صباح من صباحاتي الملخبطة

في اللحظة دي مشتاقة جدا للبحر ولبرودة أمواجه واحساس المشي على رمله ، بدأت صباح يوم جديد النهاردة بأغنيتين لسيلين ديون أغنية كئيبة بس عجبتني وأغنية تانية كئيبة برضه بس رومانسية بتحكي حكاية اتنين اتفارقوا وبعدين هي من فرط سذاجتها رجعتله تاني اول لما رجعلها
عمالة اسمع في الأغنيتين دول من الصبح ومزهقتش ! وساعات باخد فاصل من فيروز أو ماجدة الرومي او بلاك تيما او هيثم نبيل اللي في رأيي ألبومه الأخير أحلى البوم نزل السنة دي

كتبت حاجات كتير في اليومين اللي فاتوا وكالعادة بعد كده مش بنشرهم شفت فيلم ولاد العم وكتبت كلام كتير عنه والفيلم عجبني جدا وعجبني جدا تمثيل كريم عبد العزيز وبعده شريف منير حسيت انهم الشخصيات فعلا
انتيمتي مخصماني وانا بفكر فيها كل 5 دقايق وبسمع اغنيتنا عو عو عو ونفسي لما انزل القاهرة نروح ناكل كشري عند أبو طارق ونركب المترو وبفتح موقع الجامعة كل شوية علشان اشوف بيان الدرجات مع اني عارفة النتيجة واني ناجحة وبعمل داون لود لفيلم فرنسي مترجم بالانجليزي عن حياة اديت ابيتاف ام كلثوم فرنسا والفيلم أسمه الحياة باللون الوردي LaVie En Rose ورابد شير مطلع عيني في الداون لود
بابا سألني السؤال اليومي لسه منمتيش! وكان ردي هو السؤال ده مقرر كل يوم ولا ايه؟ فبابا قاللي : أه فقولتله على فكرة انا مش هجاوب

كنت بتفرج على التلفزيون في أمان الله وفأجه كله ضاع كله راح كله اتكسر كله اتغير صاحب البيت عقبال امالتكو هيبني دور كمان وكسروا كل الدشوش - جمع دش- والله اعلم بقى امتى ارسال التلافازيون هيرجع لنا تاني وهما بيخبطوا فوق دماغي مباشرة كان نفسي أبقى هركليز وزينة في بعض وأطلع أرميهم من فوق السطح لأنهم جابولي صداع ده غير اني كنت بتفرج على برنامج من سيربح البنبون ومكملتوش بسببهم وطول ما هما بيكسروا وبيخبطوا وعاملين دوشة بفتكر الأفلام بتاعت الكفار لما واحد بيجي يكسر الكعبة فيقول شلت يدي شلت يدي ياااااااااقوم ودوني المستشفى بس متكونش القصر العيني علشان الداخل فيه مفقود والخارج ده لو خرج مولود
عملت داون لود لأخر فيلم لميل جيبسون زي ما قاللي المدون مصطفى فوزي في تعليقه عالبوست اللي فات والجزء الأول عملتله داون لود مرتين والتاني نفس الموضوع الفيلم زهقني بصراحة في الداون لود وبعدين دلوقتي حاولت افك الضغط عن الفيلم وراسه وبرانيط البلد انه error هو ايه اللي غلط مش عارفة !
كل لما بدخل المطبخ بغني أغنيتين عبالي حبيبي ل اليسا واو بحار لبلاك تيما
بحب في نفسي حاجة اليومين دول اني بحب أجرب أي حاجة جديدة في الأكل خصوصا ومش فاهمه احنا ليه مقتصرين في أكلنا على المطبخ المصري اليومين دول بتعلم أكلات جديدة وتبقى المكرونة بالصلصة أحب أكلة لقلبي ممكن اطبخها علشانها سهلة التحضير وكمان كباب الحلة والفتة بس اللي لسه متعلمتوش ومش ناوية اتعلمه المحشي
وعلشان يبقى ختامها فل امبارح عملت داون لود لكورس انجليش بيعلم النطق الصحيح والمحادثة وبيتهيألي مش هعرف أوصف تعبيرات وشي أول لما سمعت أول محادثة كانوا بيتكلموا هنولولي مش انجليش ودار في ذهني سؤال لولبي هو ده الانجليش ولا اللي درسناه في الكلية اومال لو مكنتش اتعلمت في مدارس لغات كان ايه اللي حصل !
وافتكرت ايمي سمير غانم في فيلم عسل أسود لما كانت مدرسة انجليش ونطقها في الانجليش يفطس من الضحك
ويا كلياتك يا مصر يا كلياتك يا كلياتك
ونطلع من كل اللي انا قولته ده بإيه اني بقول أي كلام لأني متنرفزة ونفسي الناس اللي عاملين دوشة وبيكسروا السطح دول يذهبوا الى الجحيم والمشكلة ان الموضوع مش هيستمر النهاردة بس لأ ده هيستمر ويتوغل وينتشر لغاية لما يبنوا الدور التاني وبيتهيألي المشكلة عندي لأن لما كنا في مصر كانوا الجيران بيهدوا بيتهم وبيبنوه تاني فكان فيه نفس الدوشة :) وصيتكو المدونة لو جرالي حاجة لأني بقيت خايفة فعلا السقف يقع علينا

