الخميس، 20 أغسطس 2009

منوعات ورمضان كريم


أولا كل سنة وانتوا طيبين وبخير وفي أحسن حال بمناسبة شهر رمضان طبعا

ثانيا : بعتذر اني مش عارفة اعلق في معظم المدونات مع اني متابعاهم وده لأن النت عندنا بيهيس أحلى تهييس فغالبا بدخل النت من الموبايل
ندخل بقى في البوست

*******************************
وصل عدد المصابين بالاتش ون ان ون في سلطنة عمان لحوالي 700 وده المعلن وطالما اعلنوا عن الرقم ده يبقى عدد المصابين أكتر من كده بكتير وفي حالة هلع عند معظم الناس
وفي الهايبر ماركت النهاردة معظم الناس لابسين كمامات والمضحك ان بعض المصريين بيلبسوا الكمامه بطريقة غريبة بيحطوها على الفم ويسيبوا الأنف من غير كمامه لازم اللي يشوفهم يقول عليهم انهم بيختلفوا عن الأخرين خاالص
بصراحه منظر الناس وهما لابسين الكمامات النهارده حسسني اننا في اوضة عمليات
ربنا يستر بقى أمانه عليكو لو ودعت ابقوا اقرؤا على روحي الفاتحه - اي خدعه يا شيما مش مصر بس اللي فيها فيروسات-
---------------------------
طبعا مش ممكن انسى اخبار دمياط اللي كل شوية اشوفها في العاشرة مساءا وأخر خبر ان الدمايطه عرفوا يرجعوا الصيادين والسفن بتاعتهم من القراصنة الصوماليين بالرغم اني اسمع ان الصوماليين دول غلابة يعني بس ما علينا المهم ان الصيادين في طريقهم لمصر
وسمعني أحلى سلام للدمايطة اللي انا منهم طبعا ورجالة وطول عمرك يا بلادي رجالة رجالة
-------------------------------
كنت قاعدة جنب ماما على كنبتنا الجميلة اللي اسمها love seat والكنبة دي صغنونة ومعمولة علشان شخصين بس فقولت لماما وكنت بتكلم بواقعيه جدا وكإني فعلا مخطوبة
انا : للأسف يا ماما مش هينفع أقعد عالكنبة الرومانسية دي جنب خطيبي
ماما : خطيب مين ده اللي تقعدي جنبه انا هبقى قاعده معاكو
انا : طيب وانا قولت حاجه تنورينا يا مامتي والله مفيش مشاكل
ماما : لأ وايه يقوللي لو سمحتي يا طنط عايز قهوة مضبوطة من ايدك هقولو يا سلام بس كده أحلى قهوة مضبوطة ليدي تعملهالك
انا : لااااا قهوة مين متفقناش على كده مشيها فيسفاسيه او كبشتينو
ماما : اهي القهوة موجودة والنيسكافيه والكابتشينو موجودين بس العريس مش موجود
انا : هههههههههه ليه الاحباط ده يا اوختشي وعالعموم انا مش مستعجله يجي براحته يمكن مش لاقي مواصلات أو الطريق زحمه :)
----------------------------------
كنا في الهايبر ماركت وحصل موقف خنقني وحرق دمي بصراحة
بابا قابل واحد صاحبه وأسرته وفي العادي بابا بيسلم على أصحابه ومش بنتعرف عليهم لكن لقيت بابا ندهلي انا وماما وسلمنا على طنط وبابا وصاحبه قدموني لإبنه وقدموا ابنه ليا
بابا : بنتي ليدي
صاحب بابا : ابني عمرو
