تجربتي مع الأيلتس أخيرا :)

الزمان : السبت 9-6-2012

وقت الوصول : الساعة 7 صباحا

وقت الامتحان : هييسوا فيه بدأنا متأخر المفروض ساعة و10 دقائق !لغاية 12 الا 10 تقريبا واستراحة وبعدين من 1 ل 1:15 دقيقة

المكان : الأسكندرية – الطريق الصحراوي ميراج هول عبارة عن مكان أنيق فيه قاعتين أفراح :) أمام كارفور اسكندرية

الوقت : من الساعة 9 و10 دقائق

المود : منمتش من يومين ورايحة الامتحان سايقة على طريق سواقينه فيهم حاجه مش طبيعيه :) -الطريق ده مليان حوادث- وفي نفس الوقت بغني

" ياللي غرامك في خيالي وفي روحي ودمي

امتى هتعرف امتى اني بحبك انت امتى هتعرف اني بحبك انت انت انت امتى هتعرف امتى امتى هتعرف"علشان أغير المود :)

نبدأ الأول ب يعني ايه IELTS ؟

يعني International English Language Testing system

طيب ايه انواعه ومفيد في إيه؟

في نوعين من الإمتحان الAcademic IELTS والGeneral IELTS

انا امتحنت ال Academic IELTSطيب ايه الفرق بين النوعين؟ النوع الاكاديمي بيبقى أصعب ومطلوب في الشغل في مجال اللغة الانجليزية أو في تكملة الثانوي أو الجامعة أو الدراسات العليا في جامعات بريطانيا او استراليا او نيوزيلندا وبعض الجامعات الأمريكية كمان بتقبل الايلتس أما النوع التاني العام بيكون علشان طلبات الهجرة لنفس الأماكن واستغربت جدا من كم الناس مسلمين ومسيحيين اللي عايزين يهاجروا ! - هي دي الوحدة الوطنية مش اللي بنشوفها متصنعة في التلفزيون :)) -

الlistening أرهقني جدا مدته 30 دقيقة بما فيهم كل حاجة الإستماع -وسمعنا 4 محادثات- والإجابة في نفس الوقت لأن مفيش اعادة هي مرة واحدة بس وتحت ضغط الامتحان ونقل الإجابة من ورقة الأسئلة لورقة الإجابة لأن ممنوع الإجابة في ورقة الإجابة على طول بعكس القوانين في الجامعات المصرية

الReading كان 3 مقالات وكان أول مقال عن تاريخ طباعة الكتب والألات اللي استخدمت أيامها والأسر اللي بدأت الطباعة وتاني قطعة مقارنة بين الهندسة والفن مع ذكر نماذج كتير لمهندسين أبدعوا من خلال الفن والقطعة التالتة كانت عن الفلورايد وتأثيره على صحة الانسان كل قطعه منهم كانت من صفحتين لصفحتين ونص و40 سؤال حلهم في ساعة :D انا لو كنت اخدت ساعتين كنت هجيب الدرجة النهائية لأني حسيت اني كنت بجري مش بحل .

الWriting كان report and essay أول حاجة التقرير عن شركة قطارات نكتب في تقرير مواعيد تأخير أو تعطيل الرحلات وده المفروض مدته 20 دقيقة والموضوع التاني مقال وكان عن أن مشكلة الoverweight زادت جدا وكحل للمشكلة دي لازم نغلي أسعار الأكلات المسببة للسمنة فأنا رأيي كان

ان غلاء الأكلات السريعة أو الشوكولاتة أو غيرها مش هتفيد لأن اللي بيحب الحاجات دي – زي حالاتي- هيشتريها ولأنها مش بس أكلات دي كمان ادمان وكده كمان الاقتصاد هيتأثر لو كان في غلاء لكن الحل توعية الناس بنظام صحي سليم وبيع الأكلات الصحية في أكتر من مكان وتطبيق برنامج رياضي لكل الناس وكمان ذكرت وجهة نظر المؤيدين والمعارضين.

