لقاء مش أي لقاء (موضوع للغيظ فقط)

أيون بغيظ كل اللي محضروش وكنت مفتقداهم جدا واللي لازم يكونوا موجودين معانا اللقاء الجاي ان شاء الله

امبارح كان يوم لذيذ بجد مرمر أميرة على كوكب مهجور يا عيني غلبتها على ما صحتني من النوم لأني بطبيعة الحال مش بصحى بدري من النوم وكمان يوم الجمعة يوم الويك اند اللي ما بصدق انام فيه براحتي وخلاص أخيرا صحيت وببدأ في اللبس وهوب الكهربا قطعت وابتديت أقلق وأقول مش هروح اللقاء لكن نزلت مع انتيمتي (مامتي) وقابلت أميرة ومامتها وروحنا الموقف وركبنا من هناك

اتعرفنا اكتر انا وأميرة ودردشنا كتير طول الطريق وبعدين لما وصلنا موقف المنصورة مرمر كلمت صبرني يارب وكان تليفونها غير متاح فكلمت نوران أم شريف السكرة وقالت لنا انهم لسه في مستشفى الأطفال روحنا هناك وانا دخلت بتحفظ (داخله بنك الدم بقى بيني وبينه عداوة) ما شاء الله لقيت العدد كبير وأول حد شوفته كانت صبرني يارب وأول حاجة أقولها ليها كانت فين شيما :) قالتلي اللي لابسة اصفر هناك وكان في بنوتة جنب شيما هي كمان لابسة أصفر :) ف اتلخبطت وبعدين سلمت على شيما وبجد حسيت اني اعرفها من زمان وللأسف مخضتهاش ب بوكيه الورد :) المرة الجاية يا شيما أوعدك اني هخضك بس من غير بوكيه ورد علشانك سبتيه في كوك دور عااااااااااا عااااااااا عااااا
وشوفت خالد همس الأحباب فقولتله انا ليدي ومدونتي روح طفلة مش عايزة تكبر فقال لي بكرة تكبري ان شاء الله :)


وطلعنا من المستشفى وانا مع شيما ودخلنا المسجد سوى سمعنا خطبة الجمعة وبجد كانت جميلة جدااا
وصلينا سوى ياه على الروحانيات الجميلة اللي كنا فيها وطلعنا من المسجد اتجمعنا وروحنا على كوك دور مشيا على الأقدام وبجد طلع مكان كويس قضينا فيه وقت جميل واتغدينا سوى انا وشيما وبنت المنصورة واختها وضحكنا من قلبنا وكمان كنت قاعدة فلقيت نوران بنت خيخة جت سلمت عليا وعلى مامتي من غير ما اعرف انها نوران وانا هموت واتعرف عليها اساسا وسألت عليها وبعد كده عرفت انها هي اللي سلمت عليها بجد بنوتة جدعة وعسولة أوي و مش خيخة ولا أي كلام

بعدها طلعنا على نادي الأطباء في طلخا عالنيل بجد نادي شيك وأجمل ما فيه انه عالنيل وكنا هنقعد قدام النيل بس مش عارفة مين اللي اقترح اننا نقعد في قاعة كان فيها كوشه طبعا محدش قعد عالكوشة نياهاهااهاها سيبنا الكوشة وقعدنا على ترابيزة كبييييييرة يرمح فيها الخيل تلاتين يوم ما يجيب أخرها (طبعا لأن الخيل مربوطة هاهاهاها) واتعرفت بشوية من الموجودين منهم :

فاتيما العسولة والرقيقة وروحها بجد جميلة جدا والحضونة بتاعتها ادمااااان بجد حضنها مش أي حضن اخدت حضن منها مرتين ربنا يرجعلك يوسف يارب وميتحرمش من حضنك :)

ونوران بنت خيخة كنت بحبها من مدونتها ولما اتعرفت بيها امبارح حبيتها أكتر

حلم كان بنوتة لذيذة و شقية ودخلت قلبي بسرعة وحسيت اني اعرفها من زمان

شيما حبي يا حبي مكنتش عايزة يفوت فسوة وانا مش معاها بجد هي فعلا اختي الكابيرة شخصية تتحس اكتر من انها تتوصف بالكلام لأن الكلام مش هيوفيها حقها وعملت امبارح مجهود كبير جدا علشان اللقاء الجميل ده


رحيل وايمان بنوتتين عسولين وحلوين جدا فرحت جدا لما اتعرفت عليهم وصلينا سوى علشان يبقى تعارف وعيش وملح وصلاة كمان :)


