الخميس، 6 أغسطس 2009

معرفة البنوتات كنوز


النهاردة اتعرفت على بنوتة جميلة جدا وعسولة جدا ومرحة جدا وقلبها طيب وابيض جدا احسبها كذالك ولا ازكي على الله احدا وهي مدونة ومدونتها اسمها أميرة على كوكب مهجور وهي اسم على مسمى

دردشنا سوى عالايميل وكل ما كنا بنتكلم كنا بنلاقي مفاجئات بتحصل اول المفاجئات ان انا وهي طلعنا من نفس ذات المكان
سألتني في الاول انتي منين وقولتلها اني م البلد دي نياهاهاهاها قالتلي وانا كمان م البلد دي قولتلها نبقى جيران بقى :) قالتلي بس انا من الاقاليم قولتلها وانا كمان ناقص تقوليلي انك من دمياط كمان ههههههه ومكنتش مصدقه اني دمياطيه ومرمر كمان طلعت دمياطيه واستغربت واتصدمت يا عيني من المفاجئات دي
الدنيا صغيره ومش بس كده كمان كنا في اعدادي في نفس ذات المدرسة وكمان كانت زميلتي في الكليه اللي انا لسه بدرس فيها مع الاسف :) يا محاسن الصدف

ومش كده وبس كمان بتحب الموسيقى وخصوصا موسيقى عمر خيرت وبتحب القراءة والكتابة يعني تقريبا كل حاجه بنحبها سوى وزي بعضينا بجد سعيدة جدا جدا اني عرفت بنوتة زيها في الحياة البوهيميه اللي احنا فيها دي ههههههههههه ومتسألونيش يعني ايه حياه بوهيميه (وش بيطلع لسانه)



يارب تبقى معرفة خير يا مرمر وخصوصا اننا في ليلة النصف من شعبان كل سنة وانتوا طيبين
وانا سعيدة جدا اني اتعرفت عليكي يا قمرايا ومعلش بقى النت رحب بيكي احلى ترحيب نياهاهاهاها

بجد معرفة البنوتات كنوز مش معرفة الرجال كنوز:)


هناك 36 تعليقًا:

أميرة علي كوكب مهجور يقول...

بجد مش عارفة اقولك ايه ربنا يخليكي كلامك حلو اوي وانتي والله جميلة جدا وطيبة جدا ودي مش مجاملة دي حقيقة والله وانا مبسوطة اوي اني عرفتك بجد ويارب تكون معرفة خير و ربنا يوفقك في حياتك ودراستك يارب وتكوني احسن الناس

لا تـــشـــتــــاق يقول...

بقي دلوقتى بقي معرفه البنات كنوووز
عموما ماشي كنوز كنوز
ربنا يستى يجمعكوا دايما على خير وتكونوا اسعد اصدقاء وربنا يديمها نعمه
سلاموز بقي

غير معرف يقول...

ربنا يجعله حب في الله
ويجعلكم من المتحابين فيه
ويظلكم الله في ظله يوم لا ظل الا ظله
وكما يقول رسولنا الكريم فيما معني الحديث
انا الله يقول
المتحابون في علي منابر من نور يغبطهم الانبياء والشهداء والصالحون
أسئل الله ان تكونوا منهم
وان يجعل تجمعكمو تفرقكم علي طاعة الله
....................
البنوتات بردوا منهم رجال
بس رجال صفتا ولا ليس اسما
.........................
مستني حضرتك في مدونتي
يلا مش تتاخري

بنجاواتى يقول...

فعلا معرفة الرجال كنوز

Unknown يقول...

كل سنة وانتى بخير وكل زوار مدونتك اتمنى اكون صديقة جديدة ليكى وفعلا معرفة البنوتات كنوز

blue-wave يقول...

ربنا يديم صداقتكم على خير

♥نبع الغرام♥♪≈ يقول...