أخر حاجة في الإمتحان كانت الspeaking وكنت تالت واحدة أدخل امتحن في البداية اللي بينادي الأسماء قعد ينادي على سالي ويقول سالي – سالي وأنا طبعا فاكراه بينادي لسالي طلع بينده لي ومش عارف يقرأ اسمي بالانجليزي ! المهم أخرني حضرته على دخول امتحان المحادثة وانا أصلا كنت دايخة وحاسه انه هيغمى عليا ومعنديش استعداد لإمتحان محادثة كمان ولسه قدامي سفر من اسكندرية لدمياط فبرضه كنت قلقانه هسوق ازاي وانا كده !

المهم أخدت معايا جواز سفري وبطاقتي ودخلت أوضة صغنونة فيها مكتب وفيها الBritish trainer والحقيقة لما اتأخرت المدربة البريطانية طلعت تشوف في ايه ف استقبلتني من على الباب وراحت بسرعة على مكتبها قولتلها good afternoon وردت عليا بgood afternoon قعدت مكاني قدامها على المكتب face to face

وكانت أنيقة جدا ومرتبة هي كبيرة في السن يعني من 50 ل60 سنة تقريبا ولفت انتباهي انها لابسة سلسلة جميلة جدا عليها صليب كبير وده ليه كذا تفسير ي إما هي متدينة وده اللي ظهر في كلامها ي إما هي متعصبة واعتقد من كلامي معاها هي مش كده يا إما هي بتفتخر انها مسيحية ولابسة الصليب كرمز لدينها زي ما أنا مسلمة وبفتخر بالإسلام ولابسه الحجاب كرمز لديني :)

بدأت المحادثة البداية الإعتيادية وبدأ تسجيل المحادثة كمان والمدربة معرفتش تنطق اسمي ولا اسم بابا ولا العيلة فساعدتها انها تعرف اسمي :) وكانت ملامحها جادة جدا وحسيت انها مش طايقاني وده غير كل اللي قرأته عن ان المدرب المفروض يبقى زي صديق وشوفت ده كمان في فيديوهات امتحانات الأيلس لكن البداية بالنسبة لي مكنتش كده معاها وده وترني كمان وكنت سامعة دقات قلبي ده غير الخلفية اللطيفة بتاعت قلة النوم والسفر والدوخة .

أول سؤال : قوليلي اسمك بالكامل

قولتلها اسمي بالكامل

تاني سؤال : بتشتغلي ولا بتدرسي؟

جاوبت : بشتغل مدرسة لغة انجليزية بس بعتبر نفسي لسه طالبة

ثالت سؤال : وليه اخترتي مجال الشغل ده؟

لأني بحبه من طفولتي – وهنا راحت كل الإجابات الخرافية اللي كنت محضراها –

رابع سؤال : وإيه خططك المستقبلية؟

هكمل تعليمي العالي . أنا عايزة أكون دكتورة في الجامعة – مع ان الحلم ده ملوش أي 30 لازمة علشان الوضع السيء لجامعات بلدنا _

وقتها المدربة اترسمت على ملامح وشها التقدير والإنبهار وكإنها عايزة تقول واو وكملت

السؤال الخامس هل بتحبي الرسم؟

طبعا بحب الرسم

السؤال السادس : بتعرفي ترسمي؟

لأ للأسف حاليا مش بعرف أرسم بس ناوية أتعلم الرسم

السؤال السابع : كنتي بتحبي الرسم وانتي طفلة وهل كنتي بترسمي؟

طبعا كنت بحب الرسم جدا وانا طفلة وكنت برسم بس للأسف معرفتش انمي موهبتي لأن مدرستي مكانتش بتوفر النوع ده من الدراسة – فعلا مدرستي كانوا بيركزوا على الأشغال اليدوية والتلوين اكتر من الرسم-

