دموع مختنقة

ترى هل هذا قدرها

هل قدرها ان تبقى وحيدة في بحر الحياة الثائر

تحاول العوم في امواج تأبى أن تتركها تعيش

تنظر يمينا ويسارا فلا تجد الا البحر الغاضب

تستلم للغرق في يأسها تارة وتحاول النجاة تارة أخرى

ولكنها بين تلك المحاولة والأخرى تشعر بالوحدة

هل كتب الله عليها ان تظل وحيدة لا يشعر بها احد

فهي تبكي وحدها وتتألم وحدها وتصرخ من اعماق قلبها وحدها

وحتى في لحظات الفرح القليلة تفرح وحدها

يتملك منها شعور غريب ان هناك من يحبها ويفكر في اسعادها

ولكن حتى هذا الأمل بدأ يخبو في قلبها

وبدأ يختنق بصيص النور في جو الحياة المظلمة

فقط تتمنى لو ان كل ذلك كابوس رمادي

ولكنها ابدا لم تستيقظ منه !!

----------------------------

انا متشكرة جدا جدا لاخواتي المدونين الرائعين
البحث عن انا شيء جنوني و مستر هاني زينهم

بجد مش قادرة اوصف شعوري لما قرأت التعليقات بتاعتكم خففت عني جدا
ربنا يكرمكم ويرضى عليكم

واحب اشكر كمان اختي الجميلة كيارا لأنها اتصلت بيا الصبح بدري اول لما قرأت البوست وكان باين على صوتها انها قلقانة جدا عليا
وكمان كلمتني ع الايميل واول مرة احس بمعنى دموع الفرح
الحمد لله ان في انسانة جميلة كده في حياتي

-------------------------
ملحوظة صغنونة : ممكن اكون حاسة فعلا كلام البوست جدا حاليا ولما كنت بكتبه بس انا كاتباه بصيغة اني بتكلم على حد مش موجود
فبجد متقلقوش عليا وانا متشكرة جدا لكل الكلام الجميل اللي أثر فيا بجد وحسيت اني مش لوحدي

زوجة واحدة تكفي غصب عنك

بقلب في قنوات التلفزيون بزهق و فأجه لقيت واحدة اسمها داكتورة فوزية

كتير مش بيحبوا يشوفوها فقلت اما اشوف ليه مش بيحبوا يتابعوها

وفعلا تابعت شوية من احدى الحلقات بتاعتها

البرنامج اللي بتقدمه زي برنامج اسامة منير عن المشاكل العاطفية

اسلوبها استفزني جدا بتتكلم عنجليزي في شوية من كلامها قولت ما علينا

ما الناس كلها دلوقتي بقو خريجين مدارس وجامعات لغات اشمعنى هي يعني

المهم زوجة اتصلت بيها علشان جوزها نفسه يجرب يبقى عنده زوجة تانيه

اصل دماغه فاضية وعنده فلوس كتير وبعدين اللي عايز يتجوزها مغربيه

ما هو دلوقتي في فيضان بنات مغربيات والطلب عليهم كزوجات زايد في مصر والامارات تحديدا

وفي معظم البلاد العربية علشانهم ستات بيت شاطرين وكمان علشانهم نغشين وحلوين

الداكتورة فوزية ردت و قالت للزوجة ارفضي واوعي تقبلي وده طبيعي انها تقول كده

لكن اللي مش طبيعي ان في وسط كلامها قالت للزوجة شوفي حقيقة علمية ان الرجل بيحب يعيش في دور هارون الرشيد وفلانتينو و و و الخ وبيحب انه يكون مع اكثر من امرأه لحد هنا وانا اتفقعت مرارتي

والله ؟؟؟؟؟؟!!!!!! بجد الراجل العيون الزايغة اصيلة فيه وكمان حقيقة علمية

يعني الواحدة من بنات حواء تخلص وتحب وتهتم بجوزها حبيبها وترتب وتبني حياتها على حياته وتبقى عايشه علشانه

