الجمعة، 26 سبتمبر 2008

ايطاليانو

صفحة من مذكراتي كنت كاتباها في بدايات المدونة وقلت انشرها عالمدونة دلوقتي علشان المود mood الرمادي اللي مش لطشيف اللي انا فيه فمش عايزة اكتب حاجة فيها استئكاب اغير بقى وربنا يكرمني واطلع من المود ده لأنه طول قوي وانا زهقت منه
--------------------------------
هو في ايه
لا بجد بجد في ايه
البلوج بتاعي بيزوروه الايطاليين يا جودعاااااان بغض النظر عن اي جنسيات تانيه بيزوروا المدونة
ويمشوا وميسيبوش اي انطباع لكن اخواننا الايطاليين موصريين جدا جدا اني ازور المدونات بتاعتهم
( وفي مدونات ايطالية جميلة جدا طبعا عرفت ده من ترجمة المدونات دي)
ولو حصل وتجاهلت تعليق ليهم في التشات بوكس بيكتبوه تاني مفيش اي مشكله وبالايطالي والانجليزي علشان ميكونش عندي حجة
على اساس ان الجامعات المصرية الموقرة بتعلم كويس علشان ابقى ضليعة في اللغة الانجليزية يعني
طب هما عرفوا منين اني بعشق اللغة الايطالية وكان نفسي اتعلمها في الكلية كلغة تانيه بدل الفرنساوي اللي
مزهقني في حياتي علشان الداكتور بتاع المادة متعلم بطيخي مش فرنساوي
(داكتور حامض ربنا ينتقم منه)
الايطالية لغة لذيذه فيها عبق التاريخ والبيتزا والمكروووووونة واللزانيا اللي بموت فيهم
بجد مش بهزر لغة قوية يا سلااااام لما تلاقي حد بيقول جررررااااااتسي سينيوري
ولا يمكن كانوا حاضرين معانا محاضرة تاريخ اوروبا في اولى ( كل لية وانتا تتخن) يوووووه اقصد كلية
في المحاضرة دي كل الموجودين معلوماتهم كانت فظيعة عن ايطاليا لدرجة ان زميلة لينا كانت في البنش اللي ورايا
وقالت مش ايطاليا دي بتاعت برج بيتزا المائل طبعا انا فطست من الضحك وقلتلها لأ ايطاليا دي بتاعت
برج مكرونة اللي اتصلح حاله ومبقاش مايل وكمان الداكتور جاب الخريطه وقالنا ها مين هيطلع ايطاليا من الخريطة
على فكرة هي على شكل حاجه مشهورة
انا افتكرت انها على شكل شوز بكعب عالي فقلت لزميلاتي اللي معايا في البنش
فزميلة لينا سمعت كلامنا وقلت للدكتر يا داكتور عارفاها ايطاليا دي على شكل كوتشي في الخريطه
(معلش سمعت غلط او بتضيف معلومات من عنديها )
انا خلاص كنت في المحاضره نفسي اقوم اصرخ واقول يا ناس يا هووووو ايطاليا دي فيها كذا وكذا وكذا وهي اصل الحضارة الاوربية
بس مين وانتا اذ ناديت اسمعت حيا
ولكن لا حياة لمن تنادي

هناك 27 تعليقًا:

هانى زينهم يقول...

اولا مبروك على اللوك الجديد ومن الوانه باين قوى المود اللى انت فيه .
ثانيا حد يطول يزوروه طليان ده كفاية انهم زى القمر ما شفتش حد ايطالى سواء راجل او ست او قميص او شوز الا وهو زى الفل !!
ثالثا جراتسى سينيوريتا مورتو جراتسى على البوست الحلو ده وما فيش داعى المود يتغير فى ايام طاهرة زى دى . اجلى المود الوحش ده لبعد رمضان الايام جاية كتير !!

كـــيــــــــارا يقول...

انتي يابت بتجيبي سيره تاريخ اوروباااااااااا ليه

يابت محدش يجيب سيره التاريخ قدامي بخرج عن شعووووووري

طب اقولك ايه دلوقتي

امشي من قدااااااااااااااااااامي


عاااااااااااااااااااا

عااااااااااااااااااااااااااا

وبتقولي مود رمادي في وشي


اما تنزليلي مصر بس

هشردك تبعا تبعا كيكيكيكييك

blue-wave يقول...

مبروووووووووووووك على اللوك الجديد
انتى عارفه انى بموت فى الغوامق
وبالنسبه للبوست هنيالك يا عم
يمكن ربنا كاتبلك جوازة ايطالى وجنسيه وعيشه بقى(وش بيغمز)
ربنا يكرمك بقى

Rannon يقول...