حاجات تغيظ

علشان نبطل نقول أن الرجل الغربي ألطف من الرجل الشرقي وبيعامل مراته بطريقة نبيلة وأنيقة

واحد من مشاهير هوليود – ميل جيبسون- ادى لمراته بالبوكس في عنيها مرتين والغريب أن الممثل ده لو فيلمه بريف هارت جه 100 مرة لازم أتفرج عليه من البداية للنهاية واحتمال كبير الممثل الأمور يتسجن !

مصدر المعلومة من برنامج ذا انسايدر ع الام بي سي فور

في نفس البرنامج تابعت التحضيرات لحفل زفاف بنت بيل كلنتون وهلاري كلنتون حفلة الزفاف لغاية دلوقتي متكلفة 3 مليون دولار جه على بالي أسئلة كتير وأنا بتابع البرنامج يا ترى هو مهم حفلة الزفاف تكون أنيقة أوي كده علشانها مرة واحدة في العمر؟ يا ترى ال3 مليون دولار دول كانوا ممكن يأكلوا كام دولة فيها مجاعة ، كان ممكن يفرحوا كام طفل يتيم ، كان ممكن يعلموا كام واحد ظروفه مسمحتش انه يتعلم أصلا أو يكمل تعليمه وكان ممكن يبنوا كام بيت ويجوزوا كام شخص !

مش عارفة حسيت اني متغاظة لكن من حق أي حد أنه يعمل حفلة زفاف فخمه بس المهم أن حب العريس والعروسة يستمر ويحسوا بفرحة حقيقة في حفلة زفافهم وكل يوم بيعيشوه مع بعض يبقى فرح حقيقي والأخيرة دي مش ممكن تشتريها ولا بكنوز الدنيا مش ممكن تشتري نظرة حب ولا طبطبة ولا حضن حنين – هي أشياء لا تشترى – تمنياتي للعروسين بنجاح جوازهم واللي عطاهم يعطينا

النت عندي كان فاصل وبرغم أن بقى عندي وقت أكتر بس أعراض انسحاب النت من دمي مش عايزة تخلص

والنت من الموبايل أو من كارت زي كارت شحن الموبايل بيبقى حاجة تغيظ

لغاية امتى السبكي هيفضل ينزل بمستوى الأفلام ، استفزني جدا اعلان فيلم ولاد البلد هما ولاد البلد دينا الرقاصة اللي بترقص بطريقة مستفزة وسعد الصغير ! من كام سنة كان لما تقول لحد انت ابن بلد يعني بتمدحه غاية المدح يعني بتقوله انت جدع وشهم وأخلاق وذوق وشجاع .... الخ كوكتيل صفات كويسة وعلى فكرة في مدونين كتير ولاد بلد على حق ومش بجاملهم خالص بجد زي مثلا أ- خالد أبو همس وشريف باشا ووليد هي وظروفها وأي حد هيقابلهم في لقاء المدونين ويتعامل معاهم هيشهد بكده لكن اللي شوفته في اعلان الفيلم عن ولاد البلد حاجة تانية ده غير أغنية سعد الصغير في الإعلان أغنية مستفزة

اعلاميين كتير ومغنيين وممثلين وأسفة في اللفظ أراجوزات وكتاب ملهمش في الكتابة ولاعيبة كورة بقو مفروضين علينا وبيطلعوا ليل نهار في التلفزيون وكلهم انصاف موهبة أو منعدمين الموهبة أصلا

فين بقى الرقابة على كل اللبخ ده ؟ هو مكنش في حد بيسوء سمعة مصر غير د. هالة سرحان واللي بيحصل في الأفلام والمسلسلات والبرامج الحوارية والإعلانات مش تسويء لسمعة مصر !

