روح طفلة مش عايزة تكبر

سنة تالتة ابتدائي

2012-01-30T06:23:00.003+02:00

أنا درست لأطفال ولكبار لكن بالرغم من كده سنة تالتة ابتدائي مأثرين فيا بطريقة كبيرة هحكيلكو شوية عليهم

سنة تالتة ابتدائي أنا اعتمدت معاهم أسلوب اللعب علشان يحبوا اللغة ويتعلموا ده غير أن فيهم كتير شطار كمان فبيساعدوني أني ابتكر العاب جديدة وحاجات تفرحهم

سنة تالتة ابتدائي هما الفصل اللي بيفضلوا طول اليوم يسألوني أستاذه متى حصتنا؟ ولما الحصة بتاعتهم تقرب وأقولهم انا عليكم الحصة الجاية يفضلوا يقولوا هيه هيييييييييه هييييييييييه ويتنططوا علينا انجليزي علينا انجليزي هيييييييييييه

سنة تالتة ابتدائي هما " الفصل البسكوتة" اللي مشاعرهم بتظهر عليهم على طول وأنقياء أوي لسه متعلموش الكدب والنفاق

سنة تالتة ابتدائي هما الوحيدين اللي بيبقوا عايزين يشيلوا الشنطة بتاعتي او اللاب توب وبيحبوا يساعدوني

امبارح خرجت خروجة اجبارية مع ماما وجيراننا برغم اني كنت تعبانة شوية ولقيت طالب من تالتة ابتدائي أول لما شافني برق وكإنه شاف نجمة سينما :) وجري عليا وسلم عليا واللي انا اتفاجئت بيه انه كان عايز يبوسني طبعا انا وشي احمر مع ان الطفل بيتصرف بعفوية قولتله كلام أهبـــــــــــل تبريرا اني مش هينفع أبوسه طبعا الواد يا عيني اتحرج وانا طلع عليا شبح يلا نمشي يلا نمشي حتى ماما متعرفش انا اتعصبت كده ليه :) مبحبش طلابي يشوفوني وأنا تعبانه وهما كانوا كتير في "ماكس" امبارح

سنة تالتة ابتدائي لو ربنا أراد ورجعت شغلي هيبقى علشانهم وبس

سنة تالتة ابتدائي أكتر أطفال هفتقدهم لما ارجع مصر ان شاء الله علشان الدبلومة اللي قالوا امتحاناتها في شهر 5 ومازلت مستغربة لغاية دلوقتي من ان الكلية يقدموا الامتحان ويخلوه بدري اوي كده !!

سنة تالتة ابتدائي لازم أتصور معاهم إن شاء الله وأخليهم ذكرى جميلة عندي

أم الدنيا محتاجة كالسيوم

2012-01-23T23:47:00.003+02:00

> الفقرة دي مجنناني من كتاب في خدمة السلطان لإيان جاردنر وبقرأه حاليا
الكتاب ده جالي بالصدفة ولما بدأت قرائته عرفت انه ضروري جدا الواحد يعرف تاريخ المكان اللي هو عايش فيه ويا سلام لو كان من وجهة نظر محايدة وهقسم الكلام لمرحلتين قبل وبعد :

الفقرة اللي جاية مقتبسة من الكتاب النسخة العربية ص35

قبــــــــــــــــل : " لم تكن هناك طرق معبدة في عُمان – بضم العين- حتى بداية السبعينات، وكان هناك مستشفى واحد، ومدرسة ابتدائية واحدة ، ولم تكن هناك هواتف ، ولا بنية أساسية من أي نوع جدير بهذه التسمية ، سوى قنوات قديمة لتوزيع المياه. وكان من غير المسموح به قانونا الاستماع إلى الموسيقى أو لبس النظارات الشمسية.
وكانت بوابات مسقط المسورة تغلق ليلا ، وإذا كنت في الخارج وتريد أن تدخل، فالأمر أسوأ مما تتوقع ، أما إذا أردت التجول داخل المدينة ليلا فعليك أن تحمل فانوسا. ...... وبمزيد من التدقيق ، كان المرء يجد درجة من التداعي في المباني تبعث على الكأبة ، وانعداما تاما تقريبا لأية مرافق نافعة، سواء كانت قديمة أو حديثة وكانت السوق – إذا استطعت العثور عليها- يباع فيها ما قلت قيمته أو اهميته . ...... لقد كانت هذه العاصمة منطقة مكتظة بالمباني البالية الوسخة المكسوة بالغبار وكانت مسقط في أعين الجميع – ما عدا المولعين بالجزيرة العربية القديمة- بمنزلة مكان للنفايات . "

بعــــــــــــــــد : البلد دي اللي الكاتب بيتكلم عليها كانت كده في السبعينات احنا دلوقتي في الألفية التانية يعني مر حوالي 40 سنة البلد دي بيجيلها مصريين من أوائل الثمانينات يشتغلوا فيها – قبل ما أتولد- أما عن رؤيتي الشخصية فكفاية أوي إني أقول اني دخلت سلطنة عمان من غير فيزا بالطريقة التقليدية :) من غير ما أضطر اني أقف في طابور طويل وأخد ختم الفيزا زي بلدي قبل الثورة كنت بقف بالثلاث ساعات استنى تأشيرة الدخول لبلدي وبعد الثورة وقفت حوالي نص ساعة أما في عمان فدخلت في 5 دقائق دخلت على بوابة الكترونية واتعاملت مع تعليمات الكمبيوتر والكمبيوتر سجل لي التأشيرة من غير ختم وتعقيدات اني دخلت البلد :)
ثانيا البلد اللي الكاتب وصفها بإنها مكان للنفايات دلوقتي من غير مبالغة بتبرق من النضافة أنا خرجت من المطار وبرغم اني جيت قبل كده كذا مرة لكن كنت مستغربة من نضافة الشوارع بالطريقة دي ده غير حاجات تانية كتير قولتها قبل كده "

في تجارب كتير لبلاد كتير قبلنا بدأوا من الصفر ودلوقتي بقوا بلاد متقدمة وده مثال لدولة عربية كانت حاجة ودلوقتي بقت حاجة تانيه خالص
ان مصر ترجع تاني لمجدها ولدورها الاستراتيجي وتبقى زي ما بنتمناها دي حاجة مش مستحيلة لأنها حصلت قبل كده مصر بس محتاجة شوية كالسيوم فقدته في السنين اللي فاتت واللي قبلها من الظلم والاستبداد وقلة الضمير والفساد و.......

مصر هترجع أنا متأكده سواء اليوم ده قريب ولا بعيد

تحية لكل اللي نفسهم مصر تبقى أحسن بلد في الدنيا وتحية لأمهات وأهل الشهداء وتحية للثورة "المستمرة"
وأنا مش مع احتفالات 25- يناير "بكرة" حتى مش مع الاحتفال بعيد ميلادي يوميها "26" يناير
اليوم ده لازم نقف دقيقة حداد على أرواح كل شهدائنا اللي لسه حقهم مرجعش ولا اهاليهم ارتاحوا لازم نكمل مشوار بدأناه لأن اللي يوصل لنص السكة ويقف كإنه متحركش من مكانه أصلا !!

لا تيأسوا أن تستردوا مجدكم ** فلَرُبَّ مغلوب هوى ثم ارتقى

مَدت له الآمال من أفلاكها ** خيطَ الرجاءِ إلى العُلا فتسلَّقا

فتجشَّموا للمجد كلّ عظيمة ** إنّي رأيت المجد صعبَ المرتقى

من رام وصْلَ الشَّمس حاك خيوطها ** سبباً إلى آماله وتعلَّقا (حافظ ابراهيم – تحية للناشئين)

كلنا حاطين ايدنا على قلبنا وبنقول يارب بغض النظر عن مجلس الشعب الكوميدي ضحكوني كتير النهاردة :)

ترقص وحيدة

2012-01-08T22:52:00.003+02:00

هي طفلة تعشق الرقص وترقص حتى لو لم يكن هناك أي موسيقى فالموسيقى تسري في قلبها وروحها

صغيرة هي على وضع مساحيق التجميل ولذلك هي تعشق تنوع الألوان في ملابسها وتعشق الفساتين المنفوشة وفساتين السهرة والفرح

طفلة ترى كل شيء مميز حتى خيوط شمس الصباح ترى فيها ألوان قوس قزح وتشعر منها بالدفء وتربت الشمس على كتفيها فتدفئ روحها وتشعلها نشاطاَ

طفلة تحب اللعب والفوضى وتغمر الجميع بالمرح وتعشق الصخب والهدوء والأيس كريم والشوكولاته :)

كبرت قليلا الأن تمنت منذ فترة ليست ببعيدة أن يشاركها أحد رقصتها ومن يومها لم ترقص أبدا

لم تعد تشغل الموسيقى بصوت عالي وتغني معها الا " كل فين وفين"

كبرت قليلا لكي تستطيع وضع مساحيق التجميل ولكنها لم تعد تحبها بما فيه الكفاية ولكنها تفضل شرائها وربما رجع هذا لأنها من صغرها تعشق الألوان وتفضل اقتنائها في أي شيء :)

كبرت قليلا حتى نسيت المراجيح والألعاب واليوم في غفوة قليلة من الزمن عنها عادت للتتأرجح بين السماء والأرض على " المرجيحة"

كبرت قليلا لترى الكثير من الأشياء عادية ولكنها ليست كذلك فكل دقيقة جديدة في الحياه هي مميزة فلن تأتي مرة أخرى ولن تعود

كبرت قليلا وتفتقد طفولتها وتعتزم أن تعيش اجمل مراحل عمرها وتأخذ أفضل ما أحبته في طفولتها

ذكريات جيل العشرينات

2012-01-06T21:16:00.001+02:00

# UP 20ده هاشتاج على تويتر عجبتني فكرته وقولت أتكلم شوية على جيلي جيل العشرينات

• احنا الجيل اللي طلع على أيامه كل الحاجات الجديدة وقبله مكنتش مشهورة أو " مكنتش موجودة" زي الدش والكمبيوتر اللي كان بادئ بطريقة بدائية خالص والجيل برضه اللي شاف اللاب توب والبلاي ستيشن

• جيل لحق اخر شوية من بلده وهي هوليود الشرق

• جيل مجلة ماجد وسمير وبلبل وميكي وفلاش ورجل المستحيل وروايات للجيب

• جيل أغلبه بيحب فيلم ميل جيبسون Brave heart وyou have got mail لميج رايان وتوم هانكس وجيل أغلبه حافظ أغنية تايتانيك لسيلين ديون وشافوا الفيلم أكتر من مرة .

• الجيل اللي شاف تطور الموبايل من "فردة شبشب" لغاية ما بقى تاتش

• جيل الأتاري ولعبة ماريو وسباق العربيات والدبابات وهو نفس الجيل اللي شاف الأيباد وأي فون والبلاك بيري ...

• الجيل اللي درس في ابتدائي في "مصر" لغاية سنة خامسة ابتدائي بس والجيل اللي شهد رجوع سنة سادسة ابتدائي تاني

• جيل لحق الأكل البيتي قبل الوجبات السريعة والديلفري

• جيل كان في على أيامه أكلات دلوقتي مبقتش معروفة زي ال "بوفتيك"

• جيل بقلظ وماما نجوى وعمو فؤاد وبوجي وطمطم الأصلي وبكار

• جيل الشيخ الشعراوي يوم الجمعة وبرنامج العلم والإيمان

• جيل أماني وأغاني وجيل ميلودي ومزيكا

• جيل اليتيمات عاطفيا والأحلام الضائعة اللي بنحاول نرجعها

• جيل صداقة الفيس بوك اللي الأصدقاء فيه غالبا مجرد رقم بيزيد أو بيقل

• جيل الصداقة والحب من وراء شاشة كمبيوتر وجيل الهدايا مجرد صور عالمواقع الإلكترونية

• جيل الناس المزيفين الكتار أوووووي والحسد والحقد والوحدة والمدنية المزيفة

• جيل الثورات العربية وكلمة حق ضد الظلم الجيل اللي شايل روحه على كفه

• جيل كلمتين وبس لفؤاد المهندس وأبلة فضيلة والى ربات البيوت وصباحك معطر مفتح مزهر وبالسلامة يا حبيبي بالسلامة :) والجيل اللي شاف كل ده راح ومفضلش منه غير أبلة فضيلة

• الجيل اللي لحق المسحراتي في رمضان ولمة العيلة عالسفرة والفانوس الأصلي بشكله الأصلي مش الصيني زي دلوقتي

• الجيل اللي كان بيشوف مدرسين الإنجليزي والكمبيوتر "نجوم سينما" والجيل اللي شاف استغلال المدرسين وبدأت في عهده الدروس الخصوصية عيني عينك

• الجيل اللي كان فيه الطلاب مع بعض مسلم ومسيحي متصاحبين وبيذاكروا سوى لأن الدين ملوش علاقة بالصداقة

• الجيل اللي البنات فيه كانوا رومنسيات أوي وفي نفس الوقت بقوا عمليات أوي واختلفت طموحاتهم واولوياتهم ومتطلباتهم في شريك الحياة

• جيل أغاني فولا فولا وكوكو واوا والبطة أنتيكا وكاك كاك أنا الفرخة واحنا الكتاكيت وكان في بنت اسمها تررم والساعة ف ايدك كام يا عمو الساعه كام :)

• جيل أغنية ماكارينا ورقصتها كمان والرقصات السلو في الأفراح :)

ذكريات :)

2012 :)

2012-01-01T23:23:00.002+02:00

بداية موفقة لعام جديد والحمد لله قضيت الساعة الأولى من 2012 في الصلاة والدعاء والروحانيات سعيدة أنا بهذا العام "الزوجي" فأنا أحب الأعداد الزوجية أكثر من الفردية ففيها مشاركة وحب وود أو هكذا أشعر ...

في الصباح هنئت زميلاتي بالعام الجديد وعلى غير العادة أيقظتني زميلتي "رنت عليا" لتوقظني "وأنا أساسا كنت صحيت" والطبيعي انني اوقظها كل يوم :)

تمنت لي زميلة أمنية طيبة في العام الجديد وقالت لي : سنة سعيدة عليكي و تتجوزي السنة دي وكان ردي صادما بدلا من أجاملها فقولت لها على الفور : معتقدش :)

مر اليوم الأول وأنجزت امتحانات الصغار التي سيمتحنونها اليوم وأيضا قبضت أول راتب لي في المدرسة

راتبي برغم بساطته الا انني اشعر ان الله وضع فيه البركة وشعرت أنه فعلا 10 أبرك من 100 وحينما يرزقنا الله يرزق بلا حدود ويعوضنا بالبركة والسعادة

ذهبت أيضا لمحل " ماكس" وأشتريت ملابس جديدة للعام الجديد :)

وبرغم أن اليوم وغدا سأكون وسط دوامة لا أعرف الوانها ولا مداها بعد بسبب امتحانات اللغة الانجليزية اليوم للصغار وغدا للكبار وأعلم جيدا انهم "هيطلعوا عيني" لكنني أحببت 2012 من بدايتها كما يقولون الجواب بيبان من عنوانه

أرجو أن تستمري على نفس الوتيرة يا 2012 وأرجو أن تترفقي بأمهات الشهداء وتطيبي جراحهم

بلا نيلة ...

2011-12-23T19:21:00.003+02:00

لم تعد للكلمات جدوى ولا يوجد لي سواها متنفس

حينما أنبذ الأشياء تركض ورائي وحينما أحتاجها تتدلل بدلال سخيف

ظللت طوال أيام الإثنين والثلاثاء والأربعاء أفكر في ما حدث لفتيات مصر من ضرب وخلع ملابس

بالأمس قال لي صديق أنه مكتئب من الفيديو التي "انسحلت" فيه الفتيات قلت له لم أراه ولكني رأيت فقط الصور

قال لي : لا تريه ستكتأبي قلت له يجب أن أراه ورأيته بالفعل ووقعت فريسة للإكتئاب وحتى الأن لا أرغب بفعل أي شيء حتى الذهاب الى عملي ...

أجدني مضغوطة جدا من الأحداث التي تدور في بلادي وأتذكر جيدا أول أيام الثورة كنت أتابع القنوات الإخبارية الأجنبية بشغف لأنني أعتقد أن للحقيقة عدة وجوه القنوات العربية لا تذكرها جميعا بالطبع وحينما كانت الثورة في أوجها وغليانها كانت مانشيتات تظهر على القنوات الأجنبية عن مصر بالبنط العريض " مخاوف من استيلاء الأخوان المسلمين على الحكم" ، " العالم يتخوف من وصول الإسلاميين للحكم" ........ الخ

كنت متعجبة وأقول في نفسي : احنا في ايه وهما في ايه؟ اخوان مسلمين وتيارات اسلامية ايه دلوقتي مش لما مبارك يمشي وحكومته تغور الأول؟ لم أكن أعلم ان كل هذا ترتيبات مسبقة لما يحدث حاليا

لم يتحدث احد عن ما يحدث في مصر في عملي بالرغم من أن أغلب المعلمات والمعلمين مصريين

فقط تحدثوا عن التحرير يوم الأربعاء ولم يذكروا ما حدث للفتيات ...

يجثم على قلبي ارهاق لا أستطيع ان اتخلص منه وتلاحقني المشاغل وتمسك بطرف فستاني وأنا أصم أذني عنها ولكن الى متى؟ مطلوب مني عمل أشياء كثيرة وبدلا من أن اقوم بعملها أتفنن في إنفاق الوقت بإسراف ولا رغبة لي بعمل أي شيء حتى الذهاب لعملي ، تطاردني أشباح من التي تظهر في الأفلام الرومانسية أشباح جميلة وردية لا تظهر صورتها الحقيقية الا حينما تقرأ القرأن وتستعيذ بالله منها فهذا حال أشباح الجن ولكن لا جدوى مع أشباح الإنس الذين يلاحقونني وبطرق شتى يحاولون تغييري بالرغم من أنهم لم يلاحظوا التغيير الذي طرأ عليهم منذ أراد الله أن يجمعنا في المكان ...

أكره ان يشرف علي أحد "مبيفهمش" وأحترم وأوقر كل من يفهم ويطلق عليه لقب معلم ويرغب في تعليمي وليس أن يكسب جولة على حسابي – الكلام عن موجهة اللغة الإنجليزية-

بدأت محاضرات الدبلومة منذ يوم الأربعاء الفائت اتابع بشغف كل ما يحدث عنها وللأسف تفصلني عن الكلية قارة وأميال

أستطيع ترك العمل بسهولة والعودة لجامعتي وهو ما خططت له من البداية ولكن كيف أأمن على كرامتي وعرضي في بلدي "وحيدة"؟ بعد أن رأيت ما حدث لإخوتي البنات المصريات وبأيدي مصرية؟ وهل لو مشيت جنب الحيطة أضمن أن تصان كرامتي؟ أعترف الأن لن اعود لبلدي الا مع والدتي على الأقل أجد من أبكي الى جوارها وتمسح دموعي ...

من كانت قبلي في العمل سامحها الله باعت القضية وتركت لي أرض بور مطلوب مني أن أستصلحها وأنبت فيها ورود في أقل من شهر !!!!!!!!!!!!!!

قرار نهائي : لن أغشش الطلاب ولن أتنازل عن مبادئي ابدا

أيام قليلة تفصلنا عن العام الجديد 2012 ولأول مرة أخشى من اقتراب عام جديد وأتمنى أن يأتي بثوب أبيض نقي بدل الثوب الأحمر القاتل الذي ارتداه عام 2011

طول عمري بكره الامتحانات

2011-12-17T17:06:00.002+02:00

انا قرفااااااااااااااااااااااااااااانه

ليه مفيش اي حاجة في حياتي بتيجي سهلة؟ بس قبل ما ابدأ كلامي احب اقول للمجلس العسكري حسبنا الله ونعم الوكيل وربنا ينتقم من كل ظالم - مفيش حاجة في بلدي كمان بتيجي سهلة-

سلبيات كتير كنت عارفاها هتبقى موجودة قبل ما اروح المدرسة وسلبيات تانيه ظهرت بعدما روحت

مكنتش اعرف ان الطلاب عندهم قدر كافي من قلة الأدب وقلة التربية ومكنتش متخيلة ان مدرسة المشاغبين ممكن أشوفها في الواقع وأبقى انا المدرسة بتاعتهم

كل شرحي وتعبي معاهم رايح ع الأرض لأنهم مش بشر أصلا البشر بيفهموا لكن دول "......." مش عارفه احددلهم وصف

مفيش اهل بتسأل والتربية وكل حاجة على الشغالات ده غير اني اكتشفت ان الطلبة اللي مش ناجحين ومشاغبين في المدارس الحكومية بينقلوهم مدارس خاصة لمجرد انهم ينجحوا ويلعبوا طول الوقت "بفلوسهم"

على أيامي المدارس الخاصة كانت لتعليم احسن ولإكتساب لغة اكتر وانا نفسي درست في مدارس لغات وخاصة وكانوا الطلاب بيقلدوا الطلاب الاجانب وشايفين ان هما كمان اجانب بس مكانوش اوغاد زي الطلاب اللي في مدرستي حاليا

طول عمري بكره الامتحانات لكن مكنتش اعرف اني هكره احط الامتحانات كمان اتاري وضع الامتحان ده حاجة صعبة ولسه هتروح الوزارة تتراجع !! وطبعا لازم هيرجعولي فيها حاجات تتعدل :( حتى لو مفيهاش اي خطأ

عرفت من المدرسات اللي قبلي ان المدير هيطلب مني اغشش الطلاب الاوغاد علشان ينجحوا يبقى انا بشرح ليه أصلا لما هيطلب مني او من غيري يغششهم :( مفيش رسوب في المدارس الخاصة يبقى هيقلقوا من ايه :( سواء الاهل او الطلاب

انا قرفانه ومحبطة وعصبية وحاسه بأحاسيس زي الزفت وأحب أقول لكل اللي في المدرسة : تيييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييت ومش كفاية عليهم

يوم لا ينسى

2011-12-13T18:26:00.002+02:00

اليوم 13-12-2011 البعض يتشائم من رقم 13 لكن اليوم هو يوم لا ينسى ربما لم تعد مشاعري كما كانت في الصباح ولكنني سأظل ممتنة وسعيدة لعملي الجديد ...

يوم الأحد الماضي أخبرني مديري بالمدرسة أنني سأحضر ورشة عمل مع المدرسة الأولى عن تعليم اللغة الإنجليزية وقال : هيبقى في مدربين أمريكان :)

وبعفوية طفلة "زقطتت" وفرحت اخيرا سأسمع الانجليزية من أهلها وأنا أسميها – الإنجليزية النظيفة او النقية-

لا أخفي أنني لم أكن سعيدة للنهاية لأن المعلمة الأولى عراقية والمدربين أمريكان ولا يخفى على أحد ما حدث للعراق منهم لكن الشعب مختلف عن حكومته وكذلك أنا أفضل الإنجليزية البريطانية بحكم عراقتها وبحكم دراستي لها طوال اعوامي الدراسية خصوصا في الكلية ولأنها هي اللغة الأصلية والأمريكية مستحدثة

أخبرتني زميلتي التي تدرس للصف الأول والثاني الابتدائي أنني محظوظة لأنني سأحضر ورشة العمل فالعديد من المعلمات يقضين السنوات ولا يتاح لهن ان يحضرن أي ورشة عمل :)

وأنقضى اليومين سريعا وجاء اليوم

أوصلني والدي الى مركز التدريب الذي يبعد عنا حوالي نصف ساعة في مكان يسمى " السعادة" ظللنا نبحث عن مركز التدريب الى أن وصلنا

كعادة أبي قام بتأخيري عن موعدي كان الموعد في السابعة والنصف ولكننا وصلنا في الثامنة الا خمس دقائق وأخبرني والدي ان التدريب لن يبدأ قبل الثامنة وقد صدق –شكرا يا بابا - ...

