فتاة الرامن

عادة لما بشوف أفلام مبحبش أكتب عنها يعني مثلا السنة اللي فاتت شفت حوالي 100 فيلم لكن مفيش الا فيلمين بس هما اللي كتبت عنهم انما لما شوفت الفيلم ده مقدرتش غير اني اكتب عنه رجع لي تاني بهجة الكتابة بعدما كنت نسيتها في زحمة الحياة .
أولا : يعني ايه رامن؟ يعني نودلز أو ممكن نستعين بالقاموس المصري ونقول اندومي لأن في ناس مش بيسموه نودلز و بيسموه اندومي اللي هو شبه المكرونة الإسباجيتي بس على الطريقة اليابانية

الشخصيات الأساسية للفيلم

1- فتاة الرامن : بنوتة امريكية شقراء دخلت الجامعة وخرجت منها زي كتير مننا مش عارفه هتعمل بشهادتها ايه ولا ايه الهدف من اللي هي بتعمله في حياتها ولا هي عايزة ايه وكمان بتسافر بلد تانيه " اليابان "غير بلدها
وفجأه حياتها كلها بتتغير لما بتحدد هي عايزة ايه

2- الشيف اللي بيطبخ الرامن : شخص كبير في السن ، حاد الطباع ، مفيش حد من اللي حواليه بيتحمله وفهمت مؤخرا ان الشخصيات اللي زي دي بتبقى بتعاني داخليا وبتبني حواليها جسر من الصرامة وقلة الذوق والرخامة علشان ميبينوش انهم ضعفاء جدا من جوه وعندهم مشاكل كتير .

3- زوجة الشيف اللي بيطبخ الرامن : عسولة عسولة عسولة عندهم حق يستوردوا زوجات من اليابان مش من الصين :) بالرغم ان عدد المشاهد بتاعتها مش كتير الا اني بعتبرها بطلة أساسية في الفيلم بهدوئها وحنيتها وتفهمها واحتوائها ومرحها كمان كل ده حببني في الشخصية بجد

الشخصيات اللي مش أساسية

الحبيب الندل : أمريكي بالرغم انه ظهر في مشاهد قليلة جدا في أول الفيلم الا انه هو السبب ان فتاة الرامن تسيب أمريكا وتروح تعيش معاه في طوكيو في اليابان على أساس انه يستاهل التضحية الفظيعة دي وان الحب مقطع بعضه بينهم وإذ فأجة بيسيبها وبيمشي لانها بتفرض نفسها عليه وده بيتضح لما بتسيب له رسائل صوتيه كتييييير عالموبايل حوالي 100 مرة وبتترجاه انه يكلمها وهو تيييييييييييييت ونفض لها
أنا بكره التصرف ده جدا من البنااااااات طالما كده كده هيبقى في فراق فبلاش تخسر الحب والكرامة كمان .

الأسرة السعيدة اللي بتيجي تاكل الرامن : سيدتين كبار في السن ومعاهم شاب ومعاهم كمان شابه بس مظهرتش كتير – دمهم خفيف- :)

الحبيب الوفي : ياباني طموح بيكره السجن في وظيفه بيكرهها مفروض عليه الحياة الروتينية ، أنيق ، وسيم
متحضر وبيعرف يتكلم انجليزي :) وفي ودي احسن حاجه فيه واتمرد على وضعه الحالي وعمل اللي بيحبه رجع للموسيقى وكمان رجع لحبيبته

