السبت، 8 أغسطس 2009

الصدق منجه والكذب مش فراوله نياهاهاهاها


ملحوظة صغنونة البنوتة البيبي اللي في الصورة دي صاحبتي ومعايا صورتها في موبايلي وايميلي من وانا في ثانويه عاميه ولسه مكبرتش لغاية دلوقتي زي صاحبتها اللي هي انا نياهاهاهاها


جالي سؤال عشرتاشر مرة من البنوتات العسولين والرقيقين والأمورين انوسة عاشقة الأفراح مش الأحزان نياهاهاها وشيما اللي شكمانا كلنا وديالا دودو بنت بلدي والطفلة زي حلاتي احساس طفلة واقعية ورومانسية ومع اني مش عارفه مين اللي هيهتم يعرف أصدق عشر حاجات في حياتي بس يلا هجاوب وامري لله لأني حاسة اني عاملة زي البيبي اللي في كي جي 1 ومعملش الواجب

أصدق 10 حاجات في حياتي

اولا : أصدق حقيقة في حياتي كلها ربنا سبحانه وتعالى اللي خلقني وخلق كل شيء الرحمن والرحيم واللطيف والخبير ومن له الأسماء الحسنى

ثانيا : اني مسلمة وعلشان كده لازم التزم بحاجات كتير احيانا بتكون ضد هوى نفسي وبحاول بقدر الإمكان ابقى ظاهري زي باطني يعني مش محجبة شكلا وبس وافعالا واخلاقا لأ فأنا بحاول بقدر الامكان اكون مسلمة بجد واستاهل الاسم ده واكيد مقصرة مهما عملت بس بحاول ويكفيني شرف المحاولة


ثالثا : بابايا حبيبي اعظم واحن واجمل اب في الحياة ، لما بيكون راضي عني ببقى في قمة السعادة ولما بيتعصب عليا ببقى في قمة الكأبه
وبدأت اهدي شوية من عصبيتي واحط اعصابي في فريزر لما فهمت معنى ان عصبية بابا مش ممكن تتقارن بحنيته علشان كده يتعصب براحته :) ربنا يباركلي في عمره ويحفظه من كل شر

رابعا: مامتي حبيبتي وانتيمتي واختي مهما اتكلمت عنها مش هوفيها حقها و زي دايما ما بقولها ميتحكيش عليها زي الملايكه اما تشوفها وردايه تحلم تقطفها
ماما بالنسبة لي كل حاجه واكتر انسانة اخدت طاقة سلبيه مني واكتر انسانة ضحت علشاني واكتر انسانة قوتني في لحظات انكساري وضعفي وحزني وصبرت عليا واكتر انسانة حبها مش مشروط والحمد لله انها مامتي لان لو ام غيرها كانت رمتني من البلكونة او من فوق هرم خوفو الأكبر بس الحمد لله مامتي مش شوريرة مع اني بعلي لها الضغط كتييييييير ربنا يستر بقى ويباركلي في عمرها ويحفظها

خامسا : حبيبي معايا في كل لحظة من لحظات حياتي وروحي مقسومة اتنين نصها معايا والنص التاني معاه علشان تراعيه وتطمن عليه وتحسسه ان في انسانة بتحبه وكان نفسها تعرفه من اول ثانيه في حياتها
حاسة اني معاه وشايفاه وحساه وسامعه همساته ومش شايفة غيره رغم كل اللي شوفتهم في حياتي وحاولوا يقربوا مني او اتقدمولي الا انه مالك قلبي وروحي وبستناه وهفضل استناه طول عمري ويارب يكون بيحبني نص حبي ليه لأن حبي هيكون أقوى دايما لأنه أقوى من اي حب ودايما بيقولولي اني عايشه في وهم بس الوهم ده أصدق واقع أنا عايشاه ومفيش حاجه بعيدة على ربنا

سادسا : كرامتي أغلى من حياتي ولو هموت مش بسمح ولا هسمح لحد يقرب منها وخسرت حاجات كتير في حياتي بسببها زي درجات عالية في المدرسة و تقديرات في الكلية وصديقات راحوا في الوبا بس كل الحاجات اللي خسرتها مكسب قدام خسارتي لكرامتي لأن كل حاجه ممكن تتعوض الا الكرامة

سابعا : أحلامي الحمد لله احلامي صادقة جدا ومن صدقها في كتير اتحقق منها وعقبال الباقي ان شاء الله