وفي الاخر يقولها شكرا انا عيني زايغة او هتجوز عليكي ومش فارقة كتير ما هو في الحالتين خيانة

وبعدين لو الموضوع كده ودي سيكولوجية الرجل

محدش فكر ليه ربنا سبحانه وتعالى خلق حواء واحدة بس لسيدنا ادم ومخلقلوش 4

ويبقى كده ايه فايدة الحب بقى بدام اخرته خيانة وعذاب

انا متخيلة الاحساس ده ومجرد ما تخيلته عذبني اومال لو في واحدة في الوضع ده تعمل ايه

يا رجال العالم اتقوا الله في القوارير لأنهم ممكن ينكسروا في اي لحظة

ولو هو ده الحب فبلاش منه احسن

ولو هو ده الحب ف أنا مش عايزاه

تاج البرينسس ليدي الأول

بما اني عندي ارق من فترة طويلة وبقى مستحيل اعرف انام بالليل وبدام انا قاعدة مخنوقة ومش عارفة اذاكر وشوية وهعيط قولت اعمل ايه احل واجب من الواجبين المتأخرين عليا بقالهم فترة لدرجة اني لخبطت مين بعتلي تاج ايه بس فاكرة ان اول بنوتة دبستني في التاج هي كيارا حبيتبتي مع انها عارفة و متأكده اني بحتاس في موضوع الاسئلة ده بس ما علينا وتاني بنوتة اهدتهولي هي منوش الجميلة صاحبة مدونة ساعات ساعات وكان نفسها حد يجاوب التاج انتي تامري بس يا منوش مقدرش ارفضلك طلب يا قمرايا

بسم الله أبدأ

بدأت تدون من امتي ؟ و دخلت العالم ده ازاي ؟

بدأت ادون في المفكرة بتاعتي من فترة طويلة جدا تمتد بإمتداد سنين عمري
وكنت بقرأ كتير من التدوينات بتاعتي في الاذاعة المدرسية ودايما كنت باخد شهادات تقدير لتميزي في الاذاعة وكمان كنت بشارك في مسابقات في الكتابة بين المدارس ده غير اني كنت بحب اسلوبي في كتابة مواضيع التعبير وبتأثر أوي وبعيط لو نقصت نص درجة في التعبير (بس مش عارفة الاسلوب الحلو ده راح فين)
وبدأت التدوين عالنت في منتدى دراسي وانا في ثانوية عامية وكانت المواضيع اللي بكتبها في منهجنا الدراسي
وبعديها عرفت منتدى جميل جدا بدأت تدوين فيه من 3 سنين وبعدين شوفت مدونة عضو من اعضاء المنتدى وبدأت ادور وابحث يعني ايه بلوج وكنت مترددة اني ادخل عالم التدوين واخدت فترة كبيرة جدا في اتخاذ القرار وبدأت تدوين فعلا الصيف اللي فات

ايه كان انطباعك في البداية ؟
كنت سعيدة ان في حاجة ملكي بتعبر عني وأأقدر اتكلم فيها بحرية وقلقانة ومترقبة ردود الأفعال وخصوصا انه كان عالم جديد عليا وكانت كيارا حبيبتي بتشجعني كل بوست وبتعلق وبتقوللي رأيها
وطبعا كنت مضايقة ان لسه مفيش حد عرف البلوج بس كنت بقول هيعلقوا ازاي وهما مش عارفين البلوج اصلا وبعدين جت فترة وزهقت وكنت هقفل المدونة بس تراجعت عن قراري لما المدونة بدأت تتعرف
ولسه بيجي في بالي قرار حذف المدونة بين كل فترة والتانية بس مش قادرة احذفها وانسى المدونين الرائعين اللي بالنسبالي اكتر من اخواتي

