ربك بكرة يعدلها في أوانها

دع الحزن ينتقص من روحها ما شاء فلقد هبت عليها عواصف ماضية جعلتها تتعلم أن تذهب بحزنها الى مداه فلا يستطيع إيقافه أحد ولو حاول

ضحايا بلادها المتكررين بطرق مختلفة يذكرها بالعراق ويخيفها كطفلة عاصرت الحرب في بيروت

أحلامها المخنوقة

حب ضائع

حقوق تائهة

تشعر أحيانا أن السعادة والحب ضلا طريقهم إليها وأصبح الحزن يريحها أحيانا بقدر ما يؤلمها ويؤرق منامها

نكبات الوطن وجراحه تذكرها بنكبات وجراح روحها

وبرغم إحاطة الظلام بالحاضر والمستقبل تمشي فيه بثقة وتحمل شمعة نورها ضئيل تتفائل بها وتؤمن إيمانا عميقا بأن ربك بكرة يعدلها في أوانها .

--------------------------------

ع الهامش : شكرا يا نيللي ع الصورة :)

تالت يوم حداد على مصر

أنا مصرية زملكاوية وأعلن احتجاجي واعتراضي عن عدم تأجيل ماتش الزمالك النهاردة ودي جليطة وقلة ذوق وعدم احترام لمشاعر المصريين والنهاردة تالت يوم حداد على الضحايا اللي ماتوا في أحداث أول امبارح

نفس الأسلوب القذر اللي كان بيتبع قبل كده أيام غرق العبارة ومشاكل الحضري وماتشات الأهلي ومفيش احترام لمشاعر أي حد وأنا كزملكاوية مش هتفرج على الماتش وميهمنيش لو الزمالك فاز في وسط المصايب اللي مالية مصر وقمة الغباء ان بعض الأهلاوية النهاردة بيقولوا رايحين نتفرج ع الماتش علشان نشمت في الزمالك !!!!

من ناحية في عنصرية ففي عنصرية في مصر بين أطراف كتير مش بس الديانات المختلفة وطول عمر المسؤلين مخوفننا من بعض كمسلمين ومسيحيين بس الأحداث الأخيرة ملهاش علاقة بالمسلمين ولا بالإسلام لا من بعيد ولا من قريب ومش هفضل أقول ديني دين السلام ورحمة للعالمين مش بس للمسلمين وحدهم تعبت من كتر ما التهم بتترمى عالإسلام

مستحيل المسيحيين المصريين يضربوا الجيش ولو -افتراض 1%-حصل ف هما اتهد ليهم كنيسة في بلدهم حد فاهم ده يعني ايه؟ يعني دار عبادة اتهدم بدون وجه حق مخالف مش مخالف مش موضوعنا وكان في 100 حل غير هدم المبنى اللي اخواتنا بيصلوا لربنا فيه

اللي حصل بإجماع كل أصدقائي وصديقاتي تدبير الفلول وشوية الحرامية اللي في السجن ولسه معاهم فلوس ونفوذ وعايزين مصر تشيط ويلهونا دلوقتي عن محاكمتهم وعن بناء مصر بس بإذن الله ربنا مش هينولهم اللي في بالهم

أنا حزينة وموجوعة زيي زي باقي المصريين البقاء لله وربنا يعدي الأيام دي على خير

تاني تاني تاني

"تاني تاني تاني راجعين للكلية تاني للنار والعذاب من تاني من تااااااااااااني " عاااااااااا عااااااااا

柖
من أول لما الحمد لله اتخرجت من كلية الهباب قسم لغة الفرنجة وأنا حلفت اني مش راجعالها تاني كطالبة
ممكن أرجعلها دكتورة في الجامعة بس :)

سنة وكام شهر فاتوا عملت فيهم بحث عن الدبلومات المختلفة في مصر والماستر في الجامعة الأمريكية وبره مصر في جامعات بريطانيا وأمريكا وطبعا اللي وصلتله أن جامعات بريطانيا جامعات عريقة لكن عايزة مصاريف مهولة خصوصا بالنسبة لبنوتة عايزة تعتمد على نفسها

