الاثنين، 10 يناير 2011

تبقى جديدة وبعد ساعات تبقى ديموديه


النت كان معمول له عمل راكب جمل معايا بقى له كام يوم وأخرها النهاردة دخلت كود النت ودخلت عالنت مفيش ثواني وفصل :( كلمت شركة الاتصالات قالوا زي وردة بالضبط : قالوا معرفوش مكلمتوش ومعرفتوش قال يعني مش فاكرنا :) اخدوا الرصيد والنت كمان ومسابوليش حاجة قولتلهم دي غلطتكوا قالولي اشحني الرصيد تاني :) وما كان مني الا ان رميت خط التليفون وافتكرت كل شبكات المحمول اللي بتعيشنا احلى ما في اللحظة بإنها تسرقنا

من كام يوم كنا بنتفرج على فيلم في التلفزيون أنا واتنين

الأولى شخصية جميلة بجد بحبها اوي مش مصرية وواحدة من الناس مصرية المهم الفيلم كان شاطح شطحة غريبة أوي ومبين أن مصر كلها حرامية وناس سكيرة وكالعادة كباريهات وفتيات ليل !!!!!!!!!! على فكرة دي فكرة عرب كتير عن مصر والمصريين وبتوع السينما زي خالد يوسف مش فاهمين بيعملوا ايه بأفلامهم اللي فيها فكر بس للأسف الابتذال فيها اكتر بكتير ومصر مش ناقصة بجد

المهم الشخصية اللي مش مصرية قالت ايه الفيلم اللي كله ناس بيطاردوا بعض ومعاهم مسدسات دول ايه دي مصر ولا شيكاغو وبعدين أنا علقت على مشهد سواق التاكسي ماسك ازازة خمرة وعمال يأربع فيها –يشربها- ولا كأنها عصير تفاح فقولت : عمري ما شوفت سواق تاكسي بيشرب كده ! ردت المصرية بحماس وقالتلي : ما هما مبيشربوش خمور وبيشربوا حشيش ! جت تكحلها عمتها :) فقولتلها على فكرة سواقين الترلات هما اللي بيعملوا كده لأن للأسف حصل معايا كذا موقف يؤكد الحقيقة المنيلة دي يعني مرة مثلا مرة بعدي تريلا او مقطورة مش فارقة وصلت لنص المقطورة ولقيت السواق بيحود على الكتكوتة – العربية- عادي جدا وطبعا العربية في الحالة دي ممكن يحصلها حاجة من الاتنين مش حابة اقولهم وربنا يكفينا شر الحاجات دي ومرة تانيه مقطورة محملة كونتنر ماشيين عالطريق السريع فوقف قدامي فجأه من غير أي إنذار وطبعا كنت ماشية بسرعة ولما عديت بيقولي أسف فما كان مني الا اني هزقته أصل متموتنيش وبعدين تقولي اسف وأمثلة تانية كتير عن العربيات الكبيرة اوي دي

الاعلام كل شوية بجد بيثبت بجدارة انه منفصل عن الواقع وملوش أهمية برغم أنه بيدخل كل بيت بدليل الأغاني الوطنية اللي طلعت في ثواني الأيام اللي فاتت من باب السبوبة والاسترزاق والموضة اللي بتاخد لها ساعات وبعد كده تتنسى وملهاش لازمة ولا هتحل أزمة ولا هتعقل أغبيا

وردة بتقول كنا بنلحن الأغنية في 3 شهور ودلوقتي اغلب الملحنين بيلحنوا في 3 ساعات وغالبا بينقلوا الألحان الأجنبية لسه هيقعدوا يفكروا وبدون ذكر أسماء عمرو مصطفى من أشهر الناس اللي بيعملوا كده

انا بحترم اعلاميين قليلين أوي وأغلبهم بقيت بحترم موهبته مش بحترمه شخصيا

المهم بعدما الشخصية المش مصرية اللي بحبها مشيت جت واحدة من الناس وفضلت تقول كلام مش لطيف عنها

وأنا في الحالة دي بسكت وبعرف ان اللي قدامي وبيتكلم وحش عن حد كويس بيعامله بنبل وأناقة هو اللي مش كويس وبينطبق عليه في الوش مرايه وفي القفا سلايه واحترت جدا اروح انبه الانسانة اللي بحبها ان اللي عامله صاحبتها بتشتمها من وراها ولا اسيبها لغاية ما هي تكتشف

بجد الحياة فيها حاجات كده مكلكعة مينفعش فيها الصراحة وربنا يحمينا من الناس اللي بوشين لأن اكتشاف انهم بوشين بيوجع ويضايق أوي

ملحوظة :العنوان مأخوذ من أغنية اسمها موضات لفريق الأصدقاء

ملحوظة كمان : تخيلوا انكم بتسمعوا اغنية من البوم محمد عدوية الجديد علشان انا كسلانة احط اغنية عالمدونة دلوقتي :)

هناك 7 تعليقات:

MaNoO يقول...