السؤال الثامن : هل الرسم مفيد في حياة الناس ؟

طبعا مفيد لأنه بيخرج أحاسيسهم – وفضلت افتكر في كلمة احاسيس كتير- وكمان الألوان بتبهجهم وبتفرحهم. – كان نفسي اقول كتير في السؤال ده بس الكلام كان تاه-

السؤال التاسع : ايه اكتر لعبة كنتي بتحبيها وانتي طفلة؟

كان عندي عروسة كنت بحبها جدا ومعتبراها بنتي :) وألفت وقلت كل لما حد كان بيجيلنا او اصحابي كنت بقولهم دي بنتي – كان ممكن برضه أقول كلام كتير هنا –

السؤال العاشر : هل الألعاب ساعدتك في التعليم وانتي طفلة؟

ساعدتني جدا وكانت مهمة في حياتي .

السؤال 11 : هل تعتقدي ان التعليم بالألعاب مهم في حياة الاطفال؟

طبعا التعليم بالألعاب مهم جدا وفي الحصص بتاعتي دايما بستخدمها وبجيب ألعاب وبخلي الأطفال كمان يجيبوا ألعابهم لأن دلوقتي التعليم بيكون خالي من أي متعة مجرد قراءة وكتابه ومدارس كتير مبتوفرش التعليم باللعب لكن في حصصي بستخدم الألعاب وكمان بقدم للأطفال ألعاب كهدايا – يالهوي عالكلام برضه كنت عايزة أقول حاجات كتير احسن من كده-

كمان المدربة تفاعلت معايا بتعبيرات الوجه والعيون لأنها متقدرش تتكلم في الجزء ده وشجعتني عالكلام .

الجزء التاني من الإمتحان وهو عبارة اني اتكلم في موضوع من دقيقة لدقيقتين

الموضوع كان عن ان لو عندي فلوس كتير إيه أكتر حاجة نفسي أشتريها :)؟

واخدت دقيقة في التفكير وكتبت ملاحظات والدقيقة مرت هوى !

قلت انه اكتر حاجة نفسي اشتريها هي عربية جديدة – يمكن علشان عربيتي حاليا تعباني وفي عمان معنديش عربية حاليا-

وبيت أحلامي يكون على البحر وحواليه نباتات وقعدت افتكر في كلمة الشجر مفتكرتش خالص مع اني عارفاها من ابتدائي

وهشتري هدايا كتير لأصدقائي

وهعمل shopping كتير :))

وهزور لندن لأن نفسي أشوفها جداااااااااا وممكن اسبانيا كمان

وهساعد المحتاجين لأن في ناس كتير في دنيتنا محتاجين حتى في ناس بيحتاجوا أكل ولبس وحاجات كتير مش بيلاقوها .

س : هل في حد تعرفيه حقق في حياته الحاجات دي؟

أيوة عندي صديق بيشتغل في لندن وبيحبها وبيقول ان لندن جميلة جدا وناسها ودودين وبيتقبلوا الاختلاف ومش عنصريين وأن الجو جميل في لندن .. وسكت شوية وقولتلها أحيانا ففطست من الضحك لأنها عارفة ان جو لندن مش حلو أصلا ولندن مدينة الضباب :) ومن السؤال ده بدأت تفك شوية التكشيرة ونتكلم عادي :) -استوحيت الإجابة من تعليق عندي عالفيس -

السؤال اللي بعده : هل أغلب الناس لما بيبقى معاهم فلوس بيشتروا الحاجات دي؟ انتي قولتي انك عايزة تشتري عربية؟

أيوة وكمان بعض الناس بيشتروا مجوهرات خصوصا النساء بيحبوا المجوهرات وبيعملوا shopping وبيسافروا أماكن كتير وبعضهم بيشتري أرض علشان يبيعها في المستقبل واللذيذ اني قولت earth بدل land

يعني يشتروا الكرة الأرضية بدل ما يشتروا قطعة أرض ههههههههه فضلت أضحك عالحتة دي كتير بعد الامتحان وقتها المدربة صلحتلي وقالتلي يشتروا لاند كإستثمار ويبيعوها مستقبلا؟ قولتلها أيوة غالبا في ناس كتير بتعمل كده .