لما رجعت مصر طبعا كان كل الدبلومات في القاهرة واسكندرية التقديم ليها قفل :(
وأخيرا فتحت دبلومة ترجمة تحريرية وفورية وتتبعية في كليتي المبجلة السنة دي ده الى جانب الدراسات العليا الثانية
في الأول كنت فرحانة جدا ان بقى في دبلومة في كليتي وكنت في جمهورية المنوفية وعايزة أرجع جمهورية دمياط بأسرع وقت علشان أقدم فيها لكن النهاردة بقى نزلت أرض الواقع ورجعت الكلية علشان اسأل على الدبلومة ولقيت غيري بنوتات كتير بيسألوا عنها
دكتر أشرف جاوب على كل أسئلتي وأسئلة البنوتات التانيين وعرفت أسم المواد اللي في الدبلومة
مواد مكلكعة :) وغير كده كمان نفس الدكاترة اللي كانوا بيدرسولي في تالتة ورابعة هيدرسوا الدبلومة
حد متخيل دكاترة عندهم 60 سنة فما فوق هيفهموا جيلنا ازاي؟
دكتورين اتنين بس اللي يعتبروا متميزين وكويسين وسنهم قريب من سننا هما الجيل اللي قبلنا برضه بس بيفهموا
أما باقي الدكاترة برغم انهم دكاترة لكن في الضياااااااااع وفي فرق جيلين بيننا وبينهم يعني لو قولتلهم فيس بوك أو تويتر أو ياهو هيفكروا اني بشتمهم


" أه يا ليلي أه يا ليلي ياااا حضن السهارى يا للي شوفت في عنيا الدموع وأنا دايما راجع من الامتحانات وحيد
يااااااااا ليل "

أنا دلوقتي محتارة جدا دول سنتين مش سنة واحدة ومش عايزة أجي في السنتين الاقيني شايلة مادة أو تقديري مقبول وأفضل أعيط وأقول ايه بقى اللي هيواسيني بعدما انهدت امالي
وفي نفس ذات الوقت ربنا سبحانه وتعالى هو اللي عمل الدبلومة في كليتي في التوقيت ده اللي انا بدور فيه على جامعة كويسة أدرس دبلومة فيها


ملحوظة : اللي معاهم دكتوراه مبيتعينوش في الكلية لأن مفيش وظائف أصلا – مستقبل مشرق ومتفائل-




ملحوظة تانيه : شكرا يا مانو لأنك قولتلي على موضوع دبلومة الترجمة ده من سنتين :) بس أنا لسه فاكرة تعليقك

ملحوظة تالتة : الأغنية المصاحبة أغنية موعود لعبد الحليم

مواقف حصلت بجد :)

مساء الخير

قبل الثورة كنت بجري جدا على الطريق السريع وأنا مسافرة ومع ذلك مكنتش بوصل الا متأخر وبعد الثورة أنا ماشية بطيء في وسط السواقين دولا مجانين ومع ذلك وصلت بدري قبل المعاد المعتاد بساعة :) برغم ان كان ممكن نعمل 55550 حادثة بس ربنا بيسترها واحنا ماشيين ببركة دعاء الوالدين وبستر ربنا مش أكتر

بحب أوي لما تحصل لي مشكلة أضحك بعدها ودي حاجة جديدة حباها فيا :)

هس السلعوة طلعت بجد
أحمد ابن خالتي عنده كلب اسود في اسود وشبه الكلب اللي بيجي في اعلانات فودافون
الأطفال كانوا بيلعبوا معاه وفأجه سمعناهم بيصوتوا وبيصرخوا بهيستيريا قلنا اكيد الكلب عض حد المهم كانوا بيصرخوا لأن الكلب جري عليهم وكان عايز يعضهم :)
طبعا انا قولت مش هتعرض للكلب ده خالص :) لكن الحظ عارف اصحابة كنا في بيت احمد ونازلين انا وخالتي ومامتي وأحمد ماسك الكلب وبيمشي جنبه وبيلعب بالكورة
المهم مامتي وخالتي مشيو من قدام الكلب عادي جدا وأنا بمشي وراهم زيهم بالضبط لقيت الكلب بصلي وجري عليا وبيهوهو كمان قولت بس انا هتعض لا محالة والمفروض بقى الادرينالين يشتغل وأجري مثلا :) ده العادي لكن اللي حصل العكس تماما حسيت اني اتسمرت في مكاني وغمضت عيني وصرخت - زي الأطفال بالضبط- ف أحمد ربنا يسامحه هو وجوز خالتي مسكوا الكلب
المهم اني كنت بكلم كيكي وقتها ويا عيني قلبها وقع في رجليها :) معلش يا كيكتي الصديق وقت الضيق :)
طبعا فضلنا نضحك بعدها عالموقف ده
فريسة أنا ولا ايه؟ :) وقال ايه كان مسمي السلعوة دودو
الكلب ده بقى مسمينه بابسي .