الأحداث من وجهة نظري :-

تبقى الحياة – ملهاش معنى- الى أن نجد هدف وأول لما نلاقي هدف بتتغير حياتنا تماما بيبقى كل تركيزنا على تحقيق الهدف ده وتحقيق الأحلام والأهداف مش حاجة سهلة أبدا أبدا وكمان أبدا
لسه فاكرة دكتورة في كليتنا الموقرة قالت لنا : " اتمرمطوا زي ما احنا اتمرمطنا " :) قالتها بعصبية وبحقد دفين لكن للأسف كلمتها دي بيفهمها اللي اتخرج من الكلية وبدأ يبص للحياة فعلا
رامن جيرل لقت حلمها بعدما حبيبها "الندل" اتخلى عنها وده رمز لأن النهايات الغير جيدة بيبقى بعدها بدايات جيدة لو احنا عايزين نبتدي ولو مستسلمناش
رامن جيرل كمان تخلصت من وظيفتها اللي كانت بتكرهها وراحت لوظيفة تانيه في الاول كانت حاسة بالخجل انها تقول لأصحابها عليها وده كمان رمز للحاجات اللي بتقيدنا في حياتنا وممكن نستمر فيها فترة كبيرة واحنا كارهينها او مش حبينها وبنستمر بس علشان الأمان أيا كان بقى أمان اجتماعي او عاطفي او نفسي او مادي ...... الخ مع اننا لو غيرنا الحاجات اللي مش بنحبها بحاجات بنحبها ممكن نكسب كتير اوي عالأقل هنحس اننا فوق السحاب لما حلمنا يتحقق .
صاحب المطعم فنان بجد بيطبخ بقلبه وروحه وعواطفه وأنا سعيدة لأني بتبع نفس فلسفته في الطبخ بحط كل مشاعري في الطبخة اللي بعملها وحقيقة علمية أن الطاقة بتتغير بحاجات كتير جدا وممكن جدا تتنقل من اللي بيطبخ للأكل اللي بيطبخه وطبعا الطاقة العالية معروف انها بتبقى عاليه مع الكلام الطيب الإيجابي
وبتبقى سيئة جدا مع الكلام المحبط والسيء
انا كمان سعيدة لأني مطلعتش جايه من الفضاء الخارجي وطلع فعلا ان تفكيري صح في موضوع الطبخ بالروح وان الطهي فعل للحب .
كمان صاحب المطعم قاسي وعصبي وده حال أغلب اللي عندهم عملهم الخاص في منهم اللي بيبقى قاسي كده وفاكر انه كل ما يضغط على الانسان اللي بيعلمه فالانسان ده هيتعلم اكتر وفي اللي بيحبوا يستغلوا الانسان اللي معاهم أسوأ استغلال وبالرغم ان الجانب التاني من طيبته مكنش بيظهر للرامن جيرل لكن هي استحملت كل سخافاته لغاية لما وصلت لحلمها وكمان ورثت المطعم منه .

مشاهد كتير عجبتني في الفيلم طبعا فيلم ساعتين محتاجة اكتب عنه اكتر من كده بس علشان اختصر
عجبني مشهد الجروب اللي أكلوا النودلز وبعدها فضلوا يعيطوا لأن مشاعر الرامن جيرل اتنقلت لهم
ولما زوجة صاحب المطعم فضلت تضحك وضحكتني لأن الجروب كان شكلهم يضحك وتعليقاتهم كمان تضحك .

عجبني مشهد ام صاحب المطعم لما قالت للبنوتة الرامن جيرل طبخك مفيهوش روح
ولأن مفيش تواصل باللغة فكانت بتعبر لها بلغة الاشارة اللغة اللي كل البشر يعرفوها وبيفهموها ووقتها ضوء الشمس انعكس على وش البنوتة لأنها فهمت معنى يعني ايه كل أكل تعمله يبقى فيه روح .

عجبني كمان المشاهد اللي بتوضح الثقافة اليابانية وأد ايه هما ليهم تقاليدهم العريقة اللي بيحترموها جدا وبيحافظوا عليها

وكمان عجبني ان الرامن جيرل كانت عايزة تتعلم تطبخ الرامن علشان تسعد الناس وتتعلم حاجة بتحبها

عجبني كمان موضوع التواصل مع ناس مش عارفين لغة بعض لأن دي من اكتر الحاجات اللي بترعب اللي بيدرسوا لغات انهم ميكونوش فاهمين اللي قدامهم وكمان عجبتني اليابان ولو مكنش موضوع الاشعاعات والمفاعل والزلازل والكلام ده كنت حطتها مع البلاد اللي عايزة ازورها :)

الفيلم عجبني جدا وتقييمه 6 من 10 لكن من وجهة نظري تقييمه 8 من 10

كله بينور

# كل ما الإنسان بيعيش أكتر كل ما بيتعذب أكتر وأكتر بتيجي حاجات كده ترفعه لسابع سما أحيانا لكن بيكمل في نفس وتيرة الدوامة

# التجربة القاسية علشان تستفيد منها لازم بعدما تتوجع وتتألم تفوت أيام وأيام وكمان أيام علشان تفهم ليه حصل معاك كده وساعتها ممكن تضحك وتقول الحمد لله اني مريت بالتجربة دي

# دكتورة هالة سرحان مبقتش أوبرا وينفري مصر بقت مذيعة مصرية علشان تعجب المصريين .

# في اتصال مع خالتي قالت لنا : " الدنيا في مصر أمان لكن من كتر ما الإعلام بيقول مفيش امان أنا مش حاسة بأمان "

# مش كل حاجة بنتمناها لما بتتحقق بنفرح بيها ومش كل حاجة بتتحقق زي ما بنحلم بيها

# الشمس والقمر واللمبة والنجفة والشمعة كلهم بينوروا الحياه بس مقدروش ينوروا القلوب بالعكس القلوب زادت ظلام في عصر الكهربا والنور

# اللهم أجعله خير نفسي نقولها لما نزعل مش لما نضحك ونخاف من اللي جاي بعد الضحك

# هيقولوا عنك ضعيف لأنك مؤدب وهيقولوا عنك فاشل لأنك متفوق أكتر منهم وهيحبطوا من عزيمتك علشان متبقاش أحسن منهم وهيقولوا انك غبي لأنهم مش مستوعبين ذكائك وهيقولوا انك عمرك ما هتتقدم وهتفضل محلك سر

المصيبة انك تصدق كل ده !!!