المبنى فخم ولكنه لم يعجب زميلتي :) بالطبع يوجد به قاعات تدريب كثيرة فلم أعرف أين سيكون تدريبنا فذهبت لمكتب مسؤل وسألته؟ تدريب اللغة الانجليزية فين؟ ف دلني على مكتب مدربين اللغة الانجليزية 4 مدربين

منهم ثلاثة عمانيين وواحد أجنبي وقد كان الأخير ودودا للغاية ومبتسم لي بالرغم من أنني تحدثت بالعربية مع المدربين ولم أوجه له كلام – ولكنه الفرق بيننا وبين الغربيون ان اغلبهم دائما ودودون ومساندون في عملهم حتى مع من لا يعرفونهم"

الانطباع الأول للمدرب في البداية لم تعجبني صرامته وشعرت انه مغرور ولكنني تقبلت كل ذلك لأنني مستعدة للتعلم من أي انسان وتأخرت ورشة العمل قليلا لأن العديد من معلمين اللغة الانجليزية لم يلتزموا بالميعاد وتأخروا

سلمت على الموجهة العمانية وجلست معي في أول طاولة

جلست معاها ومع "أسيل " المعلمة الأولى ومعلمة هندية امام المدرب مباشرة :)

تم تقديم المدرب بواسطة شخص عماني حضر التدريب معنا وأخبرنا ان المعلم يقوم بالتدريس من عام 1979

انا سمعتها 1997 :) في البداية فلا يبدو على المدرب أي علامة من علامات التقدم في السن –من وجهة نظري-

المدرب بيتر لاكنتوني هو مدرب بريطاني ويال الروعة المدرب طلع مدرب بريطاني ويال الروعة تبع القنصلية البريطانية – طبعا علمت انه بريطاني من رمز القنصلية البريطانية في عرضه التقديمي-

كانت ورشة العمل عن طرق شرح وتدريس القواعد – الجرامر- والكتابة علما بأنني كنت أسأل نفس السؤال من أسبوع لإحدى اساتذتي في الجامعة :) وأرشدني لبعض المواقع الالكترونية بدون أي شرح !!

وعلما أيضا بأنني كنت أكره القواعد والكتابة فما بالنا بتدريسها للصغار والكبار :)

كان الجو مليئا بالإنجليزية وكأننا فجأه انتقلنا الى انجلترا :) في البداية ظللت أقاوم التحدث بالانجليزية برغم عشقي لها ومستر بيتر يشرح بالانجليزية ظللت عددا من الدقائق انتظر – ان حد ينزل بالترجمة بقى :)-

وبين الحين والأخر اتوقع ظهور الترجمة المكتوبة باللون الأبيض في القاعة على كلام مستر بيتر :)

وبعد دقائق اخرى انسجمت مع اللغة الانجليزية تماما وفهمتها وتحدثت بها على استحياء وكنت متقدمة في طريقة نطق الكلمات انا ومعلمة اسمها "هبة" ومعلمين رجلين مصريين وبالطبع المعلمة العراقية والهنود أحيانا وغير ذلك باقي الحضور كغثاء السيل ...

استمتعت بالكلمات وبالأساليب التي تعلمتها للتدريس وعلمت ان طرق التدريس في الوطن العربي هي طرق تدريس قديمة وعتيقة وبالية مثل جورب بالي ويصرون على أن يرتدوه فالتعلم من الممكن أن يكون مفرح وجميل وممتع والتعليم يجب أن يكون للعلم والتعلم وليس للإمتحانات وفقط ...

في أول استراحة شكرت المدرب بيتر وأخبرته أنني أبحث عن ورشة عمل أو محاضرة مثل محاضرته اليوم

منذ سنوات :) واليوم تحقق حلمي وأنه من أحلامي ان ادرس الماجستير في بلده تحدث المعلم معي بكل حماس وحفزني برغم عدم انطلاقي في التحدث معه لأنها لغتي الثانية ومنذ زمن لم اتحدث بها في حديث طويل برغم انني اشرح بها ومرات قليلة معدودة تحدثت فيها مع أهل اللغة نفسهم لكنني كنت اتحدث بها على استحياء

وسعدت بكلماتي القليلة مع المدرب :)

اعتقد ان كلامي اسعد المدرب وقام بالحديث معي اكثر بعد الاستراحة في النصف الثاني من ورشة العمل وتشجعت أكثر بالاجابة على اسئلته :) كان الجو ودودا و كان المدرب يسخر من المعلمين الذين لا يتفاعلون معه ويجلسون فاغري أفواههم :)

أنتهى الوقت سريعا واخر ما قاله المدرب هو : أتمنى أن أراكم مرة اخرى :)

ذهبت للمدرب وشكرته مرة أخرى وسألته ان كان يدرس أي مقررات تعليمية في القنصلية البريطانية ف ابتسم وقال لي انا لا اعيش هنا أصلا :) انا اعيش في سيبرس

ف أنا لم أتذكر ما هي سيبرس فقلت له هل هي في انجلترا؟ فقال : لأ سيبرس هي جزيرة قريبة من مصر :) فقلت له بفرحة : قريبة من مصر؟ فقال لي نعم "قبرص" قال قبرص بالعربي الفصيح :) فقلت له : سعدت بأن كنت تلميذتك اليوم قال لي : وأنا كذلك :)

انتهت ورشة العمل وتركت لي أمانة توصيل العلم والعمل بما علمت فيارب قدرني ان اوصل العلم ويارب زدني علما وأنفعني بما علمت

ملحوظة : الصورة في الموضوع صورة مستر بيتر

لأن من لم يشكر الناس لم يشكر الله أشكر أبواي وصديقاتي وكل من ساندني بكلماته الطيبة :) شكرا لكم جميعا

اليتيمات عاطفيا

2011-12-10T21:54:00.001+02:00

ذهبت الى حكيم لتسأله عن دواء لقلبها غريب هو ما ألم بها فهو شيء لا تظهر أعراضه عياناً بياناً ولكنه شيء محفور في الروح لقد أصبحت يتيمة عاطفيا منذ ما يقرب العامين وحتى الأن لا تستطيع أن تداوي جراح الروح

رغم كل توسلاتها لخالق القلوب أن يشفي قلبها وتنسى ...

تسائلت لماذا لا يوجد ملجأ لليتيمات عاطفيا هل من فقد أحد أبويه هو اليتيم وفقط؟ أم أن اليتيم هو من فقد تؤم الروح أو حتى من فقده وهو على قيد الحياة يتمتع بكل ثانية فيها بدون أن تأتي اليتيمة المسكينة التي تقضي الليالي الباردة الحزينة في باله قط . كم سهل هو جرح القلوب وكم مرهق مداواتها ...

ولأنه لا يوجد دواء يداوي جرح القلوب ولأنه لا يوجد تاريخ انتهاء صلاحية لوجع القلوب ولأن العديدات يتيمات عاطفيا ولا يشعر بهن مخلوق ولا مسعف سوى النسيان ولكنه يأبى أن يأتي وحينما يأتي لا يلبث أن يرحل بذكرى تأتي لتنهي كل بيوتات العنكبوت المنسوجة حول اليتم العاطفي ...

تبقى الحكايات المعلقة معلقة للأبد فحتى حينما جئت بندم كحبات الرمال ودموع المطر وشهقات الرعد كان باب الرجوع قد أغلق للأبد في وجهك فكما طردتك هي بعد أن أتمت مراسم اليتم كاملة في أيام وساعات ودقائق وثواني وأعوام ثم تأتي لتقول أشتقت اليكِ بالله عليك كيف؟ القول يصدقه العمل وأنت أبدا لم تعمل فكيف تصدقك؟

" أنا لا أتألّمُ في هواك بِالألمْ ، وَ لكن "أشياء منك أقلها الألم" و"هموم بعضها الحزن"

هذا والله لأن ما في نفسي لم يحمله إنسان قبلي

وأقل ما فيها أقسى مما تحتمله كلمات لغتكم

ولكن لم أجد تعبيرا بكلامكم إلا الألم والحزن اللذان يبدوان جنة إذا ما قورنا بما تحمله هذه النفس من أسى" مصطفى صادق الرافعي

المدير اشتغل خاطبة

2011-12-06T19:05:00.004+02:00

الحمد لله ان اللي هتكلم عنهم النهاردة مفيش عندهم ولا فيس ولا يعرفوا يعني ايه بلوجر -كناية عن انهم مبيعرفوش حاجة جهلاء تكنولوجيا-

أنا أشتغلت English teacher!!!! وعلامة تعجب أكتر احتمال أسيب الشغل الشهر ده لغاية لما يلاقوا مدرسة تانيه غيري مع اني مكملتش يومين في المدرسة وتقريبا في لعنة في المدرسة دي لمدرسات الإنجليش
في 5 مدرسات استقالوا قبل ما انا أروح

الشغل ده جالي عن طريق جارتنا ومجتمعنا المصري الحبيب كله بيدخل في حياة كله

على رأي ياسمين عبد العزيز : كل الناس بتتدخل في حياة كل الناس بطريقة تضايق كل الناس

الشغل سلبياته أكتر من ايجابياته بس هدفي من الشغل اني عايزة أراجع لغتي الانجليش بدل ما تطير وفي نفس الوقت عايزة أغير جو بدل ما أقعد في البيت

انا كنت عارفة من الأول ان هيبقى في فرق ثقافي رهيب بيني وبين المدرسات المصريات اللي في المدرسة في كل حاجة مفيش حاجة بتجمعنا الا اننا مصريين وفي غربة بس غير كده ولا تفكير ولا طريقة لبس .... الخ
النهاردة تاني يوم ليا في المدرسة وكانوا موصرين اني اشرب شاي يا جماعه مبحبوش لأ لازم تشربيه علشان تصحصحي قولتلهم أنا شربت شاي بارد الصبح لأني لو قولتلهم أيس تي مش عارفه هيعتبروها شتيمة ولا ايه !!
فضلوا شوية كتار يتكلموا على الشاي البارد والكائنة اللي جايه من الفضاء اللي مبتحبش الشاي ..

المدرسات أسهل حاجة عندهم الضرب وانا شايفة ان المدرس مينفعش يضرب لأنه بيتعامل مع بني أدميين مش مع حيوانات ممكن أعاقبهم عقاب تاني لكن ضرب مرفوض بالنسبة لي ف دي نقطة اخدوها عليا برضه وكأني برضه كائن فضائي

أكتر موقف استفزني النهاردة جدا كان عندي حصة وأغلب الطلاب اللي بدرسلهم اشقياء جدا وبيقلدوا مدرسة المشاغبين فلقيت العامل الهندي في المدرسة بيقوللي المدير عايزك فكملت كلامي شوية مع طلابي فلقيته أصر أوي وقاللي المدير عايزك فنزلت أشوف في ايه ؟ لقيت في شاب عند المدير بيتكلم معاه ف عادي دخلت
لقيت المدير اللي خلاني أسيب الحصة وأنزل أكلمه بسرعه بيقوللي ايه؟ هي ميس أميرة – اللي كانت انجليش قبلي-
عاملة نشاط؟ قولتله مش عارفه هبقى اخد رقمها وأكلمها وأسألها قاللي طيب علشان تعملي نشاط
في الوقت ده لقيت الشاب ده بيبصلي ومنتبه اوي للحوار !! مع اني مكنتش بصاله بس أنا بعرف طاقة الموجودين قدامي عاملة ازاي وعرفت انه بيبصلي فقولت للمدير بسرعه طيب انا هعمل النشاط عادي وجابلي فايل اخدته ولسه بمشي فاجئني بسؤال
انتي منين؟ !!!!!!!!!!!!!!!! علامات تعجب من هنا لبكرة ما انا يا ابن الناس لسه عامله انترفيو امبارح وسألتني نفس السؤال لحقت تنسى :( جاوبت بإقتضاب على رأي اللغة العربية الفصحى .. من دمياط
فقال للشاب : اهي طلعت بحراوية يا عم !!!!!!!!!!!!!!! وهو مال اهله انا بحراوية ولا صعيدية ولا قاهريه
المدير كان لسه مكملش كلامه ولفيت وسبته ومشيت قاللي استني قولتله عندي class ورجعت للحصة بتاعتي

العالم ده مش بتاعي وطالما ان الجو ده مش الجو بتاعي نتيجة طبيعية اني احس بالضيق اللي حاسه بيه دلوقتي

هو مينفعش وردة تتزرع وسط صبار بس انا حاليا عملت كده وبكرة هقول تجربة وعدت عدت عدت ومش هكررها تاني

في مدرسة كبيرة في السن حطاني في دماغها – مصرية- وكل يوم تضايقني بكلام ملوش أي 30 لازمة

وزملائي المدرسين الشباب السنجل حركاتهم حركات مراهقين !! كان نفسي يكونوا أنضج من كده ويعرفوا معنى الزمالة ..

عالعموم الأيام الجايه هتعرفني وهتعلمني حاجات كتير ومحدش بيتعلم بالساهل والعمل عبادة

ولازم لما أوصل لهدفي اني أبقى دكتورة في الجامعة أفتكر كويس اوي انا تعبت أد ايه صحيا ونفسيا علشان أوصل وأحقق حلم من أحلامي

الإعتراف الخطير

2011-11-24T04:23:00.005+02:00

عارفة ان الكلام في الموضوع ده مش وقته بس احنا كده المصريين اللي بجد في أحلك الأوقات وأكثرها سوادا بنضحك وبنفكر
لما جيت أنشر أول رواية ليا لقيت سياسة دور النشر سياسة غريبة جدا ومرتحتش للقيود اللي بيحطوها على الكاتب وكمان بيستغلوا الكتاب الشباب
المهم أحدث رواية لستيفاني ماير هي Breaking down
والرواية دي من سلسلة twilight المحبوبة
الرواية الجديدة 800 صفحة تقريبا والفيلم ساعتين فشوفت الفيلم وقولت الرواية هقرأها براحتي بعدين
ولما شوفت نهاية الرواية – اللي لسه مشافش الفيلم الأحداث هتتحرق بالنسبة له – تحذير

بيلا ماتت .....

ولعنت ستيفاني ماير مؤلفة الرواية عالألم اللي سببتهولي لما قتلت ايزابيلا بطلة الرواية وكنت حاسة انه مينفعش تموتها لأن بيلا لو ماتت الجزء الجاي من الرواية هيبقى ناقصه كتير وهيغلب عليه طابع الفقد وكلنا على بعضنا كده مش مستعدين نعيش الفقد في رواية كفاية بنعيشه في الواقع فالجزء الجاي كان هيفقد شعبيته وحب القراء ليه

وفي الأخر بيلا اتحولت وبقت مصاصة دماء زي ادوارد ...

الاعتراف الخطير اللي حابة أقوله ان روايتي الأولى بطلتها "مريم" ماتت في نهاية الرواية

وأنا كنت متوقعة أن النهاية دي طبيعية لأنها نهاية كل كائن حي بس مكونتش اعرف انها نهاية مؤلمة أوي كده لما اللي بيقرأ رواية أو بيشوف فيلم وبينفعل وبيتوحد معاهم يحس النهاية دي

شكرا يا دور النشر انكم خليتوني بالروتين وبالبيروقراطية والإجحاف اللي بتتعاملوا بيه مع الكتاب الجدد
معرفش أنشر روايتي الأولى شكرا جدا لأني قررت أغير نهاية روايتي

اللي بيقتل انسان حتى لو كان في رواية يبقى معندوش احساس كل انسان يستحق الحياة وخصوصا لو كان بيعمل عمل شريف أنه يعبر عن رأيه ويشارك في صناعة مستقبل بلده
يا ترى ممكن حد يفهم أن الحياة ساعات كتير بتكون أقسى من الموت؟! جايكوب قال لإدوارد في الفيلم أنا مش هموتك انا هخليك عايش بذنبها علشان ادوارد موت واحدة انسانة أومال اللي موت ناس كتير مش بس بالرصاص
الجديد بقى بغاز محدش عارف ان كان مسيل للدموع ولا فعلا غاز محرم دوليا !!

مش عايزة أضخم الأمور وأقول مصطلحات زي التلفزيون لأني فاهمه ومقدرة أمانة الكلمة لكن في ناس ماتت ولسه بتموت وناس تانيه بتتفرج عليهم ...

هو انا ليه دلوقتي افتكرت قصة أصحاب الأخدود؟ هو التاريخ بيعيد نفسه للدرجة دي؟

يارب مصر يارب بلدي + تحديث

2011-11-21T03:04:00.005+02:00

تحديث : اللي نقل كلامي من غير ما يستأذن مني وياخد اذن بنقل محتوى من مدونتي هو انسان قليل الذوق ومسمعش عن حقوق الملكية الفكرية قبل كده وحتى بعدما نشر كلامي مبلغنيش انه نشره انا عرفت بالصدفة وكمان مش كاتب اسمه تحت المقال !!

http://m.albawaba.com/ar/node/401862 ده اللينك

مش عارفة أنام ودمي محروق ذنبهم ايه الشباب يفقدوا عينيهم ويتخنقوا بالغاز وهما بيجروا يقعوا وايديهم أو رجلهم تتكسر

طيب الشاب اللي في الفيديو اللي متشير دلوقتي عالفيس اللي مات برصاص القوات اللي كانت في ميدان التحرير ومش عارفه اميز شرطة ولا جيش واللي مات ومش بس كده اتسحــــــــــل واتجرجر في الشارع بعدما ما مات ومش كده وبس كمان اللي جره حطه في مكان مليان زبالة موجوعة اوي وانا بكتب كده وموجوعة ان مفيش في ايدي حيلة نفس العجز اللي حسيته اول ايام الثورة 25-1

كان نفسي جدا أكون طبيبة وأشارك في تطيب جروح الناس دي اللي بيضحوا بكل حاجة غالية في حياتهم علشان ناس بيشتموهم وبيقولوا عليهم بلطجية ومشاغبين

كان نفسي دلوقتي أكون في بلدي وأنا فعلا منفية نفي إجباري لأن صعب أرجع أقعد في مصر لوحدي في الظروف دي مع ان ربنا شاهد اني كنت بمشي في شوارع مصر مطمئنة أكتر ما بمشي في الشوارع هنا

مع ان بيقولو ان هنا بلد أمن وأمان وفي مصر في بلطجية !!

شهر ونص قعدته في مصر متعرضتش للسرقة يمكن عربيتي حمتني من موضوع السرقة ده بس مفيش مانع انها كانت تتسرق لو فعلا في لكل مواطن بلطجي وخصوصا اني كنت ساعات بنساها مفتوحة وساعات بنسى الموبايل فيها ؟ خايفة؟ كنت خايفة في الأول من كلام الإعلام

الإعلام المصري اللي طلع أكبر كذبة في الدنيا ومش بس انا اللي كنت خايفة ماما كمان كانت خايفة عليا ومكنتش بتسبني اروح مكان لوحدي ده طبعا من كلام الإعلام عن مصر وقبل حتى ما يكون معايا العربية كنت بركب مواصلات عادي جدا والقصة اللي سمعتها مليون مرة كل ما احب اروح محافظة من محافظات مصر يقولوهالي علشان يخوفوني من المحافظة اللي عايزة أروحها !!

لأن كان من احلامي اني أدرس دراسات عليا في امريكا فكنت بقرأ كتير عنها وسمعت دكاترتنا بيحكوا لنا عن شيكاجو وغيرها والرعب اللي بيحصل فيهم وتقنيات الأمن اللي المفروض نتبعها كطلاب دوليين واحنا ماشيين في الشارع زي مثلا ان شنطة ايدنا تبقى على كتفنا وراسنا وزي كمان اننا نمشي بإسبراي دفاع عن النفس وكمان نمشي بفلوس قليلة علشان اكيد هنتعرض للسرقة ونخبي أي لاب توب ومنلبسش أي دهب أو أي ساعة غالية مثلا

حد واخد باله ان دي امريكا ؟ وكان في محاضر مصري امريكي وهو اللي كان بيقول تعليمات الأمن وكتب امريكية بتعلم التعليمات دي للطلاب الدوليين !!

مصر برغم ان مفيش حد بيدافع عن مواطنيها الا ان الدنيا موصلتش للدرجة دي وموصلتش ان كل واحد يخبي سلاح في بيته !!

وأنا مسافرة وبحط شنطتي على جهاز بيكشف في ايه في الشنط اللي كان قاعد عالجهاز ومعاه واحدة قاللي لو سمحتي افتحي شنطتك بعدما شنطتي عدت عالجهاز قولتله ليه؟ قاللي شاكك ان فيها قصافة !! فتحت شنطتي وبصو فيها وملقوش أي الة حادة أو ممنوع تطلع الطيارة فلقيته بيقول لماما يا خسارة كان نفسي الأمورة دي يبقى معاها حاجة ونمنعها من السفر قولتله يااااااااااااااااااااريييييييييييييييييييت حاجة زي ايه؟ قاللي مطوة مثلا :) انتي مش عايزة تسافري؟ ماما قالتله ايوة مسافرة غصب عنها قال لماما بسيطة نحطلها مطوة في شنطتها ونمنعها من السفر يااااااااااااااااااااااريته عمل كده ومكنش الموضوع هزار

المشكلة كانت هتبقى اختيارين أصعب من بعض وأحلاهما مر بلدي ولا أهلي pan style="font-size:130%;">

أهلي هما اللي علموني أحب بلدي

يارب صبرني على بعدها برغم كل حاجة بحبها وكل يوم بيمر وأنا مش فيها بشتاق لها اكتر من اليوم اللي قبله

مصر هتعدي الأزمة ياااااااااارب مصر تعدي الأزمة دي وتبقى أحسن بلد في الدنيا

ربنا يعوض اللي اتصابوا ويرحم اللي ماتوا ويفرجها من عنده ويبقى فرجه قريب يارب

ايش ياخد ابن البلد من مجلس الضباط

2011-11-20T21:30:00.003+02:00

المشهد دلوقتي بيفكرني ب25 يناير نفس الأحداث ونفس احساسي بالضبط في الثورة يا ترى دي ثورة تانيه تكمل الثورة الأولى ولا لأ ! كلنا مش فاهمين بلا استثناء بعد جمعة اللخبطة اللي حصلت دي الدنيا اتلخبطت يا ترى الاخوان والسلفيين فين؟ اللي كانوا بيتحدوا المجلس ومشيوا والشباب اللي زي الورد بيتقتلوا دلوقتي في الميدان

ولا هما مبينزلوش ومبيتكلموش الا لما تكون الدنيا هادية ويولعوها ويمشوا !!