س : هل الناس اللي معاهم فلوس سعداء؟

ممكن يكون بعضهم سعداء لكن في حاجات كتير مش ممكن تشتريها بالفلوس زي الأصدقاء الحقيقيين وزي الحبيب فقطاعتني وساعدتني في الإجابه وقالتلي الأصدقاء لا يشتروا وكمان الصحة وحاجات تانيه كتير في حياتنا مش ممكن نشتريها بالفلوس :) .

س : الأغنياء بيكون حواليهم ناس عاملين أصدقائهم ازاي لو حد غني يقدر يفرق بين الصداقة الحقيقية والصداقة المزيفة؟

انه الانسان لازم يختبر أصدقائه قالتلي : إزاي؟ قولتلها يقولهم انه خسر فلوسه ويطلب مساعدتهم ويشوف رد فعلهم وهيقفوا جنبه ولا لأ بصتلي بإستغراب وكإنها بتقول ايه الحل الساذج ده؟ وقالتلي ازاي ؟ قولتلها بإبتسامة انتي عايزة تعرفي إجابة السؤال ده ؟! فقامت ضاحكة جدا وشاورتلي على التسجيل يعني مينفعش اني أهزر ده امتحان

س : هل الغنى حظ ولا اجتهاد في العمل ؟

مفيش حاجة في الدنيا بتيجي بالحظ انا مثلا هنا علشان عايزة اكمل دراستي العليا فلكل حاجة في الحياة سبب

قالتلي : حتى اللي بيكسبوا الlottery ضحكني افتراضها وذكائها في الإجابة ومرضيتش أقول انه حرام أصلا عندنا كمسلمين بس قولت اليانصيب حاجه تانيه .

س : هل الأغنياء ممكن يبددوا أموالهم ويصرفوها من غير حساب؟

أيوة بتحصل قالتلي ازاي؟ قولتلها يلعبوا قمار مثلا قالتلي :Oh My God

وبعدين ضحكت وقالتلي طيب ما هما ممكن يكونوا بيلعبوا قمار علشان يزودوا فلوسهم؟ قولتلها ممكن يكونوا بيفكروا كده بس برضه هيخسروا :P فضحكت

وأخر سؤال كان : ليه في ناس بتخبي فلوسها ومبتحبش تصرف في أي حاجه؟

ج : قصدك البخلاء يعني؟ قالتلي : yes قولتلها على فكرة أنا بسأل نفس السؤال الناس دي بتفكر ازاي الدنيا قصيرة أوي علشان يعملوا كده قالتلي بس في ناس كويسة وبتفكر زيك انهم لما يكون عندهم فلوس بيساعدوا المحتاجين وأنا متأكده انك لما تعملي كده ده هيجلب لك السعادة قولتلها

thank you

وده كان أخر سؤال في الإمتحان

جت لحظات وفصلت من كتر الأسئلة لأني مش متعودة أتكلم كتير أساسا الا في حالات مش كتيرة :)

وقالتلي الكلمة اللي كنت مفكرة ان لسه شوية وهسمعها This is the end of the English speaking test :) ومدت ايديها علشان تسلم عليا فسلمت عليها وقفلت الريكورد وفضلت تضحك وقالتلي على فكرة أنا استمتعت جدا بالحديث معاكي . يمكن كلمة عادية اتقالت منها لكن رفعت معنوياتي جدا وضيعت كل التعب اللي كنت حاساه