بنت المنصورة وأختها بنوتتين زي العسل حسيت اني اعرفهم من زمان وكمان بنت المنصورة طلعت زومل من نفس ذات الكلية :)

ابراهيم كاتب مصري بجد انسان ذوق وجدع جدا وكفاية انه برضه زومل في نفس ذات الكلية

صلاح مسدس صغير المحامي بتاعنا مرح وذوق جدا وهو وابراهيم جابلونا مركب علشان ناخد جولة في النيل

أميرة مرمر بجد انا بحبك جدا ولولا انك شجعتيني مكنتش حضرت اللقاء ده بجد انتي بنوتة جميلة أوي

عاشقة وغلبانه : طلعت مرحه طلعت مرحه هييييييييه كنت كل ما بدخل مدونتها بزعل ويمكن اعيط كمان بس لما شوفتها لقيتها بنوتة زي القمر ومرحة وعسولة

صبرني يارب : عسولة جدا وجميلة جدا ومرحة وكانت عاملة جو جميل ل اللقاء وأول حد شوفته في اللقاء وحسيت بالاطمئنان

افتقدت جدا خالتو ستيتة حبيبتي وكلنا سألنا عليها ونفسي اشوفها في أقرب وقت
وكمان افتقدت ايمان ايمي حبيبتي واحساس طفلة رومانسية يارب اشوفك لما ترجعي من اليابان او اجيلك اليابان
وشباك موارب منار الدكتورة بتاعتنا ويوم جديد عرفت انها اتكلمت في التليفون بس امتى مش عارفه عااااااا كان نفسي اشوفك وبسمة انور سالت عليكي اول لما وصلت وقالولي انك مجيتيش مخمصاكي وشاب فقري برضه عرفت انه مش جاي والانجينير احمد ابو العلا بجد كان يوم جميل وفاتك وكيكي عوووو حبيبتي أي خدمة اتصلت بيكي في اللقاء وانتي متصلتيش بيا في أي لقاء روحتيه شوفتي بقى (وش بيطلع لسانه)
ديدي كان نفسي اشوفك بجد

طبعا الرحلة النيلية كانت روعة واتعرفنا فيها على بعض اكتر وبجد منظر الطبيعة ياخد العقل وفاتكو نص عمركو ياللي محضرتوش اللقاء


وكمان بعد اللقاء اتمشيت مع مامتي على النيل ومفيش ولا تاكسي جاي فاضي كلهم كانوا مليانين لغاية لما اخيرا لقينا تاكسي وتوهنا لغاية لما وصلنا لمكتبة بوكس اند بينز وكل ما اسأل على كتاب يقولولي خلص بس جبت كتابين حلوين

بجد يا مامتي انا بحبك اوي وانتي فعلا انتيمتي واليوم كان جميل بوجودنا سوى


ملحوظة : هجمع كل الصور اللي كنت عايزة انشرها عالمدونة وال3 صور بتوع يوم اللقاء وهنشرهم كلهم في بوست لواحديهم ان شاء الله

معجزة صحيت بعد الموت

كان ياما كان يوم الجمعة اللي فاتت كان في بنوتة ومامتها رايحين يزوروا خالة البنوتة وطلعوا ع القاهرة ومن القاهرة راحوا جمهورية المنوفيه وهما في الطريق ضلوا الطريق وطلعوا على طريق تاني خالص غير اللي بيمشوا فيه وكانت نجاة بتكمل الصورة وبتقول في الmp3 طويييييله طويييييييله يا سكة العاشقين تيرا طوييييييلة طويييييييييله على العاشق طويله يا عيني والجو كان جميل والشمس خفيفه وفجأه الجو بقى ممطر مطر خفيف وهما ماشيين في طريق كبير مكون من خمس حارات يعني طريق كبير ويستحمل ان 5 عربيات يمشوا جنب بعضيهم بس القاهريين الله يعمر بيتهم كانوا بيمشوا 7 او 8 او احيانا 9 عربيات جنب بعض وكانوا عاملين زحمة وهرجله كبيره جدا

وفضلت البنوتة ومامتها ماشيين لغاية لما الحمد لله دخلوا في الطريق الصح طريق القناطر المنوفيه _ وهيلا هيلا في القناطر رحلة جميله في القناطر كلنا عيله في القناطر _ دي اغنية كنت بحبها وانا طفله