امبارح وزارة الداخلية !!! بتحرر محضر ضد المعتصمين في التحرير !!!!!!!!!!!!! ضربني وبكى وسبقني واشتكى

محدش لسه طلع قال أي حاجة رسمية كالعادة واللي كان بيحصل أيام مبارك مستمر على أوسع وكل اللي بيحصل ده الغرض منه يبوظوا الانتخابات بتكلم على البعدا مش على الشباب اللي في الميدان

اللي يحرق الدم بقى الناس بتموت وبتتصاب في عنيها وفي صدرها من الغاز وعظامها بتتكسر في التحرير وفي المحافظات والإذاعة المصرية اذاعة الأغاني بتنقل مباشرة من مهرجان الموسيقى العربية !!!!!!

مش لاقية كلام غير الفيديو ده وأنا أصلا مبقتش شايلة صورة الحداد من المدونة حداد على مصر وسجلت وهنتخب برغم ان الوقت المتاح لتسجيل المصريين في الخارج كان قليل اوي بس برضه سجلت وهنتخب

يوماتى بفطر امل واتعشى بالاحباط ..

خيبتى بتركب جمل ودمى رحتوا شياط ..

فى خير كتير فى البلد لكنه مش للبلد

وايش ياخد ابن البلد من مجلس الضباط ..

وحشانى يا متعبه فى الحرب أو فى السلم

يا بعيدة و قريبة و حبيبة أوى للعلم

أنا وأنتى يا طيبة معمول علينا الفيلم ..

وأنا حيلتي اية غير حلم والدعوة فى الصلوات

مترجمة سنة أولى :)

2011-11-16T03:06:00.004+02:00

بما إنه خلاص بقى أمر واقع وبقى اسمي مع طلاب الدراسات العليا لدبلومة الترجمة الفورية والتتبعية والتحريرية وحاسة بمسؤلية كبيرة وخايفة من الخطوة دي زي أي حاجة جديدة ومجهولة بنخاف منها

إذن أهلا بيا في سنة أولى ترجمة

الدبلومة سنتين :) السنة الأولى المفروض المواد بتاعتها

1- ترجمة علمية

2- ترجمة أدبية

3- ترجمة فورية

4- لغة عربية -نحو-

5- معاجم

6- ترجمة تتبعية

7- مصطلحات قانونية وسياسية واقتصادية

لما سألت دكتر أشرف قاللي أن الترجمة التتبعية هتبقى أصعب مادة :)

أول لما عرفت بالمواد أعترضت ع اللغة العربية :) خصوصا ان اللغة العربية هندرس فيها والعياذ بالله نحو :) وأنا طول عمري بكرهه بس من صفات المترجم الناجح أنه يكون متمكن من اللغتين اللي بيترجم منها واليها إذن ف النحو شر لا بد منه وان شاء الله هذاكره وأمري لله .

طول عمري بعترض على ترجمات كتير للبرامج وللأفلام وللإعلام الأجنبي بوجه عام وللأسف وللأسف جدا كمان أن المترجمين الصهاينة من أشطر وأخبث المترجمين في العالم بيلعبوا بالكلمات لعب فظيع وبيقلبوا الحقائق لصالحهم

والإعلام العربي الأهبل بيمشي ورى ترجمتهم وبيرتكب مصائب وبلاوي في حق الحقوق العربية زي القضية الفلسطينية وغيرها :( ودي حاجة غيظاني بصراحة وليه منبقاش احنا احسن مترجمين ودي حاجة مش سهلة أكيد

علشان كده كنت بتهرب من دراسة الترجمة علشان لما اترجم وترجمتي متبقاش عاجباني يبقى عذري اني مش مترجمة :) لكن دلوقتي ادبست رسمي وبقى لازم أتعلم ومينفعش أضيع سنتين من عمري عالفاضي مع أني عارفة كويس أوي اني داخلة الدبلومة دي علشان الخطوة اللي بعدها في الدراسة بس برضه مينفعش أدخل فيها وأخرج منها زي ما سبتها

مادة الترجمة كانت أساسية 4 سنين الليسانس ودكتر الترجمة قال لنا ان أصعب حاجة الترجمة الفورية وخصوصا في المؤتمرات العالمية ومرة كان في مترجم ترجم كلمة الرئيس المصري – مش فاكرة جمال ولا السادات – سندخل عليهم وسنحاربهم ان لم نجد سلاح بالنبابيت – مفرد نبوت- فالمترجم يعمل ايه؟ مفيش حاجة اسمها نبابيت بالإنجليزي :)) فترجمها نبابيت زي ما هي والجرايد العالمية نشرت وقتها ان مصر عندها سلاح جديد اسمه نبابيت :)) مترجم ذكي :)

نيجي بقى للترجمات الغبية جداااااااااااا كنت معديه على قناة من القنوات اللي بتتاجر بالدين وكانوا مستضيفين واحد أجنبي فالضيف بيقول يجب أن نتمسك بمكانتنا بين الأمم فالمفروض ان المترجم ترجمها ازاي؟ يجب أن نتمسك بالكرسي !!!!!!!!!!!! نتمسك بالكرسي يعني ايه؟ هي دي جملة مفيدة !!

كمان في ترجمة لذيذة تنم عن ثقافة فئة من الشعب المصري كنت في كوك دور المنصورة وبقول للبنوتة اللي بتاخد الأوردر في هوت تشوكلت؟ :) قالتلي في هوت تشوكلت ساقع وفي هوت تشوكلت سخن – أنا مفهمتش بصراحة – قولتلها ازاي؟ قالتلي يعني في نوعين من الهوت تشوكلت ساقع وسخن قولتلها اذا كان هو هوت تشوكلت يبقى ساقع ازاي؟ قالتلي ما انا بقولك في نوعين ساقع وسخن :))

حاليا بقرأ كتاب Rich dad poor dad ومن كتر استمتاعي بالكتاب مش عايزة أخلصه وترجمتي المتواضعة للكتاب خلتني أندهش أن تعبيرات بنستخدمها في اللغة العربية هي هي موجود زيها بالضبط في اللغة الإنجليزية

ولذلك بقول لنفسي : ربنا يوفقك في أول خطواتك للترجمة والترجمة عايزة صبر وحب وشغف ودارسة ومجهود وطالما اختارتيها وبقيتي قدرها وبقت قدرك السنة دي واللي جاية والسنين اللي بعدها ان شاء الله – لو ليا عمر- يبقى لازم تجتهدي وتواجهي أي صعوبات هتقابليها بشجاعة وتحدي وإصرار على النجاح ومرة تانيه ربنا ينجحك ويوفقك ويعينك يا نفسي :)

نصيحة لنفسي : الشطارة مش أنك تبقي كذا حاجة في نفس الوقت الشطارة بجد انك تبدعي وتتميزي في كل حاجة بتعمليها .

ملحوظة : أنا بقيت طالبة دراسات عليا :) احساس حلو أوي بغض النظر عن ما ينتظرني من متاعب الدراسات العليا والدراسة في جامعة مصرية إقليمية منفية للمرة التانيه على التوازي .

قلبي معاكي يا دمياط

2011-11-13T11:00:00.006+02:00

النهاردة الصبح في صباح الخير يا مصر نروح للكلام عن الأخوة الأشقاء في سوريا طيب والأخوة الأشقاء في دمياط محدش بيتكلم عنهم ليه؟ والله دمياط محافظة ومش هبالغ لو قولت أحسن محافظة في مصر من ناحية الشغل والإنتاج والسلمية احنا الدمايطة ناس مبنحبش المشاكل بس لما تموتونا أكيد مش هنسكت يعني أكتر من كده !!! الصورة اللي فوق منقولة من تويتر والشارع ده شارع بيوصل للكوبري الحديد في دمياط والكوبري حاليا مقفول وهو الكوبري العلوي

والطرق من والى وفي دمياط ورأس البر مقفولة الكلام ده كله على عهدة تويتر لأنني للأسف مش هناك وللأسف أكتر في تعتيم أعلامي كبير أوي من القنوات المصرية المحروقة بجاز اللي مبتجيبش أي حاجة بتحصل في مصر

للي مش عارف الموضوع في مصنع اسمه اجريوم ده كيماويات ناس بيقولوا أسمدة وناس بيقولوا أسمنت والمصنع ده لما النظام تييييييييييت كان موجود كان في معارضة من كل الدمايطة أنه يتبني لأنه مكانه في مكان حيوي مع الرياح وبياخد مية من البحر والنيل يعني التلوث أرض جو سما ومن كل اتجاه وفعلا ال............. فتحي البرادعي محافظ دمياط سابقا نيم الدمايطة وقال لهم المصنع مش هيتعمل وانا كفيل انه مش هيتعمل والمصنع اتعمل فعلا !!!! وفتحي البرادعي ده حكايته حكاية في دمياط بوظ كل معالمها اللي كانت مشهورة بيها زي الكباس مثلا !!- هبقى أقول هو ايه بعدين- وبعد كل ده بقى وزير اسكان في حكومة الثورة !!!!!!!!!!!!!!!!

ومش بس مصنع أجريوم في مصانع كيماوية كتير جدا في دمياط مما أدى لمصايب وبلاوي لكل الدمايطة منها موت السمك والزرع وتلوث التربة وتلوث الهواء وكتمة الهواء كمان يعني المناخ أتغير !! مش بس كده ده في مصيبة أكتر من كده ان 99% من الدمايطة بقى عندهم أمراض في الجهاز التنفسي من كتر التلوث زي حساسية الصدر والأنف والأذن والحنجرة والربو وغيرها لأن دمياط أصلا فيها كيماويات تكفي وتفيض مش ناقصين مصنع كمان !!

اللي بيحصل بقى دلوقتي من الشرطة والجيش نقلا عن تويتر هو ده العادي برضه بيتعاملوا بقوة السلاح مع شباب أعزل وفي إصابات

وتعتيم اعلامي

لصالح مين كل ده يحصل !!!!!! ما يروح المصنع في ستين داهية ناس تمرض وناس تموت ومصالح تتعطل ومرضى ميعرفوش يوصلوا للمستشفيات وطلاب ميعرفوش يروحوا كلياتهم وجامعاتهم مش فاهمه ليه كل ده وليه المجلس الموقر بتاعنا مش بيتصرف بشكل لائق ومش كده وبس بيستخدم الرصاص الحي كمان !!!!!!!!!!!!

Arch Haidy يا جماعه احب اقولكم انى عايشه فى راس البر مفيش بنزين خالص فى راس البر ولا فى أنابيب غاز خالص حتى الخضار واللوازم المعيشه بدأت تقل عند البائعين وكمان بيغلوها علينا ولا عارفين نروح شغلنا ولا الناسعارفه تروح كليتها وبعدين بجد حرام اللى بيحصلنا ده اوك انا مع منع المصنع بس مش بالطريقه دى احنا بنى ادمين برضو !! ده تعليق بنوتة عايشة في رأس البر نقلا عن فيس بوك

هو مفيش مطالب ممكن تتحق بهدوء أبدا ليه المجلس الموقر بيستنى لما كل ده يحصل مش فاهمه يارب أحمي مصر ودمياط وأهلها

سقفك بعيد فوق في السما :)

2011-11-11T00:34:00.000+02:00

البوست اللي فات أتمنيت الترحال :) أي السفر وطلبتها ونولتها سافرنا من صلالة لمسقط 1000 كيلو :) بحالهم بأمطارهم بعاصفة الصحراء فيهم كانت رحلة زي الفل بصراحة الحمد لله واللي زاد وغطى أن معدتي كانت بتوجعني المشكلة العويصة أني لما بضايق أو بضطر أكلم حد بطريقة عدوانية أو سخيفة بتيجي فوق دماغي وأنا اللي بتعب حتى لو اللي قدامي يستاهل ضرب النبابيت والبراطيش والقباقيب وما شابه

بمناسبة اللي يستاهلوا الضرب وبما إن الشيء بالشيء يذكر الشوية اللي أعرفهم من المصريين اللي ممكن يتقال عليهم مصريين بيفهموا نوعا ما هنا ان شاء الله هيروحوا السفارة يسجلوا اسمهم وينتخبوا أما باقي وأسفة في اللفظ -.........- اللي مصريين بالجنسية بس !! أغلبهم مش هينتخبوا ولا في دماغهم أصلا !!!!!!!!!!
إن شاء الله هروح يوم السبت السفارة المصرية اللي لقبها – وأنا عاملة نفسي نايمة- ومن موقعي هنا بقول لكل فروع سفارتنا في كل أنحاء العالم جاتكو ستين ألف نيلة متوزعة عليكم بالتساوي لأن سفارتنا بره بلدنا لو لقت مصري في مشكلة – وعن تجربة احكيلكو عليها بعدين- بتكلكع له الدنيا وبتجمعله كل الروتين وتشيله الهم ولذلك سفارتنا في الخارج زي قلتها للأسف !! وعلى فكرة هما مش خريجين سياسة وإقتصاد زي ما كتير متخيلين !!
وكمان عايزة اروح سفارة بريطانيا علشان أبقى اجندة رسمي :) علشان أحضر لرحلتي لبريطانيا ان شاء الله ويارب أخو الأمير اللي اتجوز السنة دي ميفكرش يتجوز السنة دي والجاية علشان عايزة أزور بريطانيا السنة دي جدا جدا وبجد الرحلة دي عارفة أنها هتفرق معايا كتير أوي وهتخليني فرحانة وفي أحسن حالاتي ولذلك يارب .

النهاردة وبعد 3 أيام معدتي العصبية :( كانت بتوجعني فيهم أخيرا الحمد لله معدتي خفت – يااااااااه المعدة تاج على رؤوس اللي بياكلوا :)) إضطريت أخد عصير ومشروبين بس طول يوم السفر على أمل أن معدتي تخف وخفت معدتي نوعا ما الحمد لله تاني يوم :) وجبت سنيكرز حبيبة يسري فودة وأكلتها علشان أشوف تأثيرها فعلا زي ما قال ولا ايه وهي فعلا بتشبع جدا وبتدي طاقة تكفي أسبوع حسب كلام يسري فودة :)
ونزلنا أشترينا هدايا لأصحابنا وكنا معزومين عندهم هما مصريين وطنط فضلت تقولي عملالك مفاجأه ااااااااااه من دي مفاجئة يا إيناس أااااااااااه لأ دي مش مفاجئة دول أتنين اااااااااااااااااه يا إيناس :)
- انا بصراحة أتخضيت- أصل طنط كانت بتقول أه من المعاميق !! دي كده تبقى مفاجعة مش مفاجئة
و10 دقائق طنط دخلت وسابتني مخضوضة وبقول يارب خير وسابتني كمان للأسئلة هو في إيه؟ يمكن طنط بتتكلم على بنوتتها ؟ طيب بتتكلم عنها كده ليه؟ وشوية طنط جت وأدت لماما بيبي صغنن عنده شهر وإحنا بجد اتفاجئنا على اتبسطنا كوكتيل مشاعر عسول أوي :) وبعدين طنط دخلت وجابت البيبي التاني وأدتهولي :) بسم الله ما شاء الله تؤام ربنا يبارك لهم فيهم ويشفيهم ويعافيهم ويحفظهم بجد أتبسطت أوي وصحبتي الأنتيم نطت في دماغي هي وكارين طبعا هي عارفة نفسها من غير ما أقول :)
وأخت التؤام التانية 3 سنين" رنا" طبعا البنوتة كانت مضايقة من الأطفال الجداد اللي أخدوا كل الحب والإهتمام
ومليون في المية كنت حاسة بيها :) اطفال زي بعض بقى هههههههههه أصل وأنا في سنها كانوا بيقولولي هتعملي ايه لما يجيلك أخوات يا ننوسة وكان ردي بكل عفوية وتلقائية وبراءة الأطفال في عينيا : هرميهم من الشباك :))
طبعا ناس كتير كانوا بيزعقولي فغيرت مقولتي الشهيرة وبقت هرميهم من البلكونة :) هو أنا كده حبايبي مبيقبلوش القسمة مع حد علشان كده قربت من رنا وشوية بشوية أخدت عليا وأخدت عليها ولعبنا بالمكعبات والعروسة وحضنا بعض وأتوشوشنا علشان محدش يسمعنا :) ولعبنا بتوك الشعر وقعدنا مربعين رجلينا على السرير وأتمشينا في الأوضة وكانت عايزاني أبات معاها أنا على سرير وهي على سرير وأمرها لله هتاخد أختها جنبها علشان أنام مستريجة على سرير لوحدي :) المهم لازم أقعد ونلعب سوى وكانت ماسكة فيا وسابتني أمشي بالعافية ومرضتش تبوسني علشان ماشية وسايباها :) وكمان بيبي من البيبهات كان بيعيط فشيلته وطبطبت عليه وسكت وضحك فأخته الكبيرة قالتلي أنتي بيحبوكي الأطفال :) بعدها على طول أخوها عيط :) أما أنا ونهى أختهم الكبيرة ففضلنا نتكلم عن الإنجليش والأفلام والمدرسة وحكيتلي فيلم وغنينا سوى أغنية سيلين ديون تايتانك وأتاري الفيلم ده تتوارثه الأجيال ههههههههه جيلنا كله من البنات حافظ الأغنية دي وفي كتير مش فاهمين معناها أصلا بس حافظينها وعن نفسي كنت وأنا اد نهى بحب الفيلم ده بطريقة مش طبيعية بس طبعا شوفت النسخة المسموح للأطفال بمشاهدتها منه وكمان الأغنية دي بداية حبي لأغاني سيلين من وقتها وبدأت أسمعها .
الفكرة في العزومات انها بتبقى دفا ولمة وحب ومرهقة برضه علشان بوزع طاقتي على كل أهل البيت ولازم لازم لازم أسيب لهم طاقة إيجابية في البيت ضحك وفرحة وكلام حلو ودعاء ليهم بالخير وسؤالهم عن أحوالهم وأهتمامتهم علشان كده بخرج من العزومة مرهقة وعايزة أناااااام علشان أشحن طاقتي وأرجعها تاني
ومع إني روحت العزومة بالعافية :) لكن بجد الحمد لله أستمتعت باليوم وطنط نفسها في الأكل خطير ما شاء الله عليها :) وكمان كانت عاملة لينا عزومة أهل العروسة لخطيب بنتهم مش عزومة عادية كمان ربنا يديها الصحة ويعينها ويديها كل خير هي وعمو وأطفالها .
ملحوظة : النت عندي حاليا أوحش من وحش بحاول أنشر البوست ده ومطلع عيني بقاله شوية ده أول بوست في التدوين اليومي لمدة شهر واحتمال يفضل كذا يوم لغاية لما ارجع صلالة والنت يبظبط عندي ان شاء الله

زقزقة

2011-11-08T15:37:00.003+02:00

هل يستحق من يحول ألواننا الوردية الى الرمادية كل هذا الإهتمام منا !

يا إلهي كم أحتاج للترحال الأن !

تُرى من أين تُشترى نكهة الفرح التي تظل في الروح طويلا وأين هو عطر الفرح الذي يبقى في النفوس ويتعتق بمرور الزمن فيصبح أقيم وأحلى !!

لو كان بيدي لتمنيت لك جحيما دائما لا ينقطع ولكني لا أملك الجنة لأتمنى لك الجحيم

أخشى أن يصيبني الملل من إنتظارك فلا أعد أنتظرك وتتمتلئ كل المقاعد ولا تجد مقعد بجواري !!

أتى العيد ليفتقد الشهداء والعظماء أمثال أنيس منصور فليرحمهم الله جميعا وليرحمنا معهم .

مصر مثل بناتها كاملة متكاملة حسناء عروس شابة تتحمل الكثير ولكن كل من تقدموا لخطبتها والفوز بقلبها أقل بكثير جدا مما تستحقه هذه الحسناء الجميلة ولذلك إزدادت نسبة العنوسة في بلدي وإزداد معها الكلاب .

- اختلفت نظرتنا كتير أوي انت كنت شايف الحكاية انتصار شخصي وأنا كنت شايفاها حياة والحمد لله انها مطلعتش كده ودي أحلى حاجة حصلت وبرضه انت محققتش الإنتصار الشخصي وأنقلب السحر على الساحر :)

- لو جاتلي بنت هسميها إيناس ولو جالي ولد هسميه أنس :)

إيناس كان نفسي أجيب بنت بس جه ولد وسميته أنس :)

أنس مجنني يا إيناس :)

)زميلتي في الكلية سمت ابنها على اسمي ودلوقتي عنده سنتين)

- أجمل الأيام لم يأتي بعد ، أجمل الأيام لم يأتي بعد ، أجمل الأيام لم يأتي بعد

أيوة يعني هيجي امتى؟ وفي أمل يجي ولا هفضل أقول لم يأتي بعد !!

بريطانيا يخربيت أبوكي هجيلك امتى بقى قربت أقول مليت مليت ملييييييييييت

- في ناس في الحياة شبه النينجا اللي بيطلع في فيلم لا تراجع ولا استسلام يقول أين أشيائي :) مهما تموته هو غلس ومبيموتش وبيطالبك كمان بحاجة انت مش عارف هي ايه :)

عن صفوان بن سليم أنه قال قيل لرسول الله صلى الله عليه وسلم :"أيكون المؤمن جبانا فقال نعم فقيل له أيكون المؤمن بخيلا فقال نعم فقيل له أيكون المؤمن كذابا فقال لا" مفيش كدبة بيضا ولا كدبة سودا ولا كنت بكدب علشان سبب نبيل الكذب كذب والكذاب كذاب

لا يكذب المرء إلا من مهانته***أو عادة السوء أو من قلة الأدب – علشان كده عمري ما هسامح أبدا أي حد كدب عليا وأستهان بذكائي وكان مفكر انه ربنا مش هيكشف كذبته .

سألني صديقي وأخويا الصغير : إيه اللي ممكن يخليكي تخرجي انسان من حياتك؟ والسؤال ده كان شبه سؤال كان في امتحان منحة تدريب المحاضرين :) والاجابة كمان قريبة أوي من بعضها

جيم جواب ممكن أشيع جنازة انسان ويبقى في نظري ميت وهو على قيد الحياة لو تجاهلني أكثر من مرة من غير سبب

لو تعمد أنه يقلل من شخصيتي أو من ذكائي ولو كذب عليا وطبعا لو استهان بمشاعري وحزنت وعيطت بسببه .