بجد بجد حاجات تغيظ

العلم في الراس مش في الكراس

زي كل سنة توالت المسجات والتليفونات من الأقارب وغير الأقارب لتهنئتي بالنجاح من قبل ما أنا حتى أعرف النتيجة ولا أعرف عملت ايه في المواد المختلفة والموضوع ده على أد ما بيظهر انه اهتمام من الناس بيا على أد ما بيجنني وبيخليني أحترق داخليا وبيجيبلي انغلاق نفسي وضيق تنفسي وفسفس هستيري ، طيب الكلية عاملة موضوع الرقم السري أو الرقم القومي للدخول على النتيجة عالنت ليه علشان النتيجة تبقى خصوصية محدش يعرفها غيري ! واللي بيحصل العكس أنا أخر من يعلم ! لسه النتيجة مظهرتش عالنت بس انا عرفت التقدير العام لل4 سنين

من كام يوم كنت بدعي ربنا سبحانه وتعالى اني أجيب مقبول وحاطة في حسابي موضوع الفرنساوي اللي فضل معايا سنة تالتة ورابعة وبيقولو اني أخيرا نجحت فيه واللطيف أن باقي ال15 طالب وطالبة لسه شايلين المادة يعني 2 نجحوا من 15 كنت متأكده انه اكيد هيبهدل تقديري وهينقلني من فئة الجيد لفئة التقدير الشعبي وكنت خايفة جدا أجيب جيد علشان لو كنت جبت التقدير ده كنت أكيد أكيد هقدم دراسات عليا في كليتي اللي مش هتعلم فيها أي حاجة جديدة ولأني زي كل الناس بفضل الأمان وبخاف من التغيير فلو كنت جبت جيد مكنتش اتقدمت خطوة واحدة

دلوقتي عندي طاقة كبيرة جدا اني أثبت لنفسي و لكل الناس اللي عرفوا نتيجتي قبلي اني أذكى من كده ومستوايا أحسن من كده وأخدت عهد على نفسي اني إن شاء الله هكمل دراسات عليا في الجامعة الأمريكية أو في انجلترا أو أمريكا -نفسهم- ولأني مش بنت وزير بيتعالج على حساب الدولة ولا بنت واحد محتكر الحديد ولا بنت شيوخ على رأي شيري انتيمتي فأكيد الماجيستير في الجامعة الأمريكية أو في انجلترا حاليا هيبقى نوع من أنواع الجنون

لكن عهد على نفسي طول ما فيا حياة هفضل أسعى لتحقيق الحلم ده حتى لو بعد 10 أو 20 سنة وحتى لو كل الناس أحبطوني

دكاترتنا الأفاضل استطاعوا وبجدارة أنهم يحولوا أحلامنا من طلاب داخلين شايفين الحياة وردية وعندهم حماس يبقوا متفوقين ودكاترة جامعة مستقبليين لطلاب مرعوبين من التعبير عن رأيهم خايفين من كل حاجة وبيقولوا يارب ننجح ومش مهم تقدير ! وع العموم ربنا موجود واللي عايز يظهر أنه فعلا متميز وأحسن من توقعات الناس ليه بيعمل كده حتى لو قابله مليون عائق وظلم وظلام

والواضح اني مبعرفش أحقق أحلامي الا لو كان عليا ضغط داخلي من نفسي لتحقيقها والحمد لله على كل حال

وبرضه هفضل شايفة نفسي متميزة ومختلفة عن أي حد في سني .

معجزة سنة 2010 أنا نجحت في مادة اللغة الفرنسية بعد سنتين عذاب واكتئاب – يا بركة دعا الوالدين -

ونجحت من الدور الأول في كل المواد في كليتنا الموقرة برغم الامتحانات السخيفة والحر القاتل اللي كنا بنمتحر فيه

ومش بس كده كمان بقى عندي هدف عايشة لتحقيقه ، مرة تانية الحمد لله على كل حال

كلام تلقائي

صورة من شاطئ المغسيل في صلالة الطبيعة رائعة والجو جميل بس الرطوبة عالية جداااااا

بعدما أصابتني لعنة الفراعنة بإني بكتب وكل كلامي بدفنه في ملف في اللاب او بكتب من غير تحمس والكلام اللي زي ده مبيبقاش له لازمة انه يتنشر أساسا فقررت ان كلامي دلوقتي هيبقى كلام تلقائي واللي يجي على بالي هكتبه

* المصريين بره مصر أسخف ناس في الدنيا كلها ما عدا 1% يمكن احكيلكو على مواقف مطينة للمصريين بره مصر ويمكن محكيهاش انا دافنة الكلام في الموضوع ده في اللاب وصعبان عليا انشره لأن الكلام مش لطيف على اللي اسمهم مصريين لكن روحهم مش مصرية والله يجازي الناس دول هما والإعلام بقت حاجة لا تدعو للفخر انك تقول انا مصري