وخلتني في شعور أحسن وبعدين كان لازم أرد لها التحية فقولت لها : سعيدة جدا اني اتكلمت معاكي ، أخيرا اتكلمت مع أهل اللغة بقالي كتير جدا من وقت التخرج متكلمتش مع حد انجليزي -قال يعني قبل التخرج اتكلمت مع أجانب-قالتلي لو عايزة تتكلمي انجليزي كتير ادخلي على skype هتلاقي ناس كتير جدا ممكن تتكلمي انجليش معاهم قولتلها شكرا وخرجت من امتحان المحادثة فرحانه

حلوة تجربة امتحان ال

وكان ختامه مسك IELTS

عندما تخذلنا الأوطان 2

بدأت الصورة تخبو والأزهار تذبل والسعادة المطبوعة على قلبي تتلاشى فقد جمعت كلماتك وموسيقاك وأشعارك وإبتساماتك وغادرتني وغادرني معك وطني كسابق عهده في رحيله عني ، لقد كنت لي بعد وطني وطن ولكن الأوطان تخذلنا ، عروبتنا تكسرنا بإسم الحُب والوفاء ، أوطاننا تلقي بنا في بحار الحنين ونوبات الشوق ثم حين نقترب لنعانقها تقذف بنا إلى غيابات الجُب وتكون فينا من الزاهدين وحين نحزم حقائب السفر تُنادينا من بعيد عودوا وما أشبهك بالوطن وما أشبه الوطن بك .

العديد من الأشياء تبكي وترثينا فبيتنا الذي كنا لا ندري هل سنعيش فيه أم سيعيش فينا يبكي لذكريات لم تكن يوما ، والطرق التي لم نمشيها سويا حزينة لفراقنا ، أشباحك مازالت تطاردني كوطني ولا وطن لي بعدك غير القهوة ، المر في قلبها وتصمد أشاركها الوحدة ويذوب طعمها الحزين في دمي هي والحلوى التي فقدت لذتها بدونك.

 لازلت أمارس الصوم عنك يا وطني البعيد كجنة ضائعة ، القريب كنسمة صيفية وصديق حميم وأرتديك كمعطف أنيق خلع حزنه على قلبي على وعد بفجر حلو يكون فيه اللقاء وتعود مواكب الإبتسامات لي ولوطني فكل شيء يمتلئ بروحك فلا سبيل للنسيان.

 

 

 

عندما تخذلنا الأوطان 1

تظللنا سماء واحدة ونعيش على أرض واحدة وتُطل علينا كل يوم شمس واحدة فلماذا كل هذا الإغتراب والإختلاف؟

فقدت وطني منذ زمن بعيد وأحتفظت به بين خلاياي أسترجع ذكراه كل يوم مساءا ثم أغفو وأحلم بالعودة  ، الطيور المهاجرة ترحل وتعود بإرادتها ولكننا بشر وليس لنا أجنحة وتكبلنا  الأغلال والعديد من الوشوم تنطبع على قلوبنا بإرادتنا وحتى لو أردناها أن تُمحى فهي أبدا لا تنمحي وهي الوحيدة التي ترافقنا للنهاية !

رأيتك في يوم مليء بالأصدقاء كانت شمسه مشرقه جئت من وطني من الحبيب الغائب ، أخذنا الحديث حتى أشرق الفجر وبدأت الروح في غزل بيت وردي رقيق بيننا رأيت فيك وطني البعيد القريب كان فيك عطره ، رأيت فيك الفراشات الملونة ، وجوه الأطفال السعيدة بملابسهم الوردية وبلوناتهم وحلواهم وبرائتهم ، كانت إبتسامتك شمس صغيرة تُشرق لي فقط ، كنا نعيش مأساة وطننا وخذلانه لقلوبنا ونأمل بغد أفضل يجمعنا فيه بيت في الوطن ، كنت أنت الفارس النبيل الذي أتى من عصور الأمراء النبلاء كحكايات أسطورية لا تتحقق في الحياة كثيرا وزرعت غيمة وردية في قلبي غرستها في منبت الروح وأصبح لي وطن وجدت روحي فيه وجدت كل آمالي وأحلامي وطموحاتي ومستقبلي وصرت أوزع الحب والإبتسامات على أيتام وفقراء الحب أبتسم بدون سبب حينما تطرق كلماتك باب تفكيري وذاكرتي ، أفرح وأغني وأشعر أن العالم كله يعيش الحب والسلام وأنه لن يكون على الأرض سعادة أكثر من سعادتي   فبعض الكلمات تختبئ في القلب ولا تزدهر وتعطر المدى إلا بوجود من يستحقها
كلمات لا تحلو إلا بهم ولهم ومنهم ومعهم ، تصبح الكلمات منهم كوطن غائب وأزهار وردية وعطور معتقة ..... كأطفال لم يختبروا الأحزان ونسمات عطرة لفجر جديد يولد كل يوم من أعماق الظلام.

