الأربعاء، 10 سبتمبر 2008

معاد الكلية قرب

في البداية احب اقولكو وحشتوووووووني جدا جدا جدا جدا من هنا لبعد بكرة
وان ’بعدي عن البلوج مش سببه الوحيد رمضان لأن اكيد انا اكتر حد مقصر في العبادات في رمضان لكن في اسباب تانيه كتير ومنها ان الكمبيوتر شارب كابتشينو كتير جدا ومخرف اخر تخريف
*******************************************************
ندخل بقى في الموضوع
أنا كنت حاسة ان السنة اللي فاتت هي سنة الليسانس مع اني كنت لسه في سنة تانيه
لأن بجد كانت سنة دراسية خنيقة وكنت بحلم انها تبقى اخر سنة في الكلية ولكن مش كل الاحلام بتتحقق لسه شهر بالظبط ان شاء الله وارجع الكلية تاني
طبعا انا نفسويا مضايقة جدا اني هرجع الكلية تاني واشوف الكائنات الحية اللي فيها
ولو سألتك انتا كلية مصرية تقوللي اييييييه ؟؟؟
قوللي : يبقى هتطلعوا من الكلية زي ما دخلتوها مش فاهمين حاجة في تخصصكم ودراستكم والكائنات الحية الكابيرة بتتحكم فيكم وبتجيب لكم كتب غالية اوراقها صفرا ونص كلامها ممسوح وبتقرأوها بمكبر
وقابلوني لو عرفتو تذاكروا م الكتاب اللي بينزل قبل الامتحان بأسبوع او اتنين
وكمان علشان توهبوا حياتكم للعلم تستنوا المحاضرة ساعتين تلاته اربعه عاااااادي جدا ما انتو فاضيين
والتقديرات عييييييب لما تسألوا عليها
التقديرات محجوزة لأولاد الدكاترة وناس تانيه ملكوش دعوة بيهم (بلاش الحقد ده)
اما عن الكلية فلما تسأل عن المكتبة يبصوا لك بنظرة الرعب ويقولولك انتا بتتكلم في ايه القراءة دي رفاهية
احمدوا ربنا ان في مدرج (واللي بيقول الكلام ده الدفعة اللي قابلنا واللي بيقولوا ان مكنش عندهم مدرج )
طب بلاش المكتبة خليها معمل الصوتيات واللغات يردوا عليا : معمل ايه هو انتي فاكرة نفسك في طب ولا زراعة ولا علوم (مع ان اي كلية في الدنيا بتدرس لغات لازم يكون فيها اوضة للصوتيات واللغات بلاش معمل اللي بتزعل الناس مننا دي)
للأسف مش شايفة اي ميزة في الكلية بتاعتي غير شهادة الليسانس اللي هتشهد بإني ضيعت 4 سنين من عمري في تعليم يقال انه جامعي بس ملوش لازمة ولازم لما احب اشتغل اكمل دراستي كورسات في الجامعة الامريكية او في القنصلية البريطانية
كان انطباعي عن الكلية صح من اول مرة شوفتها قلت لزميلاتي واحنا في سنة اولى
(الكلية دي جابو الطلبة الاول فيها على ما ربنا يفرجها ويجهزوها ويبنوها )
وكمان العميد طمننا ان الكلية هتتجهز وتكون مية مية بعد 10 او 15 سنة ع الاقل ان شاء الله
واللي هيستنفع بيها اولادنا يعني الموضوع مش بعيد عننا يعني بلاش نكون جاحدين ومنفسنين !!!!!!!!!
ربنا يصبرني عليكي يا كلية ويعدي السنتين اللي باقيين لي فيكي على خير

هناك 32 تعليقًا:

كـــيــــــــارا يقول...

ههههههههههههههههه

يخربيت عقلك يانونا

ااااااااه وهتشوفي بقي اللي زي وجيه

هيك هيك هيك

بعدين ايه الطمع ده كفايه انك ولادك هيبقوا فيها وهي مبنيه جاهزه يعني منكم فيكو بلاش حقد علي عيالك بقي

ياخوفي لا توصل لعيال عيالك وده المتوقع

نياهاهاها بس احلي حاجه بقي في الموضوع

ان الكليه بتخليكي قريبه مني وبتسهل التليفونات يانونا بدل الدولي ده

سلام ياقمريتي

كيكى عوووووو يقول...