حبيبتى

معاكى حق وربنا عشان كده انا عرفتك ملاك جميل وانسانه محترمه قووى وجميله قووووى

ربنا يسعدك
وسعدت بمعرفتك عن قرب
بحبك كتيررررررر قووى خالص مالص

وجميل ما كتبتى عن مرمر يارب تدوم الصداقه دى ياقمر

بحبك مووووواه

منــار فايد يقول...

الله
بجد حاجه جميله جدا جدا
ربنا يديم الصداقه بينكم يارب
انا نفسي فعلا تحصل حاجه جميله كدا
سلامي


منار

غير معرف يقول...

اقول بقى ربنا يهنى سعيدة بسعيدة!!
عووووو
]

mohamed ghalia يقول...

هههههههههههههههه
لا بقى معرفة الرجال كنوز ههههههههههههههههههههه
ربنا يسعدكم وتبقى معرفة خير

Maryama Qandil يقول...

ربنا يديم الود ما بينكم ياا اخواااتشي,,,

:D

ربنا يظلكم يوم لا ظل الا ظله
:)

زهرة الحب يقول...

ربنا يديم بنكم الصداقه الجميله دى واكيد دى اجمل صدفه صح

ولاء يقول...

ربنا يجمع مابينكم دايما على خير صحيح الدنا صغيرة والناس الطيبين كتير واحنا ماشين قلوبنا بتشاور عليهم.... ان شاء الله تكون بداية صداقه مبنه على طاعة الله ودى اكتر حاجه هتخليها تستمر

صمت الحنين يقول...

السلام عليكم ورحمة الله

رب صدفه خير من الف ميعاد
سبحان الله صدفه جميله انك تتعرفى على قريب ليكى فى كل شىء
ربنا يكرمكم ويسعدكم ان شاء الله

دمتى بخير

جحا المصرى يقول...

ربنا يكرمكم ويسعدكم دايما

Mona Shereif يقول...

وحشانى جدا يا ليدى
اقولك حاجه
بجد لما دخلت المدونة دلوقتى رجعنى لاحساس اول مره دخلت عندك هنا
سبحان الله العظيم
وحشانى بجد


ربنا يعزك يارب ويكرمك ويبارك فيكى يارب

وبجد بجد معرفة الناس كنوز
ربنا يجعنا دايما على طاعته يارب
انتى اصلا تتحبى يا ليدى
وحشتينى بجد

Rannon يقول...

جميل انكم لاقيتوا يعض ويارب تبقى أجمل صداقة وتواصل وحب في الله
:)
ومعاك كل الحق معرفة البناتيتات كنوزات (;

akhayah يقول...

بوست رائع وجميل جدا

واجمل شىء انك تلاقى صديقه بلوجر

فهماكى وتكونوا قريبين من بعض

انتى شخصيه جميله ومرحه وكمان العزيزه

اميره على كوكب مهجور

فعلا من البوست قريبه منك وكويس جدا انكم طلعتم من نفس المكان

وانكم بقيتوا اصدقاء واهى فرصه انكم تقربوا من بعض وتشوفوا بعض

بوست جميل فعلا وبشكرك جدا على كريمات الصن بلوك وانا طمعان شويه انك تجبيلى اسم منتج كويس لانى بعمل تربيه عسكريه وهناك بنلعب رياضه وبنقف فى الشمس وانا بشرتى بتتغير بسرعه ياريت تسبيلى اسم منتج كويس وبجد الف شكر ليكى ومبروك على صداقتك الجميله الجديده

تحياتى

Lady E يقول...

أميرة على كوكب مهجور : ده كلام بسيط عنك يا مرمر ومش مجاملة

تسلميلي يا قمرايا وربنا يستجيب دعائك وليكي مثله ان شاء الله

منوراني دايما يا بنت بلدي وكليتي :)

Lady E يقول...

لا تشتاق : أيون معرفة البنوتات كنوز بس للبنوتات مش للاولاد نياهاهاها

يعني محدش يروح يتعرف ببنوتات ويقول ليدي اللي قالت :)

اللهم امين

سلاموز بالفروالة والموز

Lady E يقول...

هعزف لنفسي : اللهم امين

ربنا يكرمك

وموضوع البنوتات منهم رجال ده مش عارفه هو مدح ولا ايه :)

Lady E يقول...

بنجاواتى : فعلا معرفة البنوتات كنوز P:

Lady E يقول...

ايوية : اهلا بيكي

وكل سنة وانتي بخير وصحة وسعادة

واكيد يسعدني اننا نكون اصدقاء

نورتيني

Lady E يقول...

blue-wave :

أمين

Lady E يقول...

عاشقة الأحزان : انوسة حبيبتي

انتي كده بتوصفي نفسك يا قمرايا انتي اللي بنوتة جميلة وطيبة وصاحبة اصحابها بجد ربنا يكرمك وبجد تستاهلي كل خير

امين

تسلميلي يا انوسة وانا كمان بحبك اوي

Lady E يقول...

شباك موارب : اللهم امين

بجد كانت مفاجأه جميله جدا

وان شاء الله تحصل معاكي مفاجئة جميلة كده

نورتيني يا دكتورتنا وربنا يوفقك في الامتحانات

Lady E يقول...

كيكي المعرفة طبعا : نياهاهاهاهاهاهها ضحكات شريرة متقطعه

مين سعيد وسعيدة دول بقى (وش بيطلع لسانه )

تعليقي هقولهولك عالايميل مش عالمدونة

Lady E يقول...

mohamed ghalia : معرفة الرجال للرجال كنوز يا محمد لكن لينا احنا مش كنوز خاااااااالص

وبرضه معرفة البنوتات كنوز p:

Lady E يقول...

♥ Am fOpa'D ♥ : ههههههههه امين

ايه الاسم الجديد ده كل ده اسم :)

Lady E يقول...

زهرة الحب : اللهم امين

فعلا صدفة جميلة وفرحتني جدا

الصداقة دلوقتي بقت حاجه نادرة جدا

نورتيني

Lady E يقول...

dr.w.krm : اهلا بيكي

اللهم امين

بس ايه موضوع قلوبنا بتشاور عليهم دول هما تاكسي ولا ايه نياهاهاها طبعا بهزر

واهم حاجه في اي ناس بنعرفهم ان تكون معرفتنا بيهم مبنية على طاعة الله

نورتيني

Lady E يقول...

صمت الحنين : وعليكم السلام ورحمة الله وبركاته

فعلا سبحان الله رب صدفة خير من ألف معاد وهو قدر اكتر من انه صدفه

ربنا يستجيب دعائك ولكي مثله ان شاء الله

بحبك في الله

Lady E يقول...

جحا المصرى : اللهم امين

منور المدونة دايما

Lady E يقول...

Sometimes : يااااااااااااااااااه من هنا للسنة الجايه

وحشااااااااااااااني جدا جدا جدا جدا كمان

قوليلي بقى ايه الغيبة الطويلة دي قلقتيني عليكي بجد

اللهم امين

وانتي اللي عيونك حلوين وانسانة جميلة وتتحب علشان كده شايفة كل الناس زيها

نورتيني

Lady E يقول...

Rannon : اللهم امين

اكيد يا رنون معرفة البنوتات كنوز

نورتيني

Lady E يقول...

akhayah : تسلم

بالنسبة لكريمات الصن بلوك فهي كتير ودرجة الحماية بتاعتها مختلفه
ولو سألت في أي صيدلية على كريمات صن بلوك هتلاقي انواع كتير وكلها احسن من بعض وبتستخدم على حسب درجة تعرضك للشمس

اما ماركة الصن بلوك اللي جربتها فهي من لونا ودرجة الحماية بتاعتها 62 وممكن يكون طلع ماركات تانيه درجة حمايتها من الشمس أقوى

ربنا يوفقك ويارب اكون افدتك