وفي النهاية أحب أقول للناس المزيفين في حياة كل واحد فينا : ياما البدل بتداري سلطة ومحدش داري ... كان اللي يغلط على راسه بطحه بقى النهاردة يا عينه يا جبايره ( أيمن بهجت قمر)

يا خسارة مجبتش العوامة

2011-11-02T18:12:00.006+02:00

محدش قاللي وأنا في مصر ليييييييييه؟ ان هيبقى في منخفض جوي في سلطنة عمان؟ كنت عملت حسابي وجبت عوامة وكتافات أو حتى لايف جاكيت :)

الصورة اللي فوق دي صورة مستشفى النهضة في مسقط ونقلوا المرضى منها

النهاردة اليوم الثالث للأمطار المتواصلة والموضوع كده بدأ يدخل في الجد في طرق بدأت تتقطع

والخروج ممنوع الا للضرورة ولسه مش عارفين الوضع ممكن يتطور أكتر من كده ولا لأ

المفروض ان المنخفض الجوي ده اعصار بس مبيقولوش عليه اعصار لأنه مش قوي أوي زي الاعصار وعلشان الناس متخفش

الشوارع غرقانة وكإنه فيضان وفي شوارع عادية والتلفزيون العماني قاطع برامجه العادية وبيتكلم عن المنخفض الجوي والكهرباء مقطوعة في شارعنا وده تقريبا علشان تخفيف الحمل على الكهرباء علشان متقطعش من البيوت وكمان علشان ميحصلش صعق للأطفال أو الكبار من الكهرباء مع غزارة المية

والكهرباء موجودة في الشوارع الرئيسية

قبل يومين من دلوقتي – أول يوم مطر- رحنا الهايبر وكان متوفر فيه كل حاجة أما لو الوضع استمر جايز تحصل أزمة غذائية وخصوصا ان العادات الشرائية للعمانيين والمقيمين بتزيد في حالات الطوارئ اللي زي دي بس الحمد لله غالبا مبيحصلش استغلال للوضع وارتفاع في الأسعار وخصوصا كمان أن عيد الأضحى قرب وبرضه المشتريات بتزيد من كل الناس

الأرصاد الجوية العمانية بتقول ان المنخفض الجوي هيبدأ يقل ابتدائا من يوم السبت ان شاء الله –برغم اني مستمتعة بالجو- لكن أتمنى فعلا ان المنخفض ده يروح لحال سبيله لأن كده بدأت أقلق :) وخصوصا ان في خسائر في الأرواح والممتلكات

والحمد لله أن الكهرباء والمياه والتليفونات والإنترنت موجودين ومتأثروش بالحالة الجوية زي الأعاصير اللي فاتت عالسلطنة - مناطق قليلة اتأثرت-

أي حد عايزني أدعيله بأي دعوة يقول لأني أعتقد أن الدعوات دلوقتي مستجابة في ظل الظروف الحالية والمطر المستمر ده :)

ان شاء الله خير

مطر !! :)

2011-11-01T13:13:00.007+02:00

من أكتر الحاجات اللي فاجئتني هنا في عمان أول ما نزلت من الطيارة كان الحر المبالغ فيه الجو حر بطريقة لا تطاق طبعا بالمقارنة مع مصر

ولأني من عشاق المطر فأنا دلوقتي سعيدة جدا بالجو هنا الجو أتغير خالص في يومين وكإننا نقلنا شتاء مصر لغاية هنا والمطر من امبارح متواصل وشكل السحاب جميل أوي وصوت الرعد والبرق والأطفال جيراننا أردنيين والأردنيين بسم الله ما شاء الله بيجيبوا أطفال كتير -ربنا يباركلهم فيهم-

فالأولاد بيلعبوا مع بعض تحت البيت كورة وتحت المطر كمان :) والبنات واقفين في البلكونة مع مامتهم لابسين اسدال الصلاة وفرحانين بالمطر

حلوة الفرحة اللي بتيجي من غير معاد وحلو مشاركة الفرحة :)

الحمد لله

------------------------

ملحوظة : رجعت الأكونت بتاعي عالفيس بوك :)

مسافرة

2011-10-28T12:13:00.004+02:00

لسه ساعات على معاد طيارتي والمفروض ان دلوقتي أكون جاهزة للسفر وبعد شوية أكون في طريقي للمطار والمفروض كمان أكون مشغولة ومش فاضية أفتح الكمبيوتر أو اللاب لكن ومن امتى الكتابة كانت بتختار الوقت المناسب؟ كلمات بتفرض نفسها علينا وتفضل تيجي لينا يمين وشمال وتقول هتكتبوني يعني هتكتبووووووني

مش عارفة تسمية الربيع العربي علشان الثورات دي صح ولا غلط لأن اللي هيقول ان احنا في ربيع يبقى بيستهبل يمكن حالة بلدنا والبلاد العربية المجاورة تتصلح مستقبلا وتعيش ربيع فعلا؟ الله أعلم

قعدت وكتبت ليسته طويلة بكل الحاجات الإيجابية اللي حصلت لي في مصر وطبعا مرضتش أكتب ليستة سلبية علشان هتبقى كبيرة اوي اكتر من اللازم !! وأول لما ابقى بعيد عن مصر هكتب ايجابياتها ان شاء الله عالمدونة

السفر قطعة من العذاب مش عارفة ليه بفتكر الجزء ده من الحديث دائما وأنا مسافرة ودائما ببدأ سفري بدعاء السفر في ناس بيقولو ان السفر على جمل هو اللي قطعة من العذاب بس انا شايفة ان كل السفر زي بعضه حتى لو كان بمكوك فضائي

لا كرامة لنبي في وطنه : ايه بقى هي الجملة دي كل مرة تيجي يوم السفر وتلح عليا أوي كده ليه؟

ان شاء الله هسافر 16 ساعة بين 4 مطارات
مطار القاهرة
ترنزيت في مطار البحرين
مطار مسقط
مطار صلالة

أول مرة أنزل القاهرة وفيها مليونية وكمان البحرين اللي برضه فيها ثورة وفيها كلام مش هينفع أقوله دلوقتي عن البحرين علشان هنزل فيها ترانزيت :) فعايزة انزل ترانزيت وأرجع عمان مش أفضل في البحرين على طول فنعدي النقطة دي دلوقتي وبعدين ابقى أقول لكم لو لسه في العمر بقية :)

النهاردة أول يوم في العشرة الأوائل من ذي الحجة والأيام دي طيبة وربنا سبحانه وتعالى أقسم بيها في قوله تعالى " والفجر وليال عشر" دي دعوة بسيطة مني اننا نصومهم ونقرأ فيهم قرأن لأن الأيام دي ربنا بيحبهم وثوابهم كبير

أستودعكم الله الذي لا تضيع ودائعه

دكتور تيييييييييييييييييييييييت

2011-10-18T04:25:00.004+02:00

للأسف كلية الطب بتخرج أي ناس وبرضه بتخرج أطباء محترمين وزي الفل منهم اطباء وطبيبات غاية في الرقي والإنسانية بس للأسف وللأسف جدا السيء هو اللي سايد

امبارح كنت مع ماما عند طبيب أو نقدر نقول معاه الشهادة ومعلقها عالحيطة وأهو الإسم ضاكطور
وبرضه نفس الضاكطور أنا روحت كشفت عنده المفروض ان الضاكطور ده طبيب قلب وباطنة
يوم لما روحت أكشف ماما كانت معايا وأنا قاعدة لمحت كاميرا في الريسبشن بتاعت العيادة لأن سيادة الضاكطور بيشوف مين اللي في العيادة عنده وبيحصل ايه في عيادته قولت كويس بيفهم في التكنولوبيا
وكمان معاه لاب توب وبيسجل فيه الحالات اللي عنده
لما دخلنا بقى خير اللهم أجعله خير دخل معانا مندوب شركة أدوية وطبعا لأن الضاكطور متخيل ان كل الناس أقل ذكاءا منه ف اتكلم مع مندوب المبيعات بالإنجليزي على أساس ان محدش فاهم هههههههههههه ف اتكلم بحرية كبيرة وده علشان ربنا يكشفه قال ايه بقى لمندوب المبيعات
قال له أنه هيجرب الأدوية الجديدة اللي نسبة خطورتها عالية على المرضى الميؤس من حالتهم
وكرر كلامه ده أكتر من مرة علشان يأكد عليه وعلشان يأكدلي اني مش بحلم هو في حد معندوش ضمير للدرجة دي هو في طبيب يحمل شرف المهنة دي وأقسم على حماية أرواح الناس يجرب أدوية مضرة فيهم وأهو يبقى له نسبة ربح كل ما كتب الأدوية دي اكتر كل ما كسب اكتر واكتر
الضاكطور ده ومن غير ذكر أسماء اسمه محمد تقي الدين وكان نفسي يبقى ليه من اسمه نصيب يبقى عنده تقوى ودين وللأسف مشهور في دمياط وناس كتير مخدوعين فيه
المهم أنا لما سمعت حواره مع مندوب الأدوية قولت مستحيل أجيب الدوا اللي كتبهولي والحمد لله اني قررت كده
ونرجع لإمبارح روحنا إعادة كشف لأن الدوا مجابش أي مفعول مع ماما بل وتعبها أكتر
انا على ما لقيت مكان اركن وطلعت لماما العيادة لقيتها في قمة النرفزة والعصبية وضغطها بقى عالي بشكل رهيب
وجه على بالي كل الشتائم اللي في الدنيا نفسي اقولها للمدعو تقي الدين بس انا مؤدبة ومبشتمش
معاد اعادة الكشف اسبوع وفات كام يوم من الأسبوع وست المتخلفة سكرتيرة المدعو تقي الدين
قالت لماما هحجزلك المعاد وعلى فكرة حجز المعاد عنده قبلها بيومين على اساس انه رئيس جمهورية كشريستان
فماما حجزت وكان الخميس والجمعة اجازة وفاتو اليومين وروحنا فعلا واحنا حاجزين فالسكرتيرة – نفسي الأمارة بالسوء نفسي تشتمها بس انا مؤدبة ومش بشتم – قالت لماما ملكيش استشارة ولا اعادة كشف
خلاص اتأخرتي عن وقتك مع ان السكرتيرة اللي اخرت ماما وحجزتلها بعد المعاد بيومين ومقالتش انه مينفعش الاعادة بعد اسبوع فماما قالتلها يعني الحل ايه دلوقتي ؟ادفع كشف قالتلها حتى لو دفعتي كشف مش هتدخلي ولا النهاردة ولا بكرة أمي بقى اتعصبت واتنرفزت جدا وربنا لطف انه محصلهاش مشكلة صحية في الوقت ده من كتر زعلها وانفعالها مع ان في العادي مامتي هادية بس لغاية دلوقتي ضغطهامش عايز ينزل فقولت لماما عادي يعني ضاكطور سمعتي بودنك كلامه انه بيجرب أدوية جديدة في اللي معتبرهم زباين مش أرواح زعلانة ليه؟ وعلى فكرة اول لما دخلت عيادته لقيته حاطط صورته وفيها علامة شركتين أدوية مشهورين وصاحب شركة منهم سبب خراب حاجات كتير حلوة في مصر فمحستش بخير
نفس الموقف بالضبط اتكرر مع انتيمتي في نفس الوقت ولكن بطريقة تانيه عند دكتور تاني
هو الدكاترة في مصر مالهم بالضبط؟ عمالين يطالبوا بحقوقهم أوكي على عيننا وراسنا ووالله بنحترم اللي يستحق الاحترام منهم لكن المفروض تحترموا مرضاكم عالأقل ده الف باء طب

انا كتبت عن الدكتور اللي معتبر الناس فلوس واسمه محمد تقي الدين وقولت شهادتي عن كلامه وعن تصرفاته مع مرضاه اللي عايز يروح له بقى ذنبه على جنبه اللهم بلغت اللهم ف اشهد

كل شيء بقضاء

2011-10-16T02:15:00.008+02:00

من فترة وأنا ماشية في الأعصر في دمياط كنت بدور على كورس تدريب المدربين ورايحة الكلية أخلص أوراق التقديم لدبلومة الترجمة
وفجأه لمحت اعلان موجود على مكتبة مبارك سابقا ومكتبة مصر حاليا الاعلان اللي كان موجود ده مكتوب عليه منحة تدريب المحاضرين
10 مقاعد فقط للإتصال ومكتوب رقم تليفون

ف اتصلت بالرقم ففي بنوتة ردت عليا وقالتلي تفاصيل المنحة المكتوبة في الاعلان اصلا :) وقالتلي أي تفاصيل اسئلي في المكتبة :) فطلعت الدور الثاني في المكتبة وسألت
قالولي مفيش معلومات متوفرة دلوقتي المعلومات مع المستر اللي هيشرح الكورس وهيبقى موجود بكرة
تعالي بكرة ولا اقولك اتصلي بينا بكرة :) اتصلت وقالولي في انترفيو النهاردة تعالي قولتلهم ماشي
رحت مع مامتي وكان في كورس ففضلت مستنية حوالي نص ساعة تزيد او تقل لغاية لما المدرب خرج واتكلمت معاه واستفسرت عن الكورس قاللي علشان تعرفي اكتر روحي ل أية فدخلت القاعة اللي كان فيها التدريب
قولت للبنوتات يا بنات مين فيكم أية؟ :) ف أية جاتلي ف استفسرت عن المنحة فقالتلي طيب املي الأبليكشن دي
وقعدت فعلا جاوبت على أسئلة الأبليكشن وكانت صعبة بجد وبعدين المدرب قاللي الامتحان يوم الخميس الجاي الساعة 5 :) وكده عديت اول مرحلة
يوم الخميس رحت امتحن الإمتحان اتأخر نص ساعة لأن كان في ناس بيكتبوا الابليكشن :) والمستر كان في المكتبة في الدور الخامس أخر دور في كورس تاني عندهم حفلة فطلعت استأذنت منه قبل ما امتحن وقولتله اني هسافر ومش هقدر أكمل المنحة أمتحن ولا لأ قاللي نص علم أحسن من مفيش ده لو نجحتي في الامتحان :) قولتله ان شاء الله هنجح انا مش بتكلم على كده بتكلم على المنحة ممكن مقدرش اكمل فيها قاللي خلاص ممكن تكمليها لما ترجعي ان شاء الله
- أدالي أمل –

نتيجة الامتحان المدرب كتبها عالفيس الأحد بالليل يعني فضلت عايزة اعرف نتيجة الامتحان الخميس والجمعة والسبت والأحد لغاية 9 بالليل ولقيت اسمي وفرحت بس فرحتي انطفت بعدها لما شوفت الاحداث اللي بتحصل في مصر

تالت خطوة الانترفيو يوم الثلاثاء عملت انترفيو انه ايه خطتي بعد التدريب وهعمل ايه بالمنحة ؟ ونجحت في المقابلة وده يوم ماتش الزمالك وانبي اللي مشوفتوش عن تعمد والمدرب قاللي موضوع السفر ده مشكلة عالعموم ها رد عليكي الساعه 9 بالليل وفضلت مستنية هنجح ولا هفشل ولا ايه ؟ وانا بكره الانتظااااار
وبعدين بعت رسالة للمستر بفكره انه يرد عليا فقاللي حظا موفقا مش عارفه ايه واني م الأخر مقبلتش في المنحة
انا طبعا اضايقت يعني 3 خطوات عديت منهم بنجاح وضيعت اسبوع وشوية من اجازتي في مصر علشان المنحة دي وتيجي بقى اخر حاجة ومأخدش المنحة وبعدين سألت طيب ممكن أحضر وأدفع مصاريف المنحة دي؟ مش عايزة العلم يفوتني وعايزة اتعلم فعلا فالمدرب مردش عليا وقتها بقى حسيت انه مبيحترمش طلابه
واتغظت أوي وحلفت اني هعمل التدريب ده مجانا للي عايزين يتعلموا في يوم من الأيام واني هتعلم تعليم بجد في الجامعة الامريكية وربنا يقدرني وأتعلم هناك وأخد العلم من أهله الأصليين الأجانب وزعلت فعلا

النهاردة بقى كنت هروح المنصورة وحسيت اني مش عايزة اروح :) والساعه 3 الا ربع-قبل ما التدريب يبدأ بربع ساعة- لقيت سكرتيرة المدرب
بتكلمني بتقوللي ايناس تعالي يلا
قولتلها اجي فين؟
قالتلي التدريب ؟
قولتلها المنحة؟
قالتلي ايوة
- بتتكلمي بجد؟
- - ايوة يا بنتي
- ليه ايه اللي حصل المستر قاللي اني مش معاكو
- غير رأيه؟
- ليه يعني؟
- معرفش يلا بقى تعالي بسرعة
كانت مفاجعة :)
طبعا نيللي صبحتي كانت معايا خطوة بخطوة من اول ما عملت الأبليكيشن وبترفع من روحي المعنوية وقعدت تدعيلي وتقولي ربنا يوفقك ولو محضرتيش الكورس ده متزعليش ربنا شايلك الأحسن – حبيبتي يا نونو ربنا يخليكي ليا – وربنا يحقق لك اللي بتتمنيه يارب
وكمان حكيت لكيكي وفراشة وربنا يخليهم ليا الصحبة الجميلة دي ويباركلي فيهم

الكورس بقى كل يوم الأسبوع ده بدل يومين في الأسبوع الحمد لله

اتأخرت شوية على ما رحت الكورس لأني عرفت متأخر اني هروح وفاتني التعارف والاسترخاء اللي عملوه في بداية الكورس ودخلت على سؤال محرج للغاية اتكلم على انك طفل عندك 3 سنين :) هههههههههه أد ايه فرحت بالسؤال ده وافتكرت مدونتي روح طفلة مش عايزة تكبر

ربك بكرة يعدلها في أوانها

2011-10-13T02:19:00.002+02:00

دع الحزن ينتقص من روحها ما شاء فلقد هبت عليها عواصف ماضية جعلتها تتعلم أن تذهب بحزنها الى مداه فلا يستطيع إيقافه أحد ولو حاول

ضحايا بلادها المتكررين بطرق مختلفة يذكرها بالعراق ويخيفها كطفلة عاصرت الحرب في بيروت

أحلامها المخنوقة

حب ضائع

حقوق تائهة

تشعر أحيانا أن السعادة والحب ضلا طريقهم إليها وأصبح الحزن يريحها أحيانا بقدر ما يؤلمها ويؤرق منامها

نكبات الوطن وجراحه تذكرها بنكبات وجراح روحها

وبرغم إحاطة الظلام بالحاضر والمستقبل تمشي فيه بثقة وتحمل شمعة نورها ضئيل تتفائل بها وتؤمن إيمانا عميقا بأن ربك بكرة يعدلها في أوانها .

--------------------------------

ع الهامش : شكرا يا نيللي ع الصورة :)

تالت يوم حداد على مصر

2011-10-11T17:58:00.000+02:00

أنا مصرية زملكاوية وأعلن احتجاجي واعتراضي عن عدم تأجيل ماتش الزمالك النهاردة ودي جليطة وقلة ذوق وعدم احترام لمشاعر المصريين والنهاردة تالت يوم حداد على الضحايا اللي ماتوا في أحداث أول امبارح

نفس الأسلوب القذر اللي كان بيتبع قبل كده أيام غرق العبارة ومشاكل الحضري وماتشات الأهلي ومفيش احترام لمشاعر أي حد وأنا كزملكاوية مش هتفرج على الماتش وميهمنيش لو الزمالك فاز في وسط المصايب اللي مالية مصر وقمة الغباء ان بعض الأهلاوية النهاردة بيقولوا رايحين نتفرج ع الماتش علشان نشمت في الزمالك !!!!

من ناحية في عنصرية ففي عنصرية في مصر بين أطراف كتير مش بس الديانات المختلفة وطول عمر المسؤلين مخوفننا من بعض كمسلمين ومسيحيين بس الأحداث الأخيرة ملهاش علاقة بالمسلمين ولا بالإسلام لا من بعيد ولا من قريب ومش هفضل أقول ديني دين السلام ورحمة للعالمين مش بس للمسلمين وحدهم تعبت من كتر ما التهم بتترمى عالإسلام

مستحيل المسيحيين المصريين يضربوا الجيش ولو -افتراض 1%-حصل ف هما اتهد ليهم كنيسة في بلدهم حد فاهم ده يعني ايه؟ يعني دار عبادة اتهدم بدون وجه حق مخالف مش مخالف مش موضوعنا وكان في 100 حل غير هدم المبنى اللي اخواتنا بيصلوا لربنا فيه

اللي حصل بإجماع كل أصدقائي وصديقاتي تدبير الفلول وشوية الحرامية اللي في السجن ولسه معاهم فلوس ونفوذ وعايزين مصر تشيط ويلهونا دلوقتي عن محاكمتهم وعن بناء مصر بس بإذن الله ربنا مش هينولهم اللي في بالهم

أنا حزينة وموجوعة زيي زي باقي المصريين البقاء لله وربنا يعدي الأيام دي على خير

تاني تاني تاني

2011-10-02T02:47:00.005+02:00

"تاني تاني تاني راجعين للكلية تاني للنار والعذاب من تاني من تااااااااااااني " عاااااااااا عااااااااا

柖
من أول لما الحمد لله اتخرجت من كلية الهباب قسم لغة الفرنجة وأنا حلفت اني مش راجعالها تاني كطالبة
ممكن أرجعلها دكتورة في الجامعة بس :)

سنة وكام شهر فاتوا عملت فيهم بحث عن الدبلومات المختلفة في مصر والماستر في الجامعة الأمريكية وبره مصر في جامعات بريطانيا وأمريكا وطبعا اللي وصلتله أن جامعات بريطانيا جامعات عريقة لكن عايزة مصاريف مهولة خصوصا بالنسبة لبنوتة عايزة تعتمد على نفسها

لما رجعت مصر طبعا كان كل الدبلومات في القاهرة واسكندرية التقديم ليها قفل :(
وأخيرا فتحت دبلومة ترجمة تحريرية وفورية وتتبعية في كليتي المبجلة السنة دي ده الى جانب الدراسات العليا الثانية
في الأول كنت فرحانة جدا ان بقى في دبلومة في كليتي وكنت في جمهورية المنوفية وعايزة أرجع جمهورية دمياط بأسرع وقت علشان أقدم فيها لكن النهاردة بقى نزلت أرض الواقع ورجعت الكلية علشان اسأل على الدبلومة ولقيت غيري بنوتات كتير بيسألوا عنها
دكتر أشرف جاوب على كل أسئلتي وأسئلة البنوتات التانيين وعرفت أسم المواد اللي في الدبلومة
مواد مكلكعة :) وغير كده كمان نفس الدكاترة اللي كانوا بيدرسولي في تالتة ورابعة هيدرسوا الدبلومة
حد متخيل دكاترة عندهم 60 سنة فما فوق هيفهموا جيلنا ازاي؟
دكتورين اتنين بس اللي يعتبروا متميزين وكويسين وسنهم قريب من سننا هما الجيل اللي قبلنا برضه بس بيفهموا
أما باقي الدكاترة برغم انهم دكاترة لكن في الضياااااااااع وفي فرق جيلين بيننا وبينهم يعني لو قولتلهم فيس بوك أو تويتر أو ياهو هيفكروا اني بشتمهم

" أه يا ليلي أه يا ليلي ياااا حضن السهارى يا للي شوفت في عنيا الدموع وأنا دايما راجع من الامتحانات وحيد
يااااااااا ليل "

أنا دلوقتي محتارة جدا دول سنتين مش سنة واحدة ومش عايزة أجي في السنتين الاقيني شايلة مادة أو تقديري مقبول وأفضل أعيط وأقول ايه بقى اللي هيواسيني بعدما انهدت امالي
وفي نفس ذات الوقت ربنا سبحانه وتعالى هو اللي عمل الدبلومة في كليتي في التوقيت ده اللي انا بدور فيه على جامعة كويسة أدرس دبلومة فيها

ملحوظة : اللي معاهم دكتوراه مبيتعينوش في الكلية لأن مفيش وظائف أصلا – مستقبل مشرق ومتفائل-

ملحوظة تانيه : شكرا يا مانو لأنك قولتلي على موضوع دبلومة الترجمة ده من سنتين :) بس أنا لسه فاكرة تعليقك

ملحوظة تالتة : الأغنية المصاحبة أغنية موعود لعبد الحليم

مواقف حصلت بجد :)

2011-09-26T18:15:00.002+02:00

مساء الخير

قبل الثورة كنت بجري جدا على الطريق السريع وأنا مسافرة ومع ذلك مكنتش بوصل الا متأخر وبعد الثورة أنا ماشية بطيء في وسط السواقين دولا مجانين ومع ذلك وصلت بدري قبل المعاد المعتاد بساعة :) برغم ان كان ممكن نعمل 55550 حادثة بس ربنا بيسترها واحنا ماشيين ببركة دعاء الوالدين وبستر ربنا مش أكتر

بحب أوي لما تحصل لي مشكلة أضحك بعدها ودي حاجة جديدة حباها فيا :)

هس السلعوة طلعت بجد
أحمد ابن خالتي عنده كلب اسود في اسود وشبه الكلب اللي بيجي في اعلانات فودافون
الأطفال كانوا بيلعبوا معاه وفأجه سمعناهم بيصوتوا وبيصرخوا بهيستيريا قلنا اكيد الكلب عض حد المهم كانوا بيصرخوا لأن الكلب جري عليهم وكان عايز يعضهم :)
طبعا انا قولت مش هتعرض للكلب ده خالص :) لكن الحظ عارف اصحابة كنا في بيت احمد ونازلين انا وخالتي ومامتي وأحمد ماسك الكلب وبيمشي جنبه وبيلعب بالكورة
المهم مامتي وخالتي مشيو من قدام الكلب عادي جدا وأنا بمشي وراهم زيهم بالضبط لقيت الكلب بصلي وجري عليا وبيهوهو كمان قولت بس انا هتعض لا محالة والمفروض بقى الادرينالين يشتغل وأجري مثلا :) ده العادي لكن اللي حصل العكس تماما حسيت اني اتسمرت في مكاني وغمضت عيني وصرخت - زي الأطفال بالضبط- ف أحمد ربنا يسامحه هو وجوز خالتي مسكوا الكلب
المهم اني كنت بكلم كيكي وقتها ويا عيني قلبها وقع في رجليها :) معلش يا كيكتي الصديق وقت الضيق :)
طبعا فضلنا نضحك بعدها عالموقف ده
فريسة أنا ولا ايه؟ :) وقال ايه كان مسمي السلعوة دودو
الكلب ده بقى مسمينه بابسي .