# الحرية أعظم نعمة اذا عرفنا معناها

# تبقى الأشياء العادية عادية في حياتنا الى أن تنتهي فتصبح أشياء مميزة

كل اللي فات ده بقلمي أو بالكيبورد ممنوع الاقتباس او الاقتراب والتصوير :)

افرح ...

حينما تصبح السعادة والفرحة في منتجات - ملهاش لازمة- وتسمن ولا تغني من جوع فبالتأكيد لن تجد الفرحة الحقيقية في الحياة

تذوق طعم السعادة وكل شوكولاته كادبوري

افتح كوكا كولا تفرح

والكثير الكثير من الاعلانات التي رأت ان أغلى مفقود الأن هو السعادة فقدمته للمستهلكين الكرام في صورة مشروب أو شوكولاته وياريتهم مفيدين ولكنهم يسجنوننا تحت طبقات الدهون فلا تعود لنا ملامحنا وبالطبع عزيزي القارئ يمكن أن تصبح مثل الكونغوفو باندا في أقل من أسبوعين ولكنك لن تستطيع أن تعود الغزالة الشاردة ثانية حتى ولو أردت
الخلاصة أننا جميعا نسعى وراء السعادة وهم قدموها لنا في اعلاناتهم المبهرة عن منتجاتهم الغير مبهرة بالمرة ولكن بالرغم من ذلك فإنك تشتريها وتلتمس منها الفرح والخروج عن المألوف

من ضمن الأحداث الكئيبة التي أصابتني بالإحباط هو خبر طلاق الأمير ويليم والأميرة كيت بعد 5 أسابيع من زواجهم الأسطوري الحالم الخيالي - الفوق الفظيع- وبالطبع كالكثيرين صدمني الخبر يعني اذا كان الحلم الملكي الجميل تدمر بهذا الشكل فماذا يمكن أن يحدث بعد ذلك لكل قصص الحب الجميلة التي بالتأكيد ينقصها قصة
مواقع كثيرة أكدت الخبر ومواقع أخرى نفت الخبر على أساس انها نكته وهع هع هع كنا بنهزر معاكو انتوا صدقتوا ! ولا اعلم حتى الأن ان كانت نكته فمن " الرخم" الذي أصدرها


الكثير من المصريون في الخارج ألغوا رحلات الأجازة والعودة لمصر هذا العام نظرا لأن الإعلام المتلون ينقل للمصرين بالخارج أن مصر أصبحت أفظع من العراق وأن واحد راح طلعوا بداله 10 يجلسون في مجلسهم ويصدرون اوامرهم التي تخيف الناس - ما بالنا بالسياحة-
وأنا بالرغم من كل ذلك أفكر جديا في العودة لبلدي ولكن كلام الإعلام أخيرا أثر في و " خوفني " وأذكر صور الشهداء كل يوم وأشعر انه لو قام احد منهم ورأى مصر الأن لبكى على حاله وأثر الرحيل ولكن بشكل ما أيضا يخبرني احساسي بأنه منذ متى والإعلام صادق جرائم مثل التي أراها الأن على شاشات التفزيون وأفظع كانت تتم في العهد البائد وكانوا يصورون مصر على انها شيكاغو وفي كل الحالات ف رب هنا رب هناك وهو الحافظ والحامي
ولكل شمس شروق بعد الغروب تحلى - من أغنية لكل عاشق وطن خالد سليم-

لسه مش مصدقة

الجو هنا حر جدااااااا وبيتساقط علينا عرق الشعوب أما في مصر فالجو عندنا ربيع الوقت ده من السنة مش كل السنة :)
أما الجو المطير اللي بدور عليه فمش موجود حاليا الا في بلاد أنا لسه مزورتهاش وأكيد مش عارفه جوها ايه بس بسمع ان بروطانيا مثلا الجو عندهم غيوم طول السنة وأنا بحب الجو ده مع الشمس الخفيفة
المطر فين بجد كان سؤال يطرح نفسه لدرجة اني بقيت أسمع صوت المطر عاللاب وخلاص من كتر ما المطر وحشني أقربها النهاردة شغلت فيديو فيه صور المطر مع صوته ومن شوية سمعت سيلين ديون وهي بتقول

