الأربعاء، 2 يوليو 2008

يا عمي أنا جاي أطلب اني امرمط وابهدل بنتك

بسم الله الرحمن الرحيم
المفروض ان الجواز قائم على المودة والرحمة لكن في بعض أو أغلب أو اكتر الأحيان
العريس عايز يتجوز علشان حد يخدمه (شوفتو التفكييييير) أو علشان يخلف بس!!
مثلا سألت احد الأصدقاء : انتا عايز تتجوز ليه؟؟ فقاللي بكل ثقة : عايز واحده تخدمني (يا نهار مطين بطين ومليان عواصف رعديه شماليه جنوبيه ) بقى عايز تتجوز علشان واحده تخدمك طب متجيب شغالة بقى تشتغل عندك وخلاص بلاها جواز بقى !!!
للأسف ده رأي معظم الشباب متخيلين انهم هيتجوزوا سوبر وومن (super woman)
هتقدر تطبخ وتكنس وتمسح وتغسل وتنظف البيت وتروقه وتظبطه وكمان تظبط للمحروس جوزها حياته بالاضافه الى انها تربي العيال وتعلمهم وهو يغير من عياله ومن اهتمامها بيهم وقبل كل ده لازم تبقى قمر 114 ( نجمة بتلعلع في البيت) أحلى من كل الشيطانات (شيطانات الإغراء) اللي بيظهروا في الكليبات ويطيروا عقل المتفرجين ويجننوا المتفرجات وطبعا المحروس بسلامته مش عارف ان دول وراهم طقم تجميل كامل وبيأخدوا ساعات كتير في التوضيب والبي كب وكوي الشعر وتلوينه ده غير البوتوكس والواحده منهم بتبقى منفوخه زي البلونه بس نقول ايه ما هما مش بيشوفو غير الصورة الجميله والاغراء وخلاص مش بيعرفوا الست دي خدت وقت اد ايه ولا كام حد عملها تجميل ولا دفعت فلوس اد ايه ما هو الراجل بيحب مراته تبقى جميله من غير ما يدفع حاجه
ولو الزوجه عملت كل حاجه وتزينت للمحروس جوزها بكل المتاح برضه مبتعجبوش وبيبص بره . بجد اكتر من مرة في الشارع او في اي مكان عام أشوف زوج ماشي مع زوجته وبيبص لغيرها أو واحد بيكلم خطيبته في التليفون وبيبص وبيسبل عنيه لغيرها
مش بقول ان كل الرجالة كده بس الأغلبية للأسف كده يمكن 1% بس على مستوى الرجالة مش كده
وأول ال1% دول رسول الله صلى الله عليه وسلم كان خيرا لأهله وكان بيساعد زوجاته في اعمال البيت وكان صلى الله عليه وسلم بيمازح زوجاته وبيداعبهم وعرفهم فعلا معنى المودة والرحمة والحب ليه كل زوج أو خطيب ميبقاش كده ؟ليه الحنيه معناها غايبة اوقات كتير عند الرجل ؟
وفي الأخر فرقة المصريين قالوها حكمة (( متحسبوش يا بنات ان الجواز راحه ومتزعلوش يا بنات لو قولنا بصراحة ان الجواز عمره عمره ما كان راااااااحه))
شوفتو بقى يا بنوتات العزوبية برضه ليها مميزات راحه من تعب القلب ده كله ولو لفترة مؤقته بس انتو بصو للموضوع بنظرة طفلة مش عايزة تكبر.

هناك 9 تعليقات:

كـــيــــــــارا يقول...

طبعا انتي اتكلمتي في كذا نقطه في البوست طيب ماتيجي نفصص البوست كده

"عايز واحده تخدمني"

طيب هي مش بالمعني ده بس الحياه ادوار

طيب تيجي نعكسها هو هيقعد كده يتفرج ولا هيكون طالع عين اللي خلفوه في الشغل ومن ده لده عشان يجيب الفلوس اللي هيعشوا بيها

-----------

لازم تبقى قمر 114

مش شرط تكون ممثله بس مش يشوفها بكيييييييييييييييييزه

ههههههههههههههههه

---------
بيبص بره

مممممم السوال ليه بص برا يبقي في تقصير جوه انا مش بدافع لكن دول زوجين يبقي لازم نحل يبقي نشوف برا فيه ايه ونحاول بقدر المستطاع اننا نكون احلي من اللي برا

--------

نونا ليه اختارها اكيد لانها ملكه في نظره مش تخليص حق يعني

يبقي علي الاقل تكون ملكه في نظره طول عمره سواء بتصرفتها او في شكلها مش عوامل التعب والارهاق تتطلع مهما كانت هي انثي

----------

وفي الاخر في نوع تاني من الرجاله اصلا البيت بيكون اخر اهتمامه وده مش بيكون باني البيت ده بنفسه بيكون معتمد علي غيره

اللي باني البيت حته حته بجهده وتعبه مش هيتلحس عقله علي واحده فاضيه من جوه

فاهماني ياقمر

Lady E يقول...