اممممممممممممممممممممممممم
اممممممممممممممممممممممممممممممم
ظهرتى يا عنى يا نونتى
؟
امممممممممممممممممممممممممم
ماااااااااااااشى ماااااشى
خلى بقى فوفو تنفعك
انا عرفت انك جبتلها شنطة علشان هدوديها الحضانة قريب
!
مااااااااااااشى
عموما يا شماتة ابلة ظاظا فى
اعااااااااااااااااااااااا
ربنا يعنيكى ويخلص بيها على خير
انا وانتى
وعقبالى انا كمان عقبال ماخلص الاكاديمية العالية للقطن
و
و
و
مش هقولك وحشتينى عقاااااااااب ليكى
ها
عوووووووووووووووووووووووووو

هانى زينهم يقول...

بجملة النفسوية اللى مش مظبوطة احب اطمنك انك لما تتخرجى كمان هتندمى على ايام الكلية وتقولى عليها يا ريتها دامت وبعدين انا حاسس جدا بشعورك ده لانى الدراسة قربت وقربت ارجع المدرسة وادرس للعيال الخنيقةواصحى بدرى وكدة يعنى
معلش جت فيكى بس انت اللى فتحت موضوع الدراسة ده وحمد الله ع السلامة

غير معرف يقول...

يالهووووووووووووى...طب انا أعرف إن آداب إنجلش من أحلى الكليات

بصى نصيحة منى أستحملى و تغاضى عن العيوب عشان تقدرى تكملى لأنك بالمنظر ده حيكون أخرك خميس و جمعة

بقولك إيه أمشى من وشى...تعرفى أنتى جبتيلى حالة من البلاهة و الله مش عارفة ليه الكلام جابلى إكتئاب :(

بس برغم كل حاجة أسلوبك رائع و مدونتك زى العسل
و ربنا يوفقك فى مستقبلك

عااااااااااااااااااااااا

غير معرف يقول...

ههههههههههههههه

شكلك شايله منها الى الاخر

زيىى و الله

ربنا معانا


سلامات :)

e_emy يقول...

هههههههههههههههه

تصدقى فكرتينى

بجد نفسى احكيلك بقه عننا

بس الكلام هيبقه كتير اووووووى اووووى
بس باختصار يعنى الحال تقريبا من بعضه
للأسف .. بس الحمد لله الحمد لله اخيرا الدور الاول من المبنى خلص لولولولوى
ههههههههههه

بس برضه بحب الكلية اووووى والكشك مش المبنى الجديد(الكشك دا مبنى صغنن كده فيه الشئون على لما الدور الاول لما يخلص هههههاحنا الى مسمينه كده كشك وليه اسامى تانيه كتير بس نقتلك قسم حلو شويه)اه زى ماقولتى هطلع بالشهادة بس هطلع باصحاب جمال جدااا الحمد لله

اتكلمت كتير اووى معلش بقه انتى الى فتحتينى كنت ساكته والله هههههه

سلام ياجميل

blue-wave يقول...

ههههههههههههههه
بجد وحشتينى
دا اولا
وثانيا بقى انا عندى اقتراح
سيبك من الكليه دى وانا اجيبلك عريس لقطه
:)))))
ها ايه رأيك؟؟؟

ميرام يقول...

ههههههههه
ازيك ياليدي ..
ايه يابنتي ..
ده انا من تاني يوم خلصت فيه الاجازة ..
بدعي الدراسة ترجع ..
حسستيني اني هرجع في كلامي بعد البوست ..
بعدين ايه الحاجات الغريبه اللي انتي بتتكلمي عليها ..
ال ايه معمل الصوتيات والمرئيات ,..مش دي اللي عاملينها للسياح عند الاهرامات (:

لا وبتقوليلي ..مكتبه ومش عارف ايه ..

بس صحيح عندي سؤال مهم ...
انتو عندكم مدرج .؟؟؟!!

(:
ههههههههههههه
أشوفك على خير ..
تحيــــــــاتي

غير معرف يقول...

ربنا يعينك يا بنتي
انتوا بتتعذبوا
:D :D :D

Selfmeaning يقول...

