الأحد، 21 سبتمبر 2008

حلم من أجمل أحلامي


بيت جميل جدا عالبحر وفيه جنينة كبيرة فيها كل الورود اللي بحبها (ورود بمبي وأبيض وأحمر وفل

وياسمين ولافندر وأشجار كتير فيها كل الفواكه اللي بحبها وعارفاها واللي مش عارفاها)
وانا هناك مع حبيبي (المجهول حاليا) وكل اللي بحبهم , وكمان فيه بيسين (حمام سباحة ) لما تعوم فيه تلاقي السمك بألوانه الزاهية الجميلة حواليك وكمان لو غطست بتتنفس عادي جدا ومش ممكن تتعب




والجو المحيط بالبيت انا اللي بختاره سواء كان مطر او شمس خفيفة

وبمجرد ما بفكر في حاجة بلاقيها قدامي (وده الحمد لله ساعات بيحصل معايا في الدنيا وحتى لو نسيت الحاجة اللي اتمنيتها الحمد لله بلاقيها اتحققت ولو بعد فترة كبيرة)

الحياة هناك جميلة واكثر من رائعة وجيراني ناس حبوبين جدا وطيبين وانا بحبهم وهما بيحبوني وكلنا فرحانين مفيش حزن ابدا والبيت كإنه لؤلؤة أو دهب والعطور والنور ظاهرين فيه

بس للأسف مش قادرة اروح للبيت ده وللحياة الجميلة دي لأني مش بعمل ليها وبتمناها كتير وبفكر فيها ويمكن هي من اقوى الأسباب لأستمراري في حياتي علشان حاسة ان ربنا سبحانة وتعالى مش هيخذلني و في يوم من الأيام هروح للحياة الجميلة دي

يا ترى خمنتوا انا بتكلم على ايه ؟؟؟
انا بتكلم على بيتي اللي بتمناه في الجنة واللي بحاول اعمل ليه بس مش عارفة
كل ما اقول اتقدمت خطوة برجع 100 خطوة وحاسة ان الخير قليل اوي واللي بيساعدوا على الخير قليلين جدا جدا جدا لكن الشر كتير واللي بيساعدوا عليه في كل مكان وكمان بيزينوه وبيخلوه بشكل حلو مع انه في الحقيقة كل الشر هلاك

يا رب انتا وحدك عارف ان حياتي مبقاش ليها اي طعم وحاسة انها ايام وبقضيها وفي شباب وبنات كتيرحاسين نفس الاحساس لكن دي ارداتك ومشيئتك وحكمتك وعدلك يا اعدل العادلين وانا راضية بقضائك
يا رب كل كلامي عن بيتي اللي بتمناه في جنتك ميجيش ذرة من بيوت الجنة ونعيمها ويا رب انتا القادر على اجابة دعائي يا ملك الملوك واغنى الاغنياء اللهم تقبل مني واستجب يا ارحم الراحمين
يا رب انتا عارف اني مش ممكن استحمل ذرة من عذاب النار اللهم انك كريم عفو تحب العفو فأعفو عنا
يا رب يا أرحم الراحمين وأكرم الأكرمين ارضى عنا ويسر حياتنا
يا ربي يا عظيم يا حليم يا من له الاسم الاعظم والاسماء الحسنى انا متأكده اننا هندخل الجنة برحمتك مش بعملنا
ولكن يسر لنا طاعتك وحببنا فيها لترضى عنا وتباهي بنا الملائكة
يا رب قلت انا عند ظن عبدي بي وانا ظني بيك انك رحمان ورحيم وكريم وبتحبنا وانعمت علينا نعم كتير منها الاسلام فأتمم نعمك علينا وارضى عنا واعتقنا من النار


اللهم اجعل كلامي خالصا لوجهك الكريم

(يا جماعة انا كنت كاتبة البوست ده في الاجندة بتاعتي ومكنتش ناوية اكتبه على المدونة علشان خايفة ان الموضوع يدخل فيه رياء مثلا وخايفة ان الردود تضيع ثواب دعائي بس كتبته لغرض واحد بس علشان اللي بيفكر في احلامه في الدنيا بس ومقضيها ويائس ومخنوق
حياتنا التانية برضه تستحق الأحلام والرجاء من الله سبحانه وتعالى
وعلى فكرة فكرة البوست اخدتها من احد برامج الداعية عمرو خالد هو قال الفكرة دي وانا نفذتها بس لسه مش قادرة اطبقها صح)

هناك 16 تعليقًا:

غير معرف يقول...

hi
how r u
it is very nice......

هانى زينهم يقول...

اول مرة اشوف حلم كدة . غالبا ما حدش بيحلم بده خالص وان كان هو الحلم الوحيد اللى يستاهل يتحلم !!بس ليه نبرة الحزن واليأس دى ؟ انا معاكى ان الاحباطات كتير بس لازم تفكرى ان دى اجمل ايامك وان ضاعت هتندمى عليها قوى .
الفكرة حلوة قوى والتعبير عنها اجمل.
تحياتى

e_emy يقول...