أسود في وشي؟؟
ليه بس يا بنتي انتي صغيرة عالالوان دي :)


ما تتكلميش على حد في غيابه أوربا ايه ولية ايه .. لو جعانة قوليل وانا اعملك سنكوشت فراخ :)

انا زعلانة من الاسود ده على فكرة :(

☼♫♪ عمــاد الدين يــوسف ☼♫♪ يقول...

ربنا يحبب فيكي عباده الطلاينه كمان وكمان
تحياتي

أحمد بكر يقول...

كل اللغات حلوه و سهله المشكلة تحبيها او حد يدرسهالك و يحببك فيها ربنا يسامح مدرسين اللغات الى كرهونا فى كل الغات معادا العاميه علشان مش بيدرسوها

Lady E يقول...

هاني زينهم : الله يبارك فيك يا مستر اللوك بتاع مدونتك احلى بكتير

ثانيا: ماشي يا مستر فين الأمورة ملك والمودام يشوفو الكلام ده اذا الايطاليين زي الفل فالمصريين زي الورد البلدي الجميل اللي ليه برفيوم مش صورة وخلاص

ثالثا : مورتو دي بنت اتنين انا عارفاهم شوكولاته مورو وكرواسون مولتو صح انا شطورة ههههههه

والحمد لله طردت المود الوحش بلا راجعة الايام دي ان شاء الله

منور البلوج دايما يا مستر
دمت بكل الخير

Lady E يقول...

كيارا : هدي اعصابك يا بنتي انتي لسه صغنونة على الضغط والسكر منك لله يا وجيه عملت هس هس للبونيه

وعندك واحد عصير ليمون لأحلى كيارا علشان تهدي اعصابها
امشي يا تاريخ امشي يا وحش متجيش هنا تاني

بالنوسبة للمود خلاص الحمد لله المود مبقاش رمادي

دمتي بخير يا أحلى كيارا

e_emy يقول...

الف مبروك ع نيو لوك

زوار ايطاليين حته وحده (;
ربنا يحبب فيكى خلقه

"بالنوسبة للمود خلاص الحمد لله المود مبقاش رمادي"

طيب الحمد لله بقه لونه ايه بقه*-:
ربنا يسعدك
كل سنة وانتى طيبة

غير معرف يقول...

انا بموت فى ايطاليا و الاكل الايطالى و اللغه و الناس

بحبها مووووووووت

لو عايزه تتعلمى ايطالى قوليلى نساعد بعض

:D:D::D

عايش... ولكن !!!! يقول...

مبرووك ع النيو لووك
ايطاليانو مره واحده
ربنا يكرمك يا ستى
بس اوعى يجوا يحتلوها هههه
كل سنه وانتى طيبه وعيد سعيد
دمتى بكل الود
علاء

د/ رامي شهاب الدين يقول...

بسم الله
إيطاليا بلد قمة فى الروعة
كان ليا نصيب وزرت البلد دى وقعدت فيها شهرين ، مش هقولك بقى على جمال روما ونابولى ، أجمل مافى البلد فعلا انك مش بتحسى إنك غريبة ، الناس هناك على فكرة ملامحهم قريبة مننا شرقية يعنى ، دا غير إنهم من أكثر شعوب العالم تحضرا ورقيا فى المعاملة
يلا سلام

غير معرف يقول...

أولا
اللوك الجميل تحفة
ثانيا
أنا أول مرة أشوف حد بيحب اللغة الإيطالية كدة
أنا على طول بحب أسمعهم و هما و بيتكلموا خصوصا فى فيلم حرب أطاليا بس عمرى ما فكرت للحظة أنى أتعلمها
بس مدام أنتى كدة يبقى بجد فكرى تخدى كورسات فيها لأنها حتكون حاجة انتى حاباها
و اليومين دول بقى صعب إن الواحد يعمل حاجة بيحبها
فأنتى أعمليها و أتعلمى اللغة دى و أكيد حتكونى مستمتعة

Lady E يقول...

blue-wave : الله يبارك فيك يا دكتر
اول مرة اخد بالي انك بتحب الالوان الغامقة

وبعدين يا دكتر سيبك من الجواز ده خاااالص انا لسه قدامي كلية عايزة اخلصها الاول وبعدين مفيش حد عارف نصيبه فين وبأي أرض هيتجوز
ايييييه دنياااا :)

دمت بخير دائما

maiosha يقول...