هههههههههههههههههههه

الكلام دا انا قولته برده و انا فى سنة تانية لكن لما اتخرجت حسيت ان الكلية فرقت معايا و ان الاربع سنين خلونى اعرف اتعامل مع الناس كويس مع انى برده خريجة اداب انجليزى القاهرة

عارفة انك هتستغربى الوضع شوية و ازاى حصل دا؟؟

بس صدقينى اللى الكلية هتسيب عندك معلومات و هتتعلمى منها مواقف تفيدك فى عمرك الجاى

Lady E يقول...

كيارا : كده يا كوكي
اهون عليكي هو عقلي مخروب اصلا مش محتاج يتخرب اكتر من كدا عاااااا

وبعدين بتفكريني ليييييييه بس اني هشوف حامض انا بدعي ربنا انه يبطل تدريس في كليتنا علشان يبطل ظلم لينا وللاجيال الجاية
منه لله هو ووجيه (حسبنا الله ونعم الوكيل)

وكمان عيال مين اللي هدخلهم كليتنا انسي يا بنتي كفاية المأساه مره واحده بس

وبلاش اسيح بقى على موضوع الدولي ده
علشانك مش بترني عليا خااااالص
ولما برن عليكي تليفونك خارج نطاق الخدعه
بجد كنت مفتقدة تعليقاتك الجميلة يا قمرايتي
نورتيني

Lady E يقول...

كيكى : انا مغبتش عنك اصلا يا كتكوتتي
انا معاكي على طول بأمارة كول تون شيرين

وبعدين شيلي فوفو من دماغك لأنها بجد بجد بجد لسه عند الميكانيكي

ومتقلقيش فوفو كبرت عالحضانة من زمااااان دلوقتي بتروح الكلية معايا (وش بيطلع لسانه)

وعلى فكرة ابلة ظاظا كانت معايا امبارح واكلنا شوكولاته وانتي لأ نياهاهاها

ربنا يعيننا عالكلية والاكاديمية وعلى الكائنات الحية اللي فيها

وانا اللي هقولك بجد وحشتييييييني وحشتيني وحشتيني

Lady E يقول...

هانى زينهم : انا متأكده من كلامك يا مستر

ربنا يعينك على التدريس يااااارب لأن بجد مهمتك مش سهلة وفعلا الصحيان بدري مشكلة

وحاول تحتسب ثواب التدريس والصحيان بدري والطلبة واهاليهم الخنيقة عند ربنا سبحانه وتعالى وان شاء الله ربنا مش هيضيع تعبك في التدريس

نورت البوست يا مستر
و ولا يهمك اتكلم براحتك

Lady E يقول...

انا ودماغي : والله كنت قلقانة جدا ان انتي بالذات تشوفي البوست ده يا قمرايا
وانا بكتبه كنت بفكر في انك لسه فرحانه بالكلية ان شاء الله كليتك حالها يبقى احسن من حال كلياتنا
متحطيش الكلام ده في بالك

وعندك حق دراسة اداب انجليش متعة فعلا بس لما اللي بيدرسولك يبقوا مبدعين وبيفهموا
وده موجود في الكلية بنسبة 1 من كل 100 دكتور

وان شاء الله هعمل بنصيحتك

وبعدين جاتلك حالة بلاهه من كلامي اومال لو شوفتي الواقع ده هتقولي ايييييه ربنا يعيننا ويعينك

وربنا يسعدك ويبعد عنك الاستئكاب

نورتيني يا قمرايا
وانتي اللي كلامك رائع ومدونتك جميلة

Lady E يقول...

MaGn0liA : طبعا طبعا مش كلية مصرية لازم نبقى زي بعضيينا

احلى دعوة ربنا معانا ونخلص كلياتنا على خير

نورتتي البوست والمدونة كلها يا قمرايا

سلامات :)))

غير معرف يقول...