نيموووو كنت مجهزة رد بس للأسف الكمبيوتر فصل مره واحده والرد ضاع هكتبه تاني ان شاء الله

بس بجد ردك دسم جدا وانا سعيدة جدا بوجودك وبالمناقشه الحلوة دي

شـمو نشـادر يقول...

اسلوبك دمه خفيف و لذيذ موت على فكره ..

بس الشباب مش كلهم كده يعنى .. فى برده ناس ولاد حلال ..

يا رب يرزقك بواحد منهم ..

تحياتى ليكي ..

أسامة أمين

Mero.. يقول...

سبحان الله..
في اول زيارة الاقي هجوم حاد على الرجالة ؟؟ ليه كدا :)
بجد معكي حق..لكن الشباب الحمد لله فكرهم بدأ يتغير وبدأوا ينسوا سي السيد..وفي شباب كتير بيهمه ان يكرم مراته قبل اي حاجة..وكتير مش ناويين على جواز اصلا..
بس للاسف الغالبية العظمى زي ما قلتي
تحياتي

funckydoctor يقول...

للأسف عندك حق معظم الشباب كده
ربنا يهديهم

Lady E يقول...

(("عايز واحده تخدمني"))

طب ما هي ممكن اوي تكون بتشتغل وطالع عنتينها برضه غير كمان شغل البيت وتربية العيال والباشا مبيساعدهاش في شرع مين ده يعني؟؟ في شرع الاسلام ان المفروض الزوجة يكون عندها خادم/ة وهي مش بتشتغل جوه البيت بس ,اومال لو كانت بتشتغل جوه و بره البيت بقى المفروض كام حد يخدمها وده طبعا مش كلامي ده كلام الشيخ أحمد الكبيسي وفي كمان مواقف كتير من السيرة النبوية العطرة بتأكد الكلام ده ولو الزوج مش قادر يجيب خادمه لزوجته يبقى يخلي عنده دم وميرهقهاش ويساعدها ومينتقضش كل حاجه بتعملها

-----------

((لازم تبقى قمر 114 ))

للأسف هو مش بيشوفها بكيزة لأن بكيزة امورة وراقية هو بيشوفها زغلول مفيهاش اي أنوثة - مع اني شايفة زغلول رقيقة جدا وعسولة-

---------
((بيبص بره))

يعني يا نيمو الزوجة البسيطة هتقدر توصل لمستوى المغنيات والرقاصات ازاي وهي مشغولة وطالع عنتينها في شغل البيت ومفيش عندها اي امكانيات ولا احدث بي كب نزل في السوق ولا اغلى اكسسوارات ولا احدث التصاميم من ارقى بيوت الأزياء في العالم ولو قولنا الجمال في البساطه مبتعجبش المحروس جوزها _ طبعا مش كل الازواج كده زي مقولت_

--------

((نونا ليه اختارها اكيد لانها ملكه في نظره مش تخليص حق يعني))

مش شرط كتير بيكون هدف الرجل انه يتجوز فيقول لمامته يا ماما اخطبيلي ويخطب ويتجوز ولا اختارها عن حب ولا اي حاجه غير انه كان عايز يتجوز واتجوز ولما يحتاج يحب هيحب بره البيت
وحتى اللي بيختارها عن حب ممكن جدا شكلها يتغير بعد الجواز وبيبدأ الحب يقل يقل ويختفي اما اللي بتتكلمي عنهم هما 1% بس
----------
((اللي باني البيت حته حته بجهده وتعبه مش هيتلحس عقله علي واحده فاضيه من جوه ))

برضه مش شرط لأن معظم الأزواج بيتجوزوا مره تانيه - مش هنقول بصبصه بقى-بعد ما تكون الزوجة تعبت معاه واستحملت وضحت بحاجات كتير ويجي بسلامته يزهق ويحب يجدد شبابه بحب جديد ويتجوز ويقتل مشاعر مراته

نورتي البلوج يا نيمو وبجد بستنى ردودك الجميله دايما

Lady E يقول...

شمو نشادر :متشكرة جدا على كلامك وزوقك يا أسامة

وأكيد طبعا مش كل الشباب كده وانا كتبت في البوست ان في استثناء 1%

وموضوع ربنا يرزقني بواحد منهم أمين يا رب بس اعتقد ان الشباب أو الرجال عموما اللي هما عكس اللي اتكلمت عنهم بقوا في الخيال بس ولو لقيت حد موجود منهم يبقى يتعدوا عالصوابع لانهم بقوا حاجه نادرة جدا

شكرا لمرورك

Lady E يقول...

mero:هو مش هجوم على الرجاله هو للأسف ده سلوك موجود وواقعي جدا وظاهرة سلبيه جدا جدا في مجتمعنا
ويا رب يكون فكر الشباب بدأ يتغير كده يبقى في أمل في الجيل اللي بعد بعد بعد جيلنا ان شاء الله يبدأ الزوج يعرف ازاي يعامل زوجته

شكرا لمرورك يا mero

Lady E يقول...

funckydoctor : شهد شاهد من أهلها ان معظم الشباب كده
ربنا يهدينا ويهديهم يا دكتر
وان شاء الله ربنا يوفقك في امتحان الباطنة

شكرا لمرورك