يمن اكتر واحد بتهتم بتعليقه علي بوستك الجديد ؟
مش هتكلم بدبلوماسية
في مدونين بجد بتجنن ومودي بيبقى وحش لو مشافوش البوستات اللي بكتبها وقالوا رأيهم وهما كيار وكيكي وRANONواميرة انا و دماغي , منوش ساعات ساعات , ايمي e_emy
دكتر عمرو بلو ويف
appy ,Magnolia
وباقي المدونين او غير المدونين اللي بيحبوا يتابعوا مدونتي واكيد كمان التعليقات الجديدة بكون متشوقة جدا اني اشوفها وبفرح بيها بس انا ذكرت المدونين دول لأني ارتبطت بتعليقاتهم لما مش بيردوا بحس ان في حاجة ناقصاني
&&&&&&&&&&&&&&&&&&&

ايه أهم حاجة اتعلمتها من عالم التدوين ؟

اتعلمت اني اكون انا اعبر عن رأيي اكتر واتفاعل مع العالم الخارجي اكتر بدل الوحدة اللي بحب اكون فيها كتير مع نفسي

ايه أكتر حاجة كرهتها ؟

ياااااه كرهت حاجات كتير جدا منها المدونات اللي بتسب الله جل جلالة وللأسف المسلمين مش عارفين يعملوا حاجة وكمان كرهت ان مفيش بلوك عالمدونة ااقدر من خلاله امنع اي حد مش لطيف من دخول مدونتي

حاسس ان التدوين له تأثير ؟

أكيد ليه تأثير ده بيقولوا على التدوين صحافة المستقبل ده غير تأثيره عليا شخصيا
لما بيكون مودي وحش او مضايقة او محتارة في حاجة بلاقي ناس بحبها معايا
اه ونسيت اقول بالنسبة للتدوين في حد كلمني عالايميل من كام يوم بيقول انه معد برامج وعايزيني ابقى من ضمن الضيوف بإنهم هيتصلوا بيا عالتليفون علشان اشارك برأيي في موضوع عن الشباب بيتجوز ليه
لأني كاتبة بوست عن الجواز ومش عارفة ليه مش مستريحة للموضوع ده مع ان الشخص اللي كلمني انسان اسلوب كلامه محترم جدا هي القناة اسمها قناة( أنا) لسه جديد ة التردد بتاعها 11555 عمودي انا دورت وملقيتهاش
لو اي حد يعرف عنها معلومات يقوللي

&&&&&&&&&&&&&&&&&

تهدى التاج لمين ؟

بأهديه لكل حد بيحب مدونتي ومتابعها يعني اي حد هجاوبه هعرف انه بيحب مدونتي
ولو عايزين اسماء ههدية

للبنوتة مانجوليا لو مكنتش حلته قبل كده
وبهديه لكيكي
وبهدية لأميرة ( أنا ودماغي)
ولدكتر شهاب صاحب مدونة ابلة نظيرة
ولمستر هاني زينهم لو مكانش حل التاج