وبيسألوني بتحبي مصر قلت مش عارفة على رأي الشاعر تميم البرغوثي

* كليات البلد كلها نتيجتها طلعت ما عدا جامعتنا جامعة المكسورة - المنصورة سابقا-

* حينما ترتدي السماء المعطف الأسود المرصع بالنجوم بنسى خالص اني اعرف انام لغاية الصبح ومش عارفه هفضل لغاية امتى زي عمر دياب ليلي نهاري :( وانا مبحبش النهار بشمسه الموجعه للعين وحره القاسي ودي حقيقة لكن بحب الفجر ورائحة الهواء ولسعة البرد والندى في الوقت ده .

* بقرأ في كذا كتاب اليومين دول مع بعض لغاية لما حاسة ان دماغي بقت عاملة زي حلة الضغط وهتنفجر ومش فاكرة أي حاجة من اللي بقرأها :( محتاجة أركز اكتر في قراءة حاجة واحدة مش كذا كتاب مع بعض

حاليا بقرأ كتاب لعنة الفراعة اول يوم قرأت كتاب لعنة الفراعنة اتفزعت جدا من الكتاب كالعادة لأني مش اول مرة اقرأ عن لعنة الفراعنة بس اول مرة اقرأ الكتاب لأنيس منصور نصيحة محدش قلبه خفيف يقرأ بداية الكتاب بالليل

* حقيقة علمية تانية انا بحب أبو سلكة اكتر من اللاب

الكمبيوتر تلاقيه حمش كده وليه هيبته ومتخذ شعار اللي عايزني يجيلي انا مبروحش لحد لكن اللاب معاك في كل مكان وأكيد أكيد هيسهرك وهيطير النوم من عنتينك

كنت بقول لبابا ع اللاب مخدوش يا بابا مخدوش عاااااااااا ولما بابا جابه قاللي ميدخلش أوضتك وانا زعلت بقى وقلت ازاي يعني هو مبيتكشفش على بنات ولا ايه بس عرفت بعد كده ان طالما اللاب معايا يبقى مستحيل هنام عندك حق يا والدي

* في رمضان استهبالك عندنا

ايه كمية المسلسلات اللي جاية في رمضان دي كل سنة بيزيدوا مش بينقصوا وايه كمية العنف الكبير والصعايدة اللي في المسلسلات اللي هتيجي في رمضان السنة دي

وبعدين هما الصعايدة شريرين وقاسيين وتجار سلاح ومخدرات وأثار ولا الصعايدة هما الناس اللي اتعاملت معاهم ناس كرماء وعندهم شهامة ومرحين وبيحبوا الحياة وده ميمنعش برضه اني عرفت صعايدة سيئين جدا

بس ده ميخليش الاعلام والمسلسلات يظهروهم بشعين وبعدين الملك فاروق هيعملوا له كام مسلسل ! في رأيي المتواضع بعد مسلسل الملك فاروق بتاع الكاتبة لميس جابر وتيم مفيش الملك فاروق تاني خلاص ليس في الامكان احلى مما كان

ومش ناوية اتابع غير عايزة اتجوز علشان غادة عبد العال المدونة والكاتبة الجميلة مش علشان هند صبري المملة والمصطنعه والمبالغة جدا في تمثيل دور غادة وكمان مش محجبة مع ان غادة محجبة ولا هي ولا مامتها سوسن بدر

لما هي القصة واقعية يبقى يعملوها صح ولا بلاش واحتمال كمان اتابع مسلسل تيم لأنه بيمثل كويس أوي

والى هنا ينتهي الكلام لغاية لما اكتب تاني :)

إغتراب

أظل أصارع أمواج الحياة

فمرة أغرق ومرة أفوز

تهنأ لي الحياة وتريح بالي عكس توقعاتي

اطمئن وابدأ بحمد الله ثم أرتعب على من أحبهم

يسكب الخوف سمه في قلبي وعقلي

أتخيل أنه الهدوء الذي يسبق العاصفة

وأشعر بغصة في حلقي

وأسمع ندائا يفزعني ويمزق قلبي

وأصبح مثل قمر غريب

مثل زهرة برية وحيدة في الصحراء

مثل شوق أضنى قلوب العشاق

ضوء ينطفئ لهبوب الرياح

أؤمن بتأثير الكلمة والدعاء

فيا الهي الكريم العظيم الرحيم

ان اعطيتني قبلت

وان منعتني رضيت

وان تركتني دعوت

وان دعوتني اجبت

فاعطني الهي ما اريد فإن لم تعطني ما اريد

فارزقني الصبر على ما تريد

الحياة رحلة

">

صباح الخير

قبل رحلتنا بكام ساعة مش جايلي نوم كالعادة واكتشفت شوية حاجات

اولا : ان أغنية سيلين ديون اللي انا حاطه الفيديو بتاعها هنا بتيجي على بالي كل شوية مش كلها لكن الكوبليه اللي بيقول all by myself don't wanna be all by my self anymore احلى كوبليه في الأغنية ولذلك اللي هيسمعها يركز عالكوبليه ده ويسيبه من باقي الأغنية وكمان فيلم بريدجيت جونز بيجي على بالي


