السبت، 19 فبراير 2011

كم منزل في الأرض يألفه الفتى وحنينه أبدا لأول منزل

طب ايه؟ اتكلم عن ايه انا دلوقتي وحاجات كتير فاتت وعدت والمفروض كنت أتكلم عنها

عيد ميلادي ، عيد الثورة اللي بجد ثورة 25 يناير ، التناحة والتنحي ، ما بعد التنحي ، المولد النبوي الشريف ، أغنية ازاي؟ لمحمد منير ، أغنية بحبك يا بلادي ، المطبلاتيه قبل وبعد

حاجات كتير أوي عايزة اتكلم عنها ومن كتر ما أنا عايزة أتكلم كنت بفضل السكوت :)

طيب هتكلم عن شوية فيهم بإختصار

عيد ميلادي : جالي هدايا كتير فيه من مامتي وبابايا مالذ وطاب من هدايا ده غير التورتة الجميلة اللي ماما تعبت فيها وكمان قبل ما يقطعوا النت أصحابي المدونين والفيس بوكيين هنئوني بعيد ميلادي ومنكرش اني حسيت بسعادة شوية لكن السعادة اللي حسيت بيها عاملة زي حباية السكر الصغنونة وسط كوباية ماية كبيرة أيوة موجودة لكن طعمها ميتحسش أوي

في الوقت ده كنت بدأت أشوف الأخبار الأجنبية والجرائد الأجنبية – لأول مرة في حياتي- وأعرف منها ان بقى في شهداء يبقى ازاي أحس بفرحة حاجتين جوايا كانوا بيصارعوا بعض

حاجة تقوللي افرحي ده يوم عيد ميلادك وكل حبايبك بيحاولوا يسعدوكي اختشي بقى وبطلي نكد وحاجة تانية تقوللي عيب عليكي بلدك مجروحة وتعبانة وشبابها بيستشهد بإيد داخلية مش في حرب ! تفرحي ازاي

التناحة : كل الناس قالوا للكابير لازم ترحل وهو برضه مكنش عايز يرحل

التنحي : يا ليلة العيد أنستينا

ما بعد التنحي : الناس بيهنونا في كل مكان وعرفوا قيمة مصر بعدما ما كنت كرامة المصري متهببة بالهباب

بقيت فخورة اني مصرية وعلى فكرة هي لسه متهببة بالهباب بس مش أوي زي الأول وتحيا الوحدة العربية

المولد النبوي الشريف : يوم جميل أوي بيربطنا بجذورنا الإسلامية لكن مالوش طعم أوي واحنا بعيد عن مصر في مصر كل حاجة طعمها مختلف واحساسها ورؤيتها مختلفين لكن برضه اليوم مر جميل جدا بسبب "أهلي" والأهل مش بس عيلة الأهل كمان أصحاب وصحبة

الغريب أن قناة الحياة قرأوا اللي في دماغي وجابوا أغنية الشارع لنا والناس التانيين مش مننا اللي جت في بالي من أول ما الثورة بدأت أومال كان فين الكلام ده من زمان؟ أصل فجأه كده الناس بقوا وطنيين واللي كانوا بيسقفوا للي كانوا هنا مبقوش يسقفوا لهم لما راحوا هناك ازاي الناس دي بتقدر تتلون أوي كده وماشيين بمبدأ اللي تغلب به العب به هما مش فاهمين انهم سخيفين وحركاتهم دي مكشوفة أوي وبايخة أوي

على فكرة عجبني أوي اسم الثورة أو الانتفاضة لأنها مش مجرد مظاهرات وخلاص

أكتر أغنيتين حسيت انهم فعلا صادقين ازاي لمحمد منير كنت بسمعها كل شوية وحاليا أغنية أنا بحبك يا بلادي