امبارح ركبنا مع سواق تاكسي قولناله الكنيسة لو سمحت فبصلنا واستغرب يعني ازاي محجبات ورايحين الكنيسة؟ فقلناله رايحين لدكتور عيادته هناك فقال لنا وملقاش الا الكنيسة يعني اللي يفتح جنبها وفضل يتكلم برخامة على المسيحيين فأنا قولت بس يبقى متطرف والجدال معاه مش هيفيد واحنا نازلين من التاكسي لقيناه بيقولنا على فكرة أنا مسيحي :))) وكنت عايزة اي دليل على كلامه فلقيت صليب صغير على المراية الصغيرة اللي السواق بيشوف فيها اللي وراه :) قال لنا على فكرة انا بحب الناس تغلط في المسيحيين اللي كان راكب معايا قبلكو كنت بقوله المسيحيين يا عم مش هيدخلو الجنة وعالم مش عارف ايه وهو نازل قولتله انا مسيحي فزود لي الأجرة الضعف :)) وبعدين كلنا مصريين وكان ناقص يقول الجيش والشعب ايد واحدة
والهلال مع الصليب قشطة ومربة وحليب :)

الزمالك اليومين دول نصفنا :) ماتشين ورا بعض بيفوز فيهم :) عقبال الباقي قادر يا كريم
رحنا عند دكتور زملكاوي وكان لسه الماتش مخلصش قال لنا استنو بقى لما الماتش يخلص وقعدنا انا والدكتور زملكاويين فبنشجع الزمالك :) وفعلا الماتش خلص بفوزنا
المشكلة بقى ان الدكتور طلع بصري وأصعب شخصية لطبيب انه يكون بصري لأن البصريين مبيحبوش التفاصيل ومش عايز اللي قدامه يتكلم فكل ما أقول حاجة يقولي ألف سلامة :) لغاية لما طلعنا من العيادة وكل ما اتكلم مع حد أقوله ألف سلامة الف سلامة :)
وجبت الأدوية اللي كتبهالي واذ فجأتن الاقي الأعراض الجانبية ممكن تعمل لي مشاكل كتير ف اتصلت بيه وقال لي متقرأيش الاعراض الجانبيه وخدي الدوا لو سمحتي قولتله انا لازم اعرف هاخد ايه قبل ما اخده -وبدأت انفعل- قاللي مفيش دوا في الدنيا الا وليه أعراض جانبيه حتى الفيتامين لو اخدتيه كتير والاعراض الجانبية دي لو استخدمتي الدوا فترة طويلة وفي أخر كلامه قاللي ألف سلامة فمقدرتش مضحكش بصراحة :)

اكتر حاجة بحبها في مصر قعدتنا مع بعض للفجر نتكلم ونضحك -وناكل مانجا- :)
امبارح كنا بنتفرج على برنامج كلام من القلب والحالات اللي بتتصل كلها بيقولوا ركبتهم بتخونهم ومبيقدروش يقفوا عليها
وفجأة بنت خالتي قامت قايلة ايه الركب الخاينة الغدارة بنت التيت دي هي قالت كده وانا وهي وبنت خالتي التانيه صحينا البيت كله من ضحكنا وبعدين جبنا المانجا وقعدنا نتكلم مع بعض ونضحك لغاية الفجر

أخر يوم رحت فيه كورس دكتور ابراهيم الفقي روفي بنت عمي كانت معايا في الطريق للكورس عندها سنة وكام شهر حضنتني ومسكت فيا مكنتش اعرف ان حضن الأطفال حلو أوي كده للدرجة دي بيدي حنية وحب

من يوم ما رجعت مصر وفي حاجات كتير حلوة بتحصل لي - ده بغض النظر عني صحيا - نفسي أفضل في مصر على طول لكن كل شيء بأوان وكل شيء مكتوب

كل شيء بأوان

2011-09-23T01:01:00.007+02:00

صورة دكتر ابراهيم في قاعة اوركيدا النيل في دمياط 22-9-2011

هذا الرجل أحبه :)

9 سنين فاتوا من قبل ما حد يسمع في مصر عن التنمية البشرية وأنا بكل اهتمام بتابع دكتور ابراهيم الفقي بقرأ كتبه وبشوف محاضراته في التلفزيون وفي السنين الأخيرة كنت كمان بشوف البرامج اللي بيعملها وفيديوهاته عاليوتيوب وبنصح كل الناس اللي أعرفهم انهم يروحوا يحضروا الدورات التدريبية اللي بيعملها وأنا نفسي بسبب الغربة وأشياء أخرى مكنتش بعرف أحضر

زي ما قولت قبل كده اني دعيت ربنا سبحانه وتعالى دعوتين والحمد لله ربنا استجاب الاتنين :) أه لو كنت أعرف ان الدعاء مستجاب في الوقت ده كنت دعيت كتييييييير

اول لما نزلت دمياط لقيت اعلان كورس دكتور ابراهيم الفقي مساعد ممارس في البرمجة اللغوية العصبية وبالرغم اني عارفه حاجات كتير وأخدت كورس قبل كده عن البرمجة اللغوية العصبية NLP الا اني كان لازم أروح ده دكتور ابراهيم أخيرا حلمي هيتحقق وأقابله

فضلت كام يوم مش عارفه أي حاجة عن الكورس ولا مواعيده شوفت بس الاعلان ومش معايا الكتكوتة علشان أروح لمكان ما شوفت الاعلان وأشوف هو فين ولا امتى؟

المهم عرفت ان المواعيد وكل حاجة في المركز الأوروبي طلعوا عييييييييينيييي علشان احجز تذكرة وقالولي في الاول مفيش تذاكر ورحتلهم 4 مرات علشان أحجز مع ان المفروض مرة واحدة بس وأحجز وخلاص بس كنت بقول العلم لا يكيل بالبتنجان لازم أتعب شوية وبعدين ده دكتور ابراهيم وهشوفه أخيرا وجالي برد شديد لسه مراحش لغاية دلوقتي وكان أصعب يوم هو أول يوم كورس ومع اني مبحبش أخرج من البيت وأكون مع الناس وأنا عندي برد بس رحت :) وحضرت أول يوم وكل الأيام لدرجة أن داليا قالتلي يا بنتي نفسي أشوفك من غير البرد ده :)

المهم أول يوم كان في مدرب وحش جدا ومش هحضرله تاني ابدا لأنه لاغي شخصيته ومطورش نفسه من أيام الثلاثينات ولا حاجة كان بيجيب أمثلة لناس لاعيبة كرة وممثلين من زمان أوي أغلب جيلنا مش عارف مين دول أصلا كان نفسي أقوله انت بتخاطب مين؟

تاني يوم المدرب أحمد قدوس اللي عجبني فيه أنه مبيحاولش يتقمص غيره ودمه خفيف وبيوصل المعلومة بطريقة تتفهم ومتتكلكعش

وهو بنفسه قال ان الانسان الناجح هو اللي بيشوف مدارس كتير وبياخد من كل مدرسه اللي يتناسب مع شخصيته ووقعلي على كتابه :)

دكتور ابراهيم بقى اليوم المشهود للأسف اتأخر ساعتين عن معاد التدريب المفروض كنا نبدأ الساعة 1 بدأ هو الساعة 3 والنور كان قاطع قبل ما يجي والقاعة كانت حر جدااااااا وأول لما دخل القاعة وبيقولنا انتو دايما تتأخروا؟ النور قطع فنزل تاني من على المسرح وبعدين طلع تاني بعد لما النور جه وكان مرهق جدا لدرجة كبيرة ولأني مجربة طريق القاهرة دمياط ده كتير فكنت حاسة بيه المشوار فعلا متعب حتى لو في عربية مكيفة بس الطريق وحش جدااااا

اول يوم كنت طول الوقت عايزة أمسك دكتور ابراهيم مش مصدقة انه فعلا حقيقة :) أخيرا مش من كتاب ولا من ورى شاشة تلفزيون ولا من ورى شاشة لاب حقيقي أخيرا

ودخلت وقعت كتابه وكان نفسي جدا أسلم عليه كان نفسي جدااااااااا جدااااا أسلم عليه لكن للأسف منعني حاجتين انه كان مرهق جدا ملامحه ونظرة عينيه كان باين عليها الارهاق وممكن كان يسلم عليا بفتور وساعتها كنت هتعب نفسيا جدا لو ده حصل وكمان الأوضة اللي كان بيوقع فيها الكتاب كان فيها مدير اعماله وحد من عيلته وحد من الشرطة بس شكل رتبته كبيرة ومدير المركز الكندي :) ف اتحرجت أكيد وأكتفيت اني أبص لملامحه بس واتأكد انه حقيقة :) لأنه مش أي حد أنا بعتبره الأب الروحي ليا - وده سر ميطلعش من بيناتنا- :)

النهاردة بقى اليوم فات زي الحلم فات بسرعة أوي ودكتر ابراهيم كان مرتاح أكتر من امبارح ومع ذلك باله كان مشغول أو عالأقل ده اللي حسيته وحاولت أجيب كارت شيك كده أكتب لدكتر ابراهيم كلمة رقيقة لفيت دمياط كلها في وقت الاستراحة في الكورس ملقتش :) وبعدما ما سافر لقيت :( فكتبت اللي عايزة اقوله في ورقة عادية وطبعا الشوباب ونفسي أقول عليهم الشباشب بس بلاش كانوا محاوطين دكتر ابراهيم بطريقة متخليش ولا بنوتة زي حالاتي تعرف تقرب منه وتسلم عليه وتديله الكلمة اللي كتبتها علشانه يمكن تخفف عنه ان في ناس مش فاهمينه وحاولوا يقتلوه يمكن وفعلا رحت لعند عربيته وملحقتش أكلمه برضه لنفس السبب خالد الذكر :) مدير أعماله وولد كان بيكلمه مقفلين على باب عربيته وأنا مش من النوع اللي ممكن أتقبل أن مدير الأعمال يشدني زي الأولاد مثلا فقولت لمدير أعماله ممكن أفتح الباب وأدي الكلمة دي لدكتور ابراهيم؟ قاللي لأ خلاص هو قفل الباب قولتله طيب عالأقل من الشباك قاللي طيب هاتيها لي وأنا والله العظيم هديهالو قولتلو أكيد؟ ف رد ولد جنبي قالك والله العظيم فمدير الأعمال بصلي بصة حد عايز يخنق حد :) فقولتله أكيد؟ قاللي والله العظيم هديهالو - كده مرتين - :) فجت داليا صاحبتي وقالتلي خلاص بقى يا إيناس الراجل حلف قولتلها خلاص يا داليا أدتهالو هو لو مودهاش لدكتور ابراهيم ربنا هيعاقبه ده حلف مرتين :) والتأكيد ده لأني شخصية حسية بحب أحس بالأمان وبعدين أسهل حاجة على مديرين الأعمال انهم ميوصلوش أي حاجة لأي حد وبعدين نفس الولد الرخم اللي جنبي قال لمدير اعمال الدكتور طيب انا عايز رقم تليفونك قالوا طيب خده وانا كمان كنت هاخده مع اني مكنتش هكلمه لأنه غلس بس مش عارفه طلعت الموبايل ومدير الأعمال قال 010266 ومكملش وطار عالعربية والعربية طارت وقدامها عربية بوليس متخفية والعربيتين أسود ف أسود :) ومشينا انا وداليا نضحك مش قادرين نمسك نفسنا من الضحك وفضلت أقولها 010266

وعدت الأيام بسرعة زي كل حاجة حلوة بتفوت بس مش دي النهاية ان شاء الله

ربنا يبارك في عمره بس أنا خفت لما افتكرت حديث الرسول صلى الله عليه وسلم :(أعمار أمتي ما بين الستين والسبعين ، وأقلهم من يجوز ذلك ) وهو عنده 61 سنة ربنا يبارك في عمره

وعالعموم انا فعلا الحمد لله سعيدة بالكورس ده ومش هسافر ان شاء الله الا وأنا معايا أكبر عدد من الكورسات والعلم ان شاء الله

الحمد لله كما ينبغي لجلال وجهك وعظيم سلطانك والحمد لله الذي تتم بفضله الصالحات

شكرا يا رب

فاصل ونواصل

2011-09-16T23:14:00.010+02:00

أخيرا وبعد عناء عرفت اعمل أب لود لصورة من صور رحلتي من مسقط لمصر -الصورة اللي فوق دي- وده طبعا بعدما صغرتها علشان بلوجر يتكرم ويتعطف عليا ويعملها أب لود

النت عندي بطيء وانا عندي برد للمرة التانيه على التوازي في أقل من شهر :) وكله من روفي بنت عمي اللي كانت عمالة تعطس على طول وانا بلعب معاها وبجري وراها بالمناديل وكمان من تغيير الجو وبكده المناعة اللي عندي مش شايفة شغلها كويس وأي برد او انفلونزا ماشيين بيتفسحوا بتنادي عليهم زي ما تكون رادار وبيلقط الانفلونزا والبرد

المشروب اللي فوق ده تشوكلت كريم من ستاربكس كنت في مطار البحرين ترانزيت وكان قدامي ستاربكس وطيارتنا اتأخرت ساعة فوق الساعتين الترانزيت فطلبت التشوكلت كريم ومع اني جربته قبل كده في عمان لكن في البحرين طلع احلى بكتييييير نفس الطعم بس التلج كان مجروش كويس - حلوة اللغة العربية الفصحى دي -

ولأن المشروب ده رائع وفوق الفظيع وبيحسن المود ومفيش ستاربكس في دمياط وانا مفتقداه وكمان ستاربكس مصر مبيعرفوش يعملوه كويس فأنا بهدي لأي حد هيشوف البوست ده كوباية التشوكلت كريم اللي فوق دي وللي بيحبوا القهوة بهديهم موكا فرابتشينو وربنا يسهل وأخف واكتب تاني بعيدا عن التهييس

------------------

ملحوظة مسحت البوست اللي فات واحتفظت بالتعليقات وبشكركم من كل قلبي على تعليقاتكم اللي حاليا مش هقدر ارد عليها

جامعة المنصورة فرع دمياط كمان وكمان

2011-09-04T11:02:00.012+02:00

بدأت رحلة السفر النهاردة وحاليا مفيش حواليا غير صحرا عاليمين وصحراعالشمال ودرجة حرارة 39 درجة

الصحراء ليها قدرة غريبة على انها تفكرنا بمواجعنا وخيبات الأمل خصوصا لو كانت حديثة وليها القدرة كمان انها تفرحنا

وده في حالة لو كنا فرحانين

علي محمدين الزقزوق عنده 17 سنة لسه شاب وبيبدأ حياته بخطوات ثابته

هو كل امل اهله متدين وحافظ القرآن ومتميز في دراسته وكل الناس بتشهد بحسن أخلاقه

اتخرج من الثانوية العامة وأهله فرحوا بيه لما دخل كلية التربية علشان هيبقى مدرس أد الدنيا ومش كده وبس ده أملهم فيه انه يبقى معيد في الكلية ودكتور كمان

أصله طول عمره متميز وعمره ما زعل حد منه وأول لما سمع عن تغيير فساد الجامعات كان اول واحد يشارك فيه علشان يغير الفساد ويدافع عن زملائه اللي الفساد قتل طموحهم وأحلامهم البسيطة

وهو لسه بيبدأ مشواره الجامعي في سنة اولى كلية التربية قسم لغة عربية جامعة المنصورة فرع دمياط اتفاجئ وزمايله اتفاجئوا اكتر منه انه رسب في مادة وازاي وهو اللي كان بيراجع لهم وفاهم الكتاب وبيشرحه عن ظهر قلب؟

ف راح للدكتور في الجامعة يستفسر انا حليت ايه غلط فال...... بكل برود قال له : خلي المظاهرات تنفعك!!!

علي مستسلمش وذاكر اكتر ودخل الدور التاني في المادة دي وكان بيشجع كل زملائه وبيحمسهم

ومرت الأيام وجه الترم التاني واتفاجئ علي ان عنده 6 مواد رسوب وباقي المواد امتياز وجيد جدا !!!!!!

طبعا ده بسبب انه ضد العميد وأكلي احلام الطلاب اللي بيطلق عليهم للأسف دكاترة

تدهورت حالته الصحية لغاية لما توفي اول يوم العيد البقاء لله والموت علينا حق

لكن انا كلامي هنا هو احنا لحد امتى هنفضل نشوف نموذج خالد سعيد بيتكرر حتى بعد الثورة؟

هي جامعة المنصورة دي واخدة سند رسمي انها تقتل فينا براحتها ولا ايه؟ ده حتى الدكاترة الشرفاء فيها بيتأذوا !!! انا مش فاهمه بجد في ايه الناس دي جزارين ولا دكاترة ومين اللي ادالهم دكتوراه اصلا يغور العلم من غير أخلاق

كان ممكن انا أو أي حد نبقى في مكان علي محمدين الزقزوق اللي ممكن متشوفش اسمه في الجرايد

ولا في الاعلام لأنه شاب دمياطي ملوش ظهر مش ابن حد معروف وحالته بتتكرر كتير

المصيبة اني فكرت كتير مفيش حاجة تثبت ان الأشخاص دول مش هقول الدكاترة لأنهم ميستحقوش اللقب

هما السبب في وفاته !! الحل اللي انا شايفاه ان أوراق علي في الست مواد تتصحح ويتقارن خطه بباقي

المواد اللي حل فيها قبل كده ولو طلع فعلا حل عالأقل حل ينجحه مش امتياز زي مستواه

الدكاترة دول يتسحب منهم لقب الدكتوراه ويتأهلوا نفسيا وتربويا علشان يعرفوا ان الطلاب اللي قدامهم ولاد ناس ودمهم مش رخيص

هو احنا خلصنا من الضرب في المدارس والعاهات علشان يطلعلنا ناس بتموت الطلاب في الجامعات؟

وبعدين ازاي كلية التربية والأداب بيحصل فيهم كده الكليات اللي بيسموها بره كليات العلوم الإنسانية

انساااااااااااااااااانية

دي مش أول مرة أشوف حد بيتظلم في كليات جامعة المنصورة فرع دمياط وجامعة المنصورة نفسها

وانا نفسي اتعرضت للظلم اكتر من مرة في الجامعة دي وبعدين هيفضل الحال كده لغاية امتى؟

علي محمدين الزقزوق ممكن كان يبقى أي حد فينا والمصيبة ان دي مش حالة منفردة

انا مقدرتش اسكت وكان لازم احكي حكاية شاب مات مقهور وأهله ملحقوش يفرحوا بنجاحه وكل ده لأنه في جامعة مصرية

البقاء لله

والأيام بتجري ...