ثانيا : اني بنتهزر الفرصة وبكتب علشان مش عارفة ممكن اكتب امتى تاني وطبعا مش لاحقة ارد ع التعليقات لكن بجد فرحانه بيها واني لما بقول كده في موضوع مبيجيليش بعدها ولا تعليق :)

ثالثا : اني اكتشفت اني اخدت معايا كتب كتير جدا وبوزنها دلوقتي لقيتها حوالي 5 كيلو :) فمش عارفة هعمل ايه في الميزان وانا طالعة الطيارة بعد كام ساعة ان شاء الله

رابعا : الاكسسوار بتاعي طبعا معدن وكل بوابة في المطار هعدي عليها هتصفر وهيبقى شكلي محرررررج جدا

خامسا : عايزة انام جدااااااااااا وفي نفس الوقت عندي ارق جداااااااااااا

سادسا : يارب تبقى رحلة كويسة بكرة

اكمل بقى كتابة ما انا عملت البوست ده زي تويتر كده

دلوقتي انا في المطار قدام بوابة 7 في كافي شوب وطلبت وايت تشوكلت وشكلهم مش هيعرفوا يعملوه مع اننا في المطار
والمفروض الكافيه مستواه كويس ، قدامي مكتبة الشروق وطبعا مش هشتري كتب لاني اخدت معايا كتب تكفيني وتكفي الجيران هما أصدق أصدقاء وقريبين جدا مني
نفسي اصور المكان بس مفيش وقت لسه ساعه على اقلاع الطيارة

مع اننا وصلنا اول ناس عالميزان بس ميزان الشنط كان كبير زي ما توقعت وساعه ونص عالميزان لغاية لما زهقت


شوية حاجات كتبتها وانا جايه لطريق المطار

عمرو دياب صوت ذكرياتي سمعته معظم الوقت وانا جاية المطار

لسه ماما خايفة أضيع جواز السفر وحاسة اني بيبي :) بس اخيرا ادتهولي واخدته تاني حاليا :)

جاي على بالي مقولة لا كرامة لنبي في وطنه وعرفت ليه لما وصلت المطار روتينين اخر 20 حاجة

بضحك اوي لما حد بيقوللي بتعرفي انجليزي وبقولهم لأ أنا ثقافتي الماني

لتاني مرة بسمع أغنية هيرو لانريكي :) هو لسه في هيرو الأيام دي

سلام علشان الجيت فتحت ولو عرفت اكتب من الطيارة هكتب

شنطة سفر

فقدت شهيتي للكتابة وبحاول ارجعها تاني ، زي كل سنة خلاص هسافر وبرغم ان البلد دي خنيقة لأي حد عايش فيها الا ان ليها حنين كبير جدا والأصعب من السفر تحضيراته وأرقه أصعب من السفر نفسه


وعلى أي حال في البوست ده نقلت كلام انا كاتباه من فترة علشان مسيبش المدونة فترة طويلة من غير كتابة

رواية في كل أسبوع يوم جمعة

أخر رواية قرأتها واخدت وقت كبير لغاية لما خلصت الرواية وفعلا زعلانة على وقتي اللي ضيعته فيها !

من أول ما خلصتها وأنا عايزة أكتب عنها انها كانت رواية قبيحة ووقحة وأغلب تعبيراتها فجة ووصف بعض المشاهد فيها فج وبدور على كلام أكثر لطفا بس مش لاقية

بس واضح ان ده رأيي لوحدي لأن الكاتب ترجمت ليه أعمال كتير والطبعة اللي قرأتها من الكتاب كانت الطبعة الرابعة

يعني الرواية مش وحشة وبتتباع كويس

على أي حال ده رأيي العام لكن الرواية فيها مميزات زي فكرتها الجديدة انها بتتكلم عن الانترنت وبتتكلم بلغة الإنترنت وزي التنوع الكبير اللي موجود في عالم الانترنت والعلاقات اللي بتربط المدونين مع بعض