 وفي قلب السعادة ذات يوم همست لي أن الأسود يليق بقلبك وأنك لا تتقبل قرابين السماح والمغفرة إن أخطأ أحدهم في حقك حتى أقرب الأقربين إليك وأن أكثر من تحبهم تصيبهم لعناتك وتعاويذك ، حينها أدركت أن شبح الفراق قريب وأنه فقط علينا إنتظاره وكم كان إنتظاره مرهقا للروح .

عن عالم الطفولة

"A hundred years from now, it will not matter what kind of car I drove, what kind of house I lived in, how much money I had in the bank ... but the world may be a better place because I made a difference in the life of a child."

~ Forest Witcraft

كان يوما فارقا في حياتي بعد حلم تكرر 5 أيام متتالية في رمضان ، غالبا أحلامي التي تتكرر تتحقق وكنت في كل يوم أحلم بذات الحلم وأصحو من نومي متعجبة ! كان الحلم هو لأطفال أسلم عليهم بحرارة وأقبلهم وأبتسم وألعب معهم ولم أفهم مغزى الحلم إلا في اليوم الخامس قلت في نفسي بتهزري ! هل سأعمل مع الأطفال ! ربما إستجاب الله لدعواتي وسأجد عملا جديد يناسب طموحي وأعمل مع بني أدمين يفكرون ولهم هدف ورسالة في الحياة ، كان دعائي ابتهالا لشيئين مهمين جدا في حياتي  ،

استجاب الله لأحدهما ولم يستجب للأخر ولا أدري إن كان الله سيتقبل إبتهالاتي ودعائي واعتمادي عليه ويتقبل دعائي الأخر بعد حين أم لا ولكن الله كريم جدا وأنا أثق به وأتوكل عليه وأعلم أنه سيرضيني كما أرضاني في عملي .

أعود لذلك اليوم  بعد أيام من القلق والتفكير وكتابة السيرة الذاتية وتنسيقها وحذفها أكثر من مرة ، كتبتها بالشكل النهائي وطبعت منها 10 نسخ واشتريت 10 ملفات أنيقة وضعت كل CV بداخله ثم بدأت بالإتصال بكل الأماكن التي أود أن أعمل بها ظللت على ذلك الحال عدة أيام وأخر يوم استمريت بالإتصالات من الساعة الحادية إلى الواحدة :) فبعض الأرقام لم ترد وبعضها رد بعدم إكتراث والبعض الأخر مشغول والبعض كان ودودا ولكن ليس لديه مكان شاغر ! إلى أن وجدت الإسم أمامي ! المكان الأكثر إخافة على الإطلاق سمعت كثيرا عن تلك المدرسة الدولية ، ثنائية اللغة التي تعصر المعلمين في الإنترفيو وتهرسهم في العمل لأنها تدرس المناهج البريطانيه فهي مركز تابع لكامبريدج ولا تقبل بالعديد والكثير جدا من المعلمين الكفء ، ترددت في الإتصال  ولكن تملكتني روح المغامرة وقلت في نفسي وماذا لو؟ إذا غامرت في شرف مروم فلا تقنع بما دون النجوم   

قمت باللإتصال بالمدرسة ورد علي المدير بعد عدة رنات ، عرفته بنفسي وقلت له إنني أسعى لأن أكون ضمن مجموعة العمل لديهم رحب كثيرا وقال لي : يلا تعالي :D – إيه الناس الواقعة دي – ابتسمت وقلت له غدا لأن وقت العمل اليوم شارف على الإنتهاء .

