إنقذنا من التوهه وإملأ قلوبنا فرح

مرايتي يا مرايتي راح احكيلك حكايتي قوليلي أنا ليه شعري منو أشقر خصري منو أصغر وتمي منو أكبر يا مرايتي

دي أغنية رشا رزق من فيلم سكر بنات وأسئلة تانيه كتير ملهاش إجابه يعني مثلا ليه فلانه عيونها شبه لون المحيط والسما الصافيه ليه الأجانب ملامحهم أحلى مننا ليه حتى الحيوانات عندهم أحلى ! كإنهم قاعدين في كرة أرضية غير اللي إحنا فيها

في حاجات كتير في حياتنا بنبقى مسيرين  فيها مش مخيرين برغم وهم الإرادة الحرة : مشينـــاهَا خطًى كُتبتْ علينَــــا ،،، ومن كُتبتْ عليه خطًى مَشاهَا .. مش بس كأفراد لكن كشعوب كمان .

دايما كنت بطلب من ربنا ان ميغيرش عليا نعمة ولو هتتغير يبقى تتغير من وقت ما استخير ربنا فيها من البداية خالص قبل ما اتعود عليها متاخدش من روحي كتير ومع ذلك لسه دعوتي وطلبي دول مش مقبولين من ربنا .. دايما بعد كل وجع أو كسرة قلب أو حزن كنت بتوقع إنه زي الأفلام كده أكيد هيحصل مفاجئه حاجه تنور وتنقذني من الوجع بس تقريبا ده مبيحصلش غير في الأفلام والوجع لازم ياخد وقته ويتغذى كويس أوي على روحنا لحد ما يشبع من نفسه ويمشي وعلينا إحنا الصبر والإستحمال وإنتظار الفرج مع الثقة واليقين في ربنا اللي بنحاول نتمسك بيهم أوي برغم إننا مش متأكدين من أي حاجه ولا في أي علامه على النور اللي في أخر النفق . 

السنة الدراسية السنة دي بدأت إني كنت بشتغل في مدرسة ماسكها ومالكها الإخوان مع إني مش في مصر وكانوا ناس قمة في السوء فكتبت إستقالتي وعرفت زميلاتي والقريبين مني إني عايزة أستقيل بس مستنيه أشوف نهاية اللعبة كنت عايزة أعرف أخرهم إيه وكنت معتبرة إستقالتي إستسلام بس كنت متأكده إنهم هينهوا عملي معاهم علشان تفكيري المختلف عنهم ورفضي لحاجات كتير بيعملوها وقد كان بس أنا كنت مجهزة نفسي نفسيا كويس أوي وكمان فيه مُدرسة كانت جايه تقدم وكانت بتدعي ربنا بلهفه انها تتقبل لدرجة اني تعاطفت معاها على حساب نفسي كنت عارفه كويس أوي لما تتقبل هيحصل ايه ولما اجتمعوا معايا وقالولي قولتلهم الحمد لله أنا مستنياها ودي أحسن حاجه حصلت :) وروحت البيت صليت ركعتين شكر لله وده ميمنعش إني اتوجعت لأن في التدريس المعلم بيتعود على طلابه ومكانه ده غير حقوقي المادية اللي مأخدتهاش .. تاني يوم بالصدفة عملت انترفيو في مدرسة تانيه وكنت لابسه بلوزة فيها ورد وفراشات وجيبة جينز ودي مش هدوم فورمال لمقابلة شغل خالص ! ومع ذلك اتكلمت بمودة ومحبة مع المديرة وكانت عايزاني أدخل الفصل يومها من قبل ما حتى تشوف شرحي وقالتلي أنا لسه إمبارح كنت بدعي ربنا إنه يبعتلي من عنده مدرسة انجليش بنت حلال ^_^

 المدرسة كانت كريمة جدا في مشاعرها احتووني وأكرموني وحبوني ورجعولي حب التدريس تاني مع إني كنت مرهقه جدا وخلاص مش عايزة أشتغل تاني المهم في نفس السنة اللي قالوا عليا معلمة مش شاطرة علشان خريجة جديدة شرحت حصة نموذجية وجالي جواب شكر من وزارة التربية والتعليم :) حسيت إن ربنا كريم وإنه على أد ما مريت بتجربة وجعت قلبي وروحي ربنا عوضني إن الذم فيا جه من شوية هلافيت مكملوش تعليمهم حتى لكن التكريم جالي من الوزارة نفسها الحمد لله . 