وانا اللي حصل اللي وقتها اني مقدرتش مضحكش حسيت اني بدبس وبيثبتوني بالحركة دي علشان عارفين اني هرفض اني أقعد مع العريس ومامته في جلسة تعارف فقالوا نعمل الموضوع كإنه صدفه ومستنتش كتير واخدت ماما ومشينا واتخنقت وكان نفسي اروح عالبيت ومن كتر خنقتي رحت جنب ماما وقولتلها أغنيه اهي قلبت بغم شكلنا كده بقى .... ولسه مكملتش فماما ضحكت قولتلها عاجبك التدبيسة دي انا غلطانه اني شيلت الدبلة من ايدي
وطبعا اول لما شيلت الدبلة من ايدي ماما تنفست الصعداء وخبت الدبلة علشان ملبسهاش تاني عااااااااااا
--------------------------------------
نفس الناس اللي قابلناهم في الهايبر عايزينني أدرس انجليش لأولاد أخت العريس وبالتالي نتكلم ونتعرف على بعض اعتقد انها حركة مكشوفة أوي وبعدين انجليش ايه اللي هدرسه في رمضان ده على اساس اني فاضية يعني ولا ايه؟ يارب اعرف أخرج من الموضوع ده على خير انا مليش نفس اشرح انجليش اصلا وخصوصا في رمضان اللي وقته بيخلص في ثانيه وبعدين بحس ان اكتر ناس بيتم استغلالهم هما الأطباء ومهندسين الكمبيوتر ومدرسين الانجليش والرياضيات وبعدهم مدرسين باقي المواد
طب لو كنت دخلت اعلام يا ترى كنت هشرح للأطفال الحلوين ايه ؟
----------------------------------------
50 مسلسل جايين رمضان السنة دي ان شاء الله
وليه الهبل ده مش عارفة واشمعنا في رمضان بالذات كل كمية المسلسلات دي برضه مش عارفه بس الأكيد اني حابة اتفرج على مسلسل ليلى مراد ومسلسل الأدهم بطولة احمد عز وطالما أحمد عز في مسلسل فأكيد بابا مش هيخليني اشوفه :( ليه معرفش أكيد الاجابة في بطن الزير وعلى رأي ابن حميدو فين بطن الزير دي :)
-------------------------------
نتكلم شوية بقى عن رمضان اللي احتمال كبير يبقى يوم السبت ان شاء الله اما بالنوسبة لهنا ف احتمال كبير يبقى يوم الأحد :) ليه ؟؟ برضه الاجابة في بطن الزير
وعن الحاجات اللي ان شاء الله ناوية اعملها في رمضان ففي فكرة عجبتني أوي شوفتها في بلوج من البلوجات السنة اللي فاتت وهي كتابة قائمة بالأحلام اللي نفسنا تتحقق ونكتبها في ورقة وندعي ان الأحلام دي والحاجات اللي نفسنا فيها دي تتحق حتى لو كنا شايفينها مستحيلة فمفيش مستحيل على ربنا سبحانه وتعالى وندعي بالحاجات دي كل يوم من أيام شهر رمضان واحنا صايمين وفي صلاة التروايح
وعلى فكرة في ناس عارفين نفسيهم دعيتلهم رمضان اللي فات كتير جدا في صلاة التراويح فياريت مننساش ندعي لبعض
وكمان أحب أقولكو معلومات جميلة أوي عن شهر رمضان ان السنة فيه بثواب فرض وان لو حد صلى صلاة في ليلة من ليالي رمضان فبيكون ثوابه ان ربنا سبحانه وتعالى بيكتبله بكل ركعة ألف وخمسائة حسنة وبيبني له بيتا من ياقوتة حمراء في الجنة ليها سبعين ألف باب وكمان مننساش ان ثواب الصيام على ربنا سبحانه وتعالى وكمان اللي بيصوم رمضان وبيصبر فيه بيخرج من ذنوبه وكإنه لسه مولود معملش ولا ذنب وكمان في باب من أبواب الجنة اسمه باب الريان بيدخل منه الصائمون


كل سنة وانتوا طيبين وبخير مرة تانية ورمضان كريم وربنا يبلغنا رمضان

هناك 25 تعليقًا:

أميرة علي كوكب مهجور يقول...