ذهبت إلى المدرسة وحينما دخلتها شعرت براحة نفسية ، وكان هناك غيري أخرين بدأوا بالمقابلة وخرجوا خائبين مما زاد حدة التوتر في نفسي

إجتزت عدة مقابلات للعمل مرتين مع الإدارة ومرة واحدة مع مجموعة من المدرسين والمشرفين لم يكن بينهم عربي غير معلم أول مصري والبقيه كلهم أجانب ! وطبعا كانت المقابلة باللغة الإنجليزية

 خرجت من مقابلة العمل والشرح باردة اليدين أرتجف وكان القلق يفتك بي! تُرى هل أعجبهم شرحي؟ هل سأكون معهم وجلست صامتة أحدث الله . كنت قد أخبرتهم بأن لا يتأخروا في الرد وأخبرني المعلم المصري أنه سيتصل بي ولم يحدد الموعد قلت له حدد لي موعدا فإذا فات أذهب لأبحث عن عمل في مكان أخر . وبعد إنتظار حوالي ربع ساعة أخبرني المعلم الأول أنه تم قبولي ولم ينتظروا اليومين كما قال لي .

كنت أُحلق فوق سحابة وردية كغزل البنات لم اكن على الأرض فجأه نبتت لي أجنحة ^_^ وبدأ معي عالم جديد ترددت في قبوله في البداية ، هو عالم الأطفال والطفولة ....        To be continued

              

عودة

إفتقدت هنا إفتقدت هنا كثيرا بالرغم من وجود أماكن كثيرة لي عالإنترنت الأن كالفيس بوك وتويتر إلا أنه كما يقولون ما الحب إلا للمكان الأولي :) أعتذر لكل من أتى ووجد المدونة مغلقة فقد كانت مغلقة في وجهي أيضا لأنه تم حجبها من شبكة الإنترنت العمانية لفترة ولا أعلم حتى الأن السبب ! ولكنها عادت أخيرا .

4 شهور كاملة مرت بدون أن أكتب هنا بدون أن أمارس البوح لمدونتي المقربة ، 

4 شهور دبت الحياة في أناس وخبت في آخرين

حيا من حيا ومات من مات ، 4 شهور أثرت بي وأثرتُ بها

عن ماذا أكتب عن إسكندرية الساحرة أو سفري أو عن رمضان أو عن كتابة الC.V أو رحلة البحث عن عمل أو التوفيق من الله في إيجاد عمل ؟

 أكتب عن الطرق التي نمشيها ثم نسلك طرقا أخرى لم نحسب لها يوما حساب أم أكتب عن الكتب والأفلام والأشخاص الملهمين أم عن الويك إند الحبيب الذي بت أنتظره وكما تقول نجاة القريب منك بعيد أو أنا بستناك أنا أنا وليلي شمعة سهرانة في ليلة حب وأهلا حلوة :) عن علامات ورسائل القدر أم عن كل لبيب بالإشارة يفهم . 

لدي العديد من الحكي والبوح و"الحكايات" كما قالت صديقة ولكن الساعة تخطت 

ال 12 وانتهى الويك إند وسيتوجب علي أن أركض كما سندريلا لألحق بعملي غدا الذي أستيقظ له من السادسة صباحا ولولا والدتي العزيزة لما إستيقظت أبدا . لكم ولنفسي : كونوا بخير وإلى أن نلتقي :)