امبارح ركبنا مع سواق تاكسي قولناله الكنيسة لو سمحت فبصلنا واستغرب يعني ازاي محجبات ورايحين الكنيسة؟ فقلناله رايحين لدكتور عيادته هناك فقال لنا وملقاش الا الكنيسة يعني اللي يفتح جنبها وفضل يتكلم برخامة على المسيحيين فأنا قولت بس يبقى متطرف والجدال معاه مش هيفيد واحنا نازلين من التاكسي لقيناه بيقولنا على فكرة أنا مسيحي :))) وكنت عايزة اي دليل على كلامه فلقيت صليب صغير على المراية الصغيرة اللي السواق بيشوف فيها اللي وراه :) قال لنا على فكرة انا بحب الناس تغلط في المسيحيين اللي كان راكب معايا قبلكو كنت بقوله المسيحيين يا عم مش هيدخلو الجنة وعالم مش عارف ايه وهو نازل قولتله انا مسيحي فزود لي الأجرة الضعف :)) وبعدين كلنا مصريين وكان ناقص يقول الجيش والشعب ايد واحدة
والهلال مع الصليب قشطة ومربة وحليب :)

الزمالك اليومين دول نصفنا :) ماتشين ورا بعض بيفوز فيهم :) عقبال الباقي قادر يا كريم
رحنا عند دكتور زملكاوي وكان لسه الماتش مخلصش قال لنا استنو بقى لما الماتش يخلص وقعدنا انا والدكتور زملكاويين فبنشجع الزمالك :) وفعلا الماتش خلص بفوزنا
المشكلة بقى ان الدكتور طلع بصري وأصعب شخصية لطبيب انه يكون بصري لأن البصريين مبيحبوش التفاصيل ومش عايز اللي قدامه يتكلم فكل ما أقول حاجة يقولي ألف سلامة :) لغاية لما طلعنا من العيادة وكل ما اتكلم مع حد أقوله ألف سلامة الف سلامة :)
وجبت الأدوية اللي كتبهالي واذ فجأتن الاقي الأعراض الجانبية ممكن تعمل لي مشاكل كتير ف اتصلت بيه وقال لي متقرأيش الاعراض الجانبيه وخدي الدوا لو سمحتي قولتله انا لازم اعرف هاخد ايه قبل ما اخده -وبدأت انفعل- قاللي مفيش دوا في الدنيا الا وليه أعراض جانبيه حتى الفيتامين لو اخدتيه كتير والاعراض الجانبية دي لو استخدمتي الدوا فترة طويلة وفي أخر كلامه قاللي ألف سلامة فمقدرتش مضحكش بصراحة :)

اكتر حاجة بحبها في مصر قعدتنا مع بعض للفجر نتكلم ونضحك -وناكل مانجا- :)
امبارح كنا بنتفرج على برنامج كلام من القلب والحالات اللي بتتصل كلها بيقولوا ركبتهم بتخونهم ومبيقدروش يقفوا عليها
وفجأة بنت خالتي قامت قايلة ايه الركب الخاينة الغدارة بنت التيت دي هي قالت كده وانا وهي وبنت خالتي التانيه صحينا البيت كله من ضحكنا وبعدين جبنا المانجا وقعدنا نتكلم مع بعض ونضحك لغاية الفجر

أخر يوم رحت فيه كورس دكتور ابراهيم الفقي روفي بنت عمي كانت معايا في الطريق للكورس عندها سنة وكام شهر حضنتني ومسكت فيا مكنتش اعرف ان حضن الأطفال حلو أوي كده للدرجة دي بيدي حنية وحب

من يوم ما رجعت مصر وفي حاجات كتير حلوة بتحصل لي - ده بغض النظر عني صحيا - نفسي أفضل في مصر على طول لكن كل شيء بأوان وكل شيء مكتوب

كل شيء بأوان

صورة دكتر ابراهيم في قاعة اوركيدا النيل في دمياط 22-9-2011

هذا الرجل أحبه :)