كانت البنوتة عندها بداية دور برد وكانت صاحية بدري ومنامتش كويس والجو بدأ يمطر على الطريق السريع ما بين القناطر والمنوفيه وكأن المطرة كانت مستنياهم المطرة بدأت خفيفه والبنوتة كانت ماشية بسرعة والطريق كان عامل زي الثعبان كله منحنيات فمامة البنوتة قالت لها هدي السرعة شوية فالبنوتة – وبراءة الأطفال في عينيها – بصت للمراية الصغنونة لمحت وراها 3 عربيات منهم عربية بيجو بيضا ظهرت فجأه

وداست البنوتة على الفرامل بكل قوه علشان تهدي السرعه ووقتها فقدت السيطرة على الكتكوتة

الكتكوتة راحت منها يمييييييين بكل قوووووووه يعني كان ممكن تخبط في العربيات اللي وراها او جنبها ففكرت ان الفرامل فيها مشكله فضغطت أكتر على الفرامل مرة تانيه فالكتكوتة راحت منها شماااااال ناحية السدود الأسمنتيه اللي بتبقى بين الطريقين وفجأه البنوتة حست انها مش شايفه أي حاجه ومش قادرة تسيطر على الكتكوتة ومش قادرة تسمع كلام مامتها بوضوح في الوقت ده الكتكوتة خبطت في السدود الأسمنتيه 3 مرات والكتكوتة لفت منها وبقت في الاتجاه المعاكس ووقفت بعد طبعا ما اتخبطت من كل النواحي في الوقت ده كان صاحب العربية البيجو البيضا وقف عربيته ونزل وقف الطريق للبنوتة ومامتها لأن ده طريق سريع والحادثة حصلت في منحنى يعني العربيات اللي جايين مندفعين عمرهم ما هيشوفوا الكتكوتة ولازم يخبطوا فيها ولو كان ده حصل كانت الكتكوتة والبنوتة ومامتها بقو كفته كل ده والمطر بقى ينزل بغزارة كبيرة جدا وحجب الرؤية شويه

نزلت البنوتة ومامتها وهما الاتنين كان الفاصل بينهم وبين الموت ثواني وشافوا الخبطات بتاعت الكتكوتة وكانوا متوقعين انها بقت كفته من قدام من شدة الخبطات لكن الحمد لله اللي حصل خبطات خفيفه بالنسبه للحادثه وخدوش في دهان الكتكوتة والبنوتة اعصابها باظت فمامتها أصرت انها تكمل سواقة الكتكوتة وكمان مامة البنوتة كانت اعصابها بايظة بس حاولت تكمل سواقه كل ده وصاحب العربيه البيجو موقف الطريق للبنوته ومامتها وواقف تحت المطر والبنوتة ومامتها مكانوش شايفينه وبعد الحادثة وقفت عربيات كتير علشان تساعد البنوتة ومامتها بس اللي فعلا ساعدهم الشخص صاحب العربيه البيجو واللي المطرة بهدلته وهو موقف الطريق واللي قال للبنوتة ان سبب الحادثه انها ضغطت على الفرامل والمطرة لسه خفيفة والأرض في الوقت ده بتبقى عامله زي الصابون مزحلقه فمينفعش الضغط على الفرامل وقتها

الشخص ده انتظر لغاية لما البنوتة ومامتها ركبوا الكتكوتة ومشيوا وهو ركب عربيته ومشي بس مظهرش في مراية الكتكوتة ولا ظهرت عربيته في الطريق تاني علما بإن مفيش طريق متفرع من الطريق السريع يعني من المستحيل انه يكون دخل شارع جانبي – عارفه ان في ناس ممكن متصدقش الكلام ده بس هو ده اللي حصل –

والبنوتة كانت حاسه ان في ملائكه حواليها اول لما خبطت في السدود الاسمنتيه حست ان في ملائكه بتحميهم ده كان احساس قوي مسيطر عليها وكان نازل عليها سكينه غير عاديه

ملحوظة : البنوتة ومامتها هما انا ومامتي وقلت انشر موضوع الحادثة لأسباب كتير منها

اولا : اني اترعبت على كل المدونين والغير مدونين اللي بيتعاملوا مع العربيات وكان جاي على بالي قبل الحادثه على طول ديدي ربنا يحميها ويسلم طريقها يارب
ف خالتو ستيتة والانجينير احمد ابو العلا ومرمر على كوكب مليان ناس :)
وديدي وappy ومستر هاني زينهم ربنا يسلم طريقكم ويحميكم ومحدش يفرمل والجو فيه مطرة

ثانيا : الحمد لله فعلا حسيت بمعنى العناية الالهيه في الوقت ده
بجد ربنا سبحانه وتعالى جميل اوي

ثالثا : في عربيه نقل اتقلبت واحنا جايين في طريق المنصورة دمياط معنى كده ان الحوادث ف المطر منتشرة جدا فكان لازم اكتب عنها