يعني مثلا في اللي داخل التدوين في الموقع وهدفه دنيء وفي اللي داخل التدوين علشان يفضفض وفي اللي داخل التدوين علشان يحل مشكلة وفي اللي بيعمل دور الواعظ والفيلسوف وكل ده موجود عالنت زي العالم الحقيقي

الرواية فيها سخرية كبيرة جدا وتضاد بين اسمها اللي بيحمل رمز ديني وروحاني عند المسلمين وهو يوم الجمعة وبين محتوى الرواية اللي يبعد كتير عن المعنى ده

اعلان ميلودي السخيف

اعلان ميلودي الجديد شعاره ميلودي تتحدى قلة الأدب ، برغم ان الاعلان يبان هادف لكن الطريقة المقززة لكلام الميلودي مان واللي بيتكلم بطريقة كلها ملل لما بيقول : البنت اللي في الشارع دي أختك بتبين الولاد المؤدبين والمحترمين واللي بيحترموا البنات في الشارع بصورة عكسية يعني بمعنى اصح الإعلان عكسي !

سلام يا مدونتي ، ان شاء الله هرجعلك تاني قريب

دمياطية أنا

برغم اني تقريبا مش شايفة قدامي وكمان مكسلة أنزل صورة للبوست دلوقتي لأني لسه هوصل الموبايل بالكمبيوتر وبعدين ادور ع الصورة وبعدين انقلها ع الكمبيوتر وبعدين اعمل لها ابلود كل ده ! وبرغم ان عندي تعليقات عايزة ارد عليها بس في نفس الوقت عايزة انام واروح لعالم الأحلام لكن لازمن ولابندق اتكلم عن النهاردة قبل ما تفاصيله تروح من بالي وتتبخر كالعادة -وحتى بعدما بقينا الصبح لسه عندي نفس الاحساس-

واحنا في طريقنا للمنصورة الMP3 علق على كوبليه في أغنية لمنير والكوبلية بيقول : ده بكرة جايب نهار يستاهل المشوار ..... يبقى المصير في اليد " ومن كتر ما المقطع اتكرر زهقت من الMP3 وقولتله والله عرفت ان بكرة جايب نهار يستاهل المشوار
وكمان سمعت الأغنية اللي في المدونة حاليا وكانت عجباني جدا

النهاردة رحت المنصورة بقى بيني وبينها عمار وبدأت احفظ ملامحها ، المهم رحت بوكس اند بينز كالعادة بس مش عارفة ليه النهاردة مغليين أسعار الكتب بس برضه اشتريت كتب المدونين طبعا في الاول زي الضرب في الميت لأحمد الصباغ ووظيفة ماتمت لمايكل وكتاب اسمه تحولات في كيميا البشر مش عارفه هو بتاع مدونة ولا لأ بس الاسم مش غريب عليا ولغير المدونين سحابة صيف لكريم الشاذلي والخطوبة لبهاء طاهر وقبل أن تنتحر ل عبد الله دينور

ملقيتش ضحك مجروح لبلال فضل مع اني رايحة وناوية اجيبه اول كتاب وملقتش هل تبحث عن السعادة لمحمد غالية كلاكيت تاني مرة
في كتب استفزتني هناك زي كتاب اسمه طظ فيكم طبعا مستحيل هشتري كتاب ده اسمه وأصلا مفكرتش اشوف محتواه ، حسيت انه بيقول كده للقراء مع ان وارد جدا يبقى قصده حاجة تانية وده الاحتمال الأكبر وكتاب تاني كان اسمه عطر الأنثى تقريبا
رواية عجبني اسمها وفتحت أول صفحة لقيت مكتوب تحذير الرواية دي مينفعش اقرأها ولا أي حد من جيلي فقفلت الكتاب وحطيته مكانه ، صعب اوي لما تألف كتاب وتتعب فيه وبعدين هفوات زي دي تضيع تعبك وتخسرك حد كان ممكن يقرأ ليك