9 سنين فاتوا من قبل ما حد يسمع في مصر عن التنمية البشرية وأنا بكل اهتمام بتابع دكتور ابراهيم الفقي بقرأ كتبه وبشوف محاضراته في التلفزيون وفي السنين الأخيرة كنت كمان بشوف البرامج اللي بيعملها وفيديوهاته عاليوتيوب وبنصح كل الناس اللي أعرفهم انهم يروحوا يحضروا الدورات التدريبية اللي بيعملها وأنا نفسي بسبب الغربة وأشياء أخرى مكنتش بعرف أحضر

زي ما قولت قبل كده اني دعيت ربنا سبحانه وتعالى دعوتين والحمد لله ربنا استجاب الاتنين :) أه لو كنت أعرف ان الدعاء مستجاب في الوقت ده كنت دعيت كتييييييير

اول لما نزلت دمياط لقيت اعلان كورس دكتور ابراهيم الفقي مساعد ممارس في البرمجة اللغوية العصبية وبالرغم اني عارفه حاجات كتير وأخدت كورس قبل كده عن البرمجة اللغوية العصبية NLP الا اني كان لازم أروح ده دكتور ابراهيم أخيرا حلمي هيتحقق وأقابله

فضلت كام يوم مش عارفه أي حاجة عن الكورس ولا مواعيده شوفت بس الاعلان ومش معايا الكتكوتة علشان أروح لمكان ما شوفت الاعلان وأشوف هو فين ولا امتى؟

المهم عرفت ان المواعيد وكل حاجة في المركز الأوروبي طلعوا عييييييييينيييي علشان احجز تذكرة وقالولي في الاول مفيش تذاكر ورحتلهم 4 مرات علشان أحجز مع ان المفروض مرة واحدة بس وأحجز وخلاص بس كنت بقول العلم لا يكيل بالبتنجان لازم أتعب شوية وبعدين ده دكتور ابراهيم وهشوفه أخيرا وجالي برد شديد لسه مراحش لغاية دلوقتي وكان أصعب يوم هو أول يوم كورس ومع اني مبحبش أخرج من البيت وأكون مع الناس وأنا عندي برد بس رحت :) وحضرت أول يوم وكل الأيام لدرجة أن داليا قالتلي يا بنتي نفسي أشوفك من غير البرد ده :)

المهم أول يوم كان في مدرب وحش جدا ومش هحضرله تاني ابدا لأنه لاغي شخصيته ومطورش نفسه من أيام الثلاثينات ولا حاجة كان بيجيب أمثلة لناس لاعيبة كرة وممثلين من زمان أوي أغلب جيلنا مش عارف مين دول أصلا كان نفسي أقوله انت بتخاطب مين؟

تاني يوم المدرب أحمد قدوس اللي عجبني فيه أنه مبيحاولش يتقمص غيره ودمه خفيف وبيوصل المعلومة بطريقة تتفهم ومتتكلكعش

وهو بنفسه قال ان الانسان الناجح هو اللي بيشوف مدارس كتير وبياخد من كل مدرسه اللي يتناسب مع شخصيته ووقعلي على كتابه :)

دكتور ابراهيم بقى اليوم المشهود للأسف اتأخر ساعتين عن معاد التدريب المفروض كنا نبدأ الساعة 1 بدأ هو الساعة 3 والنور كان قاطع قبل ما يجي والقاعة كانت حر جدااااااا وأول لما دخل القاعة وبيقولنا انتو دايما تتأخروا؟ النور قطع فنزل تاني من على المسرح وبعدين طلع تاني بعد لما النور جه وكان مرهق جدا لدرجة كبيرة ولأني مجربة طريق القاهرة دمياط ده كتير فكنت حاسة بيه المشوار فعلا متعب حتى لو في عربية مكيفة بس الطريق وحش جدااااا

اول يوم كنت طول الوقت عايزة أمسك دكتور ابراهيم مش مصدقة انه فعلا حقيقة :) أخيرا مش من كتاب ولا من ورى شاشة تلفزيون ولا من ورى شاشة لاب حقيقي أخيرا

ودخلت وقعت كتابه وكان نفسي جدا أسلم عليه كان نفسي جدااااااااا جدااااا أسلم عليه لكن للأسف منعني حاجتين انه كان مرهق جدا ملامحه ونظرة عينيه كان باين عليها الارهاق وممكن كان يسلم عليا بفتور وساعتها كنت هتعب نفسيا جدا لو ده حصل وكمان الأوضة اللي كان بيوقع فيها الكتاب كان فيها مدير اعماله وحد من عيلته وحد من الشرطة بس شكل رتبته كبيرة ومدير المركز الكندي :) ف اتحرجت أكيد وأكتفيت اني أبص لملامحه بس واتأكد انه حقيقة :) لأنه مش أي حد أنا بعتبره الأب الروحي ليا - وده سر ميطلعش من بيناتنا- :)