قشطة ولا يهمك كلنا لها أدينى شوفته و اللى كان كان..بس بجد لو كنت دخلت آداب كان ممكن يجرالى حاجة بجد

أنتى إن شاء الله تعملى اللى عليكى و ربنا لا يمكن يخزلك أنا كنت فاهمة إن ده كلام كدة و خلاص بس و الله حصلى كام موقف تأكد منه إن اللى يعمل اللى عليه لا يمكن ربنا يحزنه...
و ربنا يكرمك بجد

Lady E يقول...

e_emy : حتى عندكو يا ايمي
انا كنت فاكرة كليتنا بس هي اللي متميزة بإنها مش كلية طلعت كليتكو انتو كمان عااااااا

والف الف الف مبرووووك لولولولولوي
خلصوا الدور الاول لا بجد حاجة تفرح

وكأنك بتوصفي كليتنا احنا كمان عندنا كشك لشجون الطلبة بس بجد كشك استايل معمول بالازاز والالمونيوم واخر شوياكة

بالنسبة للاصحاب فدي فعلا احسن حاجة تطلعي بيها من الكلية هي والشهادة

وبعدين متكلمتيش كتير ولا حاجة
البلوج بلوجك اتكلمي زي ما انتي عايزة

نورتي البوست يا ايمي يا جميلة

Lady E يقول...

blue-wave : هههههههه انتا بتهزر يا دكتر صح

انا فكرتك هتقول مثلا هانت لسه سنتين ده انا الكلية بتاعتي كانت 6 سنين وواحدة امتياز

وانا اللي اللي كل شوية بقول

هانت ايوة هانت فترة وانسى الرعب ده

ماشي يا دكتر مااااشي وكمان هتجيبلي عريس لقطة يعني مش هيبقى عريسي لواحدي لأ هيبقى عريس لقطة كمان

نورت البوست يا دكتر وقول للعريس على بنوتات تانيه ويا بخت اللي يوفق اتنين في الحلال هيدعوا عليه كل يوم :)

Lady E يقول...

ميرام : الحمد لله تمام
اخيرا ظهرتي والله وحشتيييني
لالالا متغيريش رأيك ولا حاجة يا باشمهندسة

وبعدين احنا بنتدلع بصراحة على رأيك معمل ايه ده للسواح اللي بيجو يتسوحو في بلدنا
وحتى المكتبة دي حاجات مش مفيدة اصلا هههههههه

ومتقلقيش عندنا مدرج الحمدلله :))

نورتي المدونة والبوست وصحبتهم كمان
ومتغبيش تاني كده بجد بتوحشيني يا قمرايا

Lady E يقول...

hager za3bal : دسييييسة اقبضو عليها هههههههه

انتي في جامعة 6 اكتوبر يا هاجر تقريبا صح

فتبقى مصيبة سودا لو الجامعة بتاعتكو زي الجامعة بتاعتنا وخصوصا ان في طلبة مش مصريين كتير في جامعة 6 اكتوبر

نورتي البوست يا قمرايا

Lady E يقول...

Selfmeaning يا ألف ألف مرحبا بالزميلة الجميلة عقبال ياااارب لما اتخرج انا كمان

يظهر ان سنة تانيه كانت خنيقة عندك برضه وأكيد كلامك كله صح انا مش مستغربة ولا حاجة لأني استفدت من الكلية في حياتي فعلا بس اللي مضايقني ان كان نفسي في تعليم بجد واني اطلع من الكلية متميزة في اللغة غير اي حد بياخد اي كورس انجليش

شكرا للنصيحة الجميلة دي يا قمرايا
وبجد اسعدني تعليقك وزيارتك الجميلة للمدونة

ADMIN يقول...

الحمدلله انى خلصت وخلصت منها ايام لا تعود اللهم اميييييييييييييييين

Lady E يقول...

انا ودماغي : الحمد لله انك مدخلتيش كلية الاداب علشان ميجراش ليكي حاجة
انا عقدتك من الكلية ولا ايه
وبعدين متقلقيش ابدا انتي دخلتي الكلية اختها التؤام تجارة انجليش بس ان شاء الله تكون خير ليكي

وعندك حق ربنا سبحانه وتعالى مش بيخذل الانسان ابدا طالما عمل اللي عليه
والحمد لله ان المواقف عدت على خير وبجد انا سعيدة انك اتعلمتي منها المعنى الجميل جدا ده

جزاكي الله خيرا وربنا يكرمك ويسعدك ويرضى عليكي

Lady E يقول...

شاب اسكندرانى : أهلا بيك

يا بختك عقبال يااااااارب لما كلنا نخلص دراسة زيك

كـــيــــــــارا يقول...

انتي يابت انتي بترني علي انهو رقممممممم

يخربيت فقرك انا مش مشغله فودافون مشغله التاني

فضايح ايه قافله فودافون من مده كبيره

بس بجد وحشتييييييييييييييييني ياعسل

Lady E يقول...