Let the rain come down and wash away my tears
Let it fill my soul and drown my fears
Let it shatter the walls for a new, new sun
A new day has...come

قولت في نفسي أدي دموعي موجودة يا سيلين فين المطر بقى :) وأنا أصلا من زمااااان مبقيتش أسهر لغاية دلوقتي لكن مش عارفة ليه صحيت لغاية دلوقتي النهاردة ومارست هواياتي لما بكون مضغوطة ومضايقة غالبا مبقتش أحب أتكلم مع حد وانا مضايقة حتى صحباتي الانتيم حتى المدونة قولت مش هكتب فيها غير عن حاجات مفرحة وحاجات جميلة وده بيفسر أنا ليه مبقتش أكتب كتير زي الأول
المهم كلمت ربنا في قارئين هيحطوا ايديهم على قلبهم ويقولوا البونيه اتجننت دي كانت طيبة طيب تعالوا لما أقربها شوية لما بنشتري أي حاجة جديدة وبعد الشر بتبوظ مش بنوديها التوكيل تتصلح علشان هما اللي صنعوها فهما اللي عارفين ايه المشكلة اللي بتعاني منها تمام كده؟ متفقين ؟ موافقة :)
طيب احنا البشر كلنا على بعضينا كده مش ربنا سبحانه وتعالى خلقنا؟ أيوة واللي يقول غير كده صعبان عليا طيب يبقى ربنا سبحانه وتعالى خلقنا ومعاه دوا أرواحنا ومفاتيح تحقيق أحلامنا وهو اللي بيرزقنا وبيوفقنا وبينجحنا وبيسعدنا طيب يبقى ليه متكلمش مع ربنا وأدعي أنا متأكده انه سامعني وفاهمني اكتر من أي حد من البشر هيطبطب عليا شوية وخلاص
الغريب كمان النهاردة ان في الحر ده مفتحتش التكييف وفتحت البلكونة الصغنونة بتاعت الأوضة بتاعتي وفجأه طلعت أخد حاجة من البلكونة واتفاجئت على اندهشت على انذهلت - من الذهول- ووقفت مكاني الدنيا بتمطر !!!!!!!!! بجد بتمطر ولسه بتمطر وأنا بكتب دلوقتي وحسيت بإن فعلا المطر غسل روحي وقلبي وخرجني من المود اللي كنت فيه ووقفت أحس بقطرات المطر وأشم رائحة المطر المخلوطة بالرمل والطين - رائحة مميزة- ومستمتعة جدا بمنظر المطر اللي أكيد هخلص البوست وأطلع أشوفه تاني ودخل المطر على البلكونة وأنا برضه لسه مش مصدقة ان في مطر في الوقت ده من السنة مطر في الصيف
هو أنا قولت اني لقيت البطاقة بتاعتي بكل اوراقها ومصروفي كمان فيها ؟ بجد الحياة دي غريبة أوي حاجات بسيطة بتفرح أوي وحاجات بسيطة بتزعل أوي
حد لسه بيقول ان احلامنا مستحيلة؟ مطر في الصيف وصورته بالكاميرا بس بلوجر الرخم مرضاش يعمل داون لود للصورة لأن حجمها كبير ولسه كمان الصبح ان شاء الله هصور وأشوف المطر عمل ايه هو حاليا ملا الشارع
أنا فرحانة :)

زمان يا حب

اكتشفت أن كل ما يحركني في الحياة هو احساس واحد هو فقط " الحب" فلا أستطيع أن أفعل أي شيء في الحياة بغير حب وشغف واذا حدث وارغمت على شيء فأقوم بأدائه كلوحة باهتة الألوان أو كلحن ناقص النغمات
تصيبني لطشة حب قبل أن أنام كل يوم لطشة حب ممزوجة بالحنين لطيور بعيدة ولوجوه مبتسمة متفائلة ولطعم أعياد وفرح وألوان زاهية وكلمات معسولة صادقة من القلب
لطشة حنين للوطن الضائع في الأفق الذي يفصلني عنه مئات الأميال ولطشة حب تقربني من سمائه وبحاره وعطره الساحر الممزوج بفرحتي ودموعي وحبي وابتساماتي وتميمته التي تحيط قلبي كلما مرت على خيالي ذكراه كأنها تعويذه خرافيه وشفرة سرية لا أستطيع فك رموزها

يا مالكة القلب بإيدك ده عيد الحياه يوم عيدك

"لو لو لو لو كان الأمر أمري لو كان في شيء بيدي كنت أقدر اشتريلك جزيرة ويخت فضي وذهبي "