رابعا : شباب كتير بيبقى نفسهم يموتوا مع أي مشكله بيواجهوها ومفيش عندهم امل في الحياه
لو اتعرضوا لحادثة زي دي وكانوا أقرب للموت من الحياه هيفهموا ان الحياه غاليه اوي وان العمر لحظة
عن نفسي حاسه اني اتولدت من جديد وشايفه الحياه بنظرة جديده

خامسا : أميرة على كوكب مهجور اول صديقة تعرف عن الحادثة ومن وقتها بتكلمني الصبح وبالليل واحيانا بعد الغدى :)
علشان تطمن عليا انا ومامتي ربنا يكرمك يا مرمر يارب وبجد انتي انسانة جميله جدا وكلمة شكرا قليلة أوي عليكي
كيكي قلب الام اللي معايا بقلبها في كل الحوادث اللي بعملها ربنا يكرمك ويباركلي فيكي
بجد ربنا يخليكوا ليا

دعاء السكينة

l

" اللهم امنحني السكينة لأتقبل الاشياء التي لا أستطيع تغييرها .... والشجاعة لتغيير الأشياء التي أستطيع تغييرها ... والحكمة لمعرفة الفرق بينهما "

دعاء جميل جدا ورائع قرأته كذا مرة في رواية ربع جرام اللي أخيرا الحمد لله قربت أخلص قرائتها واللي اتغير مجرى أحداثها خالص

ان شاء الله هحكيلكوا شوية من أحداث الرواية بس دلوقتي خلونا نتأمل في الدعاء , بجد دعاء مريح جدا والنهاردة الصبح كنت بردده وانا رايحة الكلية وحسيت بسلام وراحة مقدرش أوصفهم

يوم ألقاك ...

أشعر أن المسافة بيننا قد طويت وقد أقتربت مني واقتربت منك حتى انني أكاد ان أسمع وقع خطواتك

أكاد أن أراك كما أرى أشعة الشمس الذهبية على وجهي كل صباح وحينما أستيقظ من النوم وكلي يقين بأن كل يوم جديد يقربني من قربك

هل تعلم؟ ان أبواينا أدم وحواء قد افترقا واستمر بعدهم سنوات وسنوات الى أن جمعهم اللقاء

سنوات وأيام قضياها في البعد والخوف والتفكير في المجهول ولكنهم كانا على يقين ان اللقاء قريب

وحينما التقيا كان لقائهم يغلفه الفرح والحب والهناء والسعادة وأصبح يوم لقائهم يوم لكل المسلمين وسمي الجبل (مكان لقائهم) ب جبل (عرفات) لأنهم تعارفوا هناك بعدما تاهت أرواحهم سنوات وسنوات

هكذا أنا وانت فقد تعارفنا وتألفت أرواحنا حينما كنا هناك يوم شهدنا بوحدانية الله الواحد الأحد يوم شهدنا انه ربنا سبحانه ولا رب سواه يومها همست لي أنه كما تلاقينا هنا سنتلاقى هناك (في الحياة) فأطمني ولا تقلقي وانتظريني وها أنا على وعدي وعهدي معك وعندي يقين بأني سأراك وستضيء النجوم ويبتسم القمر وتغني العصافير ويلمع الماء على صفحات النيل من الفرحة وأنا بقربك وأخيرا ستقول لي الكلمة التي انتظرها بكل شوق وسأقول لك الكلمة التي خبأتها في قلبي وأدخرتها لك

لك وحدك

ف الى ذلك اليوم
أشتاق اليك يا رفيق روحي

هدية لكل المدونين ولغير المدونين برضه :)

الفيديو دا اهداء ل احساس طفلة حبيبتي ود. ستيتة خالتو حبيبتي ول شيما اللي دايما مختلفه معايا بس حبيبتي برضه ولمرمر على كوكو مهجور حبيبتي ولبسمة أنور حبيبتي برضه كلكن حبيباتي في الله

وطبعا انا حاولت انزل الفيديو ومعرفتش فجيبتلكم اللينك بتاعه من اليوتيوب علشان تتفرجوا عليه لأن نفسي كل الناس تشوفه وخصوصا اللي فاقدين الأمل في حياتهم

