الجمعة، 23 سبتمبر 2011

كل شيء بأوان



صورة دكتر ابراهيم في قاعة اوركيدا النيل في دمياط 22-9-2011
هذا الرجل أحبه :)
9 سنين فاتوا من قبل ما حد يسمع في مصر عن التنمية البشرية وأنا بكل اهتمام بتابع دكتور ابراهيم الفقي بقرأ كتبه وبشوف محاضراته في التلفزيون وفي السنين الأخيرة كنت كمان بشوف البرامج اللي بيعملها وفيديوهاته عاليوتيوب وبنصح كل الناس اللي أعرفهم انهم يروحوا يحضروا الدورات التدريبية اللي بيعملها وأنا نفسي بسبب الغربة وأشياء أخرى مكنتش بعرف أحضر
زي ما قولت قبل كده اني دعيت ربنا سبحانه وتعالى دعوتين والحمد لله ربنا استجاب الاتنين :) أه لو كنت أعرف ان الدعاء مستجاب في الوقت ده كنت دعيت كتييييييير
اول لما نزلت دمياط لقيت اعلان كورس دكتور ابراهيم الفقي مساعد ممارس في البرمجة اللغوية العصبية وبالرغم اني عارفه حاجات كتير وأخدت كورس قبل كده عن البرمجة اللغوية العصبية NLP الا اني كان لازم أروح ده دكتور ابراهيم أخيرا حلمي هيتحقق وأقابله
فضلت كام يوم مش عارفه أي حاجة عن الكورس ولا مواعيده شوفت بس الاعلان ومش معايا الكتكوتة علشان أروح لمكان ما شوفت الاعلان وأشوف هو فين ولا امتى؟
المهم عرفت ان المواعيد وكل حاجة في المركز الأوروبي طلعوا عييييييييينيييي علشان احجز تذكرة وقالولي في الاول مفيش تذاكر ورحتلهم 4 مرات علشان أحجز مع ان المفروض مرة واحدة بس وأحجز وخلاص بس كنت بقول العلم لا يكيل بالبتنجان لازم أتعب شوية وبعدين ده دكتور ابراهيم وهشوفه أخيرا وجالي برد شديد لسه مراحش لغاية دلوقتي وكان أصعب يوم هو أول يوم كورس ومع اني مبحبش أخرج من البيت وأكون مع الناس وأنا عندي برد بس رحت :) وحضرت أول يوم وكل الأيام لدرجة أن داليا قالتلي يا بنتي نفسي أشوفك من غير البرد ده :)

المهم أول يوم كان في مدرب وحش جدا ومش هحضرله تاني ابدا لأنه لاغي شخصيته ومطورش نفسه من أيام الثلاثينات ولا حاجة كان بيجيب أمثلة لناس لاعيبة كرة وممثلين من زمان أوي أغلب جيلنا مش عارف مين دول أصلا كان نفسي أقوله انت بتخاطب مين؟

تاني يوم المدرب أحمد قدوس اللي عجبني فيه أنه مبيحاولش يتقمص غيره ودمه خفيف وبيوصل المعلومة بطريقة تتفهم ومتتكلكعش
وهو بنفسه قال ان الانسان الناجح هو اللي بيشوف مدارس كتير وبياخد من كل مدرسه اللي يتناسب مع شخصيته ووقعلي على كتابه :)

دكتور ابراهيم بقى اليوم المشهود للأسف اتأخر ساعتين عن معاد التدريب المفروض كنا نبدأ الساعة 1 بدأ هو الساعة 3 والنور كان قاطع قبل ما يجي والقاعة كانت حر جدااااااا وأول لما دخل القاعة وبيقولنا انتو دايما تتأخروا؟ النور قطع فنزل تاني من على المسرح وبعدين طلع تاني بعد لما النور جه وكان مرهق جدا لدرجة كبيرة ولأني مجربة طريق القاهرة دمياط ده كتير فكنت حاسة بيه المشوار فعلا متعب حتى لو في عربية مكيفة بس الطريق وحش جدااااا
اول يوم كنت طول الوقت عايزة أمسك دكتور ابراهيم مش مصدقة انه فعلا حقيقة :) أخيرا مش من كتاب ولا من ورى شاشة تلفزيون ولا من ورى شاشة لاب حقيقي أخيرا
ودخلت وقعت كتابه وكان نفسي جدا أسلم عليه كان نفسي جدااااااااا جدااااا أسلم عليه لكن للأسف منعني حاجتين انه كان مرهق جدا ملامحه ونظرة عينيه كان باين عليها الارهاق وممكن كان يسلم عليا بفتور وساعتها كنت هتعب نفسيا جدا لو ده حصل وكمان الأوضة اللي كان بيوقع فيها الكتاب كان فيها مدير اعماله وحد من عيلته وحد من الشرطة بس شكل رتبته كبيرة ومدير المركز الكندي :) ف اتحرجت أكيد وأكتفيت اني أبص لملامحه بس واتأكد انه حقيقة :) لأنه مش أي حد أنا بعتبره الأب الروحي ليا - وده سر ميطلعش من بيناتنا- :)

