فاروق : اللهم أمين ربنا يتقبل دعائنا