الفيديو ده شوفته في كورس الH.R وحسيت بإني طايرة وروحي المعنوية مرتفعه

والأغنية اللي هتشوفوها فضلت تتكرر جوايا وتحسسني بالتفاؤل والأمل

اتمنى ليكوا متابعة حلوة وسعادة كبيرة ومتأكده ان الفيديو والاغنية ان شاء الله هتعجبكم

http://www.youtube.com/watch?v=pDGW8nbXv-s

يوم من أجمل أيام حياتي

طبعا كلنا بتحصل لنا منغصات لو ركزنا فيها بنشوف اليوم كله مش لذيذ لكن المفروض نسيب الحاجات المش لذيذه تخبط دماغها في الحيطة ونركز في الحاجات الجميلة اللي حصلت في يومنا وبالتالي في عمرنا كله

النهاردة نزلت كالعادة من غير الكتكوتة علشان كانت عند الميكانيكي - ومع بابا برضه- وطبعا الانسان لما بياخد على راحة وعربية ورفاهية بيبقى متمرمط من غير العربية دي وطبعا كنت متأخره على المحاضرة بسبب المواصلات الجميلة المهم كان نفسي الاقي تاكسي وفات حوالي 3 دقايق وانا بستنى تاكسي واحد ومفيش وكأن كل التاكسيات انقرضت وطبعا كنت متغاظة ان المحاضرة المفروض بدأت وانا لسه مروحتش الكلية وفجأه لقيت 3 تكسيات وقفوا قدامي وانا أختار :) يا ربي فرحت بجد ( الحمد لله)

رحت الكلية لقيت محاضرتنا اتأجلت ساعة فرحت اكتر اني هلحق المحاضرة من أولها وكان عندي كورس تنمية بشرية في المكتبة وكده المحاضرة اتأجلت ومش هحضر الكورس في معاده لكن كان عندي يقين اني هروح الكورس من أوله وقد كان الكهرباء قطعت في المدرج – هو مدرج صغير- والجو كان حر جدا ومع ذلك المحاضرة كانت رائعة كانت محاضرة دكتر حمدي شاهين والحقيقة لولا محاضرات دكتر حمدي ودكتر اسلام اعتقد اني مكنتش هقدر اكمل في الكلية
واخدنا المحاضرة وخلصنا قبل معاد كورس التمية البشرية ب3 دقائق ولحسن حظي ان الكلية جنب المكتبة اللي فيها الكورس ووصلت الساعة 2 بالضبط في ميعادي :)

في الكورس شوفنا جزء من فيلم ل الممثل ايدي مورفي وكان بيقول لإبنه الصغير متستسلمش وخليك قوي ابنه عمره حوالي 4 او 5 سنين وبعدها جت أغنية غاية في الروعة بالانجليش طبعا عن تحقيق الأحلام وعدم الاستسلام والايمان بأحلامنا والسعي للحصول عليها
وحصلت كذا حاجة في الكورس رفعت من معنوياتي منها اننا كنا بنتقسم جروبات والمستر قسم الجروبات ومطلعتش مع زميلتي دعاء اللي قاعدة جنبي فمسكت ايدي وقالت للمستر ليدي معانا الا ليدي
يااااااااه معقول حد اتعرفت عليه امبارح ويحبك في الله كده؟ الحمد لله
ده غير اني الحمد لله استفدت كتير من الكورس ده وطورت حياتي للأحسن

رجعت من الكورس يادوب دخلت البيت وأكلت معلقتين من الغدى عالسريع وبابا قاللي يلا هننزل علشان عيد ميلاد خالتو النهاردة – خالة بابا –

وهي الكابيرة دلوقتي كل الجيل اللي قبل جيل بابا الله يرحمهم لسه بس طنط ليلى ربنا يبارك في عمرها – خالة بابايا –
وعند طنط ليلى كان هناك بناتها وأطفالهم
والأطفال هما ( جومانا ودينا وسارة وخالد ) دينا وسارة وخالد كلهم في الحضانة وطبعا مش بيروحوا الحضانة وموضوع الغاء الحضانات ده عمل ازمة عند معظم الأطفال وخلاهم زهقانين

دينا كانت كل شوية تسألني مالك بس؟ كنت بقولها عايزة أنام يا دينا
دينا : نامي
أنا : انام ازاي وانا قاعدة معاكو
دينا : عادي نامي وانتي قاعدة
انا : هو انتي بتنامي وانتي قاعدة ؟ ولا بتنامي في السرير
دينا : بنام وانا قاعدة وضحكنا احنا الاتنين
وده كان كلام دينا معايا كل 5 دقايق

واللي كان مش مخليني أكلم أي حد الا هو خالد عنده خمس سنين بس ما شاء الله متحسش انك بتكلم طفل بجد شعلة ذكاء ربنا يحميه