بعدها طلعنا على كوك دور مطعم اكله حلو طبعا ده غير انه بيفكرني بأول لقاء مدونين وبشيما أختي الكبيرة اللي حذفت مدونتها ونسيتنا على أد ما انا مفتقداها على اد ما انا فرحانه ليها وبدعيلها ربنا يوفقها في حياتها الجديدة بس طول الوقت في كوك دور كنت بفتكر لقاء المدونين في المنصورة بجد كان يوم جميل مستحيل يتنسي
وانا في كوك روحت أطلب الأوردر واخدت دوري ولسه هطلب لقيت واحد جه وطلب قبلي فاللي بتسجل الطلبات قالتله مش سمعاك تعالى الناحية التانية ، ف أنا سكتت خالص لكن استخدمت طاقتي الذهنية وقلتله في عقلي انت قليل الذوق انت قلييييييييييييييل الذوووووووووووووق فيظهر انه فهم او ظهر المعنى ده على تعبيرات وشي واتحرج وقاللي اتفضلي اني اطلب الأول وطبعا طلبت الاوردر قبله
بعد كده جه شباب قعدوا في الكرسي اللي ورايا ولأن الكراسي مرتبطة ببعض فالكرسي اتحرك بعنف لما قعدوا عليه وانا طبعا اتخضيت أصل مفيش حد عنده ذرة عقل يقعد على الكرسي وكأنه عايز يكسره وبعدين يفضل يضحك بهيستريا وفعلا أصحاب العقول في راحة
مع ان الأكل كان حلو أوي بس الغريب اني مش بعرف أكل كويس في المطاعم أو في الطيارة ! مفيش احلى من أكل ماما ربنا يباركلي في عمرها وصحتها

بعدها كنا في الشارع شفت أب وطفلته طالعين من محل ألبان . البنوتة كانت لابسة شنطة حمرا وباباها حضن ايديها بكل حب واهتمام
شوفتهم ولقيتني بتنهد من أعماق قلبي فكرتني بطفولتي وبحاجات مفقودة . في الوقت ده ماما كانت بتجيب فواكه جه على بالي انها هتجيب كرز أو بالمصري كريز وبعدين قلت لنفسي يا سلام كرز فريش في مصر ! ونفيت الفكرة من تفكيري وبعد شوية ماما جت بتقوللي عارفة جبتلك ايه؟ قولتلها ايه؟ قالتلي كرز ابتسمت وانا مش مصدقة قولتلها مستحيل أنا لسه كنت بفكر انك هتجيبيه ومتخيلتش انه يكون موجود
يبقى أنا كده في الجنة بقى بمجرد ما بفكر في حاجة بتجيلي الحمد لله

طبعا لأني في الكتكوتة مش بعرف أتفرج عالمحلات وأنا ماشية ، بس في نفس الوقت عندي عشق لفساتين الفرح بحب أوي أشوف تفصيلاتهم وأشكالهم وفساتين السهرة عموما شكلها مبهج جدا وموديلاتها راقية جدا في المنصورة وتقريبا كده ان شاء الله هجيب فستان فرحي من هناك ده بعد عمر طويل ان شاء الله :) من كام يوم كنت بشتري هدوم فصاحب المحل قاللي انتي ذوقك عالي أوي متأكد ان فستان فرحك هتجيبيه من بيروت :) اشمعنى بيروت مش عارفة

كلية الآداب في المنصورة كاتبين اسمها على مبنى الكلية باللون الأحمر مش فاهمه مين الذكي اللي خلى اسم الكلية يتلون باللون ده ولا تعليق

قابلنا أصحابنا في المنصورة وبعدين طلعنا على دكتور أنف وأذن أسمه يوسف شبانة المفروض كان معادنا الساعة 8 لكن وصلنا هناك 9 ونص والشارع ده فظيع على طول زحمة ، من كتر الزحمة اللي بيسوق بيتوتر ورجله بتوجعه لأنه ماشي على أقل سرعة لمدة كبيرة ده غير الحذر الشديد انك متخبطش حد من الماشيين ولا تخبط العربيات اللي بتقف فجأه قدامك ولا تطلع دماغك من العربية وتخبطها في أقرب حيطة انك نزلت المنصورة بالعربية
ساعة ونص بندور على مكان نركن فيه لكن مفيش ، في الأخر رحنا جراج مش قريب ومش بعيد عن الشارع اللي معظم عماراته فيها اطباء

المواصلات في المنصورة صعبة جدا وسواقين التاكسي بشوات مش بيركبوا أي حد معاهم ولازم اللي يركب معاهم يكون رايح أماكن محددة
ده غير المواصلات عموما لا تطاق هناك يعني لا اللي معاه عربيه مرتاح من الزحمة ولا اللي بيركب مواصلات عارف يلاقي مواصلات
ده أكبر عيب في المنصورة لكن غير كده المنصورة جميله جدا