2011-08-29T13:20:00.003+02:00

كل سنة بقول مش هكتب عن العيد وخصوصا السنة دي لأن عندي 100 حاجة أعملها قبل العيد ومش فاضية اكتب والأجواء العالمية متشجعش ع الاحتفال بس برضه حبيت أعيد عليكم وعلى نفسي

يمكن لسه مش حاسة بفرحة العيد بس أول يوم العيد بيبقى حاجة تانيه وكأن ربنا سبحانه وتعالى بيخلط الفرحة مع الهوا اللي بنتنفسه أول يوم عيد مع تكبيرات العيد

للأسف معملتش طقوسي بتاعت كل سنة قبل العيد غير اني جبت لبس العيد :) على اعتبار ان في نص رمضان محل الملابس كان هيبقى فاضي بس طلع العكس وبرضه كان في زحمة :)

لسه قدامي رحلة طويلة ومش عارفه هقدر ارجع للمدونة امتى وعلشان كده حبيت أخر حاجة اكتبها تكون

عن العيد

عايزة اعيد على كل الناس في الدنيا وأقولهم أرجوكم افرحوا في زمن الفرحة فيه عزيزة جدا

عيد سعيد عليا وعلى مامتي وبابايا

وعلى صحباتي

وعلى متابعين المدونة اللي عددهم وصل ل104 :) لغاية دلوقتي

بعيد عليهم نفر نفر بالرغم ان في كتير منهم معلقوش قبل كده بس انا سعيدة بمتابعتكم للمدونة بجد وعيد سعيد عليكم

عيد سعيد على مصر اللي بحبها والمصريين اللي بجد

ملحوظة اللي عايز يبتسم من قلبه يشوف البوست ده

http://nightpiper.blogspot.com/2011/08/blog-post_27.html

وحشاني يا متعبة في الحرب او في السلم يا بعيدة وقريبة

2011-08-20T13:11:00.006+02:00

قبل ما أرد على تعليقات البوست اللي فات واللي قبله وقبل ما أكمل الجزء التاني من اقتباسات الرواية وقبل ما أنسى

النهاردة عملت بطاقة جديدة
باللغة العربية الفصحى بطاقة هوية لفت نظري حاجات كتير وكنت مش مرتاحة وأنا داخله مركز شرطة وكنت بتحامى في بابا وشوية شوية همسك في هدومه من كتر الزحمة
المهم دخلت أعمل بطاقة بابا جاب لي الأوراق المطلوبة للبطاقة وجواز السفر والفيزا - الفيزا بتاعت البنك مش بتاعت السفر- وبالرغم من الزحمة الا انه كان فيه نظام وكان في أول لما دخلت أربع ضباط ولما لقوا المكتب زحمة خرج منهم 2و2 بس اللي فضلوا يخلصوا اجرائات البطاقات
وعجبني جدا انهم طبقوا مبدأ
Ladies first
يعني خلصوا بطاقات كل البنوتات والنساء عموما اللي كانوا موجودين الأول
وتعامل الضباط معانا كان قمة في التحضر والنبل والذوق طبعا أنا بفتكر كل اللي بسمعه عن الأقسام وضباط الشرطة في مصر ولا على ايه ما انا مجربة تعامل شرطة المرور الله لا يسامحهم ومش ناسية الرائد اللي كان بيوقف البنات بحجة انهم مش رابطين الحزام علشان يرخم عليهم ويفرد عضلاته ويستهبل شوية بس حظه ان انا والبنوتة اللي كانت واقفة معايا مدينالوش فرصة يعاكس
المهم طبعا الإجرائات مأخدتش ربع ساعة مع ان المكان زحمــــــــــــــة جدااااااااااا
والاجرائات غاية في السهولة والسرعة البصمات بتتاخد بجهاز البصمات مش زي ما بشوف في الأفلام في الفيش والتشبيه حبر وحاجات غريبة
وكمااااااااان فلوس البطاقة بتتاخد بالفيزا في ثواني بدل ما تتأخر على الخزنة ويقولولك الخزنة قفلت فوت علينا بكرة يا سيد
المهم اتصورت وطلعت بابا كان منتظرني بره المكتب لأن الرجالة بيقفوا والستات بيقعدوا طبعا مش قوارير ليهم معاملة خاصة :)

سيبكوا من كل اللي فات وعايزاكو تركزوا على الحوار اللي جاي ده اللي دار وأنا بقدم الورق للضابط
الضابط الأولاني قاعد عالمكتب وبيقول للضابط التاني : تصدق يا أخي أنا من الصباح وانا جالس أخلص شغلي عالمكتب حتى ما رحت الحمام
الضابط التاني واقف جنب المكتب : الحمد لله احنا في رمضان اذا كنا في الأيام العادية كنا ما بنفطر للحين
الكلام ده كان الساعة الثانية عشر
ضااااااااااااابط اد الدنيا ومش عارف يقوم من عالمكتب ويروح الحمام حتى علشان ميعطلش الناس !!!!!!! حد مصدق الكلام ده انا عن نفسي لو مكنتش شوفت الضابط وانه فعلا مشغول جدا وسمعت كلامه مع الضابط التاني مكنتش صدقت الحمد لله انهم مشافوش ضباط مصر !!!
حاجة من الاتنين يا إما الضابط ده ضميره صاحي جدا مبيضيعش دقيقة من وقته يا إما سستم العمل بتاعه حازم جدا في تضييع الوقت
يا إما الاتنين معا ضميره صاحي والسستم حازم

نرجع لكلامنا تاني روحت مع بابا لمكتب تاني وبابا قاللي يلا نجيب البطاقة قولت بس .. نص ساعة بقى على ما البطاقة تطلع زي اول بطاقة عملتها هنا مفيش ثواني ولقيت الضابط بينده اسمي اخدوا البصمات مرة تانيه اوتوماتيك برضه وسلمني البطاقة وأنا مذهولة
البطاقة مأخدتش 5 دقائق نقول عشرة لو حبيت أبالغ وأقول اتأخرت

ودي ايه؟ دي دولة عربية حد يقولي ايه تاني دولة عربيــــــــــــة
حضارتها 3000 سنة يعني أقل من حضارتنا حضارة ال7000 سنة واخدين بالكو

في مصر بقى :

علشان أطلع بطاقة أخدت شهرين رايحة جايه القاهرة ورحنا مجمع التحرير واللي عايز يدعي على حد يقوله الهي تخلص ورقك في مجمع التحرير يا بعيد نفس نظام فيلم الارهاب والكباب بالضبط بدون أي مبالغة !!!

ورخصة القيادة أخدتها بعد 3 أيام ده غير الامتحان اللي اخد مننا يوم كامل !!

والبطاقة العادية في مصر بتاخد اسبوعين ده غير الطوابير والزحمة والخزنة اللي بتقفل والدمغة

نفسي نبقى زي البلاد العربية عالأقل ايه اللي حصل لمصر؟ طبعا لازم افرح ان في بلد عربيه بتستخدم التكنولوجيا كده وأزعل علشان بلدي
وأزعل علشان ناسها اللي ناس كتير صعبوا الحياة عليهم وخلوا وقتهم ملوش أي ثمن

ربنا قادر يا مصر أشوفك أحسن بلد في الدنيا

الرواية التي أرهقتني

2011-08-18T21:11:00.003+02:00

أحببت قرائتها أكثر مما ينبغي
أثرت أن أبتعد عن كل ما يزعج في الواقع والهروب الى عالم الخيال قليلا فوجدت عالم الخيال موجع كالواقع تماما -ببساطة لأن الرواية واقعية :)- لفت نظري عنوان الرواية أحببتك أكثر مما ينبغي ل أثير عبد الله وهي كاتبة سعودية
فقلت لنفسي كثيرة هي الأشياء التي نحبها أكثر مما ينبغي فتفتك بنا أحيانا
كنت قد أقتنيت الرواية من الانترنت منذ شهرين وعدة أشياء دفعتني لقرائتها الأن منها قصة حب ليز وعلي مشرفة وأشباح قديمة عادت من الجحيم
عدد صفحات الرواية 326 صفحة وسنة النشر 2009
زمن قرائتي لها يومين في كل يوم من الصباح الباكر حتى الظهيرة
اخر عشر صفحات ملهومش أي لازمة :( والنهاية مفتوحة
حينما بدأت في الرواية تذكرت أغنية أصالة : متسألنيش عن الاحزان وتوالت الأغاني الى أن وجدت أغنيتي المفضلة بين صفحات الكتاب Sorry Seems To Be The Hardest Word
أعجبني في الرواية ايضا اختلاط اللغة العربية الفصحى بجمالها بالعامية وبساطتها -بالرغم من عدم فهمي لبعض الكلمات العامية -بوجود الانجليزية التي أحبها كما أعجبني أيضا مصداقية الرواية فمثلا ذكر في الرواية موقع http://www.futureme.org/
ووجدته حقيقيا وكل الأغاني والأماكن التي ذكرتها الكاتبة حقيقية وأعجبني أيضا الاقتباسات الكثيرة لإثراء الرواية وأعجبت بإسم البطل "عزيز" وهو اسم وفعل والكاتبة أضفت الكثير من أجواء الحب التي ملأت الرواية بتكرار كلمة عزيز بين السطور
الأحداث موجعه وأكره أن أشعر ب" جمانة" البطلة الى هذا الحد كعادتي في معايشة الروايات التي اقرأها وكأنني شهدت احداثها مع أبطالها وهذا ما يرهقني ويتعبني في كل رواية اقرأها وتأخذ من روحي
ف الى أن تختفي اعراض ارهاقي من الرواية اليكم اقتباسات منها
" أتدري يا عزيز .. ما زلت لا أدرك ، لا أدرك كيف يتلاعب رجل بامرأة تحبه من دون أن يخاف للحظة مما يفعله نحوها ! كيف تلاعبت بي على الرغم من كل ما حملته في نفسي نحوك ! لم تكن رجلا أحببته يا عزيز
كنت لي الدنيا بمن فيها ، فكيف سمحت لنفسك أن تتلاعب وتقوم بما قمت به بهذه الصورة؟! "

" تسخر كثيرا من منطق الجزاء والحساب ، العقاب والثواب ! .. تفعل كل شيء ولا تأبه لما سيجري يوماً
ولا تفكر بما ستلقى من حساب .. تظن بأنك ستنفذ من كل شيء .. مؤمنة أنا بيوم الحساب أكثر من أي شيء ،
ويريحني هذا الإيمان كثيراً ، فلتقل بأنه ما يخفف عني وما أنتظره .."

" أتظن بأنني قاسية لأنني أنتظر وآمل وأرجو أن تعاقب على ما اقترفته بحقي..؟ أترى في طلبي لإنصاف الله لي حقدا لا مبرر له؟"

" لم أقصر يوما معك ولم أكن لأتوانى عن بذل كل ما أستطيع لتصبح رجلا أفضل .. كنت على استعداد لأن أصغر فتكبر .. لأن أفشل لتنجح ، لأن أخبو لتلمع "

" أشفق عليك لأنك أخطأت وعصيت لدرجة أن المغفرة ستأبى أن تحل عليك ! . وأشفق عليك لأنك ستحمل ذنبي في حياتك وبين يدي الرب .. أشفق عليك يا عزيز لكنني مع ذلك لن أغفر لك ! ..

" كنت ابحث في ملامحك عن شخص أكرهه لكنني لم أجد سوى رجل أحبه وأكره حبي له .. أكرهه كثيرا ..!.."

" أتدري يا عزيز .. دائما ما كنت مؤمنة بأن لا خير في رجل يكره وطنه .. فلماذا آمنت بخيرك ..؟! .. لماذا تجاهلت كل ما كنت أؤمن به ليلتها ..؟! لماذا يا عزيز؟!

" كانت عيناك ونحن نغادر المطار معلقتين بي على الرغم من أن حشدا من أصدقائك يحيط بك .. لم تغادر صالة المطار حتى غادرتها أنا مع عائلتي .. يومها شعرت بالكثير من الدفء يا عزيز وغرقت في غيبوبة عشق لم أستيقظ منها أبدا ..
" لطالما كنت ربيعي وكذبة عمري التي صدقتها طويلا وأحببت العيش فيها .. لطالما كان الكذب بنظري شديد السواد ، لكنك كنت تزهي كذبك بألوان لم أعرفها مع سواك .. "

" أأخبرتك مسبقا بأن أكاذيبك ساذجة؟! أتدرك كم هي مضحكة أعذارك؟ .. أترى في امرأة غبية تنطلي عليها أكاذيب رجل ينبض فؤاده في صدرها ويحتضر قلبها بين أضلعه التي ضاقت على فؤاد يخفق له وحده..؟! لست بغبية يا عزيز "

" ليتك ترحل ! أصدقك القول بأنني أود أن ترحل .. كم أرجو موتك يا عزيز ..! أتظنه كرها مني؟ أم ترى في أمنيتي حقدا وقسوة؟ ...... أرتاح وترتاح .. أبكي عليك خيرا من أن أبكي منك "

" أتدري يا حبيبي ، منطقيا حينما تتعرض امرأة للخيانة تكره حبيبها وقد تكره كل الرجال أيضا .. "

" أنت طفلة ..! تبدين كطفلة !
لست كذلك
بالنسبة لعمري .. لست إلا طفلة

" ارتفع صوت استقبال رسالة هاتفية .. شعرت وكأن الحياة قد دبت في الأرجاء ، فتحتها وقلبي يكاد أن يقفز من بين أضلعي .. كانت والدتي المرسلة يا عزيز ..! بعثت لي : جمانة لا تنسي الصلاة حبيبتي .. أحبك "

يتبع المزيد من الاقتباسات المذهلة

اخيرا عشت لليوم ده

2011-08-14T18:56:00.002+02:00

من سنة تقريبا واحنا ساكنين هنا الأوضة بتاعتي فيها بلكونة والبلكونة بتطل على مسجد قدام البلكونة على طول

فرحت في الأول ان هيبقى جنبنا مسجد وفرحت كمان علشان كنت بصحى على صوت الأذان كل يوم الفجر

وفجأه الفرحة دي خفت تدريجيا لأني لقيت أصوات المؤذنيين أصوات مش حلوة وأحيانا اللي بيأذن مبيبقاش عربي

فالكلام اللي بيقوله بيبقى غريب عن الأذان يعني مثلا بيقول : الله أجبر الله أجبر وهي الله أكبر الله أكبر ! فطبعا الكلام كده بيتغير ومرة تانيه مؤذن تاني بيأذن برضه عربي لكن صوته عادي من النوع اللي يخليك تسمع الأذان وتسرح في باقي الأذان ومتاخدش في بالك

أما النهاردة وأخيرا في أذان صلاة العشاء كنت في أوضتي وفجأه الأذان أذن بصوت ملائكي عذب يخلب الألباب فعلا خلاني فضلت قاعدة بسمع الأذان كله لغاية أخر كلمة ومش عايزاه يخلص حاسة ان هو ده الأذان اللي بجد

الأذان اللي ربنا سبحانه وتعالى بينادي بيه علينا بيقولنا تعالوا حي على الفلاح

الأذان شدني فعلا اني اطلع للبلكونة وشوفت العصافير وهي بتطير جنب المسجد كان نفسي أشوف اللي بيأذن ده وأقوله ربنا يكرمك ويرفع قدرك ويرزقك بالجنة من زمااااااااااااااااااان مسمعتش الأذان بالحلاوة دي من أيام المسجد النبوي من زمان محستش بالروحانية دي في الأذان اللي كل يوم بنسمعه 5 مرات

علشان كده الرسول صلى الله عليه وسلم اختار بلال ابن رباح علشان يبقى مؤذن لأن صوته حلو لأن فعلا الصوت بيفرق

لما تسمع صوت حلو يحببك في كلام ربنا ولما تسمع صوت يكرهك في اليوم كله

بالمناسبة مصر طول عمرها مهد الأصوات الحلوة وعندنا أعظم وأحسن مقرئين للقرآن في العالم ليه ده مبيظهرش دلوقتي ؟ ليه ثقافتنا بقت مستوردة من بلاد تانيه وليه مبنهتمش بتراثنا وثقافتنا

بالمناسبة كمان كان زمان المؤذن أو قارئ القرآن أو المبتهل –المنشد- كانوا بيتعلموا المقامات الموسيقية

- طبعا لو قلت لحد كده دلوقتي هيقولك اعوذ بالله الموسيقى حرام يا اخي- لكن فعلا ده اللي كان بيحصل

علشان المؤذن أو قارئ القرآن يعرف امتى يطلع بصوته للسما مثلا لما يكون في أيات نعيم وامتى ينزل بصوته لسابع أرض لما يكون في أيات بتتكلم عن العذاب وده مثل من أمثلة كتير

ملحوظة : والله لسه بدري يا شهر الصيام -14 رمضان-

ثمانية وثمانية وكمان ثمانية :)

2011-08-08T18:56:00.006+02:00

مساء الفل على حسب التوقيت المحلي للمدونة السنة دي احداثها كتيرة اوي والوقت فيها بيفوت هوا والوقت في رمضان بيفوت أسرع من أي وقت النهاردة 8/8 بحب الأيام اللي زي النهاردة اليوم والشهر شبه بعض ومش بس كده ده كمان الشهر الهجري النهاردة 8 رمضان :)

لسه لغاية دلوقتي مش مصدقة اننا دخلنا في شهر 8 ولسه كام شهر و2012 تيجي

الجو حاليا ومن اول شهر 7 معتدل وبيمطر على خفيف مطر بيسموه هنا رذاذ والجو ده بيساعد ان أي حد يجيله برد :) ماما بدأت الأول وانا بعدها بساعات واحنا الاتنين حاليا عندنا برد مش عايز يروح اللي انا مستغرباه ازاي ميج رايان في فيلم you've got mail وهي عندها برد كانت زي القمر كده ومتغيرتيش كتير يعني مثلا عينيها مبقتش عاملة زي البلونة ومكنتش شبه الكائنات الخيالية :) الصورة اللي فوق دي اخدتها النهاردة قبل أذان المغرب بدقائق بالكاميرا من البلكونة بتاعتنا :)

والصورة دي اخدتها في يوم تاني قبل كده لكن هو ده شكل الشارع من أول يوم رمضان الشارع على طول بيلمع ومتغطي بطبقة رقيقة من المية المختلطة بالطين والجو ضباب ورذاذ زي الندى في ساعات الصباح الباكر :)

*الصيام بيحسسنا بالناس اللي مش لاقيين قوت يومهم وبيعانوا من الفقر والجوع وبيخلينا شبه الملائكة وعبادة ثوابها كبير لكن لما تصوم وانت مريض فبتحس أكتر بالمرضى اللي مش لاقيين دوا ولا عناية طبية عالأقل احنا عارفين امتى هنفطر وناكل ونشرب وناخد الدوا لكن الفقير والمريض مبيعرفش هيصوم غصب عنه لغاية امتى

*المركز الطبي العالمي اللي دخله مبارك المركز ده في طريقي وانا رايحة مطار القاهرة ووانا راجعه من مطار القاهرة ومكنتش عارفه هو اسمه عالمي ليه؟ لكن والد صحبتي قاللي ان المركز الطبي العالمي ده واحد صاحبه عمل حادثه عالطريق ده ودخل المركز ده وقعد فيه ساعتين ف لقى الفاتورة كام؟ 10 الاف دولار يعني المركز عالمي علشان الحساب فيه بالدولار العناية الطبية فيه بيقولو كويسه لكن للي معاه فلوس وصاحب ابو صحبتي ده طبعا باع اللي وراه واللي قدامه علشان يدفع فاتورة المركز الطبي ومرة تانيه وانا ماشيه على الطريق ده كان في حادثة وسواق الميكروباص كان متبهدل وطبعا الطريق كان مقفول بسبب الحادثة ودخلوا المركز الطبي العالمي ده ومش فاكرة طلعوا بسواق الميكروباص ده تاني ولا لأ بس اللي فاكراه اني اشفقت عليه وكل لما بشوف المركز ده كنت بتوجس خيفة لكن عمري ما تخيلت ان المخلوع يتعالج فيه وشهداء الثورة ميلاقوش أي رعاية.

*متابعة مسلسل رجل من هذا الزمان دكتور علي مصطفى مشرفة وكنت منتظرة جدا اني اشوفه

من زمان وبابا وماما بيكلموني عن مشرفة لأنه عالم دمياطي وليه تمثال ومدرسة بإسمه في دمياط لكن لما شوفت المسلسل اتعرفت عليه اكتر وعجبتني شخصيته جدا عالم وموسيقي بيعزف وبيغني هما دول الدمايطة بالرغم ان المسلسل فيه اخطاء كتير في التسلسل التاريخي وكمان اللغة ساعات بيقلبوا على اميريكن انجليش ومش بس كده كمان فرانكو يبقوا بيتكلموا انجليش وفجأه تلاقي كلمة عربي نطت في النص او كلمتين ودي حركة بتضايقني جدا ده غير كام شخصية ملهومش في الانجليزي اصلا بيخرفوا كتير في النطق زي ام ليز والسكرتيرة بتاعة كلية الأداب في انجلترا كانت في الطراوة برضه ده انا بضحك ضوحك عالناس دي يعني ابسط حاجه مش عارفين تنطقوا روحوا خدو كورس عالسريع قبل المسلسل او حتى المنتج ممكن يجيب اجانب بحق وحقيقي علشان جودة المسلسل لأن المفروض انه مسلسل تاريخي مش بس دراما يعني شوفت لقطة في مسلسل اسمه انا القدس وكانوا الممثلين بريطانيين طبعا فرق شاسع بينهم وبين الممثلين في مسلسل مشرفه اما البطل فأدى دور مشرفه ببراعه لدرجة انه بيقنعني ان هو د. علي مصطفى مشرفه فعلا وكمان نطقه بالانجليش والعربي هايل

اللي لاحظته ان مشرفه طلع ودرس على حسابه علشان ياخد الدكتوراه التانيه دكتوراه العلوم :) ده ايام الملك

اما دلوقتي فأنا لغاية دلوقتي مش عارفة اروح انجلترا زيارة مش دراسه :)

*مصر انضمت ل اللستة اللي بيدعوا ليها في صلاة التراويح

اول يوم في صلاة التراويح اول يوم رمضان اتفاجئت ان الامام بيدعي لحقن دماء المسلمين في ليبيا وتونس ومصر وسوريا والعراق وفلسطين وهي دي العروبة والوحدة العربية :) طبعا انا بكتب الكلام ده عادي لكن يوميها اضايقت جدااااااااا وفضلت مضايقة كام يوم خصوصا لما سلمت على اللي كانت بتصلي جنبي وقالتلي انتي مصرية؟ قولتلها ايوة وفي سري : ايوة من البلد اللي كانوا بيدعولها من شوية اللي يراجع تاريخ مصر هيعرف ان عمرها ما استقرت وارتاحت

* بالرغم اني مش بحب كوكا كولا لكن اعلاناتهم بجد افكارها خطيرة

* ربنا مبيحرمنيش من حاجة في معرض كتاب في مصر وبرضه في معرض كتب ومراجع أجنبية هنا :)

المشكلة دلوقتي هرجع بكل الكتب دي مصر ازاي؟ سؤال يطرح نفسه

بحلم على أدي

2011-07-21T01:15:00.004+02:00

*إذاعة سلطنة عمان من القاهرة هكذا أتوقع ان اسمعها كل مرة يقولها المذيع في الراديو ومرتين قال اذاعة سلطنة عمان من القاهرة بجد :)

*" من غربتك في ديار أهلك وغربتك في بلاد الله" امتى الزمان يبدل الغربة؟

رمضان ذكريات لن يأتي مثلها وأحلام لم تتحقق بعد ولن أمل منها أبدا .