طول ما احنا قاعدين كان بيقوللي بصي هغنيلك ومش أي اغاني دي أغاني هو مألفها وقتيا ارتجال
في أغنية بتقول وحشتييييييني وبتوحشييييييييني يا وحشااااااني
بصي بقى انتي قرعة دي أغنية تانيه :) ودي رسالة موجهه لحبيبته الأولانيه ياسمين

وغنى لي أغاني تانيه كتير وقبل ما نمشي من عند طنط بشوية صغيرين خالتو بتقول له هتتجوز دينا يا خالد؟ قال لها لأ أنا مش هتجوز الا المزة ؟ فخالاته قالوله مين المزة دي يا خالد قالهم رد مكنتش متوقعاه خالص : ليدي مش هتجوز غير ليدي فأنا رديت عليه وقولتله مين؟ قاللي انتي (شكل خالد عينه بتوجعه تقريبا) :)

وبابا قعد يهزر معاه ويقوله مش موافق فقال لبابا بص انا هتجوزها من غير ما توافق
وساب الكلام مع بابا وفضل يبص لي لدرجة اننا كلنا قولناله مالك يا خالد ؟ وبعدين كنت بكلم جومانا فجه خالد مسك ايدي

فأخدت ايده وقولتله شوفت بقى ايدي وايدك شبه بعض بس ايدي كبيرة شوية وايدك صغنونة
قاللي أيوة بصي بقى أنا هجيبلك فستان فرح جميل أوي وهتجوزك
قولتله : جواز كده على طول من غير خطوبة يا خلودة
قاللي : نتجوز الأول وبعدين نعمل خطوبة فضحكت

ولما جيت أمشي قام وسلم عليا وقاللي الوصايا العشر

1- انتي كده عسولة اوعي تطخني ( من التخن يعني) لكن ممكن تخسي شوية وتبقي زي جومانا

2- خدي بالك من شنطتك

3- خدي بالك من هدومك

4- خدي بالك من موبايلك

5- بصي خدي بالك من كل حاجة

وانا خارجة حدفلي بوسة في الهوا كمان ( اطفال رومانسية جدا) بيتهيألي لو كنت مخطوبة فعلا مكنش خطيبي هيبقى رومانسي كده رومانسية ممزوجة بالبرائة

الحمد لله اليوم ده كان جميل فعلا ويارب كل أيامنا تبقى جميلة بس احنا نركز عالجميل اللي فيها ونسيب أي حاجة مش جميلة

دماغ نام ننا هو

اليومين دول بقرأ في رواية ربع جرام للكاتب عصام يوسف وهي بتتكلم عن تجربة 5 شباب مع المخدرات والقصة بتدور على لسان صلاح أحد أبطال الرواية

المهم اني وصلت لصفحة 150 والرواية 635 صفحة ولغاية دلوقتي الرواية بتتكلم بشكل من وجهة نظري يحبب الشباب في المخدرات يعني المخدرات بتخلي الانسان موده حلو وبتخلي الدنيا جميلة وبتخلي الانسان فرحان وبيضحك وكمان بيكسب ماتشات الكورة والأفظع انه بينجح في الثانوية العامة وكمان بينجح في الكلية وبيجيب تقدير جيد مع انه بيشرب حشيش كل يوم !!

المهم أن صلاح أو صاصا بدأ شرب سجاير وبيرة من وهو عنده 7 سنين – طبعا كارثة- ومحدش أكتشف الموضوع ده والجروب دلوقتي في العشرينات ومتسجنوش ولا مرة ولا قفوا في ولا كمين ولا حد تعب فيهم أو عمل حادثة ودخل أوضة العمليات فمنفعش يتبنج من كتر المخدرات اللي اتعود عليها ولا موقف من دول الا مرة واحدة لما عاطف اتمسك مرة وهو بيشرب حشيش فصلاح راح يخرجه من القسم وكان هيتحبس معاه وكمان الاشارة لبهاء انه بدأ يدخل سكة ادمان البودرة

لكن لغاية دلوقتي مفيش حاجة رادعة تبين ان المخدرات دي لعنة من لعنات الزمن وإنها مصيبة وكارثة عالعموم خليني مع الرواية لحد باب الدار

لما استعرت الرواية من المكتبة أمينة المكتبة قالتلي خدي بالك هتعيطي كتير من الرواية دي بس لغاية دلوقتي رد فعلي الاستغراب والضحك على بعض الكلام اللي ابطال الرواية بيقولوه وهما مسطولين ده غير احساسي بالأسى عليهم لكن متأكده ان حياتهم هتتغير للأسوأ

وفي حاجة تانية غير المخدرات بتعمل دماغ عالية جدا وبتخلي الانسان يهييس أخر تهييس ويبقى مش فاهم حاجة و رد فعله بطييييييء جدا ألا وهي قلة النوم .

