الأحد، 29 يونيو 2008

كان هيحصل إيه؟؟!

متخيلة لو بهبهات (ابهات)الجيل الغلبان بتاعنا مقابلوش مامات الجيل الغلبان بتاعنا برضه كان ايه اللي حصل؟؟؟!!

كان اللي هيحصل كالأتي : ( لأ مش أغنية حماده هلال)
أووولا : مكانوش هيتجوزوا وبالتالي مكانوش هيخلفوا حضاراتنا الجيل الغلبان ( دماغ والله ايه التفكير العاقل و المتعقل ده )
ثانيااااااا : مكنش جيلنا هيبقى موجود وبالتالت ( ما انا قولت بالتالي قبل كده ) مكنش هيبقى غلبان وكحيان وصدمان وعدمان وبتنجان ,مكنش هيبقى فيه زيادة سكانية ولا زحمه ولا دوشة بدليل شوفو الافلام بتاعت التلاتينات لغاية السبعينات كانت هدووووء ومفيش زحمه والحياة ميت فل وتمناشر (شوفتو جيلنا الغلبان عمل ايه في الدنيا لما جالها تبعا مش أي حد)
رابعا :
مكناش احنا الشباب هنحس بالشيخوخة واحنا في أحلى مراحل الحياة الفترة اللي بيسموها ربيع العمر بقت صيف العمر حر ودوشة وزحمة أو شتاء العمر كلية وامتحانات وبرررد وانفلونزا
حد هيسألني طب فين
ثالثا هقولو محبش الارقام الفردية نعم في اعتراض ولا حاااجه(طبعا في ناس خدت بالها وفي ناس ولا على بالها هههههه )
سادسا :
أيوة سادسا صح مش خامسا
مكنتش كل بنوتة هتمني نفسها بفارس الأوهام اللي جاي سايق عربية كرولا بيضا موديل سنة 2122
(حلو الرقم ده ههههه )وفي الأخر يبصبص لغيرها يوم الفرح او في شهر العسل ( عسل اسود على الرجالة اللي بالشكل ده ) وبعدها قدامها حلين تخلع او تتخلع والخلعان مش معناه الطلاق بس دي ممكن تخلع من الدنيا كلها يعيني ( تبعا المرأه رقيقة وقارورة بتنكسر بسرعه) ولو خلعت كده من الدنيا وقتها تبقى خسرت الدنيا والأخره !!!!
عاشرا : مكنش كل شاب وشابة بيفهموا جالهم احباط ومش فاهمين ومكبوتين اجتماعيا وسياسيا واقتصاديا فبينطوا على أول مركب متهالكة وطالع عنيها أو بيقعدوا يستنوا الفرج اللي عمره ما هييجي ( ايه الاستكئاب ده )
وزي ما بتقول الاغنية الشهيرة المشهورة بتاعت ثلاثي أضواء المسرح :
(( لو كانوا سألونا قبل ما يولدونا عارفين كنا نقول ايه ,كنا نقول اعتقونا قبل ما تولدونا في العهد اللي احنا فيه , يرضيكي يا ماما حوا , يرضيك يا بابا أدم ))
ولكن في الأخر ده قدرنا ومشيئة ربنا سبحانه وتعالى وأكيد احنا مخلوقين في الزمن الدميل ده لحكمه يعلمها رب العالمين
الدنيا مش وحشة اوي كده دايما احيانا بتكون
وردي وردي وردي وردي على رأي صفاء أبو السعود بس انتو بصولها بنظرة
طفلة مش عايزة تكبر

هناك 7 تعليقات:

كـــيــــــــارا يقول...

نونااااااااااااااااا

توبك محتاج يتفصص

ممممممممممممم

انتي قلتي بلاش فردي طب ايه اولا دي
شلتيها من الحساب

بهزر معاكي
عامه كلامك محتاج مناقشااااااااااااااااات انتظريني ياقمر ي

Lady E يقول...

ههههههههه

نورتيني يا نيمو بجد

اولا انا بحب اولا جدا ده من اعز اصحابي هههههههههه مش معتبراه فردي خااااالص

وانا فانتظراك يا نيمو

بس اوعي تتأخري يا قمرايا علشان مأغنبش انا في انتظااااااارك مليييييييت

Unknown يقول...

السلام عليكم ورحمة الله وبركاته
جميل.>>>>>بوست<<<< جميل
وكلام فى التمام
سلام

Lady E يقول...

وعليكم السلام ورحمة الله وبركاته

نورتي البلوج والبوست يا دكتر نورا

وأنا سعيدة جدا بزيارتك وكلامك الجميل

وأتمنى تنوريني في البلوج دايما

maiosha يقول...

السلام عليكم

إزيك يا جميل كويس إنى لحقت البلوج من أوله كده.. مع إن من أوله كأبة خالص

بس اول مرة أحس بالكأبة وأنا مسخسخة من الضحك .. إنتى دمك زى العسل .. بجد رهيبة

دى صحيح أول زيارة ليا بس اوعدك متبقاش الأخيرة

سلام مؤقتا

Lady E يقول...

وعليكم السلام ورحمة الله وبركاته

معقول انا مش مصدقه عنتيني ميوشه هنا منوره يا قمرايا
وكويس انك نورتيني في البلوج من اوله اصل البلوج في الاول بيبقى لذيذ وايه كريمه كريييييمه ههههههههههه

وشوفتي بقى اهو البوست اتنين في واحد زي الشانفو بالظبط مش محتاج بلسم ولا اي حاجه

وهستنى زيارتك دايما يا ميوشه وهسيب باب البلوج مفتوح علشان تيجي في اي وقت

نيللي علي يقول...

انا شايفها من وجهة نظر مختلفة,أن الام والاب مش هم السبب ,أن شايفه ان المكان هو السبب (وطنا) ..انهم ولدونا فى وقت اللى بيحكمنا بيسرقنا ,لكن زمان كان اللى بيحكم أهل مصر راجل ..لكن دلوقتى مين ..(.....)