الثلاثاء، 4 أغسطس 2009

بحبك اوي .. وحشتني اوي


شهر رمضان حبيبي بستناه من السنه للسنه

الشهر الوحيد اللي بحس فيه بأمان وببقى طايره مع الملايكه وليه لأ ما احنا بنصوم طول النهار ومش بناكل ولا بنشرب زي الملايكه يبقى ملايكه ولا مش ملايكه :)

الشهر اللي بستناه بكل شوق وحب هو صحيح مبقاش فيه اللمه الحلوه بتاعت العيله بتاعت زمان لما كانت ماما ستو وجدو عايشين الله يرحمهم بس لسه فيه حاجات حلوه

لما انا وصبحاتي بنبعت لبعض مسجات نشوف رمضان بكره ولا لأ

لما بنخرج الصبح نشتري الحاجات اللي هنعملها عالفطار

لما بقف في المطبخ مع ماما وبعمل اكلات جديده رمضان اللي فات عملت رز مكسيكي وكان طعمه تحفه

لما كل شويه بروح واجي قدام التليفزيون عايزة اشوف الأذان والأدعيه اللي قبله

لما بشم ريحة البخور اللي بتملاني بالدفا والحب قبل الفطار

لما بدعي ربنا سبحانه وتعالى بكل اللي نفسي فيه قبل الفطار

لما بسمع الأذان من كذا مسجد

لما بسبق ماما وبابا قبل ما يفطروا واديلهم تمرايه علشان ابقى فطرت صائم :) او عالاقل اول حاجه يفطروا عليها بعد الصيام تبقى من ايدي علشان كده بقول فطرت صائم

لما بلبس اسدال الصلاة الجديد

لما بروح المسجد وبلاقيه ما شاء الله مليان
صحيح في بنوتات بيبقوا مأفورين في الميك اب والبيرفيوم وهما جايين يصلوا بس اللي يشوف كل الناس دي في المسجد بيحس بمشاعر جميله اوي

لما بشوف ماما وهي بتصلي في أوضتها لأن ماما بتحب تصلي في البيت بحب اشوفها اوي وهي بتصلي بس من بعيد علشان ملخبطهاش في صلاتها بتبقى ما شاء الله جميله اوي واعتقد كلمة جميله قليله عليها ربنا يعينها في صلاتها يارب


لما بحس وانا في المصلى في الاستراحه بين التراويح ان حبيبي معايا وان شاء الله هصلي وراه في يوم من الأيام وان شاء الله كمان هنروح المسجد ونصلي التروايح سوى في يوم من الأيام

لما بتيجي على بالي المدونة وانا في صلاة التراويح او بتيجي صورته في خيالي وبدعي لكل اللي بيحبوني وبيزوروا مدونتي وبدعيله حتى لو هو مش بيدعيلي و حتى لو هو ميعرفش اني بحبه اصلا

لما بنتسحر وبفضل ارخم على ماما وبابا واقولهم عايزة ااخر السحوووووور ويقولولي الساعه واحده هتأخريه اكتر من كده ايه واقولهم هأخره قبل الاذان بربع ساعه مثلا :)

لما بسهر لوحدي وبقرأ القرأن ولما بنتسابق مين هيختم القرأن الأول ودايما انا بكون اخر واحده عاااااااا

لما بتفرج على شويه من المسلسلات اللي بتتعرض في رمضان

والحمد لله الحمد لله الكليه السنه دي بعد العيد انا مرة حضرت رمضان وانا في الكليه كنت هتشل بصراحه من عمايل الزملاء الافاضل بيدخنواااااا في نهار رمضان ولما سألت ولاد عمي في الموضوع ده افتوا ان السجاير مش بتفطر علشان مش بتدخل المعده ياااااااااااسلااااااااااام ونعم المنطق المنيل السجاير دي اساسا معصيه واحنا ممنوعين من الاكل والشرب اللي هو حلال في نهار رمضان يبقى ايه حكم المعصيبه بقى
ولا واحنا خارجين في يوم في نهار رمضان من الكليه واسمع صوت جهوري من واحد المفروض زميلنا وبيدخن برضه بيقول لواحد صحبه يا عم روح ظبط البت فلانه ربنا يهديهم

تعالى بقى يا رمضان بجد وحشتني جداااااااااااااا وان شاء الله ناويه ادعي ربنا سبحانه وتعالى دعوات كتيييييييير لما تيجي

يا ترى ناويين تعملوا ايه في رمضان السنه دي ؟

هناك 32 تعليقًا:

بنجاواتى يقول...