كلام كتير

كنت دايما لما بغيب عن جدتي ا لله يرحمها كنت بقولها (البعيد عن العين بعيد عن القلب يا ماما ستو) وكانت بتقوللي (يا حبيبتي بتغيبوا حبة بتزيدوا محبة ) والمعنى ده حسيت بيه لما رجعت مصر كل صبحاتي استقبلوني بحفاوة كبيرة جدا وبحب بجد لسه مش مصدقة ان في حد بيحبني حتى لما ببعد وبسافر ويعتبر ببقى في عالم النسيان بس مش عارفة ليه حاسة انكم نسيتوني وبفكر كتير يا ترى لسه فاكرينني ولا نسيتوني في مدونين كتير قريبين لقلبي انا متأكده انهم منسيونيش لأني منسيتهمش ولأن مستحيل ابقى دايما فكراكم وانتوا تنسوني حتى لو بعدت شهرين مش اسبوعين طبعا احداث اسبوعين كتير جدا اني اقولها كلها في بوست واحد بس هقول شوية حاجات اولا : اتأخرت في السفر اسبوع كامل علشان اتأخرنا 5 دقائق بحالهم على الطيارة فمرضيوش يطلعونا ع الرحلة احنا وناس كتير ومنهم كان دكتور في الجامعة بريطاني ما شاء الله شاب زي القمر من جامعة كامبريدج وكان بيكلم المضيفة المسؤلة عن رحلته ومكنش في اي اماكن في الرحلات الايام التانيه الا waiting list يعني قايمة الانتظار يعني اللي ع القايمة دي بيروحوا المطار كل رحلة ويشوفو لو في حد اتاخر او مجاش بيطلعوا الرحلة مكانه وللأسف قضينا يومين بنروح المطار ومفيش اي اماكن عالطيارة وطبعا وقتها كنت عصبية جدا ودمي محروق لاني بكره الانتظار ومكنتش عارفة ايه اللي حصل في الكلية وكمان كان عندي استبحس زي اللي بيجيلي ايام الامتحانات ومكنتش بنام ده غير ارهاق التحضير للسفر ثانيا : أخيرا لقينا معاد تاني للسفر وطبعا بعد اسبوع من المعاد اللي كان مفروض نسافر فيه وقررنا مش هنروح تاني المطار الا يوم السفر وهننسى موضوع الويتنج ليست ده خالص الغريب بقى اني قبل ما كنت بروح المطار ولما كنت برجع من المطار كنت بفتح التلفزيون وبلاقي اغاني كلها اللي كاتبها الكاتب الجميل أيمن بهجت قمر واللي ناويه اكتب بوست عن اغانيه السهلة الممتنعة
الغريب اكتر اني لما طلعت الطيارة شغلوا فيلم في محطة مصر وبرضه لمحت اسم أيمن بهجت قمر في تتر الفيلم
على فكرة فيلم في محطة مصر بجد رائع ثالثا : اخيرا طلعنا الطيارة وكان في كمية هنود مش معقولة وعلى فكرة الهنود مش بس كانوا على الرحلة الاخيرة لأ الهنود بيجو مصر بأعداد مهولة من سنتين او اكتر وطبعا بيشتغلوا في مصر لا وايه الفرد الواحد جايب كل عيلته معاه طبعا دمي اتحرق ان كل دول جايين يشتغلوا في مصر واحنا المصريين مش لاقيين شغل رابعا : مش عارفة ليه لما وصلنا البسبوسة والمقهورة ام عز حسيت اني بحلم وهصحى الاقي اني لسه مسافرتش وفضلت حاسة كده وخصوصا اني رجعت لقيت شركة فودافون المحترمة شفطوا 3/4 رصيدي مع اني كنت اشتريت صلاحية بس مش عارفة ليه يعني يخلصوا الرصيد وفضلت مستئكبة لغاية لما وصلنا البيت واتصلت بيا زميلتي بالصدفة تسأل عليا وبجد حسيت اني في بيتي وفي بلدي فعلا بس برضه فضل الاحساس بالغربة معايا خامسا : تاني يوم رحت الكورس وزميلاتي استقبلوني استقبال جميل جدا وخصوصا بنت زميلتي البيبي القمر ميرنا ما شاء الله عليها طفلة رائعة الجمال وخفة الدم حسيت انها عروسة لعبة عنتينها لونهم رصاصي في اخضر مع ازرق يعني لوحة فنية وكمان تختوخة كانت بتعييط مع كل البنوتات الا معايا وكانت بتلعب معايا وبتضحكلي وبتستخبى ورى الكرسي وقولتلها مليش دعوة هاخدك معايا ضحكتلي وقالتلي اه مامتها قالتلي شوفتي بقى عايزاكي تاخديها خديها او جيبلها عريس وخلصيني
بجد ضحكة البنوتة دي رجعتلي توازني النفساوي سادسا : اطفال العيلة كلهم كبروا اومال لو كنت غيبت سنة بقى كان ايه اللي حصل مريومة حبيبتي بقت بتمشي ومشيتها شبه مشيت البطوطة وبقينا نعمل سباق في الجري انا وهي وبتحب تخوفني زي كيكي وضحكتها ما شاء الله جميلة جدا وبريئة جدا عمورة حبيبي راح الحضانة وبقى عنده مسؤليات كل لما اكلمه يقوللي انا رايح اعمل الواجب عندي حضانة بكرة والميس هتزعقلي قلت بقى عمورة هيبقى اشطر مني بصراحة شجعني اني اخلص اول شيت طلبوه مننا في الكلية وده في حد ذاته انجاز يسوفة : مش مصدقة انه دخل الحضانة لغاية دلوقتي بصراحة قمر في يونيفورم الحضانة سابعا : كان اول يوم كلية ليا النهاردة واول محاضرة اخدتها كانت عن كتابة المقال نظرا لأن راحت عليا نومة ومحضرتش المحاضرتين اللي قبل محاضرة المقال المحاضرة كانت روعة كان كلها ضوحك وخصوصا ان الدكتر قال لنا في بداية المحاضرة نكتب 3 براجرافات عن العولمة اللي احنا مكناش فاهمين اوي معناها ومازلنا مش فاهمين معناها بالعربي يبقى هنكتب عنها بالانجليزي ازاي ثامنا : كفاية كد ه بقى ايه الرغي ده كله مش عايزة ابقى شوريرة