النهاردة بقى اليوم فات زي الحلم فات بسرعة أوي ودكتر ابراهيم كان مرتاح أكتر من امبارح ومع ذلك باله كان مشغول أو عالأقل ده اللي حسيته وحاولت أجيب كارت شيك كده أكتب لدكتر ابراهيم كلمة رقيقة لفيت دمياط كلها في وقت الاستراحة في الكورس ملقتش :) وبعدما ما سافر لقيت :( فكتبت اللي عايزة اقوله في ورقة عادية وطبعا الشوباب ونفسي أقول عليهم الشباشب بس بلاش كانوا محاوطين دكتر ابراهيم بطريقة متخليش ولا بنوتة زي حالاتي تعرف تقرب منه وتسلم عليه وتديله الكلمة اللي كتبتها علشانه يمكن تخفف عنه ان في ناس مش فاهمينه وحاولوا يقتلوه يمكن وفعلا رحت لعند عربيته وملحقتش أكلمه برضه لنفس السبب خالد الذكر :) مدير أعماله وولد كان بيكلمه مقفلين على باب عربيته وأنا مش من النوع اللي ممكن أتقبل أن مدير الأعمال يشدني زي الأولاد مثلا فقولت لمدير أعماله ممكن أفتح الباب وأدي الكلمة دي لدكتور ابراهيم؟ قاللي لأ خلاص هو قفل الباب قولتله طيب عالأقل من الشباك قاللي طيب هاتيها لي وأنا والله العظيم هديهالو قولتلو أكيد؟ ف رد ولد جنبي قالك والله العظيم فمدير الأعمال بصلي بصة حد عايز يخنق حد :) فقولتله أكيد؟ قاللي والله العظيم هديهالو - كده مرتين - :) فجت داليا صاحبتي وقالتلي خلاص بقى يا إيناس الراجل حلف قولتلها خلاص يا داليا أدتهالو هو لو مودهاش لدكتور ابراهيم ربنا هيعاقبه ده حلف مرتين :) والتأكيد ده لأني شخصية حسية بحب أحس بالأمان وبعدين أسهل حاجة على مديرين الأعمال انهم ميوصلوش أي حاجة لأي حد وبعدين نفس الولد الرخم اللي جنبي قال لمدير اعمال الدكتور طيب انا عايز رقم تليفونك قالوا طيب خده وانا كمان كنت هاخده مع اني مكنتش هكلمه لأنه غلس بس مش عارفه طلعت الموبايل ومدير الأعمال قال 010266 ومكملش وطار عالعربية والعربية طارت وقدامها عربية بوليس متخفية والعربيتين أسود ف أسود :) ومشينا انا وداليا نضحك مش قادرين نمسك نفسنا من الضحك وفضلت أقولها 010266

وعدت الأيام بسرعة زي كل حاجة حلوة بتفوت بس مش دي النهاية ان شاء الله

ربنا يبارك في عمره بس أنا خفت لما افتكرت حديث الرسول صلى الله عليه وسلم :(أعمار أمتي ما بين الستين والسبعين ، وأقلهم من يجوز ذلك ) وهو عنده 61 سنة ربنا يبارك في عمره

وعالعموم انا فعلا الحمد لله سعيدة بالكورس ده ومش هسافر ان شاء الله الا وأنا معايا أكبر عدد من الكورسات والعلم ان شاء الله

الحمد لله كما ينبغي لجلال وجهك وعظيم سلطانك والحمد لله الذي تتم بفضله الصالحات

شكرا يا رب

فاصل ونواصل

أخيرا وبعد عناء عرفت اعمل أب لود لصورة من صور رحلتي من مسقط لمصر -الصورة اللي فوق دي- وده طبعا بعدما صغرتها علشان بلوجر يتكرم ويتعطف عليا ويعملها أب لود

النت عندي بطيء وانا عندي برد للمرة التانيه على التوازي في أقل من شهر :) وكله من روفي بنت عمي اللي كانت عمالة تعطس على طول وانا بلعب معاها وبجري وراها بالمناديل وكمان من تغيير الجو وبكده المناعة اللي عندي مش شايفة شغلها كويس وأي برد او انفلونزا ماشيين بيتفسحوا بتنادي عليهم زي ما تكون رادار وبيلقط الانفلونزا والبرد