كيارا : كنت برن على فودافون يا كوكي

ورنيت على الرقم التاني وبرضه خارج نطاق الخدعه

ومين اللي قال فضايح اصلا

شكل البلوج الجاديد مأثر عليكي ولا ايييييه ماشي ماشي لما نتكلم بس

نورتيني يا قمرايا

Empress appy يقول...

لازم دايما نندم بعد ما نسيب الحاجه استمتعى بيها على قد ما تقدرى وربنا معاكى يا رب

Selfmeaning يقول...

لو عايزة فعلا تتعلمى اللغة

يبقى تتعملى مع الدكاترة اكتر

و انا عارفة انها مش سهلة بس حاولى

و تانى حاجة احنا عندنا فى اقسام انجليزى

اجانب حاولى برده تتكلمى معاهم

و بالتاكيد هتقدرى تستفيدى

Lady E يقول...

appy : فكرتيني بحكمة بتقول : رب زمن زمن بكيت منه فلما ذهب بكيت عليه

شكرا لتعليقك الجميل يا حبيبتي

ونورتي البلوج والبوست والنت كله

Lady E يقول...

Selfmeaning : هي فعلا معاملة الدكاترة صعبة وخصوصا اني لما بضغط على نفسي واسألهم لأني بتحرج بلاقي طلبة كتير جدا بيسألوهم فبتحرج ومش بسأل وها كذا لغاية لما السنة الدراسية تفوت
وهما ساعات بيحرجونا برضه ومش بيجابوا على اسئلتنا

وياريت في قسم اللغة الانجليزية اجانب مشوفتش اجانب خالص في هيئة التدريس ولا حتى عملوا ندوات
واللي يضحك في الموضوع اني لما بتكلم انجليش مع زميلاتي في الكلية اللي بيدرسوا انجليش معايا بيقولولي النبي عربي انتي بتتكلمي انجليش ليه عااااااا

نورتي بجد يا قمرايا

Mona Shereif يقول...

ههههههههههههههههه
هى كليه اداب فى كل الجامعات كده ولا ايه؟
هههههههههههههههههههههههههههههههه
انا فاكره من 6 سنين قالو ان شاء الله كلية اداب ليها مبنى فى الجامعه
اصل احنا بعيد عنك كنا بره الجامعه وفى مكان منعزل كده عن كل الكليات
بس كنت حاسه اننا متميزين .. طبعا يا بنتى
عدوا ال6 سنين اروح الجامعه الاقى حجر الاساس
عارفه اللى بيبقى شبه لما تروحى المقابر ده
وعلشان مبقاش مفتريه عملوا مبنى كمان بس عواميد بسسسسسسسسسسس

وبعدين لو عايزة تتعلمى صح ده هيبقى فى ايدك انتى اوعى تعتمدى على نظام التعليم ده
حاولى بنفسك تدورى ومتضيعيش الايام دى بجد من ايدك
استفيدى على اد ما تقدرى منها... واسألى واعرفى الصح من الغلط

بس تعرفى ان سنة تانيه دى كانت من اجمل السنين
اصلى كنت انتساب وجيبت جيد وحولت انتظام
والله كانت السنه الوحيده اللى جيبت فيها تقدير
خيييييييييييييييييير

وهديه منى موقع فى notes للمسرحيات وللروايات اللى بندرسها وكمان شعر
http://www.sparknotes.com/
يارب تستفيدى منه

استمتعى بجد بأيام الكليه
انا وانا فيها كنت بتمنى اخلصها
انما دلوقتى بقول ياريتها ترجع تانى

سلام يا قمر

Lady E يقول...

Sometimes : ههههههه تقريبا كده يا قمرايا وعالاقل بعد 6 سنين لقيتي في تحسن وحجر الاساس وعواميد لكن كليتنا مفيش فيها امل انها تتغير

وبجد نصيحتك جميلة جدا وهحاول اطبقها ان شاء الله

ومتشكرة جدا على هديتك الغالية دي يا قمرايا بجد جزاكي الله خيرا
عارفة الموقع ده فعلا مفيد جدا وكان معايا السنة اللي فاتت في نوفل The scarlet letter

اسعدتيني بكلامك الجميل يا منوش
دمتي بخير