سلام

عيد كميل

كل سنة وانتم طيبين ومعيدين
ومن الكحك والبيتي فور مش محرومين
ومودكم حلو ومش متضايقين ولا زعلانين

أهلا أهلا بالعيد مرحب مرحب بالعيد هيه هيه هيييييييييييه

حاولوا تتخيلوا أغنية يا ليلة العيد لأم كلثوم لأني حطاها ع البلوج وهي مش راضية تشتغل عاااا
بجد أنا سعيدة جدا جدا بكل المدونين الرائعين اللي سبقوني وعيدوا عليا بجد انا متشكرة جدا وربنا ميحرمنيش منكم
ومعلش اعذروني على قلة الرد على التعليقات الرائعة دي كلها بس انا متابعاها وبقرأها كلها وهرد عليها ان شاء الله

اسمحولي اريحكم مني شوية بقى الجماهير تناديني من فترة : (عودي يا هاميس , عودي لأتون , عودي لأخيتاتون , عودي لوادي النيل ) وأديني بسمع الكلام زي الشطورة وأن الأوان اني ارجع لبلدي البسبوسة علشان الكلية اللي بتطلعلي لسانها وبتقوللي هتيجي هتيجي
و كمان علشان حب الجماهير اللي كل شوية يقولولي هتنزلي مصر امتى (كيكي , كيارا , مستر هاني زينهم , ده غير اصدقائي , وزميلاتي في الكلية)

ياريت أي حد ضايقته يسامحني لأن الله أعلم هنتقابل تاني ولا لأ

انا متابعة كل التعليقات عالبوست ده واللي فات وبشكركم كلكم وبجد هتوحشوني انا هتابع الردود وبدخل النت من الموبايل بس صعب او يكاد يكون مستحيل اني ارد على التعليقات اذا كان بدخل بس عالبلوج وبلاقي مسج بكرهها جيالي (لقد نفذ رصيدكم برجاء اعادة شحن البطاقة )