المشروب اللي فوق ده تشوكلت كريم من ستاربكس كنت في مطار البحرين ترانزيت وكان قدامي ستاربكس وطيارتنا اتأخرت ساعة فوق الساعتين الترانزيت فطلبت التشوكلت كريم ومع اني جربته قبل كده في عمان لكن في البحرين طلع احلى بكتييييير نفس الطعم بس التلج كان مجروش كويس - حلوة اللغة العربية الفصحى دي -

ولأن المشروب ده رائع وفوق الفظيع وبيحسن المود ومفيش ستاربكس في دمياط وانا مفتقداه وكمان ستاربكس مصر مبيعرفوش يعملوه كويس فأنا بهدي لأي حد هيشوف البوست ده كوباية التشوكلت كريم اللي فوق دي وللي بيحبوا القهوة بهديهم موكا فرابتشينو وربنا يسهل وأخف واكتب تاني بعيدا عن التهييس

------------------

ملحوظة مسحت البوست اللي فات واحتفظت بالتعليقات وبشكركم من كل قلبي على تعليقاتكم اللي حاليا مش هقدر ارد عليها

جامعة المنصورة فرع دمياط كمان وكمان

بدأت رحلة السفر النهاردة وحاليا مفيش حواليا غير صحرا عاليمين وصحراعالشمال ودرجة حرارة 39 درجة

الصحراء ليها قدرة غريبة على انها تفكرنا بمواجعنا وخيبات الأمل خصوصا لو كانت حديثة وليها القدرة كمان انها تفرحنا

وده في حالة لو كنا فرحانين

علي محمدين الزقزوق عنده 17 سنة لسه شاب وبيبدأ حياته بخطوات ثابته

هو كل امل اهله متدين وحافظ القرآن ومتميز في دراسته وكل الناس بتشهد بحسن أخلاقه

اتخرج من الثانوية العامة وأهله فرحوا بيه لما دخل كلية التربية علشان هيبقى مدرس أد الدنيا ومش كده وبس ده أملهم فيه انه يبقى معيد في الكلية ودكتور كمان

أصله طول عمره متميز وعمره ما زعل حد منه وأول لما سمع عن تغيير فساد الجامعات كان اول واحد يشارك فيه علشان يغير الفساد ويدافع عن زملائه اللي الفساد قتل طموحهم وأحلامهم البسيطة

وهو لسه بيبدأ مشواره الجامعي في سنة اولى كلية التربية قسم لغة عربية جامعة المنصورة فرع دمياط اتفاجئ وزمايله اتفاجئوا اكتر منه انه رسب في مادة وازاي وهو اللي كان بيراجع لهم وفاهم الكتاب وبيشرحه عن ظهر قلب؟

ف راح للدكتور في الجامعة يستفسر انا حليت ايه غلط فال...... بكل برود قال له : خلي المظاهرات تنفعك!!!

علي مستسلمش وذاكر اكتر ودخل الدور التاني في المادة دي وكان بيشجع كل زملائه وبيحمسهم

ومرت الأيام وجه الترم التاني واتفاجئ علي ان عنده 6 مواد رسوب وباقي المواد امتياز وجيد جدا !!!!!!

طبعا ده بسبب انه ضد العميد وأكلي احلام الطلاب اللي بيطلق عليهم للأسف دكاترة

تدهورت حالته الصحية لغاية لما توفي اول يوم العيد البقاء لله والموت علينا حق

لكن انا كلامي هنا هو احنا لحد امتى هنفضل نشوف نموذج خالد سعيد بيتكرر حتى بعد الثورة؟

هي جامعة المنصورة دي واخدة سند رسمي انها تقتل فينا براحتها ولا ايه؟ ده حتى الدكاترة الشرفاء فيها بيتأذوا !!! انا مش فاهمه بجد في ايه الناس دي جزارين ولا دكاترة ومين اللي ادالهم دكتوراه اصلا يغور العلم من غير أخلاق

كان ممكن انا أو أي حد نبقى في مكان علي محمدين الزقزوق اللي ممكن متشوفش اسمه في الجرايد

ولا في الاعلام لأنه شاب دمياطي ملوش ظهر مش ابن حد معروف وحالته بتتكرر كتير

المصيبة اني فكرت كتير مفيش حاجة تثبت ان الأشخاص دول مش هقول الدكاترة لأنهم ميستحقوش اللقب