لو حد هيقرأ الكلام ده وفي الجيل اللي أصغر من العشرينات ممكن ميعرفش ان أغنية أنا بحبك يا بلادي الأصلية كانت في فيلم العمر لحظة وغنوها على مدرسة بحر البقر اللي الاسرائليين قصفوها لأن عبدالناصر كان حاطط على المدرسة مدافع فأعتبروها مكان تخزين ذخيرة وضربوها والعهدة على الراوي "بابايا"

ومن وأنا طفلة وأنا بحب الأغنية دي لأنها بصوت الأطفال ولأن كلماتها جميلة أوي واللحن كمان بليغ أوي" لبليغ حمدي " خصوصا الكوبليه اللي اتعمل منه الأغنية الجديدة أنا بحبك يا بلادي

أما الأغنية الجديدة فبجد مؤثرة جدا أول مرة سمعتها دمعت وفي كل مرة بسمعها بحس بقشعريرة هو صوت عزيز الشافعي في الأغنية دي مش أوي ومش حلو زي صوت رامي جمال بس كفاية ان الكلمات الرائعة دي كلمات عزيز الشافعي علشان أستحمل صوته ونشازه أحيانا

لينك بحبك يا بلادي الأغنية القديمة : http://www.youtube.com/watch?v=Wi4q9xoR_uY

لينك بحبك يا بلادي بالكلمات والتوزيع الجديد : http://www.youtube.com/watch?v=uHuByxYENkI&feature=related

في أغنية كمان كنت بسمعها

violin

وأول مرة أسمعها النهاردة بالكلمات والموسيقى الأصلية

Tell Laura I Love Her

فظيعة الأغنية دي محستهاش على لورا وتومي بس

حسيتها على واحد ضحى بحياته علشان حاجة غالية أوي ايا كانت بقى الحاجة دي المهم انها حاجة تستحق حياته وحبه ليها هيفضل خالد .

هناك 7 تعليقات:

mrmr يقول...

اولا : كل سنه وانت طيبه بمناسبه عيد ميلادك
ثانيا : ومبرووك علينا مصر
ثالثا : وكل سنه وانتى طيبه كمان مره بمناسبه المولد النبوى الشريف

واقعدى بالعافيه

VÖltaa يقول...

كالعادة بتتكلمى فى تسعين موضوع مع بعض ومع ذلك بنستمتع .. مفيش اى مشكلة :)

كل سنة وانتى طيبة

Lady E يقول...

mrmr : وانتي طيبة يا مرمر ربنا يجعل كل أيامك سعادة وأعياد

ثانيا : الله يبارك فيكي احنا لسه ناجحين في أول خطوة وربنا يوفقنا في الباقي

ثالثا : شكرا على كل التهاني دي وانتي طيبة :)

وانتي كمان :))

Lady E يقول...

VOLtaa :

90 موضوع ماشي يا أبوفولتا ما أنا مكتبتش بقالي كتير اكتب في مدونة الجيران يعني ولا ايه ؟

وانت طيب

بنوتة مصرية يقول...

كل سنة وانتى طيبة وبخير .. انتى عيد ميلادك كان قبل الثورة او تقريبا اثناء الثورة .. وانا عيد ميلادى كان بعد تنحى مبارك من السلطه كان يوم 14 فبراير .. كنت حاسة ان عيد ميلادى مختلف جداا عن كل سنة .. والاجمل انه كان مصادف لحرية بلدى حبيبتى مصر .. وكل سنةوانتى طيبة بمناسبة المولد النبوى الشريف...

غير معرف يقول...

كل عام وانت بخير اختي الكريمة
والف مبروك نجاح الثورة المصرية

نيللي علي يقول...

بصى كالعاده متميز
انا حسه بيكى الواحد مره بتلاتين الف حاله وحاله
من 25 يناير لحد دلوقتى
اكنك ركبه مركب والموجه بتشيلك وتحطك فى اماكن غريبه
لدرجه انم توصلى انك مش مستوعبه انك بتحلمى ولادى الحقيقه

وكل سنه وانتى طيبه ياانوس