يانهار ابيض 700 ربنا معاكم وطبعا لازم المصريين يختلفوا عن الاخرون واهل دمياط اجدع ناس طبعا واللي بني مصر كان في االاصل نجار وحلواني وحلوة اوي التدبيسة دي ولازم تعلمي ابناء الوطن وتديهم من خبراتك في اللغه عيزاكي او كلاس تروح بالكمامه هتعمل شغل جامد وادعيلي:)انا برضه شايفة مسلسل ليلي مراد حلو لاني حبيت اوي اسمهان السنه اللي فاتت متنسيش تدعيلي وانتي بتصلي يعني لا هيبقا طقم كاكاو ولا دعوة حلوة:)كل سنه وانتي طيبة يا قمر ورمضان حلو عليكي وعلي كل اللي بتحبيهم

Blind Sniper يقول...

كل عام وانت بخير ...طب ومالة يا ليدى العريس مش يمكن يكون كويس ...وكمان انا خطيبتى خريجة اعلام يس بتشرح نحو و عربى للعيلة كلها شفتى بقى ...اما بالنسبة لرمضان فانا كاتبلة هو و مسلسلاتة بوست عندى ....وشكرا

SaLLy يقول...

good morninig
i am sorry for writing in english but i live in teh states and my labtop doesnt have arabic letters
bas ana momken akteb franko
any way ana mesh aret el post bas wanted to say
ramadan karem o inshaa allah rabena ye3'fer lena kolena el zonob
amien

إيمان يقول...

كل سنة وانتى طيبه وبخير ويارب احلامك كلها تتحقق قبل رمضان اللى جاى
اما بالنوسبه لموضوع العريس بتاع الهايبر انا مش شايفه سبب لزرجنة مخك الفاضيه دى ايه المشكله لو هو كويس انك تقعدى معاه وتشوفى هل هو مناسب ولا لأ وبعدين ليه بنعتبر ان البنت هى اللى فرجه بالعكس انتى بتقعدى فى بيتك والعرسان هى اللى بتيجى تعرض نفسها عليكى وانتى لو مش عجبك العريس بعد ما تشوفيه مرة واتنين احلقيلو وابعتيه .. راجعى نفسك يا بنتى قطار العمر بيجرى يا ليدى أحسن ما بكرة تروحى انتى تخطبى العرسان نياهاهاهاهاها
ده لو مكطنتيش مرتبطه او بتحبى حد يبقى الكلام ملوش لازمه..يقطع الحب وسنينه
خللى بالك من كنبة الحب وحافظى عليها يمكن تنفع

عاشقة الأحزان يقول...

السلام عليكم

وحشتنى قوووى يا نونو يا حبيبتى
رمضان كريم علينا وعليكم

وربنا يستر علينا انا خايفه يا اختشى ينتشر عندنا المرض ده وتبقا مصيبه

عااااااااااااااااااااااااا

ربنا يسعدك وترجعلنا بالف سلامه حبيبتى
مودتى

ايناس

Bent Men ElZaman Da !! يقول...

اول مره اعرف ان العدد بقى كبير اوى كده 700 كتيييييير ربنا يستر علينا
الكمامات دى بقى احنا كتير مننا بنقلدها وخلاص وحبه ناس تانين لو شافو حد لابس الكمامه بيسلتموه نظرات ان ماوصلتش لتريقه يعنى
واحلى سلام للدمايطه :D
اتخنق انا اوى من الصدف البحته اللى بتحصل دى ال ايه عشان تشوفى عريس بالصدفه المشكله اننا بنبقى فاهمين بس عاملين مش فاهمين بمزاجنا :D
مستفزيانى انا المسلسلات الكتييييير بتاعه رمضان دى
بيخترعوا اى حاجه يلهونا بيها :(
حلوه اوى الفكره بتاعه قائمه الاحلام دى
كل سنه وانتى طيبه ياحبيبتى ويعود عليكى بالخير ان شاء الله :)

لا تـــشـــتــــاق يقول...