ماما بستنى اليوم ده من السنة للسنة ومش عارفة أقول بقى كلام شبه انتي النجمة المتألقة في السماء- مع انك كده فعلا- بس هقولك انك بجد حيرتيني بقالي شهور بفكر هجيبلك ايه في عيد ميلادك وكنت خلاص استقريت عالهدية بس الخطة اتغيرت وفكرت في حاجات تانيه دايما بحتار أهديكي بإيه وانتي هداياكي ليا كل يوم جديدة ومتواصلة وكل يوم بحس بيها وبدعي انها تستمر وربنا يباركلي فيكي وفيها بحس ان أي هدية صغيرة أوي وضئيلة أوي ومبتوصلش ولو واحد في المية من احساسي بيكي وحبي ليكي

ماما انتي بجد كل احساس حلو في حياتي كل فرحة وكل ضحكة كل نور نورلي وأنا في عز الضلمة كل الحب وكل الحنية والملاك الحنين اللي بيديني الحياة والحب غير مشروط حتى لو أنا معبرتش عن حبي ليكي وكنت أنانية وسخيفة أحيانا بس أنا عايزة أقولك ان بيني وبين نفسي ضميري بيمسكني وبيديني بالبوكس في مناخيري وبياخد حقك مني من غير ما تعرفي واني عمري ما حبيت ولا هحب زيك لأن مكانك في قلبي محدش يقدر يوصل له

بفرح أوي لما بلاقي كتير بيغيروا من اننا فاهمين بعض أوي وبنحب بعض أوي ومتصحابين أوي ونادرا لما صداقتنا بتتحول لعلاقة أم وبنتها أوامر ونواهي الام اللي بتخاف عليا - زيادة عن اللزوم- من الهوى الطاير وبتقوللي لأ متعمليش كذا والمشكلة ان كلامك دائما بيطلع صح :)

في عيد ميلادك بتمنى حاجات كتير أوي أولها ان ربنا يديكي الصحة ويقويكي ويسعد قلبك وروحك وأيامك

وتاني حاجة بتمنى أني أعرف اجيبلك هدية حلوة وزي ما قولتلك كان نفسي أجيب نجمة في السما وأسميها على اسمك

وتالت حاجة ربنا يخلينا لبعض وربنا يديم علينا نعمة الحب والود والتفاهم

ورابع حاجة بتمنى الاقي البطاقة بتاعتي لأن فيها كل مصروفي وأوراقي وكارنيهات الجامعة ورخصة القيادة وكل حاجة :) لأني لو فقدت الأمل ولقيتها ضاعت بجد هدوشك بأغنية والملاحة والملاحة وحبيبتي لابسة الطوراحة شقىىىىىىىىىى عمررررررررررري :))

وأخيرا بهديكي أغنية : مبحبش حد الا انت ولا نفسي كمان يا حياتي من بعد ما حبك وحده غطى على حبي لذاتي حبك شال الأنانية خلى مكانها الحنية وصبحت بكل كياني مبحبش حد الا انت

كل سنة وانتي طيبة يا مامتي

-----------------------------------

ملحوظتين : التورتة بيضاء لأنك بتحبي اللون الأبيض والفانيليا وفي معنى في قلب الشاعر اللي هو انا لأن الأبيض بيدل على الغيرة :)

ملحوظة كمان : انا بتلكك وبحتفل بعيد ميلادي معاكي لأني معرفتش أستمتع بيه أيام الثورة

الحياة باللون الوردي والأبيض

من كام يوم شوفت فستان فرح هو بالضبط فستان فرح أحلامي "الفستان أبو ديل" :) شبه الفستان اللي فوق ده بس مش أوي يعني - هو أحلى طبعا-
وطبعا بيحصل بيني وبين ماما جدال دايما طول عمري بقول لها أنا اللي هشتري فستان الفرح وماما تقوللي لأ الفستان عالعريس :) أقولها وفيها ايه لما أجيبه أنا تقوللي فال وحش طيب فال وحش ليه ؟ تقوللي هو كده المهم ان انا اصلا مش هجيبه دلوقتي علشان هيخلل في الدولاب لأن أصل 2011 العظيمة مش هتشهد حفل زفافي ولا خطوبتي واحتمال كمان 2012 واحتمال كمان 2013 :) وأهو كله في علم الغيب الله أعلم بس ساعات ربنا سبحانه وتعالى بيبعت رسائل على لسان الناس فالواحد يفهم ان الحلم الفلاني هيتأخر شوية أو لازم امشي في الخطوة الفلانية علشان أوصل للمينا اللي هتوصلني للبر التاني علشان أحقق حلمي :)
المهم أنا ليه أفتكرت الفستان
اولا أنا بحب فساتين السهرة جداااااااااا وخصوصا فساتين الفرح ولما كنت بمشي بالكتكوتة وقدامي محل فساتين فرح كنت ببص عليه وبسيب الطريق :)
ثانيا بقى وده الأهم كنت بتفرج على فوكس موفيز - حلوة موفيز دي - وكانوا بيتكلموا على أغلى ويدينج اتعمل في العالم وطبعا كان ويدينج المشاهير وتشوف بقى أرقام خيالية مليون ونص زورار ومليونين زورار وتلاتة مليون زورار :) ويا سلام بقى لما المعلق يقول وجابوا طفلهم الأول وبعدين فكروا يعملوا ويدينج بارتي لأ بجد كتر خيرهم