ثامنا : الحياة والموت بيظهر فيهم الصدق ده غير انهم اصدق حاجه بتحصل للإنسان في حياته ومع اني مقتنعه بالموضوع ده جدا الا اني فقدت توازني بطريقة بشعه لما عرفت بوفاة جدو الله يرحمه مع اني مكنتش كده يوم وفاة جدتي الله يرحمها بالعكس كنت صابرة جدا وقوية جدا وكنت بواسي ماما لكن مش عارفة ايه اللي حصل لما عرفت وفاة جدو
تقريبا كده البنات كل ما بيكبروا بيتهطلوا
ربنا يرحم كل موتانا وموتى المسلمين ويرزقنا حسن الخاتمة

تاسعا : مشاعري أصدق حاجه في حياتي ومستحيل أأقدر اخبيها بتظهر عليا في نظراتي وملامحي ونبرة صوتي
لما بحب ، بحب بكل ذرة في كياني ولما بكره برضه بكره بكل ذرة في كياني وماما قالتلي انتي لما بتكرهي بتبقي صعبة أوي !
وعلشان كده بفكر مليون مرة قبل ما أكره حد لاني لو كرهت مستحيل احب تاني ابدا
ربنا يستر ومكرهش حد بحبه ولا حد يكرهني

عاشرا : الحاجات الصغنونة اللي بتحصل في حياتي وبتفرحني ولأنها بتبقى مش مقصودة ومش متوقعة فبتبقى صادقة جدا وبفرح بيها جدا
زي مثلا لو حضرت محاضرة حلوة ولو خلصت قراءة كتاب ممتع ولما بنقعد نضحك ونغني انا وزميلاتي في الكليه
وافتكرت موقف دلوقتي كان ليلة امتحان العربي وهدى البيبي بنت عمي كانت بتعيط وزعلانه جدا ومسكتتش غير لما اخدتها في حضني ولاعبتها وعلشان كان عندي امتحان تاني يوم فكنت شايلاها وبذاكر لها أدب عربي جاهلي نياهاهاهاها ويا عيني مستحملتش كلمتين وراحت في سااااابع نومه نياهاهاهاها وقتها كان عندها 3 شهور

وحاجات تانية كتييييييييييير صغنونة بتبقى صادقة وبتفرحني


ودلوقتي حان وقت التدبيس لازم ادبس حد في السؤال ده اشمعنى انا اتدبست فيه يعني

كتكوتتي اللي بتزعل بسرعه واللي منفضه لمدونتها ومش بتكتب جديد فيها

ودودو دعاء بنت بلدي العسولة

وصبحتي وبنت بلدي برضه أميرة على كوكب مهجور

والبنوتة العسولة رنا رنون

ولحبيبتي اللي رجعت تاني بعد غياب ساعات ساعات

وللدكتورة بتاعتنا اللي بتحب الهدوء شباك موارب منار

ولديدي حبيبتي اللي قالتلي هتعمل مدونة ونفضت وانا مليش دعوة لو سمحتي يا ديدي اعملي مدونة بقىىىىىىىىىى عالأقل علشان أقدر اتطمن عليكي

ولصحبتي الجديدة أيوية

وللبنوتة الرقيقة صمت الحنين

وللبنوتة الرومانسية زهرة الحب


وللبنوتة الجميلة والدكتورة اللي مش هتدينا حقن :)
dr.w.krm


ول صانع السعادة محمد غالية

و ل جحا المصري



هناك 20 تعليقًا:

أميرة علي كوكب مهجور يقول...

انا دبست يا جدعان كده برضه يا ليدي عموما ماشي يا ستي انتي تأمري بس عشر حاجات صادقة دي كتير اوي بس هحاول

غير معرف يقول...

الحمد لله نفدت من التدبيسه دي
:))))))))))

اجاباتك حمياه اوي :)

زهرة الحب يقول...

اوكى انا هجاوبك على السؤال على مدونتى
انتظرى الاجابه

♥نبع الغرام♥♪≈ يقول...

السلام عليكم


عظمه على عظمه يا ليدى

عاااااااااااااااااااااااااا

♥نبع الغرام♥♪≈ يقول...

الله عليك يا قمرى

بجد جميله قووى اجباتك وميرسى ليكى قووى انك قبلتيها

وطبعا ربنا يخلى بابا يارب والام العظيمه دى وتفرح بيكى بحق الايام الجميله دى

وبجد انا عرفتك عن قرب وفعلا هى دى اجمل وارق واطعم بنوتايه عرفتها

ربنا يسعد قلبك ويفرحك ويبعد عنك اى شر يارب

بحبك كتيرررررررررررررررر
ايناس

شوكولاتة يقول...

دي أول زيارة لمدومنتك الجميلة دي وياريت تشرفيني في مدونتي المتواضعة
وماشاء الله عليكي فعلا مشاعرك صادقة قوي زي مشاعر طفلة مش عايزة تكبر
تقبلي مروري

الشعب لابد له من حكومه تشكمه يقول...