بوست متنوع جميل والاجمل انه منك
وادى فرصه للعريس يمكن يكون كويس ةابن حلال ويمكن تحبيه ولازم تعرفي ان اول مراحل الحب الارتياح
لو مرتاحه له خدى بقي خطواتك وتوكلى على الله
وكل سنه وانتى طيبه

موناليزا يقول...

كل سنة وانتى طيبة ياحبيبتى
وربنا يهيئلك كل الخير

ملحوظة: هذه المعلومة التى وردت فى الموضوع ما مصدرها؟
"من صلى صلاة في ليلة من ليالي رمضان فبيكون ثوابه ان ربنا سبحانه وتعالى بيكتبله بكل ركعة ألف وخمسائة حسنة وبيبني له بيتا من ياقوتة حمراء في الجنة ليها سبعين ألف باب"

ياريت تتأكدى من صحة المعلومة و المصدر وتذكريه
حتى لا نقع تحت من يقول على الله ما لايعلم
وارجو ان تتقبلى ملحوظتى بصدر رحب

الشعب لابد له من حكومه تشكمه يقول...

تصدقى انك واحشانى؟؟ لا بجد تصدقى؟ يعنى مصدقه ولا لا؟
ازيك يادودو وكل سنه وانتى طيبه ورمضان كريم وانا عندى صواريخ وانتى لأأأأأأأأأأأ.
شوفى بأه وبجد خدى بالك من موشوع الانفلويسه لانها بجد الموضوع بدا يكبر بس اباى حطي الكمامه على مناخيرك بلاش فضايح الله يخليكى:) ال حاطينها على بقهم وبس هو المصرى كده دايما متميز..:))

بالنسبه لموضوع الكنبه فكرتينى بماما كنت مره بقولها انا لا يمكن اسيب ولادى كده انا هعمل وهعمل وهعمل قالتلى مش لما تجيبى اللى يجيبهم الاول:))
هم كده علطول يكبسونا يابنتى:)

ندخل باه على العريس ماله هه ماله؟
حتى الحركه شكلها جانتى خالص والله دايما بيعملوا فيا الحركه دى:))
انا حبيت مامتك شكلها زى ماما بالظبببببببط بوسيهالى باه..:)
بصى لو القلب فاضى واخدالى بالك انتى عادى شوفيه ممكن يطلع كويس واهو مترجعلناش بايدك فاضيه:))

كل سنه وانتى طيبه ياجميله وربنا يتقبل يارب:)

Rannon يقول...

ايه كل الحاجات اللي ورا بعض دي D:

كل سنة وانت طيبة وبخير
وربنا يهديك ويهدنا للخير يارب :)

بـــــسمة انـــــــــور يقول...

كل سنة وانتى طيبة يا قمرة

رمضان كريم

أحمـــــــــــــد أبو العلا يقول...

كل سنه وانتي طيبه ياليدي
ويارب نفوز كلنا في رمضان ونخرج منه فائزين

Lady E يقول...

أميرة علي كوكب مهجور : بقوا اكتر من 700 دلوقتي يا مرمر عااااااا

واللي بنى مصر كان نجار واويمجي كمان أول مرة اسمع المعلومة دي :)

والتدبيسة مش حلوة خااااالص

ان شاء الله هدعيلك يا مرمر وانتي كمان ادعيلي اوعي تنسي :) وكل سنة وانتي طيبة بمناسبة رمضان وعيد ميلادك كمان :)

Lady E يقول...

Blind Snipe : وانتا بخير وسعادة يا سنير وأكيد هشوف البوست بتاع مسلسلات رمضان لو النت مرخمش عليا وفصل

وربنا يباركلك في خطيبتك ويجمعكو على خير ان شاء الله

رمضان كريم

Lady E يقول...

SaLLy : بالعكس يا سالي أنا مش زعلانة انك بتكتبي انجليش
اكتبي براحتك بالانجليش او بالعربي المهم ميكونش فرنساوي علشان مفيش بيني وبينه عمار :)

امين ان شاء الله

كل سنة وانتي طيوبة وبخير يا قمرايا

Lady E يقول...