قعدت أتأمل شوية وصوت العقل والحكمة طلع وقاللي مش مهم الفرح يبقى غالي اوي كده المهم اني أعيش الحب وأشوفه في عيون اللي بحبه يوم فرحي أشوفه شايفني أميرة وأشوفه مش شايف غيري وسامع بس صوتي
وطلع صوت الجنان وقاللي هو حد قاللك ان اللي بيعملوا الأفراح دي ضاربين بعض بالشوزات ما هما بيحبوا بعض برضوا وكل الكلام اللي بتقوليه ده
واللي غاظني ان في فرح من أفراح المشاهير العريس جاب البدلة بتاعته ب3000 زورار-في حدود المعقول السعر ده- أما بقى العروسة الهبلة فتخيلوا جابت الفستان بكام؟ ب50000 زورار بذمتكوا في تواضع أكتر من كده :)
وفرحت ان فرحي مش هيكون فيه شوكولاته ماركة جايه من سويسرا يادوب هي كوفرتينا عالعريس:) ولا واين وشامبين جاي من فرنسا فكده هنوفر كتير:)) أوي
ويجعل أفراح المحسنين عمار وعقبال عندي وعندكوا - اللي لسه متجوزوش-.

نو... لأ.... لع

>http://www.youtube.com/watch?v=7cSudpyEU9w

طبعا لأن المصريين في الخارج منسيين و محدش فاكرهم أساسا فملهومش حق في التصويت في استفتاء بكرة لكن على أي حال أنا بقول لأ للتعديلات الدستورية واللي بيقولوا لو عملنا دستور جديد هياخد سنة مش لازم نألف دستور يعني ممكن نجيب أي دستور من أوروبا والدول المتقدمة - على رأي واحد في فيلم الارهاب والكباب- ونعمل نفس القوانين مع تكييف القوانين على مصر عادي ما هو كل حاجة حوالينا بقت تقليد ومش من ابتكارنا حتى بلوجر اللي بكتب عليه دلوقتي مش احنا اللي عاملينه يبقى برضه الدستور ناخده من عندهم

http://www.youtube.com/watch?v=yhPGuITw9Mo&feature=player_embedded

كان عندي استعداد لو فتحوا باب المشاركة في الاستفتاء في السفارات كنت هروح وأقول صوتي برغم ان بيني وبين السفارة اكتر من 1000 كيلو بس للأسف مفيش في ايدي غير اني أقول رأيي " لأ" وأنا واثقة ان كل الناس المهتمين فعلا ببلدهم ومش ناسيين دم الشهداء هيروحوا ويصوتوا ويقولوا رأيهم مهما كان نعم أو لا

----------------------------------------------

من كام يوم الظهر كنت قاعدة قدام التلفزيون بالصدفة البحتة شوفت صباح دريم مع مذيعته الخنيقه دينا هي مثقفة نوعا ما بس خنيقه و اكيد مش زي خيري رمضان اللي مفيش فيه حاجه كويسه من اسمه ولا زي تمورة أمين مش عارفة الناس دي لسه في التلفزيون ازاي المفروض يسرحوا بطماطم وتين شوكي وكمان ميبقوش بيعرفوا يقطعوه علشان يشوكهم ويفضل يشوكهم في ايديهم على طووووول بجد في ناس كده مبتحسش

ما علينا نرجع لصباح دريم كان في حوار مع كاتب وبما ان الكلام عن كتاب فكان لازمن ولابندق أشوف بيتكلم عن ايه الكتاب اسمه انا من البلااااااادي وعجبني أوي بعض الحاجات في مناقشتهم للكتاب والكاتب اسمه فيليب فكري