هما السبب في وفاته !! الحل اللي انا شايفاه ان أوراق علي في الست مواد تتصحح ويتقارن خطه بباقي

المواد اللي حل فيها قبل كده ولو طلع فعلا حل عالأقل حل ينجحه مش امتياز زي مستواه

الدكاترة دول يتسحب منهم لقب الدكتوراه ويتأهلوا نفسيا وتربويا علشان يعرفوا ان الطلاب اللي قدامهم ولاد ناس ودمهم مش رخيص

هو احنا خلصنا من الضرب في المدارس والعاهات علشان يطلعلنا ناس بتموت الطلاب في الجامعات؟

وبعدين ازاي كلية التربية والأداب بيحصل فيهم كده الكليات اللي بيسموها بره كليات العلوم الإنسانية

انساااااااااااااااااانية

دي مش أول مرة أشوف حد بيتظلم في كليات جامعة المنصورة فرع دمياط وجامعة المنصورة نفسها

وانا نفسي اتعرضت للظلم اكتر من مرة في الجامعة دي وبعدين هيفضل الحال كده لغاية امتى؟

علي محمدين الزقزوق ممكن كان يبقى أي حد فينا والمصيبة ان دي مش حالة منفردة

انا مقدرتش اسكت وكان لازم احكي حكاية شاب مات مقهور وأهله ملحقوش يفرحوا بنجاحه وكل ده لأنه في جامعة مصرية

البقاء لله

والأيام بتجري ...

كل سنة بقول مش هكتب عن العيد وخصوصا السنة دي لأن عندي 100 حاجة أعملها قبل العيد ومش فاضية اكتب والأجواء العالمية متشجعش ع الاحتفال بس برضه حبيت أعيد عليكم وعلى نفسي

يمكن لسه مش حاسة بفرحة العيد بس أول يوم العيد بيبقى حاجة تانيه وكأن ربنا سبحانه وتعالى بيخلط الفرحة مع الهوا اللي بنتنفسه أول يوم عيد مع تكبيرات العيد

للأسف معملتش طقوسي بتاعت كل سنة قبل العيد غير اني جبت لبس العيد :) على اعتبار ان في نص رمضان محل الملابس كان هيبقى فاضي بس طلع العكس وبرضه كان في زحمة :)

لسه قدامي رحلة طويلة ومش عارفه هقدر ارجع للمدونة امتى وعلشان كده حبيت أخر حاجة اكتبها تكون

عن العيد

عايزة اعيد على كل الناس في الدنيا وأقولهم أرجوكم افرحوا في زمن الفرحة فيه عزيزة جدا

عيد سعيد عليا وعلى مامتي وبابايا

وعلى صحباتي

وعلى متابعين المدونة اللي عددهم وصل ل104 :) لغاية دلوقتي

بعيد عليهم نفر نفر بالرغم ان في كتير منهم معلقوش قبل كده بس انا سعيدة بمتابعتكم للمدونة بجد وعيد سعيد عليكم

عيد سعيد على مصر اللي بحبها والمصريين اللي بجد

ملحوظة اللي عايز يبتسم من قلبه يشوف البوست ده

http://nightpiper.blogspot.com/2011/08/blog-post_27.html

وحشاني يا متعبة في الحرب او في السلم يا بعيدة وقريبة

قبل ما أرد على تعليقات البوست اللي فات واللي قبله وقبل ما أكمل الجزء التاني من اقتباسات الرواية وقبل ما أنسى