وأعراض قلة النوم بالليل – وبقول بالليل لأن النوم بالليل مفيد اكتر من النوم بالنهار مليون مرة-

1- عدم التركيز خالص في أي حاجة وكإن الانسان ماشي في حلم مش حقيقة
2- التهتهه في الكلام وعدم الذكاء اللغوي اختيار ألفاظ مش لايقة على المواقف المختلفة
3- عدم الاحساس بالراحة واحساس بالارهاق والتعب
4- عدم الفهم والاستيعاب البطيء
5- الكسل وعدم الرغبة في الكلام والمناقشة
6- العصبية
7- اللامبالاة بالمواعيد

والحقيقة قلة النوم بالليل بقت موجودة عند ناس كتير ونسينا أن البركة في البكور وان الطاقة الحيوية اللي بتخلي الانسان نشيط وفي مود حلو ومنتعش وفرحان بتكون في اعلى تركيز ليها الفجر

وعلى رأي الشاعر :

فما أطال النوم عمرا ولا قصر في الأعمار طول السهر

زيارة بقرار جمهوري

السلام عليكم ورحمة الله وبركاته

تنتابني حالة من السعادة وأحس ببهجت وصفاء وسعيدة ومسعود وسعد وكل الأسماء اللي بتدل على السعادة
وأشعر أن لي جناحين وأحلق بهما في السماء حيث الغيوم والسحب والنجوم والقمر والشمس معاهم اشمعنى هي يعني؟

الدنيا كلها فرحانة وبتحتفل معايا والسبب محاضرة النهاردة غير انها محاضرة دكتر اسلام الصادي وغير اني من أشد المعجبين بالمحاضرات دي زي ما قولتلكو ووصفتلكوا البوست اللي فات فأخيرا جمعت قوايا وتشجعت ورحت سألت دكتر اسلام على أسئلة في الدراسة وكمان قولتله اني كتبت عنه في مدونتي المتواضعة وفورا دكتر اسلام قاللي انه عايز يلقي نظرة عالمدونة وأول لما سمعت الكلمة دي حسيت اني رحت لعالم تاني كله ناس بتضحك وفرحانة وأطفال بفساتينهم الوردية الجميلة وبلوناتهم والسما صافية والورود الجميلة في كل مكان ومبقيتش موجودة في المحاضرة حتى مش فاكرة قولت ايه لدكتر اسلام
رحت الدنيا الجميلة دي ل لحظات ورجعت بسرعة من الدنيا دي وقولت لدكتر اسلام دي حاجة تسعدني والحقيقة اني كان نفسي أقوله دي حاجة انا محلمش بيها أساسا وحضرتك تشرف مدونتي ودي حاجة أتمناها بجد ولولا ان المدونة كانت مغلقة مؤقتا للتحسينات كنت كتبت لينك المدونة ل د. اسلام لكن لسه هنتظر للأسبوع الجاي ان شاء الله فبالله عليكي يا ساعة بالوقت اجري
انا بجد فرحانة ان د. اسلام اللي قرأ لعظماء الأدباء والشعراء في العالم هياخد من وقته ويقرأ post أو اكتر في مدونتي

وده بيدل ان في دكاترة في الجامعات المصرية لسه بخير ولسه في تعليم ولسه في انسان بيحترم الطلاب اللي بيدرسلهم وأن الصورة لسه حلوة ومش قاتمة أوي زي ما كنت شايفاها

شخصية رائعة أثرت في حياتي

كلام قبل الموضوع

يبقى الحال على ما هو عليه وعلى المتضرر اللجوء لأقرب بحر علشان يشرب منه نياهاهاهاهاهاها بس والله بجد من جوه اعماقي القلبية وحشتوني

الحمد لله الكمبيوتر اتصلح وبقى 100 فل وتمناشر لكن النت هو اللي فصل عندنا نوهائيا وكل يوم الشركة تقوللي هيجي بكرة او بعده وانا الأن أحدثكم من عم حتاتة نت كافيه القابع بمكتبة هشتكنا وبشتكنا يا ريس مكتبة مبارك الحبيبة

وأقولكو ايه ولا ايه انا حاليا في ارض الوطن العامر والزاخر وبحمد لله رحت الكلية امبارح والنهاردة وطبعا مأخدناش أي حاجة من أول الأسبوع الا النهاردة أخدنا محاضرة لدكتر اسلام