إيمان : وانتي بخير وصحة وسعادة يا احلى ايمي ويارب انا وانتي والمسلمين

وبالنوسبة للعريس بتاع الهايبر فمش أنا اللي اتحط قدام الأمر الواقع والمقابلة اللي حصلت فأجه دي وان انا أخر من يعلم خلتني قفلت من العريس وعيلته كلها

وبعدين انا لسه مكملتش 21 يا ايمي متقلقيش لسه بدرررررررري وبعدين كمان مين دي اللي هتخطب العرسان ؟؟؟ههههههههه بقى كده يا ايمي الله يسامحك

وبجد يقطع الحب وسنينه ألف مرة وخصوصا لو بتحبي حد مشوفتيهوش أصلا ومش موجود غير في خيالك

Lady E يقول...

عاشقة الأحزان : وعليكم السلام ورحمة الله وبركاته

وانتي كمان وحشاني جدا يا انوسه بجد

والله أكرم

ومتقلقيش من ناحية الاتش ون ان ون ينتشر ربنا يستر

تسلميلي يا قمرايا

وكل سنة وانتي طيبة وبخير

Lady E يقول...

Bent Men ElZaman Da !! : أمين

وأحلى سلام ليكي يا دودو :)

وشوفتي ميحسش بالمفأجات الغير سارة دي غير اللي حصلت معاه :)

وكتر المسلسلات فعلا حاجة تغيظ

تسلميلي يا حبيبتي وكل سنة وانتي بخير وصحة وسعادة ورمضان كريم

Lady E يقول...

لا تـــشـــتــــاق : شكرا على النصيحة

وكل سنة وحضرتك طيب وبخير

ورمضان كريم

Lady E يقول...

موناليزا : وانتي طيبة وبخير وصحة وسعادة يا حبيبتي

والمصدر من كتاب اسمه المستطرف في كل فن مستظرف

ربنا يكرمك وجزاكي الله خيرا وزادك حرصا وغيرة على الدين

ورمضان كريم

Lady E يقول...

الشعب لابد له من حكومه تشكمه : من القلب للقلب رسول يا شيما
تصدقي بقى انك وحشااااااني اكتر ما انا وحشاكي :)

وانتي طيبة وبخير وصحة وسعادة يا حبيبتي واعمل ايه بقى ما في بنوتة صبحتي مش راضية تبعتلي شوية صواريخ من اللي عندها وبتعمل مقالب شوريرة في مامتها بالصواريخ نياهاهاهاهاها

وهو المصري دايما متميز في الخيبة بعيد عن القارئين ههههههه وعلى رأي مدونتك بلا نيلة

وانا كمان حبيت مامتك وعلى فكرة فعلا لما بتحكي عن مامتك بحس انك بتتكلمي عن مامتي برضه
ووصلت البوسة وصليلي بقى بوسة كبيرة لمامتك :)

ومتقلقيش مش هرجع بإيدي فاضيه
هجيب كيس جوافة وانا جايه نياهاهاها
ال عريس ال سيبك يا بنتي دول عالم فاضيه

وكل سنة وانتي بخير وصحة وسعادة يا حبيبتي وأمين يارب ربنا يتقبل ان شاء الله

Lady E يقول...

Rannon : ياميش رمضان يا رنا :)

وانتي طيبة وبخير يا قمرايا

اللهم امين

ورمضان كريم

Lady E يقول...

بـــــسمة انـــــــــور : وانتي طيبة وبخير وسعادة يا بسومة

رمضان كريم والله أكرم

Lady E يقول...

أحمـــــــــــــد أبو العلا : وانتا طيب وبخير وصحة وسعادة يا انجينير

اللهم أمين ربنا يستجيب دعائك يارب

alhayah يقول...

بحب فيكى روح الطفله الى مبتكبرش

صدقينى ده اجمل شىء فى الدنيا

انتى دمك خفيف وعسل


وكل سنه وانتى طيبه بمناسبه رمضان وكل الناس