بوست جميل بجد والكلام طالع من القلب

ربنا يتقبل منك دعائك يــــــــــارب

ويارب يحققلك الحلم ده واكون ف البيت الى جنبك وجارتك يارب


يارب يقدرنا كلنا وربنا يرضا علينا يــارب

ف رعاية الله يا جميل

Lady E يقول...

lolita : hi 2 dear lolita

thanks alot for your wonderful comment

romansy يقول...

يارب نعيش كلنا فى الجنه
احنا محتاجين ناخد ايدينا بايد بعض
بشكرك على البوست دا

Mona Shereif يقول...

هو فعلا اجمل الاحلام
ويارب حققه اللهم امين
بس انا حاسه ان فيكى حاجه مش تمام
ليه بقى؟
روقى ده ربنا جميل اوى على فكره

وبعدين انا مش شايفه ان الموضوع له علاقة بالرياء
بكره احسن ان شاء الله
ولو بترجعى خطوات لورا مكانش اكتر منى بس الحمد لله انا رجعت زى الاول ويمكن احسن بفضل الله
اتطمنى وماتقلقيش
ويارب ارزقنا الجنة
ومتعنا بلذة النظر الى وجهك الكريم ياااااارب

بقولك انا عندى استفسار كده
هو انتى مش فى مصر حاليا صح؟

Lady E يقول...

هانى زينهم : شكرا على زياراتك وتعليقاتك الجميلة دايما يا مستر

وهحاول احس ان دي أجمل أيامي ولو اني كتير مش بشوفها جميلة خااالص

سعيدة جدا برأي حضرتك عن البوست
نورت المدونة كلها يا مستر

Lady E يقول...

e_emy : تسلميلي يا قمرايا ربنا يبارك فيكي ويرضى عليكي انتي اللي دايما جميلة وعيونك حلوين علشان كده بتشوفي البوستات حلوة

اللهم أمين اللهم أمين اللهم أمين

ربنا يستجيب دعائك الرائع ده يـــــا رب

دمتي بخير وفي حفظ الرحمان

Lady E يقول...

romansy : اللهم أميــن ربنا يستجيب دعائك الجميل ده يا رب

وياريت فعلا نشجع بعض على طاعة ربنا سبحانه وتعالى

والشكر لله

شكرا على زيارتك الجميلة للمدونة مرة تانيه

هانى زينهم يقول...

مش باحب احلف بس والله انا كتبت اسمك بالانجليزى 3 مرات وملف الword ما رضيش يرفعه على النت وده طبعا لعيب فى فنياتى على النت وكتبته بالعربى لقيت فى حد واخد الاسم ده بالعربى بس انت عارفة انك من الناس المهمين اللى باستنى تعليقهم ولو انه مش بيبقى على طول . وده بيبان من تعليقى فى الاول دايما عندك والحقيقة اتكسفت اطلب اعرف اسمك الحقيقى عشان اكتبه بس . اسف لده تانى بس اكيد انت مصدقانى والا هاحذف المدونة كلها !!
نورتينى بجد ويارب تكبرى بقى عشان اسمك يطلع المرة الجاية .

Lady E يقول...

Sometimes : ربنا يكرمك يا قمرايا يا رب اللهم أمين يا رب الحلم ده يتحقق ليا وليكي ولأهلنا ولكل المسلمين

وبالنسبة للرياء فأنا قلقانة جدا من الموضوع ده في اي حاجة بعملها في حياتي مش بس في المدونة

وربنا يثبتك يا رب ويزيدك تقرب منه يا رب العالمين وادعيلي دايما يا قمرايا ربنا يكرمك

وبالنسبة للاستفسار ده علشان بيظهر عندك في الfeedjit اني بره مصر ولا ايه
انا فعلا بره مصر بس راجعة مصر قريب ان شاء الله تسلمي على السؤال يا قمرايا ونورتي المدونة

Empress appy يقول...

تصدقى جسمى قشعر بجد والله العظيم
يا رب اجعلنا من اهل الجنه

Lady E يقول...

هانى زينهم : حصل خير يا مستر

وانا طبعا مصدقة كلام حضرتك

متشكرة جدا على كلام حضرتك لأنه بجد شهادة اعتز بيها

Lady E يقول...

Appyplanet : دي حاجة اعتز بيها لما كلامي المتواضع يأثر فيكي يا قمرايا

ربنا يستجيب منك يااااااارب

دمتي بخير دائما يا أحلى Appy

غير معرف يقول...

الله كلامك جميل اوى
و الله أنا شايفة إن الناس الكويسة كترت و إن شاء الله تلاقى اللى يرفعك لفوق و يدخلك الجنة بس أنتى ادعى
و اشتركى فى أعمال خيرية ده حيقربك
عارفة أنا مشتكرة فى جمعية صناع الحياة اللى فى الشيخ زايد عندنا
و ده بيتيح أنك تتعرفى على ناس جميلة كل واحد ليه خبراته و معلوماته الجميلة اللى حتفيدك جامد

و غن شاء الله يجعلنا كلنا من أهل الجنة

Lady E يقول...

انا ودماغي : كلامك الاجمل يا قمرايا

ربنا يتقبل دعائك يا رب

دمتي بخير دائما