اهلان بيكن اهلان بيكن:)
ايه الحجات الصادقه الجميله دى:)
الا خامسا ده افهم منه انك بتحبى فى قصه حب:))
ربنا يارب يكتبلك الخير ويرزقك الزوج الصالح انتى وبنات المسليمن جميعا:)
بقولك ايه لو هترمضنى باه عندك قوليلى ابعتلك الصواريخ اازاى؟ مفيش رمضان من غير صواريخ واهو يتعرف انك مصريه عندك وتتقفشى بالصواريخ:))

بسمة انور يقول...

اجاباتك صادقه جدا يا ليدى زيك بالزبط

وحشانى يا قمرايه

Ahmed يقول...

Amazing réponses

الصدق حلو وباين في الكلان

هيا الطفله مش هتكبر؟ (وش فيه شويه خبث)

كيكى عوووووو يقول...

كع كع كع
عدنا بعد غياااااااااااااب
عودة المرعب
****عايشه في وهم بس الوهم ده أصدق واقع أنا عايشاه ومفيش حاجه بعيدة على ربنا
*****
مش هعلق ع دى بالذات عشان هعيط
وحرام عليكى الى عملتيه فى البيبى
وحشتينى

blue-wave يقول...

طفله
جميله
رقيقه
بسيطه
هى دى ليدى

عاشقه وغلبانه يقول...

بعد ربنا سبحانه وتعالي والموت والاهل بدأت اشك ان في حقائق

غير معرف يقول...

جميلة ردود واجابتاك
وكل عام وانتي بخير
رمضان كريم
اتمني زيارة مدونتي

بنجاواتى يقول...

ليدى

بصى انا قريت البوست من اول ما نزل بس دلوقت مش فاكر الاجابات كانت ايه هههههه

بس هى اكيد حلوة يعنى هههههههه

سلام

غير معرف يقول...