يا هناه يا هناه اللي يتعلم عندنا في كلية الأداب جامعة المنصورة فرع دمياط 2010

ان لم تخطط للغد فلن تصعد للسماء التاسعة من السعادة عندما تحقق أحلامك وتذكر أن هناك دائما خطط بديلة لتحقيق الأحلام العظيمة

الكرامة شيء وهمي لازلت أؤمن به بالرغم من أن كثيرين لم يتعرفوا عليها في حياتهم

كلما أتقدم في العمر أدرك أهمية طفولتي أكثر

اسكندرية هي النداهة اللي بتندهك حتى وانت بعيد أما القاهرة فهي الساحرة الشريرة :)

* أوائل الثانوية العامة بكرة تندم يا جميــــــــــــــــــــــــــــل

يا بكرة لسه شايفه فيك أمل

-----------------------------------------------

ملحوظة : يخربيت القوانين الهبلة والتطفيش

ملحوظة تانيه : جالي كتاب صغير في الأدب الأمريكي هديــــــــــة النهاردة ومعاه اهداء :) أنا سعيدة

ملحوظة تالتة : لغاية النهاردة شهادة الليسانس الأصلية اللي المفروض أعلقها عالحيطة لسه مطلعتش بعد سنة كاملة من التخرج ومش هقول غير حسبي الله ونعم الوكيل قربت أعمل دراسات عليا وشهادة الليسانس لسه مؤقته

اسمك ايه؟ تفااااااااااااهه

2011-06-28T20:13:00.003+02:00

تعليمنا أحسن تعليم وصحتنا في أحسن حال وأكلنا من صنع ايدينا وبنمشي في الشوارع بإطمئنان

وبرغم ان التعليم مش مجاني الا ان اللي عايز يتعلم ممكن يلاقي شغل بسهولة ويشتغل علشان يبقى معاه مصاريف الجامعة وبعدين يقدر يدخل الجامعة اللي يحبها في الوقت اللي يحبه ويدرس ويبدع ويعمر الأرض في المجال اللي يحبه

اقتصادنا عال العال وكل شاب يقدر يفتح بيت في الوقت اللي يحبه يشتغل سنة او سنتين بالكتير فيقدر يوفر احسن شقة ويعمل احسن فرح وكمان يقضي شهر العسل في المكان اللي يختاره هو وعروسته

الناس بتحب بعض ومحدش فاضي يتكلم عن حد

كل مصري بيقرأ عالأقل 6 كتب في السنة والمصريين بيتطلبوا بالإسم في كل بلاد العالم علشانهم مبدعين

الديموقراطية عندنا حاجة طبيعية والكاتب مهنته عظيمه ومفيش ولا دار نشر بتستغله بالعكس بيعملوا عروض رائعة علشان يجذبوا بيها الكتاب

عندنا فن راقي في كل مجالات الفنون لما كل الناس بيشوفوه بيعرفوا اد ايه احنا عظماء

كل واحد مهتم بنفسه وازاي يطور نفسه ويحسن حياته ومفيش ولا حد بيأسفن في زمايله في الشغل ولا حد بيتدخل في شئون حد ويجرحه ويحسسه بالعجز ولا حد بيقول أسئلة من نوعية جبتي كام في الثانوية العامة؟

هاااااا هنحضر خطوبتك امتى؟

حددتوا فرحكو امتى؟ مش أن الأوان بقى انكو تجيبوا اول بيبي؟ طيب مش هتجيبي أخ أو أخت لأبنك او بنتك؟

.................. الخ طبعا ده مبيحصلش في مصر خالص

وكمان من اول يوم المخلوع اتحاكم ورموز الفساد ظهرت صورهم في كل مكان وهما في السجن وبيتحاكموا

والضباط والقناصة والبلطجية أخدوا أحكام مشددة وقلوب امهات الشهداء فرحت ان اللي قتل ابنها وضناها اتحاكم وأخد عقابه وإعلامنا أحلى من أي اعلام في الدنيا

ولذلك ولأجل كل ما سبق وأكثر ف احنا فاضيين بقى ومعندناش مشاكل وحياتنا بمبي بمبي بمبيييي

فلما نلاقي صور في النت لميكي وميني لابسين لبس ملوش علاقة بالإسلام أصلا

وأقصد بالإسلام الوسطية واللي فاكر ان ده الزي الرسمي للإسلام غلطان أوي لأن الرسول صلى الله عليه وسلم لبس كل الملابس وكمان الحجاب ملوش شكل ولا لون محدد لكن ليه صفات انه لا يصف ولا يشف

ولما واحد متخلف يقول هو المنقبات دول فاكرين نفسهم حلوين يعني كلام كتير تهزيء في المنقبات

ويقول من بين كل 10 تلاقي واحدة حلوة تستاهل تتنقب فعلا وانت ماااااااااااال اهلك هي شايفه نفسها حلوة

المهم اننا نشوف الكلام ده ونسكت عادي وملاقيش حملات عالمدونات ضد عدم توفيق عكاشة

لكن لما نجيب ساويرس يعيد نشر صورة زي دي منشورة اصلا عالنت يبقى عمل ذنوب الجبال وأخطأ الخطأ الذي لا يغتفر

واعتذر مرتين مرة عالتويتر ومرة عالفيس ولقيته كاتب نفس الكلام اللي انا فكرت فيه انه بيحترم الإسلام

وان اكتر من 95 % من الموظفين في شركاته مسلمين لكن ازاي لن نقبل الاعتذار دي اهانة ده بيسخر من المسلمين ولازمن وحتما ولابد نقاطع منتجاته ومش كده وبس كمان نبعتله أبو رجل مسلوووووخة

ولما يعتذر يبقى يلا يا شبااااب همتكو معانا المقاطعة جابت نتيجة يلا نقاطعه اكتر وده من باب ان لو حد غلط فيك اوعى تصالحه علشانه اعتذر لأنه محتاجلك ولأنك احسن منه ده ايه المنطق ده !!!!!!! منطق صنع في مصر

كل ده مش علشان صورة لأن حملة مش بفلوسنا يا ساويرس من زماااااااان اوي مش من النهاردة بس ومكنتش عارفه سببها لكن عرفت دلوقتي ان في حاجة اسمها حزب المصريين الأحرار وفي سياسة دخلوها في الدين وحاجات كده عملت كوكتيل معفن عمل تربنتينه في مخ الناس

أغلب الشعب للأسف جاهل وفاضي ومريض نفسيا وبيضحك عليه بالدين زي ما البريطانيين قالوا علينا في كتبهم

ان احنا شعوب نقبل نتمرمط لكن منقبلش ان ديننا حد يمسه وفي نفس ذات الوقت بننصر ديننا بإننا نتكلم أو نغني او نهاجم أشخاص لكن نبني ونعمر لأ نعمل حاجة تبين ان ديننا دين العالمين ودين التسامح ودين متصل بكل الأديان لأ نعمل حاجة تفيد الإنسانية لأ كل حاجة ايجابية اختصرناها في شوية هجوم على ناس وعمل المشانق لبعضنا ومن بعيد عمالين يتفرجوا علينا ويقولوا شوفوا العالم التالت بيعمل في بعضه ايه شوفو الناس اللي عالة على الدنيا وبيستوردوا كل حاجة من عندنا من أول المنتجات المختلفة لغاية العلم لغاية الخيابة لكن كويس انهم مبياخدوش حاجة كويسة من عندنا

المسلم من سلم المسلمون من لسانه ويده والدين مش للتربح زي مابيحصل فى قنوات اللى مسمين نفسهم قنوات دينية أبعت مليون رسالة لآ يا ساويرس يا ترى مين هيكسب من وراء الرسائل دي؟!!

ويا ترى حد عارف اصلا فودافون واتصالات ملك مين !!! ولا علشان مبيظهروش في التلفزيون ومحدش عارف هما مين ولا بيعملوا ايه يبقى خلاص طالما مبيتكلموش هما كده كويسين وبيشربوا اللبن قبل ما يناموا ونشتري خطوط تليفوناتهم وعجبي .

فتاة الرامن

2011-06-21T00:24:00.004+02:00

عادة لما بشوف أفلام مبحبش أكتب عنها يعني مثلا السنة اللي فاتت شفت حوالي 100 فيلم لكن مفيش الا فيلمين بس هما اللي كتبت عنهم انما لما شوفت الفيلم ده مقدرتش غير اني اكتب عنه رجع لي تاني بهجة الكتابة بعدما كنت نسيتها في زحمة الحياة .
أولا : يعني ايه رامن؟ يعني نودلز أو ممكن نستعين بالقاموس المصري ونقول اندومي لأن في ناس مش بيسموه نودلز و بيسموه اندومي اللي هو شبه المكرونة الإسباجيتي بس على الطريقة اليابانية

الشخصيات الأساسية للفيلم

1- فتاة الرامن : بنوتة امريكية شقراء دخلت الجامعة وخرجت منها زي كتير مننا مش عارفه هتعمل بشهادتها ايه ولا ايه الهدف من اللي هي بتعمله في حياتها ولا هي عايزة ايه وكمان بتسافر بلد تانيه " اليابان "غير بلدها
وفجأه حياتها كلها بتتغير لما بتحدد هي عايزة ايه

2- الشيف اللي بيطبخ الرامن : شخص كبير في السن ، حاد الطباع ، مفيش حد من اللي حواليه بيتحمله وفهمت مؤخرا ان الشخصيات اللي زي دي بتبقى بتعاني داخليا وبتبني حواليها جسر من الصرامة وقلة الذوق والرخامة علشان ميبينوش انهم ضعفاء جدا من جوه وعندهم مشاكل كتير .

3- زوجة الشيف اللي بيطبخ الرامن : عسولة عسولة عسولة عندهم حق يستوردوا زوجات من اليابان مش من الصين :) بالرغم ان عدد المشاهد بتاعتها مش كتير الا اني بعتبرها بطلة أساسية في الفيلم بهدوئها وحنيتها وتفهمها واحتوائها ومرحها كمان كل ده حببني في الشخصية بجد

الشخصيات اللي مش أساسية

الحبيب الندل : أمريكي بالرغم انه ظهر في مشاهد قليلة جدا في أول الفيلم الا انه هو السبب ان فتاة الرامن تسيب أمريكا وتروح تعيش معاه في طوكيو في اليابان على أساس انه يستاهل التضحية الفظيعة دي وان الحب مقطع بعضه بينهم وإذ فأجة بيسيبها وبيمشي لانها بتفرض نفسها عليه وده بيتضح لما بتسيب له رسائل صوتيه كتييييير عالموبايل حوالي 100 مرة وبتترجاه انه يكلمها وهو تيييييييييييييت ونفض لها
أنا بكره التصرف ده جدا من البنااااااات طالما كده كده هيبقى في فراق فبلاش تخسر الحب والكرامة كمان .

الأسرة السعيدة اللي بتيجي تاكل الرامن : سيدتين كبار في السن ومعاهم شاب ومعاهم كمان شابه بس مظهرتش كتير – دمهم خفيف- :)

الحبيب الوفي : ياباني طموح بيكره السجن في وظيفه بيكرهها مفروض عليه الحياة الروتينية ، أنيق ، وسيم
متحضر وبيعرف يتكلم انجليزي :) وفي ودي احسن حاجه فيه واتمرد على وضعه الحالي وعمل اللي بيحبه رجع للموسيقى وكمان رجع لحبيبته

الأحداث من وجهة نظري :-

تبقى الحياة – ملهاش معنى- الى أن نجد هدف وأول لما نلاقي هدف بتتغير حياتنا تماما بيبقى كل تركيزنا على تحقيق الهدف ده وتحقيق الأحلام والأهداف مش حاجة سهلة أبدا أبدا وكمان أبدا
لسه فاكرة دكتورة في كليتنا الموقرة قالت لنا : " اتمرمطوا زي ما احنا اتمرمطنا " :) قالتها بعصبية وبحقد دفين لكن للأسف كلمتها دي بيفهمها اللي اتخرج من الكلية وبدأ يبص للحياة فعلا
رامن جيرل لقت حلمها بعدما حبيبها "الندل" اتخلى عنها وده رمز لأن النهايات الغير جيدة بيبقى بعدها بدايات جيدة لو احنا عايزين نبتدي ولو مستسلمناش
رامن جيرل كمان تخلصت من وظيفتها اللي كانت بتكرهها وراحت لوظيفة تانيه في الاول كانت حاسة بالخجل انها تقول لأصحابها عليها وده كمان رمز للحاجات اللي بتقيدنا في حياتنا وممكن نستمر فيها فترة كبيرة واحنا كارهينها او مش حبينها وبنستمر بس علشان الأمان أيا كان بقى أمان اجتماعي او عاطفي او نفسي او مادي ...... الخ مع اننا لو غيرنا الحاجات اللي مش بنحبها بحاجات بنحبها ممكن نكسب كتير اوي عالأقل هنحس اننا فوق السحاب لما حلمنا يتحقق .
صاحب المطعم فنان بجد بيطبخ بقلبه وروحه وعواطفه وأنا سعيدة لأني بتبع نفس فلسفته في الطبخ بحط كل مشاعري في الطبخة اللي بعملها وحقيقة علمية أن الطاقة بتتغير بحاجات كتير جدا وممكن جدا تتنقل من اللي بيطبخ للأكل اللي بيطبخه وطبعا الطاقة العالية معروف انها بتبقى عاليه مع الكلام الطيب الإيجابي
وبتبقى سيئة جدا مع الكلام المحبط والسيء
انا كمان سعيدة لأني مطلعتش جايه من الفضاء الخارجي وطلع فعلا ان تفكيري صح في موضوع الطبخ بالروح وان الطهي فعل للحب .
كمان صاحب المطعم قاسي وعصبي وده حال أغلب اللي عندهم عملهم الخاص في منهم اللي بيبقى قاسي كده وفاكر انه كل ما يضغط على الانسان اللي بيعلمه فالانسان ده هيتعلم اكتر وفي اللي بيحبوا يستغلوا الانسان اللي معاهم أسوأ استغلال وبالرغم ان الجانب التاني من طيبته مكنش بيظهر للرامن جيرل لكن هي استحملت كل سخافاته لغاية لما وصلت لحلمها وكمان ورثت المطعم منه .

مشاهد كتير عجبتني في الفيلم طبعا فيلم ساعتين محتاجة اكتب عنه اكتر من كده بس علشان اختصر
عجبني مشهد الجروب اللي أكلوا النودلز وبعدها فضلوا يعيطوا لأن مشاعر الرامن جيرل اتنقلت لهم
ولما زوجة صاحب المطعم فضلت تضحك وضحكتني لأن الجروب كان شكلهم يضحك وتعليقاتهم كمان تضحك .

عجبني مشهد ام صاحب المطعم لما قالت للبنوتة الرامن جيرل طبخك مفيهوش روح
ولأن مفيش تواصل باللغة فكانت بتعبر لها بلغة الاشارة اللغة اللي كل البشر يعرفوها وبيفهموها ووقتها ضوء الشمس انعكس على وش البنوتة لأنها فهمت معنى يعني ايه كل أكل تعمله يبقى فيه روح .

عجبني كمان المشاهد اللي بتوضح الثقافة اليابانية وأد ايه هما ليهم تقاليدهم العريقة اللي بيحترموها جدا وبيحافظوا عليها

وكمان عجبني ان الرامن جيرل كانت عايزة تتعلم تطبخ الرامن علشان تسعد الناس وتتعلم حاجة بتحبها

عجبني كمان موضوع التواصل مع ناس مش عارفين لغة بعض لأن دي من اكتر الحاجات اللي بترعب اللي بيدرسوا لغات انهم ميكونوش فاهمين اللي قدامهم وكمان عجبتني اليابان ولو مكنش موضوع الاشعاعات والمفاعل والزلازل والكلام ده كنت حطتها مع البلاد اللي عايزة ازورها :)

الفيلم عجبني جدا وتقييمه 6 من 10 لكن من وجهة نظري تقييمه 8 من 10

كله بينور

2011-06-12T13:58:00.003+02:00

# كل ما الإنسان بيعيش أكتر كل ما بيتعذب أكتر وأكتر بتيجي حاجات كده ترفعه لسابع سما أحيانا لكن بيكمل في نفس وتيرة الدوامة

# التجربة القاسية علشان تستفيد منها لازم بعدما تتوجع وتتألم تفوت أيام وأيام وكمان أيام علشان تفهم ليه حصل معاك كده وساعتها ممكن تضحك وتقول الحمد لله اني مريت بالتجربة دي

# دكتورة هالة سرحان مبقتش أوبرا وينفري مصر بقت مذيعة مصرية علشان تعجب المصريين .

# في اتصال مع خالتي قالت لنا : " الدنيا في مصر أمان لكن من كتر ما الإعلام بيقول مفيش امان أنا مش حاسة بأمان "

# مش كل حاجة بنتمناها لما بتتحقق بنفرح بيها ومش كل حاجة بتتحقق زي ما بنحلم بيها

# الشمس والقمر واللمبة والنجفة والشمعة كلهم بينوروا الحياه بس مقدروش ينوروا القلوب بالعكس القلوب زادت ظلام في عصر الكهربا والنور

# اللهم أجعله خير نفسي نقولها لما نزعل مش لما نضحك ونخاف من اللي جاي بعد الضحك

# هيقولوا عنك ضعيف لأنك مؤدب وهيقولوا عنك فاشل لأنك متفوق أكتر منهم وهيحبطوا من عزيمتك علشان متبقاش أحسن منهم وهيقولوا انك غبي لأنهم مش مستوعبين ذكائك وهيقولوا انك عمرك ما هتتقدم وهتفضل محلك سر

المصيبة انك تصدق كل ده !!!

# الحرية أعظم نعمة اذا عرفنا معناها

# تبقى الأشياء العادية عادية في حياتنا الى أن تنتهي فتصبح أشياء مميزة

كل اللي فات ده بقلمي أو بالكيبورد ممنوع الاقتباس او الاقتراب والتصوير :)

افرح ...

2011-06-04T23:03:00.005+02:00

حينما تصبح السعادة والفرحة في منتجات - ملهاش لازمة- وتسمن ولا تغني من جوع فبالتأكيد لن تجد الفرحة الحقيقية في الحياة

تذوق طعم السعادة وكل شوكولاته كادبوري

افتح كوكا كولا تفرح

والكثير الكثير من الاعلانات التي رأت ان أغلى مفقود الأن هو السعادة فقدمته للمستهلكين الكرام في صورة مشروب أو شوكولاته وياريتهم مفيدين ولكنهم يسجنوننا تحت طبقات الدهون فلا تعود لنا ملامحنا وبالطبع عزيزي القارئ يمكن أن تصبح مثل الكونغوفو باندا في أقل من أسبوعين ولكنك لن تستطيع أن تعود الغزالة الشاردة ثانية حتى ولو أردت
الخلاصة أننا جميعا نسعى وراء السعادة وهم قدموها لنا في اعلاناتهم المبهرة عن منتجاتهم الغير مبهرة بالمرة ولكن بالرغم من ذلك فإنك تشتريها وتلتمس منها الفرح والخروج عن المألوف

من ضمن الأحداث الكئيبة التي أصابتني بالإحباط هو خبر طلاق الأمير ويليم والأميرة كيت بعد 5 أسابيع من زواجهم الأسطوري الحالم الخيالي - الفوق الفظيع- وبالطبع كالكثيرين صدمني الخبر يعني اذا كان الحلم الملكي الجميل تدمر بهذا الشكل فماذا يمكن أن يحدث بعد ذلك لكل قصص الحب الجميلة التي بالتأكيد ينقصها قصة
مواقع كثيرة أكدت الخبر ومواقع أخرى نفت الخبر على أساس انها نكته وهع هع هع كنا بنهزر معاكو انتوا صدقتوا ! ولا اعلم حتى الأن ان كانت نكته فمن " الرخم" الذي أصدرها

الكثير من المصريون في الخارج ألغوا رحلات الأجازة والعودة لمصر هذا العام نظرا لأن الإعلام المتلون ينقل للمصرين بالخارج أن مصر أصبحت أفظع من العراق وأن واحد راح طلعوا بداله 10 يجلسون في مجلسهم ويصدرون اوامرهم التي تخيف الناس - ما بالنا بالسياحة-
وأنا بالرغم من كل ذلك أفكر جديا في العودة لبلدي ولكن كلام الإعلام أخيرا أثر في و " خوفني " وأذكر صور الشهداء كل يوم وأشعر انه لو قام احد منهم ورأى مصر الأن لبكى على حاله وأثر الرحيل ولكن بشكل ما أيضا يخبرني احساسي بأنه منذ متى والإعلام صادق جرائم مثل التي أراها الأن على شاشات التفزيون وأفظع كانت تتم في العهد البائد وكانوا يصورون مصر على انها شيكاغو وفي كل الحالات ف رب هنا رب هناك وهو الحافظ والحامي
ولكل شمس شروق بعد الغروب تحلى - من أغنية لكل عاشق وطن خالد سليم-

لسه مش مصدقة

2011-04-26T00:16:00.005+02:00

الجو هنا حر جدااااااا وبيتساقط علينا عرق الشعوب أما في مصر فالجو عندنا ربيع الوقت ده من السنة مش كل السنة :)
أما الجو المطير اللي بدور عليه فمش موجود حاليا الا في بلاد أنا لسه مزورتهاش وأكيد مش عارفه جوها ايه بس بسمع ان بروطانيا مثلا الجو عندهم غيوم طول السنة وأنا بحب الجو ده مع الشمس الخفيفة
المطر فين بجد كان سؤال يطرح نفسه لدرجة اني بقيت أسمع صوت المطر عاللاب وخلاص من كتر ما المطر وحشني أقربها النهاردة شغلت فيديو فيه صور المطر مع صوته ومن شوية سمعت سيلين ديون وهي بتقول

Let the rain come down and wash away my tears
Let it fill my soul and drown my fears
Let it shatter the walls for a new, new sun
A new day has...come

قولت في نفسي أدي دموعي موجودة يا سيلين فين المطر بقى :) وأنا أصلا من زمااااان مبقيتش أسهر لغاية دلوقتي لكن مش عارفة ليه صحيت لغاية دلوقتي النهاردة ومارست هواياتي لما بكون مضغوطة ومضايقة غالبا مبقتش أحب أتكلم مع حد وانا مضايقة حتى صحباتي الانتيم حتى المدونة قولت مش هكتب فيها غير عن حاجات مفرحة وحاجات جميلة وده بيفسر أنا ليه مبقتش أكتب كتير زي الأول
المهم كلمت ربنا في قارئين هيحطوا ايديهم على قلبهم ويقولوا البونيه اتجننت دي كانت طيبة طيب تعالوا لما أقربها شوية لما بنشتري أي حاجة جديدة وبعد الشر بتبوظ مش بنوديها التوكيل تتصلح علشان هما اللي صنعوها فهما اللي عارفين ايه المشكلة اللي بتعاني منها تمام كده؟ متفقين ؟ موافقة :)
طيب احنا البشر كلنا على بعضينا كده مش ربنا سبحانه وتعالى خلقنا؟ أيوة واللي يقول غير كده صعبان عليا طيب يبقى ربنا سبحانه وتعالى خلقنا ومعاه دوا أرواحنا ومفاتيح تحقيق أحلامنا وهو اللي بيرزقنا وبيوفقنا وبينجحنا وبيسعدنا طيب يبقى ليه متكلمش مع ربنا وأدعي أنا متأكده انه سامعني وفاهمني اكتر من أي حد من البشر هيطبطب عليا شوية وخلاص
الغريب كمان النهاردة ان في الحر ده مفتحتش التكييف وفتحت البلكونة الصغنونة بتاعت الأوضة بتاعتي وفجأه طلعت أخد حاجة من البلكونة واتفاجئت على اندهشت على انذهلت - من الذهول- ووقفت مكاني الدنيا بتمطر !!!!!!!!! بجد بتمطر ولسه بتمطر وأنا بكتب دلوقتي وحسيت بإن فعلا المطر غسل روحي وقلبي وخرجني من المود اللي كنت فيه ووقفت أحس بقطرات المطر وأشم رائحة المطر المخلوطة بالرمل والطين - رائحة مميزة- ومستمتعة جدا بمنظر المطر اللي أكيد هخلص البوست وأطلع أشوفه تاني ودخل المطر على البلكونة وأنا برضه لسه مش مصدقة ان في مطر في الوقت ده من السنة مطر في الصيف
هو أنا قولت اني لقيت البطاقة بتاعتي بكل اوراقها ومصروفي كمان فيها ؟ بجد الحياة دي غريبة أوي حاجات بسيطة بتفرح أوي وحاجات بسيطة بتزعل أوي
حد لسه بيقول ان احلامنا مستحيلة؟ مطر في الصيف وصورته بالكاميرا بس بلوجر الرخم مرضاش يعمل داون لود للصورة لأن حجمها كبير ولسه كمان الصبح ان شاء الله هصور وأشوف المطر عمل ايه هو حاليا ملا الشارع
أنا فرحانة :)

زمان يا حب

2011-04-16T21:23:00.002+02:00

اكتشفت أن كل ما يحركني في الحياة هو احساس واحد هو فقط " الحب" فلا أستطيع أن أفعل أي شيء في الحياة بغير حب وشغف واذا حدث وارغمت على شيء فأقوم بأدائه كلوحة باهتة الألوان أو كلحن ناقص النغمات
تصيبني لطشة حب قبل أن أنام كل يوم لطشة حب ممزوجة بالحنين لطيور بعيدة ولوجوه مبتسمة متفائلة ولطعم أعياد وفرح وألوان زاهية وكلمات معسولة صادقة من القلب
لطشة حنين للوطن الضائع في الأفق الذي يفصلني عنه مئات الأميال ولطشة حب تقربني من سمائه وبحاره وعطره الساحر الممزوج بفرحتي ودموعي وحبي وابتساماتي وتميمته التي تحيط قلبي كلما مرت على خيالي ذكراه كأنها تعويذه خرافيه وشفرة سرية لا أستطيع فك رموزها