لا اله الا الله

استودعكم الله الذي لا تضيع ودائعه

ايطاليانو

صفحة من مذكراتي كنت كاتباها في بدايات المدونة وقلت انشرها عالمدونة دلوقتي علشان المود mood الرمادي اللي مش لطشيف اللي انا فيه فمش عايزة اكتب حاجة فيها استئكاب اغير بقى وربنا يكرمني واطلع من المود ده لأنه طول قوي وانا زهقت منه
--------------------------------
هو في ايه
لا بجد بجد في ايه
البلوج بتاعي بيزوروه الايطاليين يا جودعاااااان بغض النظر عن اي جنسيات تانيه بيزوروا المدونة
ويمشوا وميسيبوش اي انطباع لكن اخواننا الايطاليين موصريين جدا جدا اني ازور المدونات بتاعتهم ( وفي مدونات ايطالية جميلة جدا طبعا عرفت ده من ترجمة المدونات دي)
ولو حصل وتجاهلت تعليق ليهم في التشات بوكس بيكتبوه تاني مفيش اي مشكله وبالايطالي والانجليزي علشان ميكونش عندي حجة
على اساس ان الجامعات المصرية الموقرة بتعلم كويس علشان ابقى ضليعة في اللغة الانجليزية يعني
طب هما عرفوا منين اني بعشق اللغة الايطالية وكان نفسي اتعلمها في الكلية كلغة تانيه بدل الفرنساوي اللي
مزهقني في حياتي علشان الداكتور بتاع المادة متعلم بطيخي مش فرنساوي (داكتور حامض ربنا ينتقم منه)
الايطالية لغة لذيذه فيها عبق التاريخ والبيتزا والمكروووووونة واللزانيا اللي بموت فيهم
بجد مش بهزر لغة قوية يا سلااااام لما تلاقي حد بيقول جررررااااااتسي سينيوري
ولا يمكن كانوا حاضرين معانا محاضرة تاريخ اوروبا في اولى ( كل لية وانتا تتخن) يوووووه اقصد كلية
في المحاضرة دي كل الموجودين معلوماتهم كانت فظيعة عن ايطاليا لدرجة ان زميلة لينا كانت في البنش اللي ورايا
وقالت مش ايطاليا دي بتاعت برج بيتزا المائل طبعا انا فطست من الضحك وقلتلها لأ ايطاليا دي بتاعت
برج مكرونة اللي اتصلح حاله ومبقاش مايل وكمان الداكتور جاب الخريطه وقالنا ها مين هيطلع ايطاليا من الخريطة
على فكرة هي على شكل حاجه مشهورة
انا افتكرت انها على شكل شوز بكعب عالي فقلت لزميلاتي اللي معايا في البنش
فزميلة لينا سمعت كلامنا وقلت للدكتر يا داكتور عارفاها ايطاليا دي على شكل كوتشي في الخريطه (معلش سمعت غلط او بتضيف معلومات من عنديها )
انا خلاص كنت في المحاضره نفسي اقوم اصرخ واقول يا ناس يا هووووو ايطاليا دي فيها كذا وكذا وكذا وهي اصل الحضارة الاوربية
بس مين وانتا اذ ناديت اسمعت حيا
ولكن لا حياة لمن تنادي

حلم من أجمل أحلامي

بيت جميل جدا عالبحر وفيه جنينة كبيرة فيها كل الورود اللي بحبها (ورود بمبي وأبيض وأحمر وفل
وياسمين ولافندر وأشجار كتير فيها كل الفواكه اللي بحبها وعارفاها واللي مش عارفاها)
وانا هناك مع حبيبي (المجهول حاليا) وكل اللي بحبهم , وكمان فيه بيسين (حمام سباحة ) لما تعوم فيه تلاقي السمك بألوانه الزاهية الجميلة حواليك وكمان لو غطست بتتنفس عادي جدا ومش ممكن تتعب

والجو المحيط بالبيت انا اللي بختاره سواء كان مطر او شمس خفيفة

وبمجرد ما بفكر في حاجة بلاقيها قدامي (وده الحمد لله ساعات بيحصل معايا في الدنيا وحتى لو نسيت الحاجة اللي اتمنيتها الحمد لله بلاقيها اتحققت ولو بعد فترة كبيرة)

الحياة هناك جميلة واكثر من رائعة وجيراني ناس حبوبين جدا وطيبين وانا بحبهم وهما بيحبوني وكلنا فرحانين مفيش حزن ابدا والبيت كإنه لؤلؤة أو دهب والعطور والنور ظاهرين فيه

بس للأسف مش قادرة اروح للبيت ده وللحياة الجميلة دي لأني مش بعمل ليها وبتمناها كتير وبفكر فيها ويمكن هي من اقوى الأسباب لأستمراري في حياتي علشان حاسة ان ربنا سبحانة وتعالى مش هيخذلني و في يوم من الأيام هروح للحياة الجميلة دي