وصلنا للعمارة اللي فيها عيادة الدكتور في الدور الخامس وطبعا الأسانسير بايظ والباشمهندس اللي مخطط العمارة عامل السلم صغير جدااااا جداااااااا علشان واخد كل مساحة السلم في الاسانسير فيادوب واحد بس اللي يطلع السلم ولو اتنين اتقابلوا ع السلم لازم يستنوا بعض علشان السلم مينفعش اتنين يمشوا جنب بعض فيه سلم غرييييييب صغير جدا ، بعدها طلعت الدور الخامس وروحي طبعا طلعت معاه ، في سلم تاني في العمارة الغريبة دي فلقيت بسم الله ما شاء الله واحد في الأربعينيات طالع السلم بكل رشاقة - فكرني بأوباما لما كان طالع سلم الطيارة-
المهم شوفته وبعدين كملت طريقي فسمعت واحد بيقول له ازيك يا دكتر انا جه في بالي دكتر ازاي يعني مش باين عليه خالص انه دكتر لابس كاجوال وجاي متأخر الساعه 10 ونص يبقى اكيد دكتر تاني غير اللي رايحين له ، دخلت العيادة وكانت زحمة جدا ولقيته دخل العيادة وسلم على المرضى ، بعد فترة انتظار دخلنا انا وماما ، لقيت حوض سمك فضلت العب معاه بس طبعا مش بشكل طفولي علشان البرستيج بس :)
بس بجد السمك كان شكله حلو أوي ، وطبعا مطلعتش هعمل عمليات ولا أي حاجه واخد بالك يا د. قبلاوي وبا د. بطوط حبوب وباقي المدونين اللي درسوا او بيدرسوا طب اللي كلهم قالولي طالما دكتورين قالولك تعملي العملية يبقى لازم تعملي العملية ! لما قولت عالمدونة ان المفروض اني اعمل عملية في الجيوب الأنفية وانا رافضة

طلع عندي حساسية ضد الملوثات أو الروائح النفاذة طبعا اتصدمت لأني بعشق البخور والبرفيوم وماما سألت الدكتور هستمر عالدوا أد ايه قالها كل ما الحساسية تنشط قلت للدكتر معنى كده ان الحساسية دي مش هتخف وهتفضل معايا طول العمر قاللي في وشي أيوة ولازم متتعرضيش لملوثات ! طب متقولهاش في وشي واستنى لما امشي لازم يعني تقولي الحقيقة المرة دي :(
الغريب ان ماما وأنا الحساسية دي ظهرت عندنا في نفس الوقت ! وللأسف دمياط كلها ملوثات علشان تصنيع الأثاث وللأسف كمان أعلى نسبة اصابة بالحساسية في دمياط من كتر التلوث اللي فيها وفاكرة لما كنت في الكلية وبتكلم مع زميلة في الموضوع ده قالتلي ان هي وجوزها جالهم حساسية برضه ومش هما بس ده في كتير برضه مصابين بالحساسية ويا شماتة أبلة ظاظا فينا

الحمد لله رحلة الرجوع كانت سلسة بس كان بيجي على بالي أخر حادثة عملتها و فجأه وانا ماشية لقيت عربية بوكس سودا واحنا بالليل وطافيه النور راكنه على الطريق السريع قدامي وبتبعد عني خطوتين وانا رايحه عليها بسرعة الطريق وثواني وهخبط فيها وطبعا ماشي جنبي بالضبط ميكروباص مش عايز يديلي سكة ولا طريق لأنه حيوان واللي راكن في نص الطريق من غير حتى اشارة انه راكن حيوان أكتر منه ، مكنش قدامي غير اني اخبط فيه
هديت السرعة على أد ما قدرت وجبت غيارات عكسية في السرعة و الحمد لله السرعة قلت ونجينا بأعجوبة من الحادثة اللي لو كنا عملناها كنتوا هتسمعوا في برنامج من برامج التوك شو عن حادث اليم على طريق دمياط وكنا هنبقى مجرد خبر ويموت

يخربيت الحكومة اللي تتصرف مع شعبها كده ، عربيه بوكس يعني المفروض اكتر واحد يحترم القانون

حسبنا الله ونعم الوكيل ومنه لله أي حد بيدمر البلد دي أو بيأذي أهلها

appearance and reality

">

"تبدو قطرة الماء نقية شفافة كبلورة فإذا ما كبرتها العدسات ظهرت فيها آلاف الشوائب ، ويظل القمر جميلا صافيا ما دام بعيدا فإذا ما اقتربت بدا لك كشاطئ قذر مهجور . حتى وجه التي تحب ، بشرتها الغضة المتوردة التي تأخذ قلبك، ما إن تضاعف قدرتك على رؤيتها حتى تتبدى لك كنسيج قبيح مجعد . في كل مرة تتأكد الحقيقة . ليس إعجابنا بالجمال إلا خداعا للنظر وكلما اتسعت الرؤية بانت التجاعيد."

من كتاب نيران صديقة لعلاء الأسواني