واحكيلكو شوية عن محاضرات دكتر اسلام وما تفعله في نفساوياتي من سنة أولى وانا بتعلم كتير جدا من محاضرات دكتر اسلام الصادي لأنها محاضرات أكثر من رائعة مش بس دراسة لكن كلنا بنحس بفيض من المعرفة والأدب والشعر والتجارب الحياتية والمرح كمان وبعتبر محاضرات دكتر اسلام كنز من الكنوز وكمان قررت اني أدخل قسم لغة انجليزية من كتر ما انبهرت بشخصية دكتر اسلام وطريقة شرحه الرائعة لأني كنت شهادة معادلة وكنت محتارة ما بين اعلام وانجليش لكن بعد ما حضرت محاضرتين لدكتر اسلام قررت اني هدرس أداب اللغة الانجليزية وصليت صلاة استخارة وتوكلت على الله

تاني محاضرة حضرتها لدكتر اسلام اتطردت من المحاضرة والسبب اني رنيت على زميلتي علشان اقولها ان في محاضرة واطلعي للمدرج فالدكتر لمحني وانا بلتفت وببص يمين وشمال علشان بدور على زميلتي فحس اني مش منتبهة للمحاضرة مع ان كان لسه مبتداش في الشرح ومع ذلك اتطردت من المحاضرة وقاللي كلمة عمري ما هنساها lecture is lecture الترجمة الحرفية المحاضرة هي المحاضرة لكن معنى الكلام ان وقت المحاضرة للمحاضرة وبس فمش لازم أفكر في حاجة تانيه

طبعا مش ممكن انسى احساسي لما طلعت من المحاضرة مطرودة وفاكرة اننا كنا في رمضان ومش هحكيلكو تبعات الموضوع ده اني كرهت الكلية واني تعبت صحيا ونفسويا وقررت مش هروح الكلية تاني وبالخصوص مش هحضر محاضرات دكتر اسلام لكن مع كلام كل اللي حواليا اني هشيل المادة ولازم احضر علشان انجح حضرت المحاضرات بس اللي كنت بتفاجئ بيه ان كل حاجة بقرأ عنها وأي تسائل في نفسي كنت بلاقي اجابته في محاضرات دكتر اسلام وكنت ببقى مستغربة جدا وفرحانه في نفس الوقت لدرجة ان دلوقتي مش بقدر أفوت ولا محاضرة لدكتر اسلام وبابايا كان مسافر القاهرة علشان العلاج وبابا سافر فعلا يوميها وكان المفروض أسافر معاه بس حضرت المحاضرة لأن بابا عارف اد ايه حبي للمحاضرات دي وأد ايه بستفيد منها

حتى اليومين دول بقرأ عن سمات المجتمع الحديث وسمات الانسان في العصر ده وان الشر هو المسيطر على الانسان في العصر الحديث ولما حضرت المحاضرة النهاردة لقيت انها بتتكلم عن نفس الموضوع وان دراستنا هتكون عن نفس الموضوع ان شاء الله :)

وكمان من كتر فرحتي بالمحاضرة حضرت محاضرة دكتر اسلام مع سنة تالتة مع اني مش شايلة المادة السنة اللي فاتت لكن علشان محاضرات دكتر اسلام مش هتتعوض وفعلا هفتقدها جدا بعد التخرج ان شاء الله

طبعا مش عارفة أتكلم بشكل يرقى لمستوى علم وثقافة دكتر اسلام بس ده كلام بسيط بيعبر عن انسان عظيم اتعلمت منه كتير حتى لما اتطردت من المحاضرة اتعلمت احترام الوقت وان لكل وقت خصوصيته ولكل مقام مقال هو الدرس كان صعب شوية كتير لكن علمني واستفدت منه جدا وعلى فكرة انا جبت في المادة اللي اتطردت من محاضرتها جيد :)

والحقيقة من سنة أولى وانا دلوقتي في الليسانس نفسي أقول لدكتر اسلام بجد حضرتك علمتني كتير واستفدت كتير جدا من كلامك ومن محاضراتك اللي بتكون منتدى أدبي رائع وفيه كتير من الجواهر ده الى جانب تمكن حضرتك من اللغة الانجليزية فبتبقى المحاضرة دراسة وشعر وأدب وكمان لغة بنستفيد جدا منها

بجد حضرتك اروع نموذج لدكاترة الجامعات اللي يستحقوا كل الاحترام والتقدير

ربنا يكرمك ويرضى عليك وينفع بيك ويحفظك من كل سوء وجزاك الله عنا كل خير وباقة الورد دي مهداة لحضرتك