النهاردة عملت بطاقة جديدة
باللغة العربية الفصحى بطاقة هوية لفت نظري حاجات كتير وكنت مش مرتاحة وأنا داخله مركز شرطة وكنت بتحامى في بابا وشوية شوية همسك في هدومه من كتر الزحمة
المهم دخلت أعمل بطاقة بابا جاب لي الأوراق المطلوبة للبطاقة وجواز السفر والفيزا - الفيزا بتاعت البنك مش بتاعت السفر- وبالرغم من الزحمة الا انه كان فيه نظام وكان في أول لما دخلت أربع ضباط ولما لقوا المكتب زحمة خرج منهم 2و2 بس اللي فضلوا يخلصوا اجرائات البطاقات
وعجبني جدا انهم طبقوا مبدأ
Ladies first
يعني خلصوا بطاقات كل البنوتات والنساء عموما اللي كانوا موجودين الأول
وتعامل الضباط معانا كان قمة في التحضر والنبل والذوق طبعا أنا بفتكر كل اللي بسمعه عن الأقسام وضباط الشرطة في مصر ولا على ايه ما انا مجربة تعامل شرطة المرور الله لا يسامحهم ومش ناسية الرائد اللي كان بيوقف البنات بحجة انهم مش رابطين الحزام علشان يرخم عليهم ويفرد عضلاته ويستهبل شوية بس حظه ان انا والبنوتة اللي كانت واقفة معايا مدينالوش فرصة يعاكس
المهم طبعا الإجرائات مأخدتش ربع ساعة مع ان المكان زحمــــــــــــــة جدااااااااااا
والاجرائات غاية في السهولة والسرعة البصمات بتتاخد بجهاز البصمات مش زي ما بشوف في الأفلام في الفيش والتشبيه حبر وحاجات غريبة
وكمااااااااان فلوس البطاقة بتتاخد بالفيزا في ثواني بدل ما تتأخر على الخزنة ويقولولك الخزنة قفلت فوت علينا بكرة يا سيد
المهم اتصورت وطلعت بابا كان منتظرني بره المكتب لأن الرجالة بيقفوا والستات بيقعدوا طبعا مش قوارير ليهم معاملة خاصة :)

سيبكوا من كل اللي فات وعايزاكو تركزوا على الحوار اللي جاي ده اللي دار وأنا بقدم الورق للضابط
الضابط الأولاني قاعد عالمكتب وبيقول للضابط التاني : تصدق يا أخي أنا من الصباح وانا جالس أخلص شغلي عالمكتب حتى ما رحت الحمام
الضابط التاني واقف جنب المكتب : الحمد لله احنا في رمضان اذا كنا في الأيام العادية كنا ما بنفطر للحين
الكلام ده كان الساعة الثانية عشر
ضااااااااااااابط اد الدنيا ومش عارف يقوم من عالمكتب ويروح الحمام حتى علشان ميعطلش الناس !!!!!!! حد مصدق الكلام ده انا عن نفسي لو مكنتش شوفت الضابط وانه فعلا مشغول جدا وسمعت كلامه مع الضابط التاني مكنتش صدقت الحمد لله انهم مشافوش ضباط مصر !!!
حاجة من الاتنين يا إما الضابط ده ضميره صاحي جدا مبيضيعش دقيقة من وقته يا إما سستم العمل بتاعه حازم جدا في تضييع الوقت
يا إما الاتنين معا ضميره صاحي والسستم حازم

نرجع لكلامنا تاني روحت مع بابا لمكتب تاني وبابا قاللي يلا نجيب البطاقة قولت بس .. نص ساعة بقى على ما البطاقة تطلع زي اول بطاقة عملتها هنا مفيش ثواني ولقيت الضابط بينده اسمي اخدوا البصمات مرة تانيه اوتوماتيك برضه وسلمني البطاقة وأنا مذهولة
البطاقة مأخدتش 5 دقائق نقول عشرة لو حبيت أبالغ وأقول اتأخرت

ودي ايه؟ دي دولة عربية حد يقولي ايه تاني دولة عربيــــــــــــة
حضارتها 3000 سنة يعني أقل من حضارتنا حضارة ال7000 سنة واخدين بالكو

في مصر بقى :

علشان أطلع بطاقة أخدت شهرين رايحة جايه القاهرة ورحنا مجمع التحرير واللي عايز يدعي على حد يقوله الهي تخلص ورقك في مجمع التحرير يا بعيد نفس نظام فيلم الارهاب والكباب بالضبط بدون أي مبالغة !!!

ورخصة القيادة أخدتها بعد 3 أيام ده غير الامتحان اللي اخد مننا يوم كامل !!

والبطاقة العادية في مصر بتاخد اسبوعين ده غير الطوابير والزحمة والخزنة اللي بتقفل والدمغة

نفسي نبقى زي البلاد العربية عالأقل ايه اللي حصل لمصر؟ طبعا لازم افرح ان في بلد عربيه بتستخدم التكنولوجيا كده وأزعل علشان بلدي
وأزعل علشان ناسها اللي ناس كتير صعبوا الحياة عليهم وخلوا وقتهم ملوش أي ثمن

ربنا قادر يا مصر أشوفك أحسن بلد في الدنيا