احم احم
اول تعليق وقريت البوست كمان

انتى يا ليدى كاتبة كلام عادى بس مش عادى

بجد كلام جميل ومشاعر جميلة وربنا يديمها يا رب

رمضان بقى يا ستى السنة دى انا هعمل فيه عمايل ما عملتهاش قبل كده خااااااالص

اكتر حاجة هعملها هى انى هذاكر كتييييير علشان امتحاناتى هتبدأ بعد العيد وغالبا هقفل المدونة بدخول رمضان ومش عارف هتفتكرونى بالدعاء ولا لا

القصد يعنى انى هذاكر وانا الحمد لله مقتنع انى لما ابقى مشغول فى رمضان ومش فاضى بيكون رمضان احسن لانى هكون مشغول بالمذاكرة والحمد لله بصدق النية ربنا يجازينى على العمل ده وكمان نفسى لما اشغلها بالحق اللى هو المذاكرة بتنسى الباطل اللى هو المسلسلات والتى فى كله وبجتهد اكتر فى العبادة والحمد لله

القصد انى ناوى بإذن الله يكون رمضان السنة دى حاجة تانية وربنا يتقبل

يا رب يا ليدى يكون رمضان خير عليكى وعلى كل الناس وتصلى التراويح ومفيش كلية وتفكرى فى حبيب القلب يا ستى وماله وتدعى لى

لسه لكم معايا بوست او اتنين بالكتير قبل ما انزلق لاى معسكر مغلق ينتهى بانتهاء شهر 12 ....محدش يفكرنى :((

صباح الفل ونفسية سعيدة بإذن الله

moustapha achraf يقول...

كل عام وانتى بخير اللهم ادركنا رمضان ....تصدقى خلتينى اركز واقول ان رمضان وحشنى انا كمان من كتر الى قولتية انا نفسى رمضان السنادى يبقى سعيد علينا و ربنا يهدينا فية كلنا وانة يكةن هة دة رمضان الى حبقى احسن فية
نهارك بيضحك

غير معرف يقول...

كل سنة وإنتي أحلي وأرق بنوتة ؛؛ اللهم بلغنا رمضان أعواما كثيرة وتقبل منا صالح الأعمال.
ربنا يقدرنا علي الصيام في الجو الصيفي ده !!.
* علي فكرة تقريبا كل ذكرياتك في رمضان شبهي ؛ بس أنا كنت أحب أتسحر بدري علشان عندي شغل الصبح ؛ ده غير إننا كنا بنصحي قبل الفجر نقيم الليل وبعدين بابا يصلي بينا الفجر جماعة؛ كمان العصر والمغرب كنا بنصليهم جماعة. كانت أيام جميلة لكن سبحان من له الدوام وربنا يباركلنا في الحاضر ويصبرناعلي الغايب .
رمضان كريم يا ليدي ؛
ديدي

Unknown يقول...

سلامو عليكم
هييييييييييه هيييييييييييه
فكرتيني برمضان !
انا بقي بقيت بكره اشوف التليفزيون فيه عشان المسلسلات دي

بجد رمضان وحشنا كلنا

The illusionist يقول...

الرابع بجداره

بعون الله اكيد لازم نخليه يختلف
الواحد كل سنه بينقص من عمره رمضان

هنفضل لحد امتى نضيع رمضان ورا التانى
بيقولك الصحابه كانوا بيستعدوا لرمضان
من بدايه شهر شوال
بيستعدوله من السنه علطول للسنه
يخلص رمضان
يبتدوا الاستعداد تانى

احنا لو حتى نبقى اى حاجه ونستعدله من الشهر ده
يبقى كويس جدا
يا رب مايضيع علينا السنه دى

لا تـــشـــتــــاق يقول...

والله ياطفلتى البريئه الجميله انا عاوز اقولك انه فعلا وحشنى اوى شهر الطاعات والرحمات والتكفير عن العذاب وهو شهر الله حيث قال عز وجل في حديث قدسي كل عمل بن ادم لنفسه الاالصيام فهو لى وانا اجزى به
فربنا يبلغنا رمضان وياباغى الخير اقبل وياباغى الشر اقصد
ودومتى فرحانه وسعيده

أميرة علي كوكب مهجور يقول...

ازيك الاول ويارب تكوني بخير رمضان وحشنا اه بس الحاجات الحلوة بتاعت زمان خلاص مبقتش موجودة وكل حاجة بتجري بسرعة بحس ان خلاص مفيش بركه في اي حاجة

أميرة علي كوكب مهجور يقول...