علشان كده يارب واثقة فيك صحيح بتوجع وبتألم وببقى مش قادرة أقف على رجلي تاني من الوجع ومببقاش فاهمه ايه الحكمة فيه لكن مع الوقت بفهم الوقت أكتر حاجه بتداوي ومعرفتنا ان لينا رب اسمه الكريم وهيعدلها في أوانها بتهون كتير ده غير طبطبة ربنا الكبيرة مامتي حبيبتي اللي دايما حبها غير مشروط وحضنها بيساعني ربنا يباركلي فيها ويفرح قلبها وميجيلهاش أي وجع من ناحيتي وسامحني يارب لما بغضب وبزعل من أوجاع الروح علشان كل البني أدمين عاملين زي الأطفال لما بيتوهوا من أهلهم بيبقوا واثقين من أهلهم إنهم مش هيسيبوهم بس التوهه مخوفاهم واحتمالات الحاجات المرعبة في التوهه بترعبهم أكتر. 

يارب إنقذنا من التوهه وإملأ قلوبنا فرح .

زاد المعاد في السفر للبلاد

قبل ما نحجز تذاكر السفر كنت هتجنن علشان نحجزها فضلت من أجازة نص السنة لغاية شهر مايو متابعة شركات الطيران وكل ما الصيف بيقرب الأسعار بتغلى وبتزيد وبتتوحش مع إن مفيش إقبال على السفر لمصر من المصريين والعرب عموما السفر للسياحة دلوقتي بقى أكتر للإمارات وماليزيا وأوروبا وهو ده السبب اللي خلى التذاكر تغلى الطيارة هتطلع ب50 مسافر من 100 مقعد على الطيارة يبقى نقسم سعر ال100 مكان على الخمسين مسافر علشان نبقى كسبانين ..

السنة اللي فاتت وأنا مسافرة حسيت بحنين كبير لكل حاجه في بيتنا ، إن كل حاجه بتوشوشني وبتقولي هتوحشيني زي ما أنا متعودة لما بغيب عن بيتنا لفترة طويلة بودع كل الحاجات اللي بحبها وبقولها هتوحشيني وإديت وعد لممتلكاتي الصغيرة إني هرجع لها تاني في نص السنة وحاولت كتير حاولت وحاولت وحاولت ومفيش فايدة معرفتش .

كان نفسي جدا أسافر على طيران الإمارات وبعد عذاب الإنتظار بعدما خلاص بدأت أنهار وأزهق وأتعب أخيرا حجزنا تذاكر الطيران وعلى طيران الإمارات :) . أحلى رحلة في حياتي كانت على طيران الإمارات كنت طفلة والأطفال بيتدلعوا على الطيارة وفي المطار :) كنا مسافرين في مهرجان صيف دبي في مطار دبي فاجئوني بشنطة فيها أقلام رصاص وألوان وكتاب تلوين وعلى الطيارة بدأوا ببسكويت ووزعوا علينا دباديب صغيرة ^_^ وكمان الرحلة كانت مريحة برغم إن الرحلة إتأخرت 8 ساعات وروحنا المريديان قعدنا هناك وارتحنا لغاية ما جه معاد الطيارة وحصلت هناك حاجات كتير مع المصريين ملهاش علاقة بالإتيكيت من قريب أو بعيد ميتحكيش عليها ! غير كده الرحلة كانت مريحة والخدمة مميزة والأكل لذيذ مش مسمم زي طيران الكويت . فيارب الرحلة اللي استنيتها طول السنة تبقى رحلة سعيدة ومريحة يارب وياخدوا بالهم إني لسه طفلة بس طفلة كبيرة :) .

ساعات في ناس بيبقوا أوطان لينا جوه الوطن قادرين يفهمونا ويحسوا بينا برغم المسافات وشوقنا للقائهم بيبقى أكتر من شوقنا للوطن نفسه وعلشان كده اللقائات الأولى بعد سنة غياب بيبقى ليها طعم مختلف وبتبقى مميزة وذكرى حلوة بعيش عليها سنة تانيه في الغربة . اللقائات الأولى  بتدوم والإنطباعات الأولى بتفضل دايما في الذاكرة.

رمضان في مصر بيبقى حاجه تانيه مفتقده روحه السنين اللي فاتت ومفتقدة حبايبنا اللي طلعوا للسما وسابونا ويارب نقدر نتجمع تاني معاهم في الجنة  

 ويارب إحنا نقدر نرجع اللمة والفرحة وروح رمضان تاني يمكن نعرف .