يا ترى خمنتوا انا بتكلم على ايه ؟؟؟
انا بتكلم على بيتي اللي بتمناه في الجنة واللي بحاول اعمل ليه بس مش عارفة
كل ما اقول اتقدمت خطوة برجع 100 خطوة وحاسة ان الخير قليل اوي واللي بيساعدوا على الخير قليلين جدا جدا جدا لكن الشر كتير واللي بيساعدوا عليه في كل مكان وكمان بيزينوه وبيخلوه بشكل حلو مع انه في الحقيقة كل الشر هلاك

يا رب انتا وحدك عارف ان حياتي مبقاش ليها اي طعم وحاسة انها ايام وبقضيها وفي شباب وبنات كتيرحاسين نفس الاحساس لكن دي ارداتك ومشيئتك وحكمتك وعدلك يا اعدل العادلين وانا راضية بقضائك
يا رب كل كلامي عن بيتي اللي بتمناه في جنتك ميجيش ذرة من بيوت الجنة ونعيمها ويا رب انتا القادر على اجابة دعائي يا ملك الملوك واغنى الاغنياء اللهم تقبل مني واستجب يا ارحم الراحمين
يا رب انتا عارف اني مش ممكن استحمل ذرة من عذاب النار اللهم انك كريم عفو تحب العفو فأعفو عنا
يا رب يا أرحم الراحمين وأكرم الأكرمين ارضى عنا ويسر حياتنا
يا ربي يا عظيم يا حليم يا من له الاسم الاعظم والاسماء الحسنى انا متأكده اننا هندخل الجنة برحمتك مش بعملنا
ولكن يسر لنا طاعتك وحببنا فيها لترضى عنا وتباهي بنا الملائكة
يا رب قلت انا عند ظن عبدي بي وانا ظني بيك انك رحمان ورحيم وكريم وبتحبنا وانعمت علينا نعم كتير منها الاسلام فأتمم نعمك علينا وارضى عنا واعتقنا من النار

اللهم اجعل كلامي خالصا لوجهك الكريم

(يا جماعة انا كنت كاتبة البوست ده في الاجندة بتاعتي ومكنتش ناوية اكتبه على المدونة علشان خايفة ان الموضوع يدخل فيه رياء مثلا وخايفة ان الردود تضيع ثواب دعائي بس كتبته لغرض واحد بس علشان اللي بيفكر في احلامه في الدنيا بس ومقضيها ويائس ومخنوق
حياتنا التانية برضه تستحق الأحلام والرجاء من الله سبحانه وتعالى
وعلى فكرة فكرة البوست اخدتها من احد برامج الداعية عمرو خالد هو قال الفكرة دي وانا نفذتها بس لسه مش قادرة اطبقها صح)

نظرات فتاة في العشرين

تشعر بالتعجب كلما نظرت الى نفسها في المرايا

تتعجب من هذه التي تراها انها فتاة انطبعت على ملامحها معالم الزمن وليتها كانت ملامح السعادة ولكنها ملامح الأحزان ...

في كل مكان تذهب اليه تنظر الى وجهها في المرايا والى ملامحها لعلها تجد تلك الطفلة الضائعة منها والتي يريد الجميع ان يقتلها بداخلها

وفي المساء حينما تختلي بنفسها وتغلق باب حجرتها الكبير عليها تتأمل أيام حياتها وتفكر في المستقبل وتعود لها الذكريات

كم تشعر بوحدة كبيرة وخوف من الحياة والناس والأيام والمستقبل فالخوف يملأها من كل شيء ...