واتكلم عن التفرقة ضد المسيحين اللي اتعرض لها لدرجة اني فصلت عن كل حاجة حواليا واندمجت جدا مع الحوار كانوا بيتكلموا عن موقف ظلم صريح حصل للكاتب هو بيحب الرسم ودخل مسابقة رسم وهو في اعدادي بعنوان فلسطين عربية وأخد فيها المركز الاول وبعد كام يوم لما راح يستلم الجائزة اتفاجئ انه بقى المركز التاني علشان اسمه "فيليب" وبيقول المفارقة ان كل اللي وقفوا جنبه وساعدوه مسلمين وزعلوا جدا من اللي حصل ده

وبعد ما سمعت القصة دي بشوية افتكرت حكاية تيبيكال حصلت لي وأهو كله ظلم

كنت في تانية ابتدائي وكنت متفوقة جدا وطالعة من مدرسة اللغات بقى وبكتب اول انجليش اول ذا تايم واتنقلت مدرسة تانية "خاصة" في عمان وطلعت الأولى عالفصل وجت حفلة المدرسة وشاركت في كل الفقرات وكنت فرحانة جدا ما أنا عارفة اني هتكرم في أخر الحفلة لأني الأولى

وهما بيعلنوا عن اسماء المتفوقين أخر الحفلة فجأة لقيت اسم مروان زميلي هو اللي بيتنده مش أنا !!!!!!!! اتفزعت وقولت ازاي انا الأولى أنا مش مروان وبعد كده عرفت ان ادارة المدرسة كان ليهم وجهة نظر في اني مبقاش الأولى عالفصل لا أنا ولا أي بنت علشان مينفعش فصل يبقى فيه بنات وأولاد وبنت اللي تطلع الأولى ومش كده وبس كمان وافدة مش عمانية ارضائا لأولياء أمور الطلاب العمانيين مع ان التفرقة دي مبتحصلش في المدارس الحكومية مش مدرسة المفروض انها خاصة يعني مستوى تاني لكن للأسف ادارة المدرسة كانت مصرية وكتير من المصريين بيحبوا المحلسة خصوصا لأي حد غير اهل بلدهم ولأصحاب البلد اللي هما عايشين وبيشتغلوا فيها وفي وقت توزيع الهدايا وشهادات التقدير في الحفلة عييطت كتير اوي وحسيت بظلم ملوش اخر وكان جنبي اطفال كتير بيعيطوا برضه كان يوم نصه مفرح ونصه صعب اوي واللي فكرني بيه كلام فيليب اما تبعات الموقف ده اني بدأت اعرف ان العلم لا يكيل بالبتنجان وأن التفوق زي عدمه وبعدما كنت ببقى الأولى بدأت أبقى من العشرة الأوائل وبعدين توهت وسط الزحام واتأكدت في الجامعة من مقولة ان تذاكر يمكن تنجح

لكن دلوقتي غيرت فكرتي التفوق حاجة تانيه غير مجرد النجاح

كمان أ- فيليب قال في الحوار ان في اماكن شغل بيكتبوا فيها المسيحيون يمتنعون نفس الكلمة بالضبط قرأت قبل كده انها كانت مكتوبة على مطعم شيك أوي في لندن بس مكتوبة بطريقة وحشة اوي العرب والكلاب يمتنعون !!!!!!

بإختصار اللي بيفرق بين انسان والتاني على اساس لونه أو جنسه او بلده أو دينه او عرقه أو نسبه أو أي حاجة في الدنيا يبقى مريض ومحتاج يتعالج اذا كان ديننا علمنا نحترم اللي معندوش دين أصلا ولا يعرف اله يبقى الاولى نحترم أي حد عارف ان في اله وبيعبده وفي قصة بفتكرها دائما : "عن النبي ابراهيم انه كان لا يأكل لوحده وفي يوم من الأيام جاء وقت الغداء ولم يدخل احد الى بيت سيدنا ابراهيم وانتظر الى ان برد الاكل . فخرج سيدنا ابراهيم يبحث في الشوارع ليرى احد جائع ليأكل معه فرأى رجل وأتى به الى البيت فقال له سيدنا ابراهيم : سمي بالله وكل فقال الرجل : ما هذا الله؟ فغضب سيدنا ابراهيم و قال له الله هو ربي وربك فقال الرجل : هو ربك ولا اسمي فقال له سيدنا إبراهيم ان لم تسمي فلن تأكل فقال الرجل لا أريد أن أكل فخرج من بيت الخليل , فحزن سيدنا إبراهيم على الرجل لأنه خرج جوعان ..فهبط الوحي على سيدنا إبراهيم وقال له : الله يقول لك حملت عبدي منذ خلق والى أن يموت وهو كافر ..وأنت لم تستطيع أن تتحمله بعض الوقت الى أن يأكل وخرج جائعا .وأين ضيافتك