يا مالكة القلب بإيدك ده عيد الحياه يوم عيدك

2011-04-03T16:31:00.002+02:00

"لو لو لو لو كان الأمر أمري لو كان في شيء بيدي كنت أقدر اشتريلك جزيرة ويخت فضي وذهبي "

ماما بستنى اليوم ده من السنة للسنة ومش عارفة أقول بقى كلام شبه انتي النجمة المتألقة في السماء- مع انك كده فعلا- بس هقولك انك بجد حيرتيني بقالي شهور بفكر هجيبلك ايه في عيد ميلادك وكنت خلاص استقريت عالهدية بس الخطة اتغيرت وفكرت في حاجات تانيه دايما بحتار أهديكي بإيه وانتي هداياكي ليا كل يوم جديدة ومتواصلة وكل يوم بحس بيها وبدعي انها تستمر وربنا يباركلي فيكي وفيها بحس ان أي هدية صغيرة أوي وضئيلة أوي ومبتوصلش ولو واحد في المية من احساسي بيكي وحبي ليكي

ماما انتي بجد كل احساس حلو في حياتي كل فرحة وكل ضحكة كل نور نورلي وأنا في عز الضلمة كل الحب وكل الحنية والملاك الحنين اللي بيديني الحياة والحب غير مشروط حتى لو أنا معبرتش عن حبي ليكي وكنت أنانية وسخيفة أحيانا بس أنا عايزة أقولك ان بيني وبين نفسي ضميري بيمسكني وبيديني بالبوكس في مناخيري وبياخد حقك مني من غير ما تعرفي واني عمري ما حبيت ولا هحب زيك لأن مكانك في قلبي محدش يقدر يوصل له

بفرح أوي لما بلاقي كتير بيغيروا من اننا فاهمين بعض أوي وبنحب بعض أوي ومتصحابين أوي ونادرا لما صداقتنا بتتحول لعلاقة أم وبنتها أوامر ونواهي الام اللي بتخاف عليا - زيادة عن اللزوم- من الهوى الطاير وبتقوللي لأ متعمليش كذا والمشكلة ان كلامك دائما بيطلع صح :)

في عيد ميلادك بتمنى حاجات كتير أوي أولها ان ربنا يديكي الصحة ويقويكي ويسعد قلبك وروحك وأيامك

وتاني حاجة بتمنى أني أعرف اجيبلك هدية حلوة وزي ما قولتلك كان نفسي أجيب نجمة في السما وأسميها على اسمك

وتالت حاجة ربنا يخلينا لبعض وربنا يديم علينا نعمة الحب والود والتفاهم

ورابع حاجة بتمنى الاقي البطاقة بتاعتي لأن فيها كل مصروفي وأوراقي وكارنيهات الجامعة ورخصة القيادة وكل حاجة :) لأني لو فقدت الأمل ولقيتها ضاعت بجد هدوشك بأغنية والملاحة والملاحة وحبيبتي لابسة الطوراحة شقىىىىىىىىىى عمررررررررررري :))

وأخيرا بهديكي أغنية : مبحبش حد الا انت ولا نفسي كمان يا حياتي من بعد ما حبك وحده غطى على حبي لذاتي حبك شال الأنانية خلى مكانها الحنية وصبحت بكل كياني مبحبش حد الا انت

كل سنة وانتي طيبة يا مامتي

-----------------------------------

ملحوظتين : التورتة بيضاء لأنك بتحبي اللون الأبيض والفانيليا وفي معنى في قلب الشاعر اللي هو انا لأن الأبيض بيدل على الغيرة :)

ملحوظة كمان : انا بتلكك وبحتفل بعيد ميلادي معاكي لأني معرفتش أستمتع بيه أيام الثورة

الحياة باللون الوردي والأبيض

2011-03-26T21:50:00.002+02:00

من كام يوم شوفت فستان فرح هو بالضبط فستان فرح أحلامي "الفستان أبو ديل" :) شبه الفستان اللي فوق ده بس مش أوي يعني - هو أحلى طبعا-
وطبعا بيحصل بيني وبين ماما جدال دايما طول عمري بقول لها أنا اللي هشتري فستان الفرح وماما تقوللي لأ الفستان عالعريس :) أقولها وفيها ايه لما أجيبه أنا تقوللي فال وحش طيب فال وحش ليه ؟ تقوللي هو كده المهم ان انا اصلا مش هجيبه دلوقتي علشان هيخلل في الدولاب لأن أصل 2011 العظيمة مش هتشهد حفل زفافي ولا خطوبتي واحتمال كمان 2012 واحتمال كمان 2013 :) وأهو كله في علم الغيب الله أعلم بس ساعات ربنا سبحانه وتعالى بيبعت رسائل على لسان الناس فالواحد يفهم ان الحلم الفلاني هيتأخر شوية أو لازم امشي في الخطوة الفلانية علشان أوصل للمينا اللي هتوصلني للبر التاني علشان أحقق حلمي :)
المهم أنا ليه أفتكرت الفستان
اولا أنا بحب فساتين السهرة جداااااااااا وخصوصا فساتين الفرح ولما كنت بمشي بالكتكوتة وقدامي محل فساتين فرح كنت ببص عليه وبسيب الطريق :)
ثانيا بقى وده الأهم كنت بتفرج على فوكس موفيز - حلوة موفيز دي - وكانوا بيتكلموا على أغلى ويدينج اتعمل في العالم وطبعا كان ويدينج المشاهير وتشوف بقى أرقام خيالية مليون ونص زورار ومليونين زورار وتلاتة مليون زورار :) ويا سلام بقى لما المعلق يقول وجابوا طفلهم الأول وبعدين فكروا يعملوا ويدينج بارتي لأ بجد كتر خيرهم

قعدت أتأمل شوية وصوت العقل والحكمة طلع وقاللي مش مهم الفرح يبقى غالي اوي كده المهم اني أعيش الحب وأشوفه في عيون اللي بحبه يوم فرحي أشوفه شايفني أميرة وأشوفه مش شايف غيري وسامع بس صوتي
وطلع صوت الجنان وقاللي هو حد قاللك ان اللي بيعملوا الأفراح دي ضاربين بعض بالشوزات ما هما بيحبوا بعض برضوا وكل الكلام اللي بتقوليه ده
واللي غاظني ان في فرح من أفراح المشاهير العريس جاب البدلة بتاعته ب3000 زورار-في حدود المعقول السعر ده- أما بقى العروسة الهبلة فتخيلوا جابت الفستان بكام؟ ب50000 زورار بذمتكوا في تواضع أكتر من كده :)
وفرحت ان فرحي مش هيكون فيه شوكولاته ماركة جايه من سويسرا يادوب هي كوفرتينا عالعريس:) ولا واين وشامبين جاي من فرنسا فكده هنوفر كتير:)) أوي
ويجعل أفراح المحسنين عمار وعقبال عندي وعندكوا - اللي لسه متجوزوش-.

نو... لأ.... لع

2011-03-18T22:59:00.005+02:00

>http://www.youtube.com/watch?v=7cSudpyEU9w

طبعا لأن المصريين في الخارج منسيين و محدش فاكرهم أساسا فملهومش حق في التصويت في استفتاء بكرة لكن على أي حال أنا بقول لأ للتعديلات الدستورية واللي بيقولوا لو عملنا دستور جديد هياخد سنة مش لازم نألف دستور يعني ممكن نجيب أي دستور من أوروبا والدول المتقدمة - على رأي واحد في فيلم الارهاب والكباب- ونعمل نفس القوانين مع تكييف القوانين على مصر عادي ما هو كل حاجة حوالينا بقت تقليد ومش من ابتكارنا حتى بلوجر اللي بكتب عليه دلوقتي مش احنا اللي عاملينه يبقى برضه الدستور ناخده من عندهم

http://www.youtube.com/watch?v=yhPGuITw9Mo&feature=player_embedded

كان عندي استعداد لو فتحوا باب المشاركة في الاستفتاء في السفارات كنت هروح وأقول صوتي برغم ان بيني وبين السفارة اكتر من 1000 كيلو بس للأسف مفيش في ايدي غير اني أقول رأيي " لأ" وأنا واثقة ان كل الناس المهتمين فعلا ببلدهم ومش ناسيين دم الشهداء هيروحوا ويصوتوا ويقولوا رأيهم مهما كان نعم أو لا

----------------------------------------------

من كام يوم الظهر كنت قاعدة قدام التلفزيون بالصدفة البحتة شوفت صباح دريم مع مذيعته الخنيقه دينا هي مثقفة نوعا ما بس خنيقه و اكيد مش زي خيري رمضان اللي مفيش فيه حاجه كويسه من اسمه ولا زي تمورة أمين مش عارفة الناس دي لسه في التلفزيون ازاي المفروض يسرحوا بطماطم وتين شوكي وكمان ميبقوش بيعرفوا يقطعوه علشان يشوكهم ويفضل يشوكهم في ايديهم على طووووول بجد في ناس كده مبتحسش

ما علينا نرجع لصباح دريم كان في حوار مع كاتب وبما ان الكلام عن كتاب فكان لازمن ولابندق أشوف بيتكلم عن ايه الكتاب اسمه انا من البلااااااادي وعجبني أوي بعض الحاجات في مناقشتهم للكتاب والكاتب اسمه فيليب فكري

واتكلم عن التفرقة ضد المسيحين اللي اتعرض لها لدرجة اني فصلت عن كل حاجة حواليا واندمجت جدا مع الحوار كانوا بيتكلموا عن موقف ظلم صريح حصل للكاتب هو بيحب الرسم ودخل مسابقة رسم وهو في اعدادي بعنوان فلسطين عربية وأخد فيها المركز الاول وبعد كام يوم لما راح يستلم الجائزة اتفاجئ انه بقى المركز التاني علشان اسمه "فيليب" وبيقول المفارقة ان كل اللي وقفوا جنبه وساعدوه مسلمين وزعلوا جدا من اللي حصل ده

وبعد ما سمعت القصة دي بشوية افتكرت حكاية تيبيكال حصلت لي وأهو كله ظلم

كنت في تانية ابتدائي وكنت متفوقة جدا وطالعة من مدرسة اللغات بقى وبكتب اول انجليش اول ذا تايم واتنقلت مدرسة تانية "خاصة" في عمان وطلعت الأولى عالفصل وجت حفلة المدرسة وشاركت في كل الفقرات وكنت فرحانة جدا ما أنا عارفة اني هتكرم في أخر الحفلة لأني الأولى

وهما بيعلنوا عن اسماء المتفوقين أخر الحفلة فجأة لقيت اسم مروان زميلي هو اللي بيتنده مش أنا !!!!!!!! اتفزعت وقولت ازاي انا الأولى أنا مش مروان وبعد كده عرفت ان ادارة المدرسة كان ليهم وجهة نظر في اني مبقاش الأولى عالفصل لا أنا ولا أي بنت علشان مينفعش فصل يبقى فيه بنات وأولاد وبنت اللي تطلع الأولى ومش كده وبس كمان وافدة مش عمانية ارضائا لأولياء أمور الطلاب العمانيين مع ان التفرقة دي مبتحصلش في المدارس الحكومية مش مدرسة المفروض انها خاصة يعني مستوى تاني لكن للأسف ادارة المدرسة كانت مصرية وكتير من المصريين بيحبوا المحلسة خصوصا لأي حد غير اهل بلدهم ولأصحاب البلد اللي هما عايشين وبيشتغلوا فيها وفي وقت توزيع الهدايا وشهادات التقدير في الحفلة عييطت كتير اوي وحسيت بظلم ملوش اخر وكان جنبي اطفال كتير بيعيطوا برضه كان يوم نصه مفرح ونصه صعب اوي واللي فكرني بيه كلام فيليب اما تبعات الموقف ده اني بدأت اعرف ان العلم لا يكيل بالبتنجان وأن التفوق زي عدمه وبعدما كنت ببقى الأولى بدأت أبقى من العشرة الأوائل وبعدين توهت وسط الزحام واتأكدت في الجامعة من مقولة ان تذاكر يمكن تنجح

لكن دلوقتي غيرت فكرتي التفوق حاجة تانيه غير مجرد النجاح

كمان أ- فيليب قال في الحوار ان في اماكن شغل بيكتبوا فيها المسيحيون يمتنعون نفس الكلمة بالضبط قرأت قبل كده انها كانت مكتوبة على مطعم شيك أوي في لندن بس مكتوبة بطريقة وحشة اوي العرب والكلاب يمتنعون !!!!!!

بإختصار اللي بيفرق بين انسان والتاني على اساس لونه أو جنسه او بلده أو دينه او عرقه أو نسبه أو أي حاجة في الدنيا يبقى مريض ومحتاج يتعالج اذا كان ديننا علمنا نحترم اللي معندوش دين أصلا ولا يعرف اله يبقى الاولى نحترم أي حد عارف ان في اله وبيعبده وفي قصة بفتكرها دائما : "عن النبي ابراهيم انه كان لا يأكل لوحده وفي يوم من الأيام جاء وقت الغداء ولم يدخل احد الى بيت سيدنا ابراهيم وانتظر الى ان برد الاكل . فخرج سيدنا ابراهيم يبحث في الشوارع ليرى احد جائع ليأكل معه فرأى رجل وأتى به الى البيت فقال له سيدنا ابراهيم : سمي بالله وكل فقال الرجل : ما هذا الله؟ فغضب سيدنا ابراهيم و قال له الله هو ربي وربك فقال الرجل : هو ربك ولا اسمي فقال له سيدنا إبراهيم ان لم تسمي فلن تأكل فقال الرجل لا أريد أن أكل فخرج من بيت الخليل , فحزن سيدنا إبراهيم على الرجل لأنه خرج جوعان ..فهبط الوحي على سيدنا إبراهيم وقال له : الله يقول لك حملت عبدي منذ خلق والى أن يموت وهو كافر ..وأنت لم تستطيع أن تتحمله بعض الوقت الى أن يأكل وخرج جائعا .وأين ضيافتك

فخرج سيدنا إبراهيم يبحث عنه الى أن وجده فقال الرجل ماذا تريد مني ألم تطردني فقال له سيدنا إبراهيم : ربي عاتبني بشأنك لأنك خرجت من بيتي من دون أكل .فقال الرجل إن رجعت لا اسمي فقال له لا تسمي المهم أن تأكل قبل أن تمشي فوصلا الى البيت ..فسمى الرجل بالله وأسلم وكانت فرحة سيدنا إبراهيم كبيرة"

مفيش حاجة اسمها فتنة في حاجة اسمها ناس مبيفهموش ودماغهم صغيرة

اللي مصبرني

2011-03-05T09:16:00.007+02:00

الدفا والمودة والحب والإبتسامة الصافية اللي من القلب بص في وش أي حد في أي مكان في الشارع أو في الهايبر أو حتى في الكلية أو في الشغل ده لو أصلا لقيت شغل هتلاقي كل ده تلاشى لا في دفا ولا مودة ولا حب ولا ابتسامة صافية
زمان أيام الجامعة كنت بدرس حاجات وفهمتها أوي بعد ما خلصت كلية مصطلح الإغراق في المادية
materialism المادية اللي كل البشر غرقانين فيها ونسيوا حاجات كتيرة جدا حلوة وطحنوا نفسهم بنفسهم في مطحنة الحياة
والموضوع ده لكل البشر وبيلخص المعنى ده أغنية money money money by ABBA band وبيلخص ده وجوه الناس وحقدهم وحسدهم للإنسان اللي بيتمتع برزق وافر ده غير كمان انقطاع الاتصال بين الناس ومتأكده ان كل واحد فينا بيحصله كده
يبقى مهتم بموضوع وفجأه يلاقي اللي بيتكلم معاه مش معاه أو بيكلمه في موضوع تاني كل ده من سمات العصر الحديث اللي اتعرفت عليها في كتب الكلية واتعرفت عليها بجد لما اتخرجت من الكلية وفعلا أغلب الكلام اللي درسته طلع صح
ده غير كمان شعور عدم الأمان اللي مسيطر على الجميع بلا استثناء الغني خايف لا يخسر فلوسه والفقير خايف على رزقه والغريب أن كل خوف البشر من ناحية الرزق وطبعا الرزق مش بس فلوس لأ الرزق صحة وراحة بال ووقت وزوج أو زوجة صالحين وأطفال وصحبة طيبة وحاجات تانية كتير بس مفيش ناس كتير فاهمين كده
كمان انعدام الأمان وهتكلم عن نفسي أنا خلاص مبقتش حاسة بالأمان مش على النطاق العائلي لكن على النطاق العربي كل البلاد العربية بقى فيها دوشة بما فيها البلد اللي انا فيها مع انهم يعتبروا مرفهين بالنسبة للمعيشة في مصر وكفاية ان الباحثين عن عمل من العمانيين ليهم مصروف شهري ما يعادل 2000 جنيه ياللي بتطالبوا بأدنى حد للأجور 1200 جنيه وكمان السكن متوفر ليهم وموقفين عربياتهم الأحدث موديل زي اللاند كروزور والهامر والتويوتا بأنواعها والنيسان وبرضه عاملين اعتصامات وأهو تقليد أعمى وخلاص
ومع ان الوضع هادي بس أنا برضه مش حاسة بالأمان وبرضه الوضع في مصر ميشجعش عالرجوع لأن برضه في مصر مفيش أمان عالأقل حاليا
مصر وحشتني جدا ومش مصر كلها لكن الحاجات اللي بحبها في مصر وأهمهم -الكتكوتة- والأشخاص كمان اللي بحبهم في مصر لكن ما باليد حيلة هنزل مصر مش هعرف ابدأ دراسة في حاجة مفيدة ولا هعرف ألاقي شغل
اللي مصبرني ومهون عليا اني مش في بلدي اني مع اهلي وكمان التسوق او الshopping وده بيبقى أسعد وقت في حياتي والصورة اللي فوق بعدسة الكاميرا بتاعتي لأكبر هايبر في صلالة اسمه اللولو وفتح الأسبوع اللي فات
غير كده النهاردة زي بكرة زي بعده والناس بيزيدوا بعد عن بعض والرأسماليين بيزيدوا الفقراء فقر أكتر يمكن أكون محبطة ويمكن أكون بفكر بواقعية بس في كل الحالات أنا عايشة بالأمل وأحلامي الحمد لله بتتحقق
هي صحيح بتتحقق ببطء أوووووووووي وكأنها بيبي لسه متعلم يحبي بس المهم انها بتتحقق والمهم نتعلم نحلم ونمشي ورى أحلامنا

http://www.youtube.com/watch?v=t4scdbs8thQ&feature=related

ايه الغباء ده؟

2011-02-23T20:25:00.005+02:00

مش عارفة مين الغبي تحديدا في شركة الإتصالات هنا اللي فصل عليا النت وأنا بشوف الفيديو ده عاليوتيوب

http://www.youtube.com/watch?v=D_olIAALNuc&feature=related
ودي مش أول مرة النت يفصل وأنا عاليوتيوب بشوف النوعية دي من الفيديوهات
بس كويس رب ضارة خير ان شاء الله انا مكنتش ناوية أعلق عالخطاب الأهبل الأخير بتاع الرز المعمر لكن بعدما شوفت الفيديو ده حسيت اني عايزة أقول تيييييييييييييييييييييييييييييييييت والإحساس ده مش بيجيلي كتير الا لما أشوف غباء بس أنا مؤدبة ومش هقول تيت عالنت هقول في سري بس وربنا عالظالم والمفتري
بيقولها في الفيديو انتي ليبية ولا من مصر يعني ايه؟ حد يفهمني قصده ايه ؟يمكن أكون فهمت غلط وبعدين أنا طول عمري مقتنعة ان اللبس حرية شخصية اللي ماشية بالبيكيني زي اللي ماشية بالنقاب مش من حق أي حد يعترض حريتهم بتغاظ أوي من الحركة دي طيب من حقك تعرف هوية اللي بتكلمك جيب أي واحدة تشوف وشها في مكان مقفول وبعدين تقولك انها فعلا واحدة وان دي فلانة بنت فلان مش هو اللي يكشف وشها وهو عارف كويس اوي ان بلده نظام قبائل وعيب أوي ان واحدة تكشف وشها قدام أي راجل غريب مش العدد المهول ده من الرجالة :(
أما عن الخطاب فمش هعلق عليه هسيب الزمن هو اللي يحكم بعد كده ع الكلام اللي اتقال في خطاب امبارح
ربنا معاهم

أما عن مصر فالحياة ماشية ببطء أوي بالمناسبة حد فرحان ان الصاوي بقى وزير السخافة وشالو ألدو جابوا شاهين والاتنين أكيد مش نافعين مع كل التقدير للصاوي على الساقية بس ميستحقش الوزارة

ايه الكلام ده؟!!!!

2011-02-21T12:23:00.003+02:00

نوارة نجم ومدونتها الجميلة اللي كانت بتنقل لنا حاجات كتير بتحصل من أول الثورة وقبلها كمان عن جريدة الدستور طبعا نوارة أسلوبها جميل جدا في الكتابة ده غير ثقافتها وانها من بيت كله مثقفين وأنا بحترم كل ده وأنا من قرائها لكن امبارح قرأت حاجة عندها في المدونة
طبعا لأني مش بشك في مصداقيتها صدقته في البداية لكن فكرت فيه كتير جدا وكان أخر حاجة أقرأها قبل ما أنام وطبعا مكلمكوش عن الكوابيس كانت عاملة معايا ازاي

http://tahyyes.blogspot.com/2011/02/blog-post_6266.html الكلام اللي انا مقتبساه كان في البوست ده

"في البحرين بيدخلوا الجرحى التلاجات وهم لسه احياء وفيه دكاترة سمعوا صوت انين طالع من التلاجات" اسمحيلي يا نوارة الكلام ده هبل في الجبل أولا فين مصدر الكلام ده في البوست ثانيا انا عارفة انك مثقفة جدا لكن تعرفي حاجة عن تاريخ البحرين أو زورتيها قبل كده؟ علشان تقولي الكلام ده مين دول اللي هيدخلوا الجرحى تلاجات الموتى وهما أحياء ليه هما فين في بلاد الواق الواق ولا ايه بحرين ايه اللي بتعمل كده في شعبها
البحرين أقدم حضارة في التاريخ كله طبعا مكنش اسمها البحرين لكن المنطقة دي فيها أقدم حضارة في الخليج كله والبلد متطورة وغنية
واحنا اكيد مع البحرين واليمن وليبيا وخصوصا ليبيا لأن الأخبار بتقول ان الوضع بيتصاعد في ليبيا بطريقة سريعة جدا وفي شهداء عندهم بس أرجوكوا في الزحمة كده محدش ينسى أن مصر كمان عدت أول خطوة ولسه خطوات كتير لغاية لما ترجع تاني قوية زي ما هي طول عمرها وهتفضل كمان قوية دايما