تذهب بشغف الى المرايا وتقف امامها فتأتي فكرة الى خيالها

تذهب الى ملابسها فتختار ثوبا بلون امواج البحر وصفاء السماء فلطالما عشقت هذا اللون منذ طفولتها

وعندما ترتدي الثوب تشعر براحة كبيرة ثم تختار ’حلي تعشقها لكي ترتديها فهناك الخاتم ذو الثلاث وردات الصغيرة وايضا هناك اقراطها ذات القلوب الصغيرة اللامعة وتنظر الى نفسها في المرايا وقد عادت اليها الطمأنينة فتعثر على طفلتها اخيرا لأنها تنتمي الى عالم الصغار وليس لعالم الفتيات المزيف

معاد الكلية قرب

في البداية احب اقولكو وحشتوووووووني جدا جدا جدا جدا من هنا لبعد بكرة
وان ’بعدي عن البلوج مش سببه الوحيد رمضان لأن اكيد انا اكتر حد مقصر في العبادات في رمضان لكن في اسباب تانيه كتير ومنها ان الكمبيوتر شارب كابتشينو كتير جدا ومخرف اخر تخريف
*******************************************************
ندخل بقى في الموضوع
أنا كنت حاسة ان السنة اللي فاتت هي سنة الليسانس مع اني كنت لسه في سنة تانيه
لأن بجد كانت سنة دراسية خنيقة وكنت بحلم انها تبقى اخر سنة في الكلية ولكن مش كل الاحلام بتتحقق لسه شهر بالظبط ان شاء الله وارجع الكلية تاني
طبعا انا نفسويا مضايقة جدا اني هرجع الكلية تاني واشوف الكائنات الحية اللي فيها
ولو سألتك انتا كلية مصرية تقوللي اييييييه ؟؟؟
قوللي : يبقى هتطلعوا من الكلية زي ما دخلتوها مش فاهمين حاجة في تخصصكم ودراستكم والكائنات الحية الكابيرة بتتحكم فيكم وبتجيب لكم كتب غالية اوراقها صفرا ونص كلامها ممسوح وبتقرأوها بمكبر
وقابلوني لو عرفتو تذاكروا م الكتاب اللي بينزل قبل الامتحان بأسبوع او اتنين
وكمان علشان توهبوا حياتكم للعلم تستنوا المحاضرة ساعتين تلاته اربعه عاااااادي جدا ما انتو فاضيين
والتقديرات عييييييب لما تسألوا عليها
التقديرات محجوزة لأولاد الدكاترة وناس تانيه ملكوش دعوة بيهم (بلاش الحقد ده)
اما عن الكلية فلما تسأل عن المكتبة يبصوا لك بنظرة الرعب ويقولولك انتا بتتكلم في ايه القراءة دي رفاهية
احمدوا ربنا ان في مدرج (واللي بيقول الكلام ده الدفعة اللي قابلنا واللي بيقولوا ان مكنش عندهم مدرج )
طب بلاش المكتبة خليها معمل الصوتيات واللغات يردوا عليا : معمل ايه هو انتي فاكرة نفسك في طب ولا زراعة ولا علوم (مع ان اي كلية في الدنيا بتدرس لغات لازم يكون فيها اوضة للصوتيات واللغات بلاش معمل اللي بتزعل الناس مننا دي)
للأسف مش شايفة اي ميزة في الكلية بتاعتي غير شهادة الليسانس اللي هتشهد بإني ضيعت 4 سنين من عمري في تعليم يقال انه جامعي بس ملوش لازمة ولازم لما احب اشتغل اكمل دراستي كورسات في الجامعة الامريكية او في القنصلية البريطانية
كان انطباعي عن الكلية صح من اول مرة شوفتها قلت لزميلاتي واحنا في سنة اولى
(الكلية دي جابو الطلبة الاول فيها على ما ربنا يفرجها ويجهزوها ويبنوها )
وكمان العميد طمننا ان الكلية هتتجهز وتكون مية مية بعد 10 او 15 سنة ع الاقل ان شاء الله
واللي هيستنفع بيها اولادنا يعني الموضوع مش بعيد عننا يعني بلاش نكون جاحدين ومنفسنين !!!!!!!!!
ربنا يصبرني عليكي يا كلية ويعدي السنتين اللي باقيين لي فيكي على خير