زنقونا يا مرزوق!!! كده يا ليدي تزنقي أختك المزنق ده!!!عموما شرف عظيم إنه يهمك تعرفي آرائي في الحياة ؛ وإللي واثقة إنها بتقرب المسافات أكتر وأكتر؛ة ولذلك أنا هتكلم كأني بتكلم مع نفسي ، بس بصوت عالي .علي فكرة أنا بكتب دلوقتي وأنا بسمع موسيقي ليدي ؛ والله جت كده!!!.
1*حبي وإيماني بربي وحبيبه المصطفي (عليه الصلاة والسلام ): تزداد يوما بعد يوم وخصوصا بعد المحن ؛ ربي الذي أضحك وأبكي ؛ فالحمد لله الذي لا يحمد علي مكروه سواه.
2*أبويا:علي فكرة بحب أقول أبويا معرفش ليه!!.أصدق حب عرفه قلبي ؛ كان دايما يقوللي أنا وماما إللي بنحبك عشان بنحبك ، من غير مصلحة ؛لقد كان لي الصديق والحبيب والأب .
كنت وطوال العام الماضي ، أتقمص شخصيته دون ترتيب ؛ صدقا أقول . وجدتني أقول و أفعل مثلما كان يقول ويفعل ؛ حتي في الأشياء التي كنت ألومه عليها !!!!. نعم .وعرفت ذلك ممن كنت أجلس معهم من الأقارب من أعمام وعمات وأولاد أعمام وخالات ؛ فكانوا يقولون لي : كإن عمي جالس أمامنا ؛ تتحدثين مثله ، حركاته قفشاته ، طباعه . حتي أن خالتي قالت لي ذات مرة : عملتي زي أم رتيبة - ده فيلم بتاع ماري منيب التي تقمصت دور أخيها بعد وفاته رغم إختلافهم وهو علي قيد الحياة ، إلا أنها تقمصته كنوع من أنواع الحزن!!!!.
3* عندي يقين من إني هروحله لما يجي ميعادي وهيكون راضي عني بإذن الله ؛ علشان كان دايما يقوللي: " أبر البر أن يصل المرء أهل ود أبيه ؛ بعد أن يولي الأب ". والحمد لله ربنا مقدرني إني أبره وأود كل إللي كان بيحبهم ويودهم في حياته ؛ حتي إنه بيجي في الأحلام إللي بيزور فيها حد قريب مني علشان يبلغه إنه مبسوط مننا .
4* أمي : ربنا يباركلي في عمرها ؛ ليها طبيعة خاصة شوية ؛ مش كتيرة الكلام ؛ يعني حبها لينا مترجم إلي أفعال لا أقوال...حتي في زعلها مني خصامها لي بأن تتجاهلني تماما حتي أشعر أنا بخطأي ؛؛ هي كتلة حنان تمشي علي الأرض لي ولأخي ولكل من تستطيع أن تعطيه من حنانها." فحب الأم يهب كل شيء ولا يطمع في شيء "من أقوال أبويا.
5* أخي : راجي ؛ إسمه كده راجي عفو الكريم ؛ حفظه الله في غربته هو وزوجته ؛ إحدي الصديقات قالت لي في مرة عنه : " أخوكي بيعرف يسعد إللي حواليه " صدقت والله فأخي ورغم بعد المسافات إلا أنه معنا بصوته بشكل يومي وأكثر من مرة في اليوم الواحد ؛ ودايما يقوللي : لو سمعت إنك كنتي عايزه حاجة وماقولتليش مش هيحصلك كويس ؛فلم تشغله زوجته الجميلة عنا ؛ ربنا يحفظه لينا وليها .
6*الأصدقاء :لي والحمد لله صداقات ومنذ أيام الطفولة : حتي وإن لم نري بعضنا ؛ لم تنقطع إتصالاتنا ؛ فصديقاتي كلهن متزوجات ويعولن من 2 إلي 3 أطفال ؛ ربنا معاهم مشاغلهم كتير طبيخ وغسيل ومذاكرة وهلم جرا ، بلتمس ليهم العذر في أغلب الأحيان .
7* المدونات والمدونين :
أصدق حب ولايف كمان ؛ وده لإني بتكلم مع ناس من غير سابق معرفة ؛ لا بالشكل ولا بالطباع ولا بالسن ولا الجنس ؛ حب زي ما قولتليلي قبل كده " حب من أول بوست من أول تعليق ؛ في مغناطيسية وإنجذاب حصللي ؛ مع ليدي الجميلة ,الرقيقة ’ النقية إللي بوستاتها بتنبض بالحب والفطرة والبرلءة والشقاوة ؛ بحس كده إن إللي في قلبك علي لسانك "بحبوحة ، حبوبة ،كتكوتة ، طعومة .
8*مشاعري :مثلي مثلك لا أجيد إخفاء مشاعري سواء ( حب / بغض - فرح / حزن)
بتعامل بحسن نية وياما شربت مقالب ؛ بس لولا المواقف لولا تشكلت خبراتنا الحياتية ؛ لازمن ولا بد شوية مرارة ع الماشي ماينفعش عسل علطول ده حتي الواحد يجزع !!!.
9* الحب الحب يا نوسة !!!###:
في إعتقادي إن أصدق حب هيعرف الطريق لقلبي هو إللي زي الست ما بتقول : " قبل ما تشوفك عينيا ، عمري ضايع يحسبوه إزاي عليا " , أتمني أن يرزقني الله الحب الذي يعوضني الحنان والأمان الذي إفتقدته ، الحب إللي يطبطب علي أحزاني وأوجاعي ؛ أوجاع فقد من نحبهم ؛؛؛
10* خلاص كده مش عندي حاجة أقولها في نمرة 10- غير إني أقول أحبكم في الله وربنا يديم المحبة ونعيش ونتعلم من دروس الحياة ولحد ما أبقي واحدة من المدونين الجامدين إللي زيكوا ؛ تقبلوا تعليقاتي ومروري كلما سنحت الفرصة ؛ فرصة سعيدة ؛؛؛
ديدي

The illusionist يقول...

ايه الاجابات بتاع كتاب الوزاره دى
ماشى يا ستى
انا جالى السؤال ده
اصدق عشر اشياء فى حياتك
كلهم فناجين شاى
الشاى اصدق حاجه
ومحدش يقدر يقول لا
معرفش ايه الفكره
بس الروقان يحتم عليا اقول كده

غير معرف يقول...

إنتي بخير يا ليدي !!؟؟
بطمن عليكي ؛ معقول إجاباتي مرهقة كده.....!!!
ديدي

د. ياسر عمر عبد الفتاح يقول...

التاج ده بقي في كل المدونات
أنا خايف أفتح الحنفية ينزلي منها

بس الإجابات كانت جميلة

كيكى عوووووو يقول...

فينك ياقللبى
؟؟؟
وحشتينىىىىىىىىىىىىىىىىىىى
جداااااااااااااااااااااااااااا
انتى عارفة انى مبقتش اقعد زى زمان ع الكمبيوتر وبسبلك اوف لاين***
والله مش معايا رصيد انتى فين قلقتينى اوى عليكى
فيكى حاجة طيب ونبى طمنينى ضروروى
ربنا معاكى ياقلبى
وحشتينى يانونتى

Lady E يقول...

شكرا ليكم فردا فردا على رأي شيمو

نورتوني