فخرج سيدنا إبراهيم يبحث عنه الى أن وجده فقال الرجل ماذا تريد مني ألم تطردني فقال له سيدنا إبراهيم : ربي عاتبني بشأنك لأنك خرجت من بيتي من دون أكل .فقال الرجل إن رجعت لا اسمي فقال له لا تسمي المهم أن تأكل قبل أن تمشي فوصلا الى البيت ..فسمى الرجل بالله وأسلم وكانت فرحة سيدنا إبراهيم كبيرة"

مفيش حاجة اسمها فتنة في حاجة اسمها ناس مبيفهموش ودماغهم صغيرة

اللي مصبرني

الدفا والمودة والحب والإبتسامة الصافية اللي من القلب بص في وش أي حد في أي مكان في الشارع أو في الهايبر أو حتى في الكلية أو في الشغل ده لو أصلا لقيت شغل هتلاقي كل ده تلاشى لا في دفا ولا مودة ولا حب ولا ابتسامة صافية
زمان أيام الجامعة كنت بدرس حاجات وفهمتها أوي بعد ما خلصت كلية مصطلح الإغراق في المادية
materialism المادية اللي كل البشر غرقانين فيها ونسيوا حاجات كتيرة جدا حلوة وطحنوا نفسهم بنفسهم في مطحنة الحياة
والموضوع ده لكل البشر وبيلخص المعنى ده أغنية money money money by ABBA band وبيلخص ده وجوه الناس وحقدهم وحسدهم للإنسان اللي بيتمتع برزق وافر ده غير كمان انقطاع الاتصال بين الناس ومتأكده ان كل واحد فينا بيحصله كده
يبقى مهتم بموضوع وفجأه يلاقي اللي بيتكلم معاه مش معاه أو بيكلمه في موضوع تاني كل ده من سمات العصر الحديث اللي اتعرفت عليها في كتب الكلية واتعرفت عليها بجد لما اتخرجت من الكلية وفعلا أغلب الكلام اللي درسته طلع صح
ده غير كمان شعور عدم الأمان اللي مسيطر على الجميع بلا استثناء الغني خايف لا يخسر فلوسه والفقير خايف على رزقه والغريب أن كل خوف البشر من ناحية الرزق وطبعا الرزق مش بس فلوس لأ الرزق صحة وراحة بال ووقت وزوج أو زوجة صالحين وأطفال وصحبة طيبة وحاجات تانية كتير بس مفيش ناس كتير فاهمين كده
كمان انعدام الأمان وهتكلم عن نفسي أنا خلاص مبقتش حاسة بالأمان مش على النطاق العائلي لكن على النطاق العربي كل البلاد العربية بقى فيها دوشة بما فيها البلد اللي انا فيها مع انهم يعتبروا مرفهين بالنسبة للمعيشة في مصر وكفاية ان الباحثين عن عمل من العمانيين ليهم مصروف شهري ما يعادل 2000 جنيه ياللي بتطالبوا بأدنى حد للأجور 1200 جنيه وكمان السكن متوفر ليهم وموقفين عربياتهم الأحدث موديل زي اللاند كروزور والهامر والتويوتا بأنواعها والنيسان وبرضه عاملين اعتصامات وأهو تقليد أعمى وخلاص
ومع ان الوضع هادي بس أنا برضه مش حاسة بالأمان وبرضه الوضع في مصر ميشجعش عالرجوع لأن برضه في مصر مفيش أمان عالأقل حاليا
مصر وحشتني جدا ومش مصر كلها لكن الحاجات اللي بحبها في مصر وأهمهم -الكتكوتة- والأشخاص كمان اللي بحبهم في مصر لكن ما باليد حيلة هنزل مصر مش هعرف ابدأ دراسة في حاجة مفيدة ولا هعرف ألاقي شغل
اللي مصبرني ومهون عليا اني مش في بلدي اني مع اهلي وكمان التسوق او الshopping وده بيبقى أسعد وقت في حياتي والصورة اللي فوق بعدسة الكاميرا بتاعتي لأكبر هايبر في صلالة اسمه اللولو وفتح الأسبوع اللي فات
غير كده النهاردة زي بكرة زي بعده والناس بيزيدوا بعد عن بعض والرأسماليين بيزيدوا الفقراء فقر أكتر يمكن أكون محبطة ويمكن أكون بفكر بواقعية بس في كل الحالات أنا عايشة بالأمل وأحلامي الحمد لله بتتحقق
هي صحيح بتتحقق ببطء أوووووووووي وكأنها بيبي لسه متعلم يحبي بس المهم انها بتتحقق والمهم نتعلم نحلم ونمشي ورى أحلامنا

http://www.youtube.com/watch?v=t4scdbs8thQ&feature=related