النت اصلا بقاله كام يوم كدا بيقولك كانو بيعملوا الكاابل اللى علطول بايظ دا
السينما بقى سبوبه خاصه للى بيتاجروا بمصر اللى كلها عشوائيات وغيره بيحسسونا ان فى مصر تانيه موجوده فى اسيا ولا حاجه وبيتكلموا عنها
وفعلا موقفك مع صاحبتك انك تقوليلها او لا دا محير ومش دايما الصراحه بتنفه بس ممكن تنبهيها بطرق غير مباشره
وبالنسبه لعدويه بقى انا شخصيا بسمعله اغيه سيبى روحك الشريط كله عاجبنى بصراحه

P A S H A يقول...

جميلة الأغنية


دمتي بود

:)

نيللي علي يقول...

اولا اولا اولا انوس واسمحبلى ادلعك بعد اذنك طبعا

المقاله فى غايه الروعه

طبعا هبتدى من تحت لفوق بالنسبه لصحبتك انا من راى متقولهاش ممكن تلمحى تلميح من بعيد لبعيد لان ممكن الصحبه الاولانيه تلاقكى مبررات وتطلع منها وتعمل مفسها ملاك

فلمحى بس ونبيها لكن متقولهاش حاجه بعينها ده احسن

تانى حاجه بالنسبه لافلام البشعه بتاعت مصر امثال خالد وايناس هانم
اللى بيقولوا اننا بنقدم رساله هم بيقدموا بذئه

يعنى سيبين ايجابيات وماسكين فى السلبيات وياريت كدا وبس بيحطوا كم منظر على مشهد عشان السبوبه يعنى دول كفايلين انهم يقولوا ان مصر زفت

بصى انا شوفت فيلم اسمو ماى نيمز خان
ده فيلم هندى بيتكلم عن الاسلام بجد فيلم تحفه تقعدى من اول ثانيه لاخرها مش عاوزه تقومى
اما الافلام المصريه من امثال السبكى والهانس فى الدنس يااكس لانس ده اسمو اسفففففاف

حسبى الله ونعم الوكيل فيهم

وبجد بحب مقالاتك ومتغبيش عننناااااااااا

رحاب صالح يقول...

صباح الورد
هههههههههههه
ضحكتيني
وبكيتيني علي حالنا....
السينما الفن السابع...
عندنا فن هابط للأسف...
وانا برغم اني كنت زمان بحترم خالد يوسف دلوقتي اطيق العمي ولا اطيقوش...
اللي علنا فيلم زي العاصفة وجواز بقرار جمهوي وانت عمري....وهي فوضي ...دلوقت هو خلاها فوضي وابتذال وعري وحنس وقرف وبس....
فاكر ان دي هي الحرية....هو ده الواقع...اي واقع ده...اللي بيتكلم عنه...؟

صدقي عجبتني مدونتك اوووي
تقبل كلماتي بصدر رحب وتقبليني صديقة للمدونة

Tamer Moghazy يقول...

انا باحب الاغنية دي قووووي :)

"الفيلم كان شاطح شطحة غريبة أوي ومبين أن مصر كلها حرامية وناس سكيرة وكالعادة كباريهات وفتيات ليل !!"

وهو احنا واحنا صغيرين عرفنا الحاجات دي منين..؟؟
مش من الاعلام برضه..؟؟
للاسف احنا بنشوه صورتنا قدام نفسنا قبل ما يكون قدام الناس وده من زمااان قوي من غير ما ناخد بالنا..!!

مدونة رحلة حياه يقول...

السلام عليكم
اعلام
اعلام اعلام اعتقد الاعلام بقا سبب كتير من المشاكل ونشر الانفلات الاخلاقى كمان وزيادة العصبية فى كل حاجة احزاب كورة مشاكل خلافات بقت كلها برامج المفروض يكتبوا عليها للكبار فقط + 90 سنة اصل مفيش حد يستحملها
لو كلامى غلط عرفونى

Unknown يقول...

هههههههه
جميل الاسلوب
وان كنت اختلف فى بعض النقاط