اه نسيت اقولك انا كنت عايزة ايميلك ده طبعا لو مفيش مانع بجد نفسي اتعرف عليكي لو مش يدايقك

mohamed ghalia يقول...

اللهم بلغنا رمضان
ربنا يرزقنا حسن الطاعة
هجاوب فى بوست مخصوص لرمضان إن شاء الله

أمل حمدي يقول...

كل سنة وانت طيبة وربنا يعيده عليك اعوام واعوام ويفرحك دايما يارب

سلام

♥نبع الغرام♥♪≈ يقول...

السلام عليكم


وحشتنى قوووووووووووى ياعمرى كله

ربنا يبارك فيكى ويعزك يارب

الله على كلامك الجميل ياحبيبتى

يارب يعوده علينا بالف خير يارب

ويجعل كل حرف بميزان حسنتك يا روحى بارك الله فيكى

معلهش مع انها متأخره

البقاء لله ربنا يغفر له بحق الايام الجميله والفضيله


وكل سنه ولحظه وانتى بخير

حبيبتى خلى بالك من نفسك قووى
انا هفتح الميل

محتاجه اتكلم معاكى شويه
منتظراكى

الشعب لابد له من حكومه تشكمه يقول...

كل سنه وانتى طيبه ياقمر...رمضان احلى شهر فى السنه بالنسبالى...مش عارفه اوصفلك بحس بايه بس بحس ليه طعم جمييييييييييييل..
بس قوليلى انتى هترمضنى عندك ولا حدانا فى ام الدنيا...

موناليزا يقول...

كل سنة وانتِ طيبة ياحبيبتى وربنا يبلغنا جميعا رمضان ويتقبل مننا صالح الاعمال
هعمل ايه ياستى
هعمل ايه ياستى



مينفعش اقول كلمتين وخلاص ده عايزله بوست مخصوص ان شاء الله انزله قبل رمضان:)

Lady E يقول...

بنجاواتى : في جمله مش مترابطه او فيها غلطه مطبعيه يا بنجا

وتفكرى فى حبيب القلب يا ستى وماله وتدعى لى

افكر في حبيب القلب وادعيله هو لكن افكر في حبيب القلب وادعيلك !!!!!!!!!!! بيتهيألي هي بدل لي هي له

الحق اللي هو المذاكرة والباطل اللي هو التليفزيون ؟

يمكن المذاكره حق لكن مش كل التلفزيون ولا كل المسلسلات باطل

اللهم امين

وربنا يبلغنا رمضان ان شاء الله

وبلاش نظام الناس الدحيحه ده مش لازم تقفل مدونتك في الامتحانات وربنا يوفقك ويتقبل منك

دمت بخير

Lady E يقول...

Blind Sniper : وانتا بخير يا سنيبر

اللهم امين

وجميل ان كلامي في البوست خلى رمضان يوحشك :)

نهارك سعيد
ونهاري بيضحك دي اول مرة اسمعها :) هو بيضحك علشان سمع نكته ولا ايه :))

Lady E يقول...

ديدي حبيبتي : تسلميلي يا قمرايا انتي اللي اجمل واحلى بنوته

اللهم امين

انا دايما بحب اتسحر متأخر حتى ايام المدرسه وفي سنه اولى كليه ببقى هصحى بدري ومع ذلك بحب اتسحر متأخر لأنها سنة تأخير السحور وتعجيل الفطار وكمان تأخير السحور بيخلي في بركه في الصيام والانسان ميحسش بالارهاق والجوع من اول اليوم وهو صايم

الله اكرم يا ديدي

دايما بفرح بتعليقاتك ووجودك في المدونة

دمتي بخير وسعادة دايما

بنجاواتى يقول...

سورى دى كانت غلطة مطبعية
انا قصدى طبعا تدعى له له له له

وهو انا مين علشان اجى ع البال ساعتها
ده حتى انا ابقى عزول وتكرهينى

وموضوع المسلسلات ده عند الناس حاجة نسبية
يعنى انا بشوف انه الوقت فى رمضان اثمن من انه يضيع قدام التليفزيون حتى لو كان اللى بيتقدم فيه حاجة عادية وبشوفها فى غير رمضان

مش قصدى باطل لان محتواه باطل ولكنه بيبقى باطل لما يشغلنا عن الاجتهاد فى رمضان

تحياتى يا ليدزى

youssuf يقول...

رمضان جانا ...

رمضان احلي شهر في السنة ... نستقبله بفرحة ...
و نودعه بدموع ...
و نقول كل سنة يارب السنة كلها تبقا رمضان ...
ذكريااااااااااااات كثير ...