كل سنة وانتى طيبة يا جميل

ومبروك على النيو لوك الغامق ده

جراتسى

غير معرف يقول...

هو لوني المفضل الاسود

بس البوست كله جامد

بس بصراحة انا نسيت التاريخ والحضارة
وأول ماجات سيرة اللزانيا والمكرونة والبيتزا

مقدرتش امسك نفسي مقرتش افكر حاعمل ايه غير اني اقولك

جوعتيني
البوست الجميل

وعموما النيو لوك دا بتاع التمبو بتاعك

Lady E يقول...

Rannon :لا لا وشك زي القمر يا قمرايا الأسود ده للمدونة بس
وتصدقي كلمتك دي ماما دايما بتقولهالي اني لسه صغيرة عالالوان دي

وبعدين معقول رنون اللي بتكره شغل البيت هتعملي سنكوشت بجد بجد فرحانة وهستغل كرمك واطلب لازانيا بدل السنكوشت :)

ومتزعليش بقى انا مقدرش على زعلك وهغير الاستايل قريب ان شاء الله
بجد دايمل منوراني يا حبيبتي

Lady E يقول...

المحرر الصحفي والشاعر : عمــاد الدين يوســـف : اللهم أمين
بس بجد عرفت الدعوة دي ازاي دي دعوة جدتي الله يرحمها ليا ربنا يحبب فيكي عباده كلهم مش الطلاينة بس :)

شكرا للدعوة الجميلة دي

دمت بخير دائما

Lady E يقول...

(baker)بيكر : الله يسامحهم اللي بيعقدوا الناس من اللغات فعلا وبعدين ما العامية كوكتيل من لغات مختلفة يعني عندك مثلا ميرسي دي فرنساوي وسيرفس وكمبيوتر ولاب توب وكلمات تانيه كتير انجليش المشكلة بقى في طريقة التعليم وتقبلك لتعلم اللغة اصلا

شكرا ليك ودمت بخير دائما

Lady E يقول...

e_emy : هييييه ايمي حبيبتي جت

الله يبارك فيكي يا قمرايا
زوار ايطاليين حتتين مش حتة واحده :)
وبجد كنت مفتقدة الدعوة دي جدا
جدتي اللي يرحمها كانت دايما بتدعيهالي ((ربنا يحبب فيكى خلقه))
وبالنوسبة للمود فهو بقى قوس قزح ساعة تروح وساعة تيجي بس بحاول على اد ما ااقدر اخليه بمبي pink علشان العيد
كل سنة وانتي بخير يا قمرايا

Lady E يقول...

MaGn0liA... : هيييييييه انا فرحانة اوي انك بتحبي اللغات أخيرا لقيت حد بيحب اللغات وخصوصا اللغة الايطالية

أكيد عايزة اتعلم ايطالي بس مش دلوقتي خالص علشان مش هقدر اتعلم 3 لغات في نفس ذات الوقت العنجليزي والفرنساوي كفاية عليا

دمتي بخير دائما يا حبيبتي

Lady E يقول...

عايش ولكن : الله يبارك فيك

وبعدين مين ميقدروش يحتلوها

وانتا بخير يا رب

وان شاء الله عيد سعيد عليك

دمت بخير دائما

Empress appy يقول...

ماله المود يا قمر واحنا داخلين علىالعيد اقولك تعالى اركبى عجله معانا وفرقعي بمب فى العيال
كل سنه وانتى طيبه

هانى زينهم يقول...

كل سنة وانت طيبة وربنا يعيد عليكى الايام بخير انت والاسرة وكل اللى بتحبيهم وعيد سعيد .

romansy يقول...

كل سنه وانتى طيبه
عيد سعيد عليكى وعلى المسلمين جميعا
باليمن والخير والبركات

ميرام يقول...

ليدي
وحشتييييييني بجد
كل سنة وانتي طيبة ويارب يكون عيد سعيد عليكي ..
مبروك كمان على اللوك الجديد ..

الاولاني كان طفولي شوية
انتي خلاص غيرتي رايك في (مش عايزة تكبر)

يابخت الايطاليين بمدونتك (:
هههههههه
يلاا
كل سنة وانتي طيبة تاني
ومستنيه البوست الجديد
تحيـــــــــــاتي

نيللي علي يقول...

مش معقول ..على شكل كوتشى ..طيب كويس انها مقلتش على شكل شبشب ,وفيها برج بيتزا المائل ..معلومات هايلة..وانتى مخدتيش ليه كورس إيطالى ..يابت ياانوس