النهاردة بقى اليوم فات زي الحلم فات بسرعة أوي ودكتر ابراهيم كان مرتاح أكتر من امبارح ومع ذلك باله كان مشغول أو عالأقل ده اللي حسيته وحاولت أجيب كارت شيك كده أكتب لدكتر ابراهيم كلمة رقيقة لفيت دمياط كلها في وقت الاستراحة في الكورس ملقتش :) وبعدما ما سافر لقيت :( فكتبت اللي عايزة اقوله في ورقة عادية وطبعا الشوباب ونفسي أقول عليهم الشباشب بس بلاش كانوا محاوطين دكتر ابراهيم بطريقة متخليش ولا بنوتة زي حالاتي تعرف تقرب منه وتسلم عليه وتديله الكلمة اللي كتبتها علشانه يمكن تخفف عنه ان في ناس مش فاهمينه وحاولوا يقتلوه يمكن وفعلا رحت لعند عربيته وملحقتش أكلمه برضه لنفس السبب خالد الذكر :) مدير أعماله وولد كان بيكلمه مقفلين على باب عربيته وأنا مش من النوع اللي ممكن أتقبل أن مدير الأعمال يشدني زي الأولاد مثلا فقولت لمدير أعماله ممكن أفتح الباب وأدي الكلمة دي لدكتور ابراهيم؟ قاللي لأ خلاص هو قفل الباب قولتله طيب عالأقل من الشباك قاللي طيب هاتيها لي وأنا والله العظيم هديهالو قولتلو أكيد؟ ف رد ولد جنبي قالك والله العظيم فمدير الأعمال بصلي بصة حد عايز يخنق حد :) فقولتله أكيد؟ قاللي والله العظيم هديهالو - كده مرتين - :) فجت داليا صاحبتي وقالتلي خلاص بقى يا إيناس الراجل حلف قولتلها خلاص يا داليا أدتهالو هو لو مودهاش لدكتور ابراهيم ربنا هيعاقبه ده حلف مرتين :) والتأكيد ده لأني شخصية حسية بحب أحس بالأمان وبعدين أسهل حاجة على مديرين الأعمال انهم ميوصلوش أي حاجة لأي حد وبعدين نفس الولد الرخم اللي جنبي قال لمدير اعمال الدكتور طيب انا عايز رقم تليفونك قالوا طيب خده وانا كمان كنت هاخده مع اني مكنتش هكلمه لأنه غلس بس مش عارفه طلعت الموبايل ومدير الأعمال قال 010266 ومكملش وطار عالعربية والعربية طارت وقدامها عربية بوليس متخفية والعربيتين أسود ف أسود :) ومشينا انا وداليا نضحك مش قادرين نمسك نفسنا من الضحك وفضلت أقولها 010266
وعدت الأيام بسرعة زي كل حاجة حلوة بتفوت بس مش دي النهاية ان شاء الله
ربنا يبارك في عمره بس أنا خفت لما افتكرت حديث الرسول صلى الله عليه وسلم :(أعمار أمتي ما بين الستين والسبعين ، وأقلهم من يجوز ذلك ) وهو عنده 61 سنة ربنا يبارك في عمره
وعالعموم انا فعلا الحمد لله سعيدة بالكورس ده ومش هسافر ان شاء الله الا وأنا معايا أكبر عدد من الكورسات والعلم ان شاء الله
الحمد لله كما ينبغي لجلال وجهك وعظيم سلطانك والحمد لله الذي تتم بفضله الصالحات
شكرا يا رب

هناك 12 تعليقًا:

Miss LoZa يقول...

ااااااااااااااه يانى
بتغظينى تانى ؟؟
يعنى على الفيس كتبى حاجة صغيرة وانا كنت هتجنن
تروحى تكتبى بوست طويل عريض فى كل تفاصيل اليوم !!
اعمل فيكى ايه طيب
هههههههههههههههههه
انا بجد نفسى اشوفه جدا جدا اصلا
ويا ريته كمل الرقم :(
انتى نامى واحلمى يمكن باقى الرقم يجى فالحلم
ههههههههههههههه

P A S H A يقول...

أولا : ورا وليست ورى (الخلق على ما اعتقد)
عظيم سلطانك ف آخر البوست :)
ثانيا : ربك السميع المجيب وقادر على كل شيء ، سعيد إن الأمنيتين اتحققوا ، ما تكسليش ! واتمني تاني :)
ثالثا : ‏‎ ‎الكارت كان مكتوب فيه إيه ؟؟ ‏D‏:
ربنا يوفقك وتحققي أمنياتك

Lady E يقول...

Miss LoZa : طيب ممكن أغيظك تالت بليز؟
وأنا بكتب الاستيتس عالفيس كنت في الكورس :)

يا لوزتي ويا مهموهتي أنا قعدت 9 سنين أحلم باليوم ده وموقفتش في مكاني كنت بتحرك للهدف ده كل يوم كنت بروح كورسات لمجرد انهم طلاب دكتور ابراهيم وكنت بتكلم عنه دايما مع كل الناس أول لما الاقي فرصة وكنت بدعي ربنا كتير انه يوفقني وأحضر كورسات ليه
والحمد لله اللي بيصبر بينول
اصبري بقى

وعلى فكرة رقم دكتور ابراهيم من الأسرار الحربية :) علشان تكلميه لازم تكلمي مكتبه أو مدير أعماله بس أو مدير أعماله ومساعديه كمان :) واللي مكملش ده رقم مدير أعماله

وهغيظك لتالت مرة أخدت رقم مدير المركز الكندي علشان أبقى أحجز في الكورسات عندهم :) لو عايزاه مش هبعتهولك على فكرة نياهاهاها نياهاها نياهاهاهاهاهاها ضحكات متقطعة شوريرة

Lady E يقول...

P A S H A : أولا أعتذر عن اللغة اللي باظت لأن بقالي كتير مكتبتش وبقرأ بلغة الفرنجة اليومين دول ومش عارفة ورى دي جت فين؟
وسعيدة انك طلعتلي أخطاء لغوية وده دليل أنك قرأت البوست للأخر :)

ثانيا : ده أكيد متقلقش عندي أحلام كتير والحمد لله حققت منها جزء مقبول

هههههههههههه ثالثا دي ممكن أطبق عليك فيها اللي اتعلمته وترجع تقول هو السؤال كان ايه :)

اللهم أمين أنا وأنت وكل الناس

Miss LoZa يقول...

ايون مانا عارفة انك كنتى فالكورس
وبعدين الى يقرا لوزتى ومهموهتى يقول ان فى كلام جميل جى بعد كده
بس مع الاسف انتى مكملة وبتغظينى عاااااااااااااا
خلاص انا هعمل زيك واتكلم مع الناس واروح كورسات بس لما افضى طبعا
ولما اشوف بقه هيجى اليوم الى هشوفه فيه ولا لا
وعارفة طو مانتى بترخمى عليا مش هتكبرى ابدا وهتصغرى وتصغرى لحد ماتبقى عقلة صباع بس هه
ههههههههههههههههههههههه
انا هجيلك البيت واغنيلك فالشارع ها بقه هتدينىالرقم :$

The illusionist يقول...

انسه بلا كتكوته ك ايناس بلا كتكوته برضك

انتى مهووسه بابراهيم الفقى

مممممممممممممممم

اكيد انا مش مهووس بيه

بس كاريزمته عاليه بطريقه بنت تيت

ده خلى المدرج كله يحضن بعضه وتقريبا لو فى فرسصه كانوا باسوا بعض

يا كورساتك

برضو هتسافرى

ممممممممممممممممممممممممممم

ما تقتلى عيلتك اسهل

انا عارف ياخيويا عمان دى بيعملوا فيها ايه

يلا

برضو مستنى الجمل

وبرضو بقولك

مستنى الكتاب كذلك

The illusionist يقول...

يا ديكتاتوريه

وربنا وربنا وربنا كمان مره

هعمل ثوره واحتل بلوجك واطالب بالبتاع ده اللى الناس بتطالب بيه

قال حفظ تعليقك ومالك المدونه

شريييييييييييييره

Lady E يقول...

Miss LoZa : علشان تعرفي يا لوزتي نحن نختلف عن الأخرون خالص :)

ما عاش ولا كان اللي يغيظك يا حبي أنا بهزر معاكي بس وعلشان تتأكدي اني مش بغيظك هقول سيكريت دكتور ابراهيم في ليه كورس اليوم الجمعة 30-9 في قاعة الأزهر للمؤتمرات وبما انك من القاهرة يعني ممكن تحضري :)

استنيتك مجيتيش ليه :)))

Lady E يقول...

The illusionist : معلوماتك قديمة يا محمد الكتكوتة معايا دلوقتي

مهووسة؟ جبت الشعور ده منين د. ابراهيم يعتبر الأب الروحي ليا وممكن أكون مهتمة بعلمه وبكاريزمته العالية زي ما بتقول لكن مش لدرجة الهووس

على فكرة مكنتش هنشر تعليقك علشان كلامك اللي في الأخر ده

وبمناسبة الجمل على فكرة قولتلك عليها بس انت مخدتش بالك ومختفي اليومين دول

ثورة ؟ من أنتم ؟ ده البلوج ده الجيش والشعب فيه ايد وايد بيسقفو مع بعض :)

Miss LoZa يقول...

يا سلاااااااااااام !!
طيب لو ظبطت وعرفت اروح
تيجى معايا ؟؟

Lady E يقول...

Miss LoZa : انتي من القاهرة وانا من دمياط هاجي معاكي ازاي؟

اول لما اتأكد اني رايحة ان شاء الله هقولك عالفيس ممكن نتقابل هناك ونقعد جنب بعضينا :)

NOUR Kamal يقول...

عزيزتي لم يكن معي وقت كافٍ لقراءة البوست ولأنني كنتُ متعلقة بهذا الرجل.. نسخت البوست على ملف الوورد وقرأته بالليل ..

فعلا أكيد الاشخاص هادول من كتر الضغط ما بلاقوا فرصة يرتاحو

بس بجد شي حلو انو توصلي هناك وما تقدري توصليلو اللي عايزاه هالشي زعلني

بس عموما موفقة