رمضان بيغير طعم كل حاجة ...
بيغير جو البيت
بيغير جو الشارع
بيغير الناس ...
حتي كل صلاة في الجامع ليها طعم في رمضان لما تلاقي الجوامع مليانة عن اي شهر تاني طول السنة ...
ساعة المغربية تجري في الشارع انت و إللي حواليك عشان تلحقوا الفطار و تلاقي واحد متعرفوش جمبك بيديك نص التمراية إللي في ايده عشان اذان المغرب اذن ...

و الله بعودة يا رمضان ...

شموسة يقول...

كل سنه وأنتى طيبه
ويارب يكون رمضان سعيد عليكي
ورمضان السنه دى تحققي فيه كل اللي بتتمنيه .

Lady E يقول...

المعلم محمد صاحب المطعم : وعليكم السلام ورحمة الله وبركاته

هي مسلسلات بعقل ده هجوووم في 100 مسلسل هيتعرضوا في رمضان السنة دي ان شاء الله يعني لو قعدنا نتفرج عليهم كلهم ولا هنصلي ولا هنصوم

ربنا يبلغنا رمضان ان شاء الله

دمت بخير

Lady E يقول...

THE illusionist : ربنا يستجيب منك يارب

ومنضيعش رمضان الجاي ونستفيد منه ونحقق حاجات كتيره فيه ان شاء الله

ربنا يبلغنا رمضان ويعيننا على ذكره وشكره وحسن عبادته في الشهر الكريم

دمت بخير

Lady E يقول...

لا تـــشـــتــــاق : بغض النظر عن موضوع يا طفلتي

اللهم امين وبجد رمضان من اجمل واروع الشهور ويارب ربنا سبحانه وتعالى يوفقنا للخير فيه

ربنا يكرمك ودمت بخير

Lady E يقول...

أميرة علي كوكب مهجور : الحمد لله بخير طول ما انتي بخير يا قمرايا

فعلا رمضان فيه حاجات كتير اتغيرت دلوقتي عن زمان بس برضه كل زمن وليه جماله

اما بالنسبة للوقت ف عندك الحق الوقت بيجري بطريقه مش معقوله عامة

اما بالنسبة لرمضان فجأه هنلاقينا بنقول والله لسه بدري يا شهر الصيام

Lady E يقول...

أميرة علي كوكب مهجور : تم وبنجاح :)

فرحت جدا اني اتعرفت عليكي يا مرمر

Lady E يقول...

mohamed ghalia : اللهم امين

هستنى البوست

دمت بخير

Lady E يقول...

ماما أمولة : وحضرتك طيبة وبخير وصحة وسعادة

اللهم امين وحضرتك وكل المسلمين يارب

دمتي بخير وسعادة

Lady E يقول...

عاشقة الأحزان : وعليكم السلام ورحمة الله وبركاته

اللهم امين

تسلميلي يا حبيبتي ربنا يبارك فيكي ويكرمك ويسعدك دايما

Lady E يقول...

الشعب لابد له من حكومه تشكمه : وانتي طيبة وبخير وصحة وسعادة يا شيما

ربنا يبلغنا رمضان

وان شاء الله هرمضن عندي

Lady E يقول...

موناليزا : وانتي طيبة وبخير وفي احسن حال واحسن صحة يا حبيبتي

ربنا يبلغنا رمضان

وهنتظر البوست ان شاء الله

Lady E يقول...

بنجاواتي : هههههههههه كفايه له واحدة يا بنجا مش 4 انا مش الحاجه متولي

وبعدين طالما هو عالبال يبقى مستحيل حد غيره يجي عالبال ادعيلي بس يبقى حقيقة ان شاء الله زي ما انا حاسه انه حقيقه

وصلت الفكرة يا بنجا

هو بس الموضوع بيبقى ساعه وساعه ساعة عبادة وساعة تانيه ترفيه عن النفس يعني ممكن تشوف مسلسل وانتا بتتسحر مثلا مش شرط تشوفه مخصوص

ربنا يبلغنا رمضان وان شاء الله موفق في امتحاناتك من غير قفل المدونة

Lady E يقول...

youssif : ربنا يبلغنا رمضان يارب

الكلام مش ممكن يخلص عن رمضان

وما شاء الله اسلوبك في الكلام عن شهر رمضان احلى من البوست :)

دمت بخير

Lady E يقول...

شموسة : وكل سنة وانتي بخير وصحة وسعادة يا قمرايا

اللهم امين ولكي مثل